Author: 肥仔文

0

【食飯似環遊世界咁happy 一間餐廳食勻廿個國家】POP STREET

食飯都可以有去旅行嗰種探險感覺?得㗎!小編今次介紹喺西營盤嘅多國菜POP STREET,完全有呢種異國feel呀! 佢哋嘅菜式多到超出中、日、韓、泰、越等等常見菜式,連尼泊爾、阿根廷呢類冷門地區嘅菜式都有供應!想分辨係咩地區?睇菜名前嘅國旗就知啦。輕輕數吓都有成廿個國家,幾乎所有異地菜式,都係主廚去旅行食過,然後訪問當地人得返嚟嘅食譜,真係少啲心機都唔得。 小編想推介嘅Starter係香港人都覺得親切嘅啖啖胡椒蟹雲吞撻(HKD108)!咬落啖啖蟹肉超鮮甜,加埋卜卜脆炸雲吞撻皮,口感一流! 另外,呢道招牌小食毛毛餃(HKD45)係尼泊爾菜。望落同我哋嘅中式水餃冇乜分別,但特別在個醬汁!酸甜得嚟有少少辣,入面仲有啲肉醬,味道非常開胃! 同朋友仔叫兩個main share都唔錯㗎。英國菜之中,最出名莫過於Fish & Chip!呢味啤酒炸漿多嚿魚薯條(HKD148)個名夠晒盞鬼,魚柳皮脆肉嫩。三個特色醬汁都好惹味,分別係四川麻辣醬、鹹蛋黃醬同埋他他醬。小編就對麻辣醬最有興趣,你哋會揀邊款呢? 仲有來自法國嘅野菌醬煙肉雞卷(HKD158),賣相非常唔錯!食落啖啖肉超滿足,配埋creamy嘅薯蓉同有咬口嘅薯仔粒,口感層次好豐富。 「飲飽食醉」是常識吧!食咗咁多嘢,梗係試埋佢哋自家調配嘅cocktail啦。呢款拗荔枝(HKD78)就啱晒唔鍾意太濃酒精味嘅女士們,入口係清新荔枝香,幾乎飲唔到酒味,不過飲得多都會醉嘅,大家量力而為喇!   POP STREET 地址:西營盤第三街70號地舖 電話:5116 8883 營業時間:星期二至五:11:30-15:30;18:00-22:30;星期六、日:11:30-17:00;18:00-23:00

0

【鐵板燒全新OMAKASE餐單 A5和牛配極尚海鮮】Ukiyo 世

雖然仲係年頭,但都想食餐好獎勵自己。小編推介大家試試銅鑼灣Ukiyo世嘅全新廚師發辦menu。雖然價錢稍貴,但絕對值回票價,因為依家用上多款海鮮同A5和牛,即刻睇吓點正法啦! 餐廳位於時代廣場對面嘅OLIV,就腳得嚟環境好似去咗中環咁。想食正嘅Fine Dine?以後多一個選擇啦。 全新嘅OMAKASE MENU(HKD1680/位)總共有9道菜,每款菜式選用嘅食材都由主廚Gary按季節精挑細選。重點菜式有咩?呢道北海道海膽多士,有超多新鮮肥美嘅海膽,味道鮮甜甘香。鋪埋魚子醬同金箔喺面,睇落氣派又奢華,入口層次都好豐富,正! 另外,甘鯛魚配南瓜汁係令人眼前一亮嘅清新開胃菜。甘鯛魚喺日本有「萬魚之王」嘅稱號,相當矜貴㗎!呢種魚口感好嫩滑彈牙,味道鮮甜。面頭鋪上炸成脆片嘅魚鱗,令菜式更加精緻,同時口感層次更加多變化。配埋香濃幼滑嘅忌廉南瓜汁,真係心機菜嚟。 仲有活龍蝦配海膽忌廉汁,用上厚肉又彈牙嘅新鮮深海龍蝦,配秘製海膽忌廉汁,啖啖龍蝦肉都俾海膽嘅精華包住,好鮮味呀!將伴碟嘅法國炸麵餅點埋海膽汁,惹味到唔想停口囉。 主菜之一有西班牙紅蝦意粉,承接海鮮嘅味道。將多膏嘅紅蝦頭壓碎,配鮮蕃茄熬煮成濃厚精華湯底,然後加入煮到半熟嘅紅蝦身同意大利麵一齊烹調,令成道菜都充斥紅蝦嘅精華。 到食肉獸大愛嘅特選日本宮崎A5和牛牛柳,油脂分佈細緻,入口即溶到爆發心心眼!配埋即磨山葵、鹽漬昆布同岩鹽,一道菜試到幾種風味添。 作為一餐嘅結尾,呢個顏色超sharp嘅焦糖蘋果應該滿足到大家。以焦糖慕絲同海綿蛋糕包住青蘋果啫喱,底層係黑朱古力脆脆,酸甜味道交替衝擊勁正!小編覺得大家budget夠,絕對可以一試當犒賞自己囉。   Ukiyo 世 地址:銅鑼灣霎東街 15 號 OLIV 18 樓 電話:2152 8880 營業時間:星期一至日: 12:00-15:00;18:00-23:00

