Author: 為食加菲貓

0

【快速自製邪惡掃街小食 氣炸煎釀三寶啖啖肉】氣炸師

疫情越爆越犀利,出去人多嘅地方都怕中招呀,仲點去掃街喎。氣炸師忽然好想食煎釀三寶,又睇吓喺屋企會唔會整到出面嘅味道啦!   氣炸煎釀三寶 材料與分量: 紅腸 – 半條 豆卜 – 4-5粒 茄子 – 一條 鯪魚肉 – 300g 生粉 – 2-3茶匙 做法: 1. 清洗乾淨食材,將紅腸同茄子切件,豆卜開半。 2. 將鯪魚肉同胡椒粉混合調味。 3. 將鯪魚肉釀喺茄子片、紅腸片同豆卜表面。 4. 用篩將生粉均勻灑喺三寶表面。 5. 用掃輕輕掃上油後先以180度炸10分鐘,之後轉200度再炸5分鐘。

0

【家上海佛跳牆宴買一送一 新推客飯餐外賣75折】家上海

家上海推出全新奧海城限定嘅佛跳牆海皇宴,兩位起仲買一送一,計埋茶芥同加一都係百幾蚊位就試到一系列招牌菜同新鮮海產炮製嘅淮揚菜,啱晒鍾意養生同中菜嘅朋友喎。 店內環境寬敞,亦有少量戶外坐位。 佛跳牆海皇宴(HKD298/位)以淮安四小碟(右)打頭陣,前菜有花雕醉轉彎、鎮江冰官肴蹄、四喜烤麩同埋涼拌陳醋紅蜇頭。呢幾款冷盤開胃得嚟唔會好濃味,而且係必食嘅經典淮安菜。 跟住當然係每日新鮮原盅燉製嘅鮑魚花膠佛跳牆!以老雞、雞腳、金華火腿同豬肉做上湯嘅主要材料,加埋花膠、鮑魚、干貝同海參呢啲名貴食材一齊燉,湯色清澈但味道濃郁,而且滋養氣血,補而不燥㗎。 薺菜年糕燴桂花魚片將大大塊桂花魚片油泡再湯煮,魚肉鮮嫩冇骨,加埋軟糯嘅年糕一齊食就有唔同口感添。 你仲可以揀鮑汁撈飯或濃湯魚翅撈飯,矜貴之餘仲好鹹香惹味添。 仲有用韓國米餅整成嘅乾燒蝦球配鍋巴,爽口彈牙嘅蝦球大隻到要分幾啖先食晒,甜辣醬嘅醬汁令人食得更滋味。最後食埋酒釀湯丸啦!清甜嘅酒釀配芝麻湯丸唔會好甜膩。 餐廳依家仲特別推出外賣自取75折優惠,連新出嘅一至二人客飯餐(原價HKD138-398)都一樣有折㗎。兩餸一湯嘅一人客飯餐C都幾豐富,麻香嘅雞絲粉皮配鑊氣嘅海派回鍋肉好夾,加埋上海酸辣湯、絲苗白飯同豆漿都幾飽㗎。想知仲有咩套餐同小菜可以外賣就睇下面嘅餐牌啦!   家上海 地址:大角咀海泓道1號奧海城三期地下G19-21號舖 電話:2869 2228 營業時間:星期一至五:11:45-16:30, 18:00-22:30,星期六、日及公眾假期:11:30-16:30,18:00-22:30 限聚令下營業時間:星期一至日:11:30-18:00(堂食)|11:30-20:30(外賣)

