【京都第一西京燒香港店 鮮味海膽新菜重磅登場】京都一の傳

擁有92年歷史、被譽為「日本京都第一西京燒」嘅京都一の傳,尖沙咀首間海外分店最近推出一系列海膽菜式,無論冷熱盤、前菜定主食都俾你鮮味滿分嘅滋味!

店內裝潢由日本師傅監修,內外都呈現日本特色,入到嚟好似打開如意門去咗日本咁。

呢度首創嘅燒海膽年糕(HKD88)結合日本街頭小食燒年糕嘅做方,再選用新瀉縣糯米製成嘅年糕,特別有米香同軟糯煙韌。年糕搽上調配過嘅濃醬油反覆燒烤至微微焦香,然後放上鮮甜北海道海膽,鹹甜香熱嘅層次好豐富!

海膽高湯啫喱(HKD178)係冷盤菜式,以日本溫室種植南瓜蓉做底,再放上加入蝦湯嘅海膽高湯啫喱,然後以北海道海膽同大大粒嘅青森縣三文魚籽相間鋪成花形。每啖都好似濃縮咗海鮮嘅甜,而且蝦味都好突出,加上紫蘇花獨特嘅香氣,令口腔包含多種而融合嘅味道!

海膽小船壽司(HKD258)有別於一般壽司,整排北海道海膽會分碟奉上,由食客享用時自己將海膽鋪上飯面。建議大家連埋紫蘇葉一齊食,清香嘅感覺令你冇咁膩㗎。

海膽出汁豚肉涮涮鍋(HKD398)嘅出汁(湯底)即係指用昆布加鰹魚製作嘅日式高湯,再加入北海道海膽製成製成黃金色嘅海膽出汁。配上爽口日本豚腩片同9款素菜配料夠晒豐富呀!

最後作結可以追加海膽雜炊飯(HKD48)蛋汁將湯底嘅精華一滴不漏咁鎖緊喺飯粒上,再將30g海膽鋪喺飯面,咁就由頭到尾都俾海贍包圍啦。

 

京都一の傳
地址:尖沙咀廣東道3-27號海港城海洋中心4樓402號舖
電話:3101 4981 / 3101 498
營業時間:星期一至日:11:30-22:30
(餐廳會因應疫情調整營業時間)

You may also like...

Leave a Reply

Your email address will not be published. Required fields are marked *