0

【「不能燒的燒肉」咩玩法? 最新師傅發辦玩刁鑽!】YAKINIKU GREAT

食肉獸注意喇!呢間喺中環Soho新開嘅YAKINIKU GREAT係一間燒肉店,同傳統放題式燒肉同單點燒肉店唔一樣,佢哋嘅套餐係Omakase形式,即係一個價錢由廚師發辦,食勻大廚私心推介嘅高質和牛部位;仲有一個全新嘅燒肉理念,就係「不能燒的燒肉」喇!整個用餐過程會有專業嘅「燒肉服務生」幫你燒,包保每片肉燒得啱啱好,避免出現平時掛住傾偈燒燶嘢嘅蝦碌情況呀!燒肉控ready未?Tag埋身邊嘅食肉獸啦! FULL OMAKASE“KIWAMI「極」” 套餐(HKD980)   YAKINIKU GREAT SOHO 地址:中環砵甸乍街45號Lower H CODE 1樓 電話: 2758 8688 營業時間:星期一至六:06:00-23:00

0

【東涌街市歎墨西哥外賣 超抵$34雞髀飯+爆脆Tacos】街霸

今日街霸踩入東涌街市搵食,估唔到港鐵站對面嘅富東商場嘅富東街市有一間墨西哥外賣店,幾少見喎! 估唔到呢個街市都幾多外國人行喎,唔知係咪因為呢頭都算近機場呢? 唔知大家知唔知Olé Olé Olé點解呢?其實睇世界盃成日都會聽到㗎,Olé係西班牙文,通常喺歡呼、慶祝嘅時候就會用到,相傳最早期係為鬥牛勇士吶喊助威嘅口號。 呢間Olé Olé Olé老闆係外籍人士,雖然餐牌中英對照,但老闆廣東話唔係咁叻,所以大家落單時為求快捷方便都係用英文講好啲喇!Menu都算幾多嘢揀,價錢幾親民,30零蚊就有個飯、20蚊就可以食埋Tacos喎,好,等我試吓先! 首先試咗雞肉墨西哥玉米餅(HKD20)。其實墨西哥玉米餅分好多種,我哋成日食嘅多數都係Nachos或者今次食嘅Tacos,Tacos特色係將玉米餅油炸,然後捲成半月開口定形,包裹住餡料、配料同酸奶油等等。 呢個Tacos咬落超級脆,街霸咬咗一啖就成塊粟米餅皮都裂晒,真係食得有啲論盡呀!表面白色嘅醬汁唔係沙律醬,而係酸奶油,嗰種酸甜味本身已經好開胃,再加埋新鮮嘅蕃茄粒粒同黑橄欖超fresh,用嚟做下午茶分量同味道都啱啱好! 呢幾年通脹通到嘭嘭聲 ,40蚊樓下嘅外賣幾乎買少見少,高唔高質都仲要睇彩數。呢度嘅雞髀配墨西哥飯(HKD34)超靚仔,雞髀大大隻,皮烤得脆卜卜,望見都流口水呀!34蚊仲隨機包一盒紙包飲品,抵喎。 呢個飯係蒜蓉汁底,用嘅係西班牙料理常用嘅黃薑飯,啖啖滋味。隻雞髀有成個飯盒咁大隻,咬開依然肉嫩多汁,街坊們必試呀。   街霸最愛:今集最愛就係Tacos喇!因為香港街市有得食正宗Tacos嘅真係5隻手指數得晒,呢度整得超脆卜卜,成個配搭好fresh,如果街霸住附近應該會成日幫襯!未試過嘅東涌街坊要試吓喇! Olé Olé Olé 地址:東涌富東街6號富東廣場地下富東街市M22號舖 電話:2154 1688 營業時間:從缺