0

【尖沙咀嫩滑海南雞飯 東南亞菜式推外賣88折】亞參雞飯

海南雞飯係香港人鍾意嘅菜式之一,亞參雞飯唔止有飯餐,仲可以成隻海南雞買走㗎。尖沙咀店仲有馬來咖喱系列,喺三間分店之中菜式選擇最多。依家除咗下午茶,外賣自取有88折優惠,順便斬料返屋企都得喎。 亞參去骨海南雞飯(HKD88)肉質好軟滑,肉味幾香甜。配上大大碗雞油飯同鮮甜嘅冬瓜雞湯,成個飯餐都幾豐富。你亦可以趁依家有外賣自取有88折優惠,淨買外賣海南雞(HKD120/半隻,HKD220/全隻)返屋企加餸喎。 亞參豬手(HKD88/例,HKD140/全隻)全隻夠3-4人食,入味唔會過鹹,最驚喜係有滿滿嘅膠質呀! 新加坡喇沙米線(HKD80)湯底有椰香味,甜中帶辣。配料有雞蛋、蝦、豆卜、魚片條、菜同芽菜,食晒都幾飽㗎。 尖沙咀店限定嘅馬來咖喱系列合共有6款飯麵菜式,呢份馬來咖喱牛腩飯(HKD78)聞到陣陣香料味,辣得嚟好啱撈飯食!牛腩大大嚿但幾腍身,分量都唔少添。 呢度仲有啲馬來小菜,馬來班蘭咖央多士(HKD22)、馬拉盞怡保芽菜(HKD30)同香煎蝦餅(HKD42/3件)都好惹味㗎。 飲品方面有馬來拉茶、薏米水、香茅薄荷特飲(各HKD25)等款式,清爽或重口味都有得俾你揀。   亞參雞飯 地址:尖沙咀廣東道新太陽廣場地庫一樓 電話:2698 7600 營業時間:星期一至日:11:00-20:00

0

【外賣中西日美食Stay Home 精選主食+甜品著數優惠】2020外賣抗疫

第三波疫情來勢洶洶,唔想去買餸減少同人群接觸就當然要叫外賣啦。小編精選中西日式嘅主菜同甜品,包保你嘅外賣一啲都唔hea,有啲仲低至6折添! 甜品 波仔×台灣超人氣Touched塔吉特 今次唔係想講波仔嘅叮叮飯,而係佢引入呧台灣最紅嘅千層蛋糕Touched塔吉特!一個8吋千層蛋糕可以分到12件,一家人週末做下午茶或飯後甜品就啱晒喇。期間限定推出三款口味之中,芒果多千層(HKD218[原價HKD240])以新鮮愛文芒果肉整成;芒果奶凍千層(HKD180 [原價$210])配搭焦香蛋皮入口酸甜開胃;仲有夾住煙韌珍珠、餅皮都充滿濃郁黑糖口味嘅黑糖珍珠千層(HKD198[原價D240]),總有一款啱你口味嘅。   波仔 專門店位置:https://www.eateasthk.com/retail   HABITŪ HABITŪ嘅Rosemantic Summer「瑰麗仲夏」,喺8間指定分店返嚟喇!雖然指定店舖會佈置成玫瑰花主題俾大家打卡,但主題餐飲買返屋企食會安全啲嘅。其中瑰麗草莓意大利芝士杯(HKD78)用上意大利芝士、以玫瑰蜜糖浸泡過嘅手指餅加入自家製玫瑰士多啤梨果醬,層次同味道都好豐富㗎;玫瑰水晶寒天(HKD68)喺微甜嘅水晶寒天注入了玫瑰花嘅幽香,可食用玫瑰花瓣配埋士多啤梨、葡萄、無花果、蘋果等新鮮水果,素食友都可以一齊食。仲有一系列玫瑰主題夏日飲品(HKD52起),冰搖玫瑰泡沫大麥葉茶、巴西莓玫瑰豆奶碎冰等等都好吸引人。   HABITŪ table 地址:銅鑼灣軒尼詩道500號希慎廣場8樓L804號舖 電話:3543 1313 營業時間:星期一至日:12:00-21:30   中式 楚撚記大排檔 唔去得大排檔,不如外賣返屋企啦!楚撚記大排檔西環同土瓜灣店開設外賣專線,西楚霸王雞、地道港式煎蠔餅、楚撚記黑栢葉爆炒雞腎花等等係佢哋熱點菜式之一,依家仲有加推優惠
,每消費HKD100即送老薑蕃薯糖水或清保涼糖水一碗添。想試嘅朋友留意佢哋嘅抗疫限時優惠
喇: – 外賣消費滿HKD600免一半運費 – 外賣消費滿HKD1,000運費全免 優惠細則: 1. 優惠期由即日至31/8/2020 2. 不得與其他優惠同時使用 3. 送貨地點不包括離島、馬灣、愉景灣、禁區及偏遠地區...

