【三層樓新店歎「家」味意菜 打卡新點嚐清新原味】Casa Cucina & Bar

想食住家意菜有咩新選擇?一定要試西營盤嘅Casa Cucina & Bar呀!「Casa」有家嘅意思,而行政總廚兼餐廳老闆Anthony更加將獨立三層樓嘅餐廳以威尼斯傳統意大利住屋為設計藍本,為大家提供舒適而空氣流通嘅用餐環境。Anthony 本身係會計師,但鍾意煮嘢食嘅佢後嚟毅然去美國紐約The International Culinary Center學廚,以實習生身份喺短短三個月就調到去紐約米芝蓮兩星餐廳Jean-Georges實習,仲跟從星級法國大廚Jean-Georges Vongerichten學習添。2016年返到香港就加入香港置地文華東方酒店、米芝連兩星法式餐廳Amber,喺廚藝總監Richard Ekkebus領導下累積近4年烹飪技術。依家自己開餐廳,感受到佢以法式嘅精美擺盤襯托意菜原味道嘅清新感,無論前菜、主菜、甜品同飲品都處處有驚喜㗎。

日夜嘅門面都俾人寫意嘅感覺,餐廳外牆同部分內牆用上惹人注目嘅珊瑚橘色同夢幻優雅嘅淡粉紅,配襯石紋地板、鑲木地板、實木樓梯同磚牆,加下幻彩嘅燈光格外有情調。

地面呢層營造出「前院」嘅氛圍,chill啲飲杯嘢都得。

二樓就好似客廳咁,其中一邊可以望住廚師大顯身手。

三樓private 少少,兩邊各有大長枱營造飯之廳嘅感覺。三層都有各自嘅格調,又唔會俾人貴格嘅拘謹,可見呢個「家」嘅主人有獨到嘅品味。

帶子薄片SCALLOP CARPACCIO(HKD108)用上鮮甜爽口嘅北海道帶子,薄切後配上清新開胃嘅菠蘿、柚子、橄欖油、豆蔻等調味,以龍鬚菜作點綴,清爽而涼浸浸,啱晒夏天做開胃菜。

小食拼盤CICCHETTI PLATTER (HKD188)有3款小食,其中蕃茄麵包Bruschetta係意大利中部嘅輕食之一,喺烤熱而香脆嘅西班牙CRYSTAL BREAD麵包塗上蕃茄汁同蒜油等簡單調味。而新鮮水牛芝士佐以Datterino蕃茄,口感柔軟香滑,味道清新。配埋傳統小食風乾Bresaola火腿配新鮮火箭菜卷,當中嘅Grana Padano芝士油醋令火腿嘅鹹香味更突出。

意式煮鱈魚COD ACQUA PAZZA (HKD248)選用黑鱈魚柳,有別於傳統意式食譜中用整條魚烹煮。黑鱈魚煎至外皮香脆,配抬用新鮮Datterino蕃茄、新鮮蜆同黑橄欖等煮成嘅蕃茄汁再煮約3分鐘;將麵包蘸醬汁享用仲可以一味二食添。

呢度嘅意大利飯都各具特色!蘑菇燴飯 MUSHROOM RISOTTO (HKD150)先將菠菜打成蓉加入意大利飯,再放上香草、煎香嘅靈芝菇、芝士同埋經焦化牛油煮成嘅蘑菇泡沫,撈勻一齊食令菇味突出又清爽香甜,而且幾有咬口添。

慢煮鮮魷釀蟹肉海膽米意粉 STUFFED CALAMARI (HKD188)就將Puntalette米意粉煮至半熟,加入蟹箝肉、日本海膽忌廉、西芹再釀入鮮魷;鮮魷以70度慢煮約45分鐘後略燒,淋埋經牛油、鮮魷墨汁及港式魷魚乾煮成嘅特製墨汁醬,味道鮮得嚟會偏清,想再濃味同突出啲就一定要唧檸檬汁喇。

Anthony仲自製手工意粉,其中牛尾意大利雲吞 OXTAIL RAVIOLI (HKD188)先將牛尾慢煮約5至6小時,再用自家手工雲吞皮包好。以焦化牛油、牛尾汁、Cacio e Pepe忌廉醬、巴馬火腿、黑胡椒同灼熟嘅牛尾意大利雲吞煮一陣就可以上碟;最後灑上Grana Padano芝士同新鮮芝麻菜,令色、香、味層次更鮮明。

甜品方面必試每日製作嘅自家製意式豆腐奶凍 TOFU PANNA COTTA (HKD58)!受香港傳統甜品豆腐花啟發,豆腐加忌廉等製成奶凍,口感creamy有啲似cream cheese 。面頭加上黃糖同淡豉油製成嘅甜糖漿,味道似拖肥糖咁令人一試難忘!

Casa亦提供富有地中海特色嘅雞尾酒同無酒精雞尾酒,歡樂時光優惠HKD40起就可以享用精選啤酒、葡萄酒、雞尾酒同烈酒,非常超值!左邊嘅Mocktail係Passion Fruit Bellini (HKD58),混合熱情果、蜜桃蓉、新鮮檸檬汁同梳打水,酸爽嘅感覺非常消暑。右邊嘅Cocktails係Bloody Mary Martini (HKD88),混合龍舌蘭酒、香橙利口酒、蕃茄同紅辣椒汁,啱晒女士們打卡添。

 

Casa Cucina & Bar
地址:西營盤干諾道西158A號均益大廈3期地下8-9號舖
電話:2887 9666 / 9570 1068 (WhatsApp)
營業時間:星期二至日:15:00-22:00 (逢星期一休息)
(餐廳會因應疫情調整營業時間)

You may also like...

Leave a Reply

Your email address will not be published. Required fields are marked *