0

【春秧街街市藏福建美食竇 傳統小食牛肉粳勁有風味】街霸

正所謂香港呢個國際都會美食天堂,匯聚咗各國嘅文化同美食,其實香港除咗廣東人眾多,仲有好多唔同鄉下嘅外省人聚居㗎,今次街霸就帶大家去北角呢個福建人私竇真真美食店! 由北角地鐵站一出,行過長長嘅春秧街街市,差唔多行到尾尾就到㗎喇!呢間真真美食外表超樸實,平日下晝都幾乎爆場,一睇就知係搵平民美食嘅好地方。 一入到去街霸真係覺得自己有啲格格不入呀!事關入面無論係員工抑或客人,大家都好一致咁用福建話交流。小編差啲以為唔用福建話溝通唔到添呀,好彩阿姐見到我唔多似同鄉,就即刻轉channel用廣東話同我落單。正如頭先所講,去得幫襯嘅多數都係福建人,原來喺香港嘅福建人都唔少喎,雖然多數都係上咗年紀嘅姨姨叔叔,但離春秧街幾步之隔竟然有個清一色講福建話嘅食店,真係幾得意呀! 由於老闆同員工都係福建人,咁我諗食物都夠晒正宗啩!老闆娘推介小編食呢個牛肉粳(HKD24),話係福建嘅傳統嘅小食。飲落有啲似玻璃芡咁,個湯頭又好鮮味。牛肉咬落就比較有咬口少少,唔係一般免治牛肉一咬即爛嗰種感覺。 另外呢個煎雞卷(HKD23)亦係招牌小食。用腐皮包住切碎咗嘅雞肉、蘿蔔絲等等,食落頗有風味。 肉包(HKD5)好抵呀,5蚊大大個,入面係菜肉餡,菜同肉分量啱啱好,用嚟做早餐或者下午茶都perfect喎!   街霸最愛:今集最愛就係牛肉粳喇,因為小編覺得呢樣菜最顯得出福建菜同廣東菜嘅唔同之處,通常我哋嘅「羹」,好似粟米羹等等都會有好多樣嘢喺裡面,粟米呀、蛋花呀、蔥花呀咁,但佢哋嘅牛肉粳同魚肉粳都係碗入面只有嗰樣餸,粳嘅顏色亦比較清澈,但都飲得到濃厚嘅鮮味呀。   真真美食店 地址:北角春秧街70號地下 電話:2503 0976 營業時間:星期一至日:07:00-19:00