0

【東南亞主題餐廳登陸圓方 惹味午餐×香口小菜】Monsoon

ELEMENTS圓方新開嘅Monsoon主打現代東南亞街頭美食,唔單止菜式由屢獲殊榮嘅Will Meyrick設計,仲由「亞洲50最佳餐廳」Sarong Restaurant開店團隊之一嘅印尼籍大廚Gede Budiana主理。強強聯手嘅菜式有咩等別?你可以喺度品嚐到泰國、巴里、柬埔寨、印尼等燒烤、咖喱、湯麵等東南亞美食,即刻睇吓有幾正啦! 店內有大量藤製傢俱,而VIP房更加營造成「雨林」嘅環境,令人好似置身東南亞當地咁。 呢度嘅午巿套餐(11:00-14:30)款式大約兩星期轉一次,一定令你保持新鮮感。而且升級仲可以無限量添飲泰式奶茶(加HKD18),或者享用原個椰青、紅白餐飲同氣泡酒(加HKD38)等。其中前面嘅金不換炒雞肉碎配煎蛋、雞湯及泰國香米(HKD148)充滿泰式風味,以羅勒、辣椒、蒜蓉等香料炒香碎雞肉、長豆同粟米芯,熄火後放入金不換葉增添香氣;配上淡蘿蔔雞湯同放上太陽蛋嘅泰國「茉莉香米」絲苗白飯,一份午餐就試到唔同口味喇。而後面嘅香辣炒鮮蝦魷魚配青木瓜沙律及泰國香米(HKD168)以泰式辣椒醬快炒蝦、魷魚、青豆、粟米芯等材料,入口香甜惹味;加埋經典嘅泰式青木瓜沙律,酸甜辣嘅味道令人更加開胃添。 呢度嘅單點菜式都好大份,鹹蛋黃脆炸軟殼蟹沙律(HKD138)都夠3個人食㗎。將蝦乾、蒜同辣椒剁碎後加入青檸汁調味,撈埋茄子、花生碎粒、長豆、蕃茄、蘿蔔絲、椰糖、羅望子醬等製材料,配上脆口炸軟殼蟹同鹹鴨蛋,係惹味又邪惡嘅前菜呀! 如果你鍾意食魚,柬埔寨蒸咖喱三文魚(HKD132)都係唔錯嘅前菜。三文魚混合羅勒、香茅、紅咖喱、檳榔葉與椰子忌廉等調味,用香蕉葉摺成嘅葉碗蒸熟,配埋獨特nahm pla prik醬汁,香料味幾濃郁。 想分量多啲可以點主菜之一嘅芭蕉葉叢林咖喱魚(HKD168),以薑黃、羅勒、辣椒等醃製澳洲盲曹魚柳,用香蕉葉包住香烤整成。唔點特製嘅“nam pla prik” 甜辣醬都好惹味,魚肉仲好嫩滑添。 印尼索多慢煮牛肋骨湯(HKD148)經慢煮嘅牛肋骨,加入雞蛋 、馬鈴薯、番茄、亞洲芹菜、青蔥、青檸等多種香料燉煮成索多湯(Soto),湯底濃郁,牛肉亦好軟腍。配有鹹蛋、蝦片同白飯,係經典嘅印尼飲食文化。 巴東椰奶燉牛肋骨(HKD168)係香港人熱點嘅菜式之一,呢道菜椰奶味濃郁,但唔會覺得好油膩。以印尼巴東醬醃製和牛牛肋骨,加入辣椒、椰漿、羅勒等印尼香料快炒,再以慢火燉煮,令和牛更加入味。 飯後當然要食甜品啦,芒果黑糯米飯配芒果雪糕(HKD78[後])唔止有新鮮芒果,特別配埋芒果雪糕特別滋味。越南焦糖布丁配咖啡冰沙(HKD78[右])焦糖布甸配上香濃咖啡味冰沙,特別有越南風味。少見啲嘅就有花生朱古力奶油芭菲(HKD78),灑上香脆朱古力花生同糖碎增加口感。 而雞尾酒必試Monsoon(HKD78),混合伏特加、熱情果、新鮮檸檬、辣椒、泰國青檸葉糖漿同啤酒調製,好有果酒嘅感覺。而New Wild East(HKD78)選用紅肉火龍果混合Nusa Cana Rum酒、Vermout白苦艾酒、新鮮青檸、自家製菠蘿汁和Angostura 苦酒調製而成,啱怕甜嘅朋友入口。   Monsoon 地址: 尖沙咀柯士甸道西1號ELEMENTS圓方1樓1045號舖 電話:2511 0100 營業時間:星期一至日:11:00-23:00

