【酮友必試真材實料Keto批 日本茶粉製濃厚Latte+梳打】深水埗

 

生酮雖然係近年飲食潮流,但Keto-friendly又有質素嘅餐廳並唔多,喺深水埗合舍入面嘅Eat Matters就將肉批同飲品做得好出色喇!3款肉批都選用自然餵飼肉類、天然農發蔬果同全天然調味料,真材實料好有良心,食都食得安心啲啦!

忌廉汁龍蒿葉雞批(HKD78)係由慢煮無激素穀飼雞肉配搭忌廉汁、龍蒿草、椰菜花蓉、洋蔥同甘荀製成。 內餡creamy有口感, 雞肉好香滑。

鴨肉批喺坊間比較少見,五香炒冬菇手撕鴨肉批(HKD78)嘅鴨髀同日本冬菇用高湯慢煮而成,配合五香粉同新鮮香草等香料令味道更有層次感,非常惹味。

自家製蕃茄蓉牛肉批(HKD78)選用草飼牛同自家製蕃茄醬,經低溫慢煮35個鐘嘅蕃茄醬有陣陣天然酸甜味,同牛肉味道好夾。

呢度每款批都會配埋健康又惹味嘅自家製日本櫻花蝦牛油果油辣椒油(HKD80/180ml),鍾意食可以單購添。

70%黑朱古力軟心曲奇(HKD22)熱食會有半融流心效果,甜度啱啱好。不過門市現售嘅曲奇唔係Keto-friendly,Keto版曲奇要網上預訂。

呢度連飲品都係生酮友善(亦可製成Vegan版,適合純素飲食嘅朋友),人氣茶類飲品均選用日本百年茶業老店「丸安茶業」嘅茶粉,用料一啲都唔馬虎㗎。其中抹茶杏仁奶(HKD38)口感濃厚軟滑,天然甜抹茶味。以壺仔裝住嘅抹茶杏仁奶可以保持溫度,等你慢慢品嚐微暖嘅Latte。

焙茶檸檬梳打(HKD48)味道層次好豐富,入口會飲到鹹、酸、甘、甜嘅味道,有啲似茶香版嘅鹹柑桔。而且冰塊用大粒圓冰,融得慢唔易變淡,夏天飲返杯真係消暑解渴。

凍100%可可杏仁奶(HKD43)好Nutty,質感濃稠好厚身,冇冰塊都夠晒凍,落足料呀!

 

Eat Matters
地址:深水埗大南街186號地下合舍內
電話:從缺
營業時間:星期三至一:12:00-19:00(逢星期二休息)
(餐廳會因應疫情調整營業時間)

You may also like...

Leave a Reply

Your email address will not be published. Required fields are marked *