0

【下雨天總掛念從前! 拉埋中同去懷舊Café食蛋餅】小食糖

中學嘅時光總係令人最懷念嘅,通常大家最好嘅朋友都係嗰時識落,久唔久大家約埋食飯聚舊,講吓當年邊個鍾意邊個、講吓當年是非都幾過癮㗎!今次小編就搵到個私竇,平日下午冇乜人,靜靜哋最啱好朋友聚會,加上成間Café嘅裝修都走懷舊課室Style,一坐入去成個青春回憶返晒嚟呀! 呢間小食糖係台式Café,喺美麗華商場入面,位置唔算好好搵,不過勝在唔怕多人逼,座位都幾闊落,仲有露天位可以坐添! 除咗裝修走校園風,連餐具都有精挑細選過㗎!好似筷子係顏色筆造型,好可愛呀!台式嘢No.1必選item當然係紅燒牛肉麵(HKD60)啦!湯底熬足8個鐘,配方跟足台灣,口味偏濃,但係湯頭濃味而未至於會飲到好口渴,忍唔住一口接一口咁飲晒成碗湯! 牛肉亦炆得相當腍,咬落超嫩口,入口即溶,咬都唔係好使咬咁滯,正呀! 除咗牛肉麵,滷肉飯(HKD50)都係相當signature嘅台式招牌菜!台灣滷肉基本上分兩種,一種係肉燥版嘅滷肉;另一種就係用大片肥豬肉版嘅滷肉(又名焢肉)!而小食糖所賣嘅正正就係呢種肥豬肉版滷肉飯喇! 雖然話係肥豬肉,但其實仔細睇塊肉係分肥中瘦3 part,肥肉部分咬落爽口,夾埋碗內嘅酸菜撈飯食落啱啱好! 唔知大家係咪同小編一樣,去親台灣都會特登早啲起身去早餐店食蛋餅呢?呢度就配合返香港人嘅生活習慣,將蛋餅整成下午茶,方便大家三點三Tea Time就歎得到,附近返工嘅朋友可以一試呀!今次小編就試咗呢個肉鬆蛋餅(HKD35),賣相當然比台灣街邊蛋餅店精緻啦! 蛋餅食落餅皮比台灣普遍嘅蛋餅略厚少少,餡料亦比較單一。台灣版嘅蛋餅通常都會俾你揀2-3款配料,但呢度一個蛋餅只有一款配料,食落好似單調咗少少,不過止吓台灣癮都唔錯嘅! 最後試埋呢個台灣特調-冬瓜檸檬茶(HKD28)。賣相就夠晒得意喇,用咗科學堂實驗室嘅三角燒瓶同量杯,好卡哇伊!味道酸酸甜甜幾得意,冬瓜味唔算好重,不過夾埋檸檬嘅酸味就好match,有少少柑桔檸檬嘅感覺。成間餐廳坐得舒服,食物同價錢又幾公道,大家可以約埋成班中同聚舊喇!   小食糖 地址:尖沙咀彌敦道132號2樓 電話:2771 7828 營業時間:星期一至日:12:00-21:30

0

【雞批浮在青苔上? 冰室食物配搭錯晒嚇死人】伏務台

伏嘅嘢主要分幾種,可以係味道伏、價錢伏或者外表伏。今次小編就遇到大佬喇,伏嘅點竟然係個配搭喎! 就係呢個喜喜冰室嘅「雞批浮台」,聽到個名都覺得怪啦,雞批就雞批啦,好哋哋浮咩台呢?睇埋張相小編就呆咗喇,係就係浮台……點解浮喺綠色嘅青苔上面嘅?嚇死人喇。 呢個雞批浮台(HKD36)其實即係雞批加綠豆蓉湯,小編唔明點解呢兩樣加埋一齊會work……同埋本身綠豆蓉湯都係一款比較非主流嘅湯種,點解仲要mix埋個雞批呢? 見到佢咁嘅樣,小編其實都有啲心理準備㗎喇。究竟會唔會係小編誤會咗佢呢?或者會好好食呢? 結果小編嘅直覺係冇錯嘅。首先雞批個皮唔脆就梗㗎啦,話晒都浸住晒;咬落完全唔知自己食緊咩,就係一個濕咗嘅批皮,入面個餡微暖。 至於個綠豆蓉湯……飲落好草青味,仲有少少腥腥哋,我諗除非係綠豆愛好者,如果唔係呢個湯都唔太啱飲㗎喇。   小編伏氣:小編覺得呢個配搭完全無厘頭兼完全唔好食,可以話係由頭伏到落腳。各位勇士想嚐鮮之前要三思喇。 入伏點:喜喜冰室入伏價:雞批浮台(HKD36)中伏by:肥仔文美術by:車雲    