0

【氣炸鹽酥小食免外賣 撲熄旅人夜市掃街癮】氣炸師

冇得去台灣旅行,又想食到當地嘅夜市小食可以靠自己!為咗幫大家同自己解決掛住台灣嘅苦,今次就氣炸台灣兩味夜市小食,如果想做到台式嘅脆口口感就一定要跟當地做法用木薯粉,快啲即學即整啦! 氣炸鹽酥雞×氣炸鹽酥雞髀菇 氣炸鹽酥雞 材料與分量: 去骨雞胸肉 – 1塊(約350g) 蒜蓉 – 適量 醬油 – 30g 砂糖 – 15g 五香粉 – 2g 木薯粉(即蕃薯粉) – 適量 食用油 – 適量 做法: 1. 將雞胸肉切成小塊,用蒜蓉、醬油、砂糖同五香粉醃20分鐘。 2. 沾上木薯粉,然後等5-6分鐘 3. 以160度氣炸10分鐘,反轉再用200度,氣炸6分鐘。   氣炸鹽酥雞髀菇...

0

【$4起平食傳統糖餅 鬆化酥脆蝴蝶酥×杏仁條】平霸

今次平霸帶大家去試吓平盡大圍全區嘅老馮餅家,佢哋大部分嘅唐餅都係平民價HKD4件咋。朝早9點鬆啲就去到佢地喺顯俓嘅分店,都有唔少街坊幫襯㗎,店員仲話熱賣嘅嘢假期會好快賣晒,想食要早啲去買喇。 佢哋門市大大隻字寫明「本店只用日本麵粉」,今次真係食平啲又食好啲喇。買嚟當早餐、下午茶仲可以慳返唔少錢添。 英式鬆餅(HKD4/右)size比平常見嘅大1倍。佢外層幾鬆脆,內層就濕潤啲。不過牛油味唔係好突出,不過提子乾就大粒又香喎。 老婆餅(HKD4)嘅酥皮焗到金黃色,包裹住軟綿綿嘅冬瓜蓉,賣相都幾靚,入口鬆軟。內餡仲有啲杏仁片增加口感,成個餅食落甜甜哋唔會膩。 新鮮出爐嘅蛋撻(HKD5)分別有牛油皮同酥皮,牛油皮食落香脆啲,酥皮就鬆化啲,蛋味都幾明顯。如果買半打會再平少少,而且兩款可以任意配搭㗎。 小編覺得最有驚喜係蝴蝶酥同杏仁條(各HKD50/半磅),睇落有少少貴,但其實分量都幾多㗎。蝴蝶酥足足有成23塊,即係HKD2.2一件。而杏仁條都有18條,即係HKD2.8一條,都好抵食!不過食唔到咁多可以買細包裝(HKD10)過吓口癮。呢兩款都標榜手製225層薄脆酥皮,睇吓層次幾豐富! 蝴蝶酥食落好香脆,仲有糖粒集中喺餅邊,甜度適中唔油膩。而杏仁條食落鬆化酥脆,牛油香十足呀,食到尾仲有陣杏仁香,真係食唔停口囉! 招牌脆口曲奇(HKD32/半磅)有4種口味,包括由左至右嘅核桃、伯爵茶果仁、牛奶朱古力杏仁同埋特濃朱古力。唔好以為佢細細盒,數吓有成32塊,即係一蚊一塊咋!小編覺得茶味香濃嘅伯爵茶果仁就最吸引喇。   老馮餅家 地址:沙田大圍顯徑邨街市M25號舖 電話:從缺 營業時間:星期一至日:07:30-19:30

