【全港首間酒廠餐廳二合一 釀酒桶列陣×英式居酒屋美食】GRAIN

潮人搵潮食唔一定要去外地搜羅嘅,位於西營盤、Woolly Pig Hong Kong餐飲集團旗下新開嘅GRIAN就俾到你「唯一」嘅感覺喇!餐廳分成兩個區域,前半部係酒吧區同本地手工啤品牌Gweilo Brewlab釀酒區,亦係全港首間喺餐廳釀酒嘅舖頭,大家記住把握喺成排釀酒桶前留影嘅機會喇。而深入餐廳後半部,就係座位闊落嘅用餐區,部分菜式仲加入手工啤酒釀造材料,打造成英式Gastropub居酒屋文化,令你有更完整嘅餐飲體驗。事不宜遲,即刻睇吓有咩正嘢不容錯過啦!

Gweilo嘅研發團隊會喺釀酒區進行新款酒品研究同測試,一入到嚟就聞到陣陣酒香,加上座位選用高腳椅,令成個感覺更加Chill。Gweilo嘅手工啤有十多款,order由200至500ml都有(HKD45起)。

*供應之啤酒款式將不定期轉換,詳請見餐廳當日提供之款式及價錢為準。

Coctails on Tap: Gin & Tonic (HKD70)

餐廳都好貼心提供雞尾酒,俾各位酒友有更多選擇。將Gweilo自家出產嘅氈酒混合Capi Tonic湯力水,調製出呢杯淡香而清爽嘅Gin & Tonic,喺炎炎夏日好易令人一飲再飲又唔易醉。

介紹咗咁多酒又點少得食物呢,無理由要大家空肚飲酒咁傷胃嘅。想清新啲可以先嚟個芝士沙律Burrata(HKD135),圓滑creamy嘅Burrata芝士配上大大件又爽甜嘅新鮮蕃茄同蜜瓜,好啱夏天做開胃菜。加上Lager啤酒油醋汁同辣椒乾,令味道有細微變化而帶層次感。

煙燻三文魚Salmon Pastrami (HKD130)就啱鍾意低熱量又有蛋白質嘅朋友。三文魚先醃48小時,然後用核桃木煙燻3至4小時,連配搭嘅爽口醃青瓜都微微燒焦過。配以白脫牛奶醬同柚子胡椒油醋,入口微酸又令魚肉更滑溜。

肉感啲嘅主菜就有OX Cheek and Bone Marrow Pie (HKD180),先將牛面頰肉連同Stout啤酒慢煮8小時,然後用酥皮包裹牛面頰肉,再將牛骨髓插喺批餅中間就可以烤約20分鐘喇。甜甜哋嘅牛面頰肉同鹹香嘅牛骨髓一齊食可以互相balance,分開食亦各有特色,而薯蓉都打到好幼滑,食晒都幾飽

Potato & Cheese Hash (HKD175)係一道冇肉都極度惹味嘅菜式,薯仔片層層疊又烤到表面金黃香脆,遠睇仲以為係豬腩肉,而每層薯仔片之間都搽上特製芝士薯蓉醬!先將Lincolnshire Poacher芝士熟成約14至16個月,令芝味濃郁又帶有淡淡辛辣味,再混合薯蓉製成芝士薯蓉醬。加上西洋菜蓉製成嘅素醬汁,連同Stout啤酒、黑松露醬同埋以釀造啤酒時產生嘅酵母製成Marmite醬,完全係一道心機菜呀!

簡單啲開share的話,點個羅馬傳統Pinsa薄餅就啱晒喇。呢度嘅長形薄餅達10吋,除咗外形有別於一般橢圓形,用小麥粉、大豆粉、米麵粉、海鹽、酵母、水同橄欖油自家製作嘅麵糰仲低溫發酵最少48小時添!而且先以大約350度烤焗到餅邊香脆,內裡鬆軟煙韌,切開裡面嘅紋路仲好似油炸鬼咁;取出薄餅後再放上餡料就完成喇。其中Carbonara(HKD190)簡單配上Mozzarella芝士、Guanciale風乾豬面頰肉、Pecorino芝士再掃上蛋黃,天然嘅鹹香味都好開啟味蕾。

追求獨特感嘅朋友,不妨試吓只限周日供應嘅Sunday Roast (HKD280/位),喺12:00-20:00都可以order,每星期供應一款,每個月都會循環款式,想試晒四款就校啱日子嚟喇。呢道Roast Iberico Pork Coppa with smoked pork shoulder有烤伊比利亞豬Coppa、煙燻豬肩肉、烤馬鈴薯、糖蜜紫椰菜、牛油蔬菜、煙燻甘筍、Lager啤酒糖蜜同焦香蘋果茄汁。齋睇已經好豐富?每款仲配Yorkshire布甸㗎!

試埋英國傳統甜品之一嘅Sour Cherry and Porter Bakewell Tart (HKD80),享受釀入酸甜車厘子醬、砵酒醬同杏仁餡嘅撻餅拼麥芽雪糕,香甜誘惑絕對令你大滿足呀!

 

GRAIN
地址:西環堅尼地城New Praya新海旁3-5號五福大廈地下1號舖
電話:3500 5807 
營業時間:星期一:12:00-22:00,星期二至五:12:00-00:00,星期六:10:00-00:00,星期一:10:00-22:00
(餐廳會因應疫情調整營業時間)

You may also like...

Leave a Reply

Your email address will not be published. Required fields are marked *