Author: tfffeileentsoi

0

【晚晚爆場厚切刺身 舌戰板半千層海膽】鮨一

依家食咩都好,「勁量」永遠都係最吸引人。如果食日本菜,厚切刺身同大大份嘅海膽都必定令人群情洶湧,所以去尖沙咀鮨一食嘢要早早早好多訂位,因為都幾爆場㗎! 老闆會挑選一啲特別嘅食材做刺身,認真不時不食。 海葡萄沙律(HKD128)主要用咗沖繩海葡萄同長崎蕃茄,超爆新鮮同清甜。原來新鮮嘅海葡萄放耐咗會縮水,所以撈好醬汁就要食咗先。醬汁少少酸尾尾,都幾開胃。 重頭戲之一嘅特上錦繡刺身 (HKD468)有8款海鮮,每款各兩份——噴火灣帶子肉、三陸海岸真鯖、四國油甘魚腩、韓國紫海膽、北海道連子鯛、北海道目張魚同噴火灣牡丹蝦。厚切刺身充滿魚油嘅滑、甘香同鮮甜味。加多HKD100就可以好似上圖咁,有埋日振島吞拿魚,佢嘅特別之處係喺魚鮫位切出嚟,唔係時時有得食㗎。注意:其他海鮮都有機會因應時節轉換款式。 千層海膽飯(HKD298/大)有成板半韓國馬糞海膽,仲灑咗金箔喺面,好豪氣呀!連埋拖羅蓉同加咗赤醋嘅壽司飯,用紫菜包住一齊食唔會好膩,因為酸酸哋嘅赤醋可以中和到油膩嘅感覺。 靚嘅天婦羅會無咩油印到落紙度,呢份炸蝦天婦羅(HKD78)就做到呢個效果喇,食多幾件都無咁罪惡。 鮨一 地址:尖沙咀厚福街12號藍馬商業大廈18樓 電話:3705 9227 營業時間:星期一至日: 12:00-14:30;18:00-23:00   地址:大埔翠怡街3號翠怡花園 16 號舖 電話:2656 6634 營業時間:星期一至日: 12:00-15:00;18:00-23:00

0

【閨蜜嘅浪漫午後 秘嘆仙氣花系High Tea】Cafe Bauhinia

成日聼人講女人嘅錢最易搵,似乎又幾有道理。香港各式餐廳多不勝數,Cafe都可以開到大街小巷都有,有不少特色Cafe更令女生們瘋狂。呢間位於上環嘅Cafe Bauhinia,以花店做主題,由餐廳門面到内部都有好多花飾擺設,就連食物都滲透咗花嘅元素。如果你係愛花之人,一定會對呢間Cafe念念不忘,事源餐廳定時有插花教學課程,可以讓你享受插花藝術嘅樂趣,又可以一嚐可口甜點。最適合喺呢度享受一頓下午茶。 一踏入Cafe呈現喺眼前嘅就係各種時令鮮花,餐廳每個角落都佈置不同植物,打造出一個非常悠然嘅自然環境空間,另外更會聞到陣陣鮮花香氣,讓客人猶如置身在花園之中。 身為粉紅迷嘅小編,對今次呢個下午茶套餐直頭著迷,以粉紅色為主嘅熱帶遊蹤(HKD428 /2人)亮點多多,Flamingo水泡套住菠蘿特飲,一大壺菠蘿汁讓你自由斟,玩味十足。甜點方面都有驚喜,芥末八爪魚沙律味道好清新,做開胃菜最適合不過,再配搭滑溜溜Oreo木糠布甸,口感更上一個層次,除此之外仲有紫薯撻 、紅粉馬卡龍、綿綿士多啤梨花,不同花款甜點。 甜點雖然係下午茶主角,鹹點一樣不可缺少。香煎北海道珍寶帶子,微微煎至金黃色,加上蟹籽喺面層做點綴。日式明太子手羽煎得恰到好處,水份鎖係雞肉中,味道濃郁油唔油膩。另外,仲有芝士龍蝦沙律包食添呀。 餐廳老闆非常貼心,只要食呢個下午茶套餐就有一份小禮物送俾顧客,仲有4個唔同選擇添。 Cafe Bauhinia 地址:上環新街市街23號地下 電話:2368 9339 營業時間:星期一至日 11:30-19:00

0

【同閨密約會girls talk 歎盡尖沙咀4大下午茶】The Ritz-Carlton、Shangri-La Hotel、The Langham、Hotel Icon