0

【旺角新派川菜中西合壁 辣控必試辣到噴火套餐】祥仔辣辣

煮開西餐,尤其擅長法國菜嘅大廚張錦祥Ricky,平時好鍾意食辣,出街食飯都會自備辣味香料。最近佢就開咗以川辣菜為題嘅祥仔辣辣,作為祥仔概念行政總廚都同精於四川菜嘅大廚誠哥交流,部分菜式會加入世界各地嘅西式香料,譬如印度黃薑、法國南部香草、泰國檸檬、台灣金不換等,出奇地令辣香層次有更多變化喎。 餐廳環境有啲中日式同古現代混合嘅感覺,感覺都幾輕鬆自在。食物方面都一樣俾大家「有得揀」,大部分嘅菜式都可以自選少辣、中辣、大辣,甚至地獄辣。Ricky話如果你可以生食指天椒或者成包18禁薯片,歡迎你挑戰地獄辣呀!如果冇特別指明辣度,都會以中辣烹調,所以小編都試呢個辣度體驗吓先。 食辣要食得出色除咗挑戰辣度,仲會享受帶酸、麻、香、甜等唔同嘅辣味,所以辣到噴火精選套餐(HKD388/兩位)就將呢啲味道注入六道菜式。前菜先試酸辣開胃嘅惹火山木耳同埋肉質嫩滑嘅川味口水雞,呢兩款人氣川菜未至於辣到噴火,但開始有麻香嘅感覺留喺口喇。 招牌菜可以二揀一,先睇呢盤水煮安格斯牛肉,紅卜卜咁真係幾嚇人,但加入迷迭香令麻香更有層次,食慾即刻大增!入口即刻俾麻辣味衝擊到要飲水,但肉味依然明顯,呢樣真係估佢唔到。不過餐廳會按時節轉換肉類,下次嚟就可能轉款喇。 相比之下,同樣落咗迷迭香嘅祥仔招標酸菜魚會辣啲,但開頭會俾自家製嘅酸菜掩蓋辣度,但後尾真係愈食愈辣同麻痺呀!鱸魚厚薄適中冇咩骨,質感滑不留口添,大力少少都會夾斷魚肉㗎。 套餐仲包埋三款特色小菜,噴火小籠包係罕見嘅口味,湯汁微辣幾惹味,唔蘸醋都好夠味,不過呢款就冇得揀辣度喇;香芹豬肉手水餃內面冇加辣,怕辣嘅朋友可以蘸少啲醬汁;乾煸四季豆反而爽甜唔辣喎。 最後食埋冰凍嘅黃金南瓜露解辣收尾,清涼甜滑,而好似海底椰嘅亞塔子仲增加咬口添。 食唔到咁多都有其他選擇,好似午市套餐嘅麻婆豆腐石鍋飯(HKD78)都俾足誠意,炒飯底配上滑嫩甜辣嘅麻婆豆腐,食晒都幾飽㗎。 而全日供應嘅招牌辣辣撈丁(HKD58)先麻後辣好惹味,撈勻櫻花蝦同蛋汁一齊食唔止香滑,好似冇咁邪惡添!   祥仔辣辣 Ricky’s Spicy Kitchen 地址:旺角彌敦道639號雅蘭中心2樓201號舖 電話:2885 1910 營業時間:星期一至日:12:00-15:00,18:00-23:00

0

【燒烤主題維港海景餐廳 法式風味×爆汁嫩滑西冷】Harbourside Grill

要搵高質抵食嘅海景餐廳?早排郭富城慈善表演樓下,就有間開業冇耐嘅西式燒烤主題餐廳Harbourside Grill。喺尖沙咀坐擁180度維港景色,嚟食個超值午市套餐(HKD208起)、睇住日落歎杯酒,或者喺星空下品嚐注入法式元素嘅晚餐都一樣咁正! 入餐廳前可以喺廚窗見到廚師們準備餐飲。 室內外座位都可以睇到維港景色,浪漫情調滿分! 先嚟個牛油果羽衣甘藍藜麥蘆筍沙律(HKD118) 開開胃啦!以健康嘅黑、紅、白三色藜麥置底,混入新鮮蘆筍、牛油果、羽衣甘藍、少少糖脆片同清新柚子醋,口感層次豐富,而且幾大份添。 如果想揀小食類,香煎帶子配脆皮豬腩肉(HKD218)伴上味道偏日嘅咖喱椰菜花蓉、酸豆同金葡萄乾好惹味。加上煎到焦香又厚肉嘅日本北海道帶子,同埋慢煮12個鐘後再烤到外皮香脆嘅豬腩肉,口感同味道都好夾,而且唔會覺得好油膩。 牛肉他他配酸種麵包(HKD158)會喺你面前即席調製,將澳洲牛柳加入生蛋黃、洋蔥、酸豆、鹽、辣汁等配料,如果有唔食嘅嘢都可以預先提出。配埋自家焗製酸種麵包一齊食,酸爽煙韌嘅感覺幾醒胃。 鱸魚配薯蓉及法式龍蝦湯(HKD328)將馬鈴薯壓碎整成牛油薯蓉置底,再放上煎香嘅鱸魚同龍蝦蟹鉗。然後倒入香濃嘅法式龍蝦湯,真係好似飲緊龍蝦嘅精華咁! 呢度嘅牛扒有唔同產地可以揀,大廚就推介呢款USDA認證嘅美國Snake River Farms西冷扒(HKD488/300g),經濕式熟成後以西班牙頂級烤爐Josper Grill配日本木炭烤製,炭香味十足㗎。入口肉汁豐富,味道濃郁又嫩滑,而且非常厚肉!另外可以喺五款醬汁之中自選一款。其中香草牛油醬汁、波爾多醬同胡椒汁都適合配搭肉類,但講到配牛扒大廚就建議香草牛油醬汁喇。配埋伴碟嘅油封蒜、洋蔥蓉同Espelette辣椒牛油,可以變化出唔同嘅口味。 呢度仲搵到罕見嘅反烤蘋果撻(HKD158/2人份),紐西蘭Braeburn蘋果經糖煮後依然厚肉有咬口,加上肉桂條嘅香氣,令味道更香甜。如果蘸埋法式酸奶油一齊食,甜度會相對低啲。 餐廳仲有多款Mocktail同Cocktail。以鮮甘蔗汁、鮮菠蘿汁、椰子同青檸調製嘅Staycation(HKD88/右)同埋青瓜味突出嘅Vida Verde(HKD88)都係冇酒精又非常清新嘅口味。 有想酒味又帶果香的話,可以試吓Sherry Cobbler(HKD118),混合Fino雪利酒、新鮮西柚汁、St-Germain 接骨木花利口酒、新鮮菠蘿汁同蜂蜜水,女士都易入口。 Shades of Ray(HKD128)混合伏特加、杏仁、紅菜頭同青檸,入口有種蔬果酒嘅感覺。   Harbourside Grill 地址:尖沙咀海港城海運大廈4樓OTE 401號舖 電話:2619 9100 營業時間:星期一至日:12:00-22:30