0

【火炭美食沙漠除名喇!街坊大推牛三寶+足料靚湯】街霸

唔知大家有冇去過火炭呢?呢個地方不嬲都冇乜嘢好食,近地鐵站嘅大型屋苑居民要搵食嘅話,最近都要行到去山尾街附近,真係唔係好方便!不過街市翻新之後開咗銀禧開心市集,終於都為火炭帶來一啲生氣喇!呢度近御龍山,離火車站只係三、四分鐘路程,門口有幅壁畫牆,幾靚喎。 地方唔算大,食物選擇唔算好多,但街霸就發現有兩間應該幾啱街坊口味嘅舖頭喎!第一間推介就係呢間美景牛雜粉麵喇。 睇住師傅包雲吞嘅熟練工夫就知呢間嘢食得過啦。 今次街霸叫咗一碗牛三寶河粉(HKD45)同一碗四寶麵(HKD45)。 牛三寶分別有牛腩、牛肚同牛筋。炆得夠晒入味,牛腩夠腍、牛肚爽口、牛筋又夠膠,非常唔錯呀! 至於碗四寶麵就分別有魚蛋、雲吞、魚皮餃同魚片。 比較出色嘅係雲吞,隻蝦大大隻咬落好爽口,皮薄餡靚! 本來食完牛雜準備走嘅時候,俾街霸發現呢度仲有間MY·湯,原來係間專賣自家湯水嘅舖頭!街霸至鍾意就係飲湯,點可以唔試呢? 眼見幾多選擇喎,湯款每日都會有些少唔同,視乎老闆娘入到啲咩食材。真係花多眼亂,搞到街霸遲遲都決定唔到飲邊款好,於是老闆娘就推薦咗茶樹菇栗子烏雞湯(HKD48)喇。 開頭以為自家煲製嘅湯水都係用普通膠兜裝住啦,點知原來有一個專擺湯水嘅錫紙兜,上面仲有層可撕開嘅鋁紙,完全防水,唔怕打瀉。連附送嘅環保袋都係防水,好貼心呀。撕開鋁紙後發現碗湯比我想像中大碗,湯渣同湯水嘅比例啱啱好,唔會全兜都係渣,湯就得嗰兩啖。 飲落熱辣辣,茶樹菇嘅清新夾埋香濃嘅烏雞真係冇得頂,細嚐之下仲飲到栗子嘅甜味,如果街霸住呢頭一定成日幫襯啫!   街霸最愛:今集最愛就係MY·湯嘅靚湯喇!都市人日日生活咁忙,有幾何得閒返屋企煲湯吖,呢間嘢啲湯夠晒足料又好味,街霸真係好想佢哋喺我樓下開返間呀! 銀禧開心市集 地址:火炭樂景街2-18號 電話:從缺 營業時間:星期一至日:07:00-20:00(個別商店營業時間有所不同)

0

【無辣不歡者必去新辣竇 陝西油潑扯麵煙韌惹味】嘹咋咧

最近銅鑼灣渣甸街開咗間新食肆,賣嘅係香港絕無僅有嘅陝西菜。餐廳名叫嘹咋咧,個名幾有特色,不過呢三個字好翹口喎,究竟點解呢?「嘹咋咧」呢三個字原來係陝西方言,意思係「無與倫比的美麗」。 老闆娘係陝西人,嫁來香港之後就喺香港落地生根,老闆娘喺西環同佐敦都有餐廳,都係做陝西菜,佢話依家揀喺銅鑼灣開店,係因為見同區冇乜同類型餐廳,希望會有更多客人食到佢嘅家鄉菜。 首先試吓呢個潼關肉夾饃(HKD28),陜西嘅肉夾饃同平時台灣或者廣州嗰種唔一樣,我哋食開嘅係用白色麵糰整成嘅饃,而呢度嘅饃係偏酥脆,有少少似手抓餅嘅feel。 一客有兩件,小編第一啖咬覺得有少少唔慣,因為成個饃都係偏乾身。豬肉餡都係比較乾,同平時食開嗰種爆汁嘅肉饃有啲唔同,不過餅皮真係整得好脆,幾香口,各有各風味啦。 跟住老闆娘極力推介呢味乳瓜仔炒花生苗(HKD78)。佢話香港冇乜地方有花生苗賣,所以香港人對於呢味菜應該有啲陌生。「我哋喺陝西嗰邊直接入返嚟㗎!香港第二度應該食唔到。」花生苗係浸種花生後得出嘅產物,喺香港唔算流行。花生苗驟眼睇同大豆芽有啲相似,只係豆嘅部分變成花生,同埋「芽」嘅部分相對粗壯好多。小編今次第一次食就覺得幾新奇喎,因為平時花生同芽菜大纜都扯唔埋,夾埋食雖則有種說不出嘅違和感,但其實花生爽口、「苗」又清甜。鍾意食花生嘅朋友一定要試吓! 重頭戲嚟喇,呢道油潑扯麵配秘製豬仔骨(HKD48)係陝西嘅招牌,呢碗麵一啲都唔簡單呀! 老闆娘話最正宗嘅油潑扯麵係一碗一條麵,麵條又長又闊,超有嚼勁,煙韌之餘食得出擀麵者嘅心機,麵筋擀得恰到好處,配埋油潑辣子超開胃,油香惹味香口,嗜辣者必試呀!豬仔麵肉嫩多汁,一咬落離骨,唔會食到勁狼狽。 米子甜飯(HKD48)係陜西地道嘅甜品之一,糯米煮成糊狀再配上幾粒大紅棗,食落黏膩感頗重,同廣東人食開嘅糖水非常唔一樣,幾特別。食落飽肚感十足,小編建議大家同朋友Share一碗嚐鮮喇!   嘹咋咧 地址:銅鑼灣渣甸坊9號地舖 電話:6063 5512 營業時間:星期一至四:12:00-21:30;星期五至六:12:00-22:00;星期日:12:00-21:30

