【新蒲崗大牌檔第二代 台菜小炒闖飲食界】台灣館

新蒲崗雄記大牌檔十年結業之後,好多街坊都懷念佢哋嘅鑊氣小菜,今日就到大牌檔第二代喺九龍灣勇闖飲食界!台灣館聽個名就知主打台菜啦,但佢哋都想豐富客人嘅味蕾,所以搵嚟兩位大廚,分別負責台菜同川菜,俾大家不時換吓新口味。

店內大部分位置都見到街外景致,而且好光猛,喺度用餐都幾舒服。

早餐都有台式風味係咪好過癮呢?滷肉粉新竹米粉配滷蛋、滷豆腐(HKD28)嘅炒麵配有特製醬料,連嫩滑嘅豆腐都係自家滷㗎。

午餐點少得台灣鹽酥雞飯(HKD52)呢?飯面淋滿滷肉,配搭炸到香脆厚肉嘅雞扒,真係好有當地風味。

招牌台灣牛肉刀削麵(HKD58)都係必試午餐之選,蘿蔔同牛腩都大大嚿,亦煮得好軟腍入味。

午餐加HKD8-15/款可以追加藕片麻辣牛腱麻辣豬耳得麻辣涼伴小食。辣度接近譚仔2小辣至小辣之間,大家就住嚟加餸呀!

呢度晚市套餐(HKD208起),2-4人分量由適量到勁量都滿足到唔同人需要。

酸菜桂花魚(單點HKD238)輕炒酸菜等配料再煮成湯,魚片大大塊,灼過後依然彈滑。

古早味黃酒煮雞湯係健身食療菜式嘅口味!一上枱就聞到陣陣酒香,當中嘅紅棗仲用酒浸足兩日添。一鍋有4-5碗湯令你以為好少雞肉,但其實肉量近乎成隻雞㗎。不過湯煲耐咗會太濃縮而偏鹹,大家最好趁熱快啲飲喇。

蒜蓉炒台灣龍鬚菜係時令菜式,當季都未必日日有。爽口嘅菜身有咬口但又易咬斷,口感幾得意。

呢度嘅晚市少菜同一般餐廳比除咗夠晒火侯鑊氣足,仲會免費配白飯,啱晒忙碌嘅香港人同無飯煮婦。好似呢道三杯蝦(HKD72),大約8隻新鮮本地蝦好爽口,加上同乾蔥、紅蔥、九層塔等香料一齊炒,聞同食落口都一樣咁惹味,仲有少少美極蝦嘅感覺添;而且鹹度啱啱好配飯。

飲品方面梗係要試珍珠奶茶(HKD25/凍,HKD23/熱)啦!綠茶拿鐵珍珠奶茶朱古力珍珠奶茶夠味但唔會好甜,加上面頭嘅creamy同胚芽,即刻加入少少本地原素。

 

台灣館
地址:九龍灣牛頭角道3號得寶商場1樓210號舖
電話:2398 8835
營業時間:星期一至日:08:00-22:00
(餐廳會因應疫情調整營業時間)

You may also like...

Leave a Reply

Your email address will not be published. Required fields are marked *