0

【珍奶控人生必食甜點 精選6款韓台話題口味】人生必食

珍珠奶茶紅遍台灣、香港、韓國等地方,除咗飲料之外仲推出好多出其不意嘅珍珠奶茶創新甜點。小編精選6款喺台灣同韓國牽起熱潮嘅甜點零食,如果作為珍奶控嘅你仲未試過,快啲搵吓有冇代購幫到你啦! 台灣篇 皇族珍珠奶茶大福 呢個珍珠奶茶大福(約HKD16/4個)有三層,煙韌嘅麻糬外皮配搭奶茶豆沙內餡,而最內層就係黑糖珍珠粒。你可以室溫食佢軟糯嘅口感,想煙韌啲可以放入雪櫃凍食添。佢曾經喺香港7-11有售,你有冇錯過呀? 銷售點:台灣麻糬主題館   卡滋爆米花(珍珠奶茶口味) 睇戲必食嘅爆谷都可以整成珍珠奶茶味?一杯珍珠奶茶口味爆谷(約HKD13/80g)入面有2隻味,深色嘅係黑糖珍珠味,而淺色就係奶茶味。脆口嘅爆谷真係癲覆咗對珍珠奶茶煙韌嘅想像呀!。 銷售點:台灣7-11、康是美   珍珠奶茶酥 鍾意食鳳梨酥嘅朋友不如試吓珍珠奶茶酥(約HKD100/ 10包),佢外皮同一般鳳梨酥冇咩分別,內餡以珍珠奶茶調味,用冬瓜蓉混合椰果製成珍珠嘅口感。呢款傳統甜點加入新口味,都幾特別喎。 銷售點:台灣新東陽門市   黑糖珍奶雪條 黑糖珍奶雪條(約HKD26/4條)嘅外表完全係一枝冰凍咗嘅黑糖珍珠奶茶囉!以奶茶混合焙炒黑糖,濃味中帶啲焦香,再加上超級Q彈嘅珍珠,夏天食真心正! 銷售點:台灣全聯福利中心、萊爾富便利商店、OK便利商店   韓國 黑糖珍珠奶茶波波 韓國人氣零食黑糖珍珠奶茶波波(約HKD10/40g),係用厚厚嘅朱古力包住Q彈嘅黑糖珍珠,唔少食過嘅朋友都表示陣奶茶香味好濃郁,好似飲緊黑糖珍珠奶茶咁! 銷售點:韓國7-11、CU、GS25   黑糖珍珠奶茶味杏仁 韓國Tom’s Farm嘅堅果有好多種口味,連黑糖珍珠奶茶味杏仁(約HKD48/190g)都出咗喇!黑糖奶茶味朱古力包住香脆嘅杏仁,口感一流,啱晒鍾意甜食同果仁嘅朋友呀! 銷售點:韓國CU便利店   相片來源:104659、floral_floral_room、xiaoailovetaiwan、jessicaaa1007、livingconsultant、daveltk、yogisisfood、chocoduk_who、jyun791004、choo_permarket、busan_waboiso、bokhee.duck