0

【坑口小食街Fusion腸粉新口味 爆汁九層塔炸蚵仔最惹味】街霸

上次街霸行開將軍澳,發現坑口Gateway嗰邊有條連住街市嘅小食街FOODLANE喎!咁啱有啲肚空空不如試吓新嘢啦。 首先見到呢間小食工房,燒賣魚蛋雞蛋仔樣樣齊,不過最吸引街霸眼球嘅係呢個芝士肉醬腸粉(HKD28)喇!其實本身對黑松露肉醬更加有興趣,不過店員阿姐話已經賣晒,冇辦法啦! 平時食開腸粉都係落甜醬花生醬豉油,最多咪整多隻蛋變雞蛋腸囉,真係未食過西式醬汁嘅腸粉喎。 腸粉即叫即蒸,等咗15分鐘左右終於有得食喇。雖然賣相唔係咁好,但味道其實比預期中好。肉醬唔會太杰,連埋芝士同腸粉一齊食味道意外地夾喎。雖然28蚊唔係話太抵,但係大大兜,食落都幾飽肚而且唔滯,可以一試。 行入少少見到呢間幾多人食嘅大哥大魚蛋,魚蛋聲稱係手打,超彈牙咁話喎。不過魚蛋有好多人介紹過,今次街霸就試咗雙色魚麵(HKD18)啦!唔知大家細個喺屋企打邊爐有冇食過唧唧魚麵呢?街霸好耐冇食過喇,今次就試吓呢間手打魚麵係咪真係正啲先。 魚麵可揀腩汁或辣汁湯底,今次揀咗辣汁,味道鮮甜,辣度就大概BB辣程度。魚麵咬落爽口彈牙,感覺同直接食緊魚蛋冇分別。雖然魚麵唔算掛湯,但係咬落魚味頗重,18蚊抵食! 幫襯任何嘢都可以用優惠價錢換杯特飲,老闆極力推薦呢杯鮮水果茶(HKD26/跟餐$8),咁就即管試吓水果茶啦。飲落茶底都算香濃唔苦澀,生果切得夠細粒用粗飲管飲到呢吓幾加分,入面仲有俗稱「青蛙卵」嘅蘭香子,整體好似高質過X芳喎…… 食完魚麵個肚仲有少少位,就走過隔離睇吓有咩吸引嘅炸物啦!GOURMET TASTY主打台灣嘢,手抓餅、炸雞扒等等一應俱全。九層塔炸蚵仔(HKD25)係最新出品,好似喺台灣夜市都冇乜點見過,一於試吓啦! 炸蚵仔即叫即炸,大概等6-8分鐘就有得食。新鮮熱辣噴晒煙,大家記得吹凍少少先放入口呀。炸皮薄又香脆,蚵仔咬落爆汁超嫩滑,感覺仲好味過夜市嘅蚵仔煎。 蚵仔炸得剛剛熟,味道鮮甜仲爆汁;九層塔有提鮮效果,簡直畫龍點晴呀!   街霸最愛:今集最愛就係九層塔炸蚵仔喇!鮮甜嫩口嘅蚵仔加埋沾有九層塔嘅薄炸脆皮真係一流,如果宵夜時段買返屋企送酒仲正呀!小食街店舖收夜晚10點,坑口嘅朋友仔必試呀! 小食工房 地址:將軍澳坑口厚德商場東翼地下 電話:從缺 營業時間:星期一至日:12:00-22:00 大哥大魚蛋 地址:將軍澳常寧路2號TKO Gateway東翼地下EF21號舖 電話:從缺 營業時間:星期一至日:10:00-20:00 GOURMET TASTY 地址:將軍澳常寧路2號TKO Gateway東翼地下EF22號舖 電話:從缺 營業時間:星期一至五:11:30-22:00;星期六至日:11:00-22:00