【即叫即蒸手工尼泊爾餃子 Fusion口味+招牌捲餅】Momoz

平時食得餃子多,諗住嚟嚟去去不外乎都係嗰啲餡?其實可以有好多變化!最近喺尖沙咀同中環連開兩舖嘅Momoz以尼泊爾餃子為主題,除咗傳統味道外,亦加入唔同國家嘅材料整成Fusion口味,外形吸睛仲好有驚喜添!

當地人叫餃子做Momo,傳統口味會用加入香料嘅羊肉或雞肉做餡。而呢度嘅餃子色彩繽紛,除咗源用尼泊爾入口嘅香料同自製外皮,所有顔色都係天然不含人造色素㗎,每籠8隻,全部即叫即蒸熱辣辣。餐廳特別為每款Momo配兩款蘸醬,一種係傳統Momo醬汁,以大量蕃茄同辣椒整成,超級掛汁同香辣;另一款就按個別餃子款式特別調配,俾你一次過試到唔同風味!

日式咖喱吉列雞Momo(HKD88)外形似炸雞,其實係將咖喱雞肉餃子裹上蛋汁同麵粉炸至金黃色,外面香脆入面juicy,蘸埋咖喱汁更惹味!

海南雞Momo(HKD98)靈感來自海南雞飯,以高湯熬煮海南雞同飯粒製成內餡,非常有咬口,配上薑蓉超有驚喜。

瑞士意大利芝士Momo(HKD98)以Emmentaler及Mozzarella芝士同白酒整成,蘸上芝士醬汁,口感軟綿煙韌又香濃。

傳統雞肉餃子(HKD88)附咗傳統醬汁,另一款係唔辣嘅蔬菜汁,用西芹同薄荷葉整成,味道清新。

傳統素菜Momo(HKD78)以菠菜汁製成餃子皮,而椰菜、洋蔥等蔬菜就製成餡料,所配嘅醬汁同傳統雞肉餃子一樣。

韓國泡菜Momo(HKD98)同樣係素菜餃,外皮同樣用咗菠菜整成,加入韓國泡菜同粉絲,哈羅米芝士等,仲有食用花做裝飾,好吸睛呀!

火辣雞肉Momo(HKD98)將雞肉同洋蔥、蒜頭、薑、尼泊爾辣椒、小茴香、等香料混合成餡料,味道香辣,嗜辣嘅你一定要試吓!

餃子以外仲有大份嘅捲餅俾你揀,捲餅餅樣會掃上蛋漿輕烤添。其中Rogan Josh羊肉咖喱尼泊爾蛋卷(HKD108)用咗紐西蘭羊肉、蕃茄醬、小荳蔻、月桂葉等香料整成印度羊肉咖喱,加上薯條捲埋一齊超夾喎。醬汁炸蝦尼泊爾蛋卷(HKD118)以美國菜式Dynamite Prawn為題製作炸蝦,醬汁以自家製蛋黃醬沙律同雞蛋製成,大量蔬菜配埋薯條口感十足,味道甜甜酸酸非常開胃。

仲有自家入罐飲品嘅雞尾酒,方便外帶。House Lemonade(HKD42)微酸嘅檸檬汁加薄荷,整體感覺好清新;Orange Blossom(HKD42)超重橙味,酸酸甜甜好解渴。

 

Momoz
地址:尖沙咀赫德道1-3 號利威商業大廈地下3號舖
電話:3752 2670
營業時間:星期二至四及日:11:00-22:00、星期五、六:11:00-02:00(逢星期一休息)
(餐廳會因應疫情調整營業時間)

You may also like...

Leave a Reply

Your email address will not be published. Required fields are marked *