【老字號打冷店街坊力捧 原區重開足料夠火候】紅伶飯店

紅伶飯店雖然經歷四次轉手,上年5月接手廿多年嘅陳老闆將舖頭結業之後,唔少食客大嘆又少一間老字號嘅親民打冷店,始終有時喺小店食會別有一番風味吖嘛。事隔一年,二仔Felix終於安排到繼承衣缽,原區重開餐廳,舖頭仲大過以前又增設午市,好多熟客嚟幫襯,周末最好訂定枱呀!

市道艱難,Felix點解決定再開舖?「其實上年都想接手,但時間未安排到唯有先結業。之後間中同朋友出去食打冷,始終都係覺得爸爸整嘅好食啲,依家終於分配到時間就重新開業,好多舊客都即刻嚟食。搵埋爸爸做顧問,佢落嚟見到啲舊客都幾開心,佢輕鬆啲,但又可以傳承落去。」

平時嘅潮州反沙芋(HKD100)都係白雪雪,但紅伶嘅就仲見到芋頭嘅紋路同有點點綠色,因為呢個係改良版呀!現時大家都注重健康,所以將傳統用大量白糖嘅做法改良,仲加上少少蔥花令味道略帶鹹味。大廚話低溫生炸芋頭令口感鬆化,但耐時較耐,大家最好一早落單,等廚師預返時間準備。

打冷點可以唔食滷水?有選擇困難嘅朋友就點滷水雜錦(HKD138)啦!十幾款餸料有鵝片、鵝腸、生腸、大腸、腩肉、豬耳、豆腐等,疊到成坐山咁高俾足分量㗎。

想食得豪氣啲當然要有潮州凍蟹(市價)喺枱面啦!肉甜大隻又多汁,同平時嘅熱盤始終唔同嘅。究竟點知餐廳有冇開天殺價?Felix話其實睇來貨價而定,好難話實一個範圍。

打冷小店另一個特色就係帶有大排檔色彩,始終隊住啤酒就有食惹味嘅下酒菜嘅。砵酒田雞(HKD118)用自家調配嘅炸粉,令鹹辣嘅味道更突出同沾染喺肉上,入口香脆唔厚粉,而且田雞幾大隻,彈牙嘅髀位好似小雞髀咁!

黃金苦瓜(HKD98)係新菜式之一,苦瓜嘅炸漿同樣好薄身,撈勻炒到起沙嘅鹹蛋黃依然係薄脆口感!食落甘香,鹹度適中唔封喉。

舖位大咗可以開埋午餐,可以食到大大份乾炒牛河(HKD56)呢類茶記口味之外,亦有少見嘅豉椒鵝腸飯(HKD58)邪惡款式,要乾身嘅乾身,汁煮嘅亦唔漿口。

不過無論加幾多新菜都好,依家退居顧問身份嘅陳爸爸都話:「我由始至終都係用心煮俾客食,唔會話自己食嘅咁煮,俾客嘅就用其他方法,過得自己先過得人。依家我都係咁同阿仔講,佢都要煮出嚟過到我先得㗎。」

 

紅伶飯店
地址:油麻地砵蘭街14號地舖
電話:3481 2020
營業時間:星期一至日:11:30-22:00

You may also like...

Leave a Reply

Your email address will not be published. Required fields are marked *