【馬拉人氣食店進駐旺角 必食怡保雞+肉骨茶「火鍋」】霹靂南洋

旺角全新馬拉菜餐廳霹靂南洋,其實係當地人氣餐廳南洋1957首家海外店,香港餐廳主廚Simon經朋友介紹認識總店老闆Jacky,對佢嘅馬拉菜一試難忘就決定引入香港喇。除咗招牌菜怡保芽菜雞,仲有Jacky家傳食譜炮製嘅霹靂仁當牛腩煲同老巴剎肉骨茶都好值得一試。點解?睇埋落去就知喇!

餐廳牆身重現馬來西亞街頭壁畫藝術之外,亦掛上出自Simon喺馬拉嘅年輕畫家朋友畫作,柔和嘅水彩畫都值得打卡㗎。

Simon本身已具有22年中西廚經驗,但依然按照原店特色炮製怡保芽菜雞,午市套餐必食怡保芽菜雞飯(HKD68)呀!肥而短身嘅芽菜配上皮薄唔油嘅雞肉,加上自家製薑蓉同甜黑豉油、香滑嘅油飯同雞湯,連女士都啱食。

招牌砂煲系列有兩款,亦融合火鍋元素,俾大家滾住食!霹靂仁當牛腩煲(HKD108)嘅「仁當」即係乾咖喱,以多款香料、辣椒同椰奶以中菜「煲、焗、煲、焗」嘅方式煮牛腩兩小時,腩肉入味腍身而不失咬口,咖喱仲會帶嚟後續嘅辣勁添!

老巴剎肉骨茶(HKD98)依循馬來西亞傳統方法烹調,湯底加入當歸、川芎等藥材,比新加坡嘅肉骨茶帶較濃藥材味,又但不至於好似飲藥咁款。排骨煮到骨肉容易分離又入味,加上爽口豬大腸、油豆腐、油炸鬼同香菜,非常足料飽肚㗎。

18款火鍋餸料(HKD8-68/款)有肥牛、鮮魷魚、秋葵、丸類等款式,話咁易變成變微型火鍋,而且會添加原湯底,只會愈滾愈香濃。為慶祝餐廳開幕,5月份堂食凡惠顧招牌砂煲系列,每兩位食
客即送精選肥牛一份添(每日供應量有限,送完即止)。

Simon仲用蝦膏、蝦米、辣椒等材料自家製成參巴辣醬,參巴辣醬炸豆腐(HKD28)外脆內軟嘅口感配上馬拉式嘅辣都幾滋味。

想食個Tea有極邪惡嘅咖央西多士(HKD38)俾你揀!大大塊牛油喺即炸多士表面好快融晒,加上內藏當地咖央醬,完美結合馬拉同港式口味,不過真係要食埋青瓜解膩嘅。

桂圓冬瓜茶(HKD22)話梅桔仔冰(HKD22)用肉眼睇已經見到足料,入口亦好夠味,唔會太甜。

 

霹靂南洋
地址:旺角彌敦道575號 Ladder Dundas 5樓
電話:6971 7738
營業時間:星期二至日:12:00-22:00
(餐廳會因應疫情調整營業時間)

You may also like...

Leave a Reply

Your email address will not be published. Required fields are marked *