日日30度高溫,咁熱天就算出街血拚掃貨都滿足唔到都市女性,食得舒適又可以影相呃Like先係真理。小編有推介!位於尖沙咀呢四間酒店新出嘅下午茶,每間都有特色主題,甜品造型各不同,更有小禮物帶走。酒店主題下午茶大多期間限定,趁熱抓緊夏日尾巴,快快約埋好朋友試試啦。 熱帶水果派對 High tea就要夠曬「High」,位於全香港最高建築嘅Café 103,絕對係High嘅代表,除咗品嚐精美甜點外,仲可以品賞維港兩岸景色,一舉兩得,俾盡Like! 曾於法國任職多年餅廚,同時包攬多個獎項嘅總廚Franck Michel今次為Café 103精心製作一系列以夏日水果為主題嘅甜點,為客人送上清新怡人嘅下午茶體驗。甜點有用多種水果製成糖漬水果蓉嘅熱情果泡芙、可口奶油酥餅底層嘅雜莓檸檬杏仁蛋白蛋糕、白朱古力脆漿包裹杏仁慕絲嘅杏仁黃梅朱古力球、甘香醉人嘅紅莓蜜瓜橙酒芭菲杯、外形可愛吸引嘅番石榴椰子芒果朱古力球。每樣甜點都好精緻,完全將整個仲夏滋味共冶一爐。 熱帶下午茶 供應日期: 直至8月31日 時間: 15:30-17:30 價格: 星期一至星期五 - 每位HKD382/兩位HKD622星期六、日及公衆假期 - 每位HKD402/兩位HKD642 Café 103 地址:尖沙咀柯士甸道西1號香港麗思卡爾頓酒店103樓 電話:2263 2270 細味鳥語花香 聽住現場演奏古典音樂,飽覽維多利亞海港景色盡在眼廉,細嚐鳥籠裝飾盛載美味下午茶,簡直係夏日一大享受。九龍香格里拉大酒店為大家呈獻全新「鳥·語」下午茶,精選美食包括米芝蓮二星評級香宮出品嘅上乘鹹點,以及一系列巧手精製清涼小吃及甜品。 由四層高鳥籠盛載懸垂掛於天花,相機即時要食先。今次仲有趣味十足嘅印有自己照片泡沫咖啡,同埋迷你鳥籠可以帶回家。咸點包括甜酒桔子鵝肝凍、脆皮乳豬多士及蘋果鳳梨酥;別類特色小吃更讓人鍾意,龍蝦卷伴日本柚子番紅花蛋黃醬、阿拉斯加蟹肉三文治及櫻花芝士餅等,食完一件接一件,完全停唔到口。 「鳥·語」下午茶 供應日期: 直至8月31日 時間: 14:00-17:00 價格: 星期一至星期五...

0

【你準備好打卡未 3大搶眼又吸睛甜品餐廳】 ATUM Desserant、AMMO、DK Cuppa Tea

當相機食先已成爲一種普遍現象,食物已唔單止係局限於飽足,而係涉及所有感官嘅感受。餐廳為令顧客可以喺美食中感受到愉悅感,亦花盡不少心思。小編今次行盡港島,搜羅到三間富有特色甜品餐廳推薦俾大家,等你都可以影相打卡呃盡Like! 銅鑼灣視覺藝術享受甜品 甜品向來都係女仔摯愛,除咗其賣相夠精美吸引外,最緊要係可以影相呃Like。位於銅鑼灣L Square嘅ATUM Desserant,甜品花款多又夠創新,不時更有驚喜。以即興作畫去呈現甜品,滿足到客人胃口之餘,同時都帶俾客人視覺上嘅享受。就連女神周秀娜都前來朝聖,會橫掃社交網絡都唔係無道理喎。 餐廳鎮店之寳——IMPROVISATION(HKD348/二人用),可以話係黎呢度不容錯過嘅甜品。每檯客人由一個廚師負責作畫,廚師會觀察客人特徵後就畢加索上身,開始喺矽膠蓆上作畫。 以芒果醬同椰子醬畫出唔同線條,再放上色彩繽紛嘅甜品配料,有荔枝奶凍、香蕉果凍、綠茶糥米糍、朱古力脆脆、新鮮雜莓等。如果你有個別唔鍾意食嘅配料都可以提出,廚師會安排其他甜品代替。另外,廚師會邊做邊介紹每種配料味道,等你有時間可以不停相機食先。 驚喜在後頭,即製嘅液態氮雪葩,廚師一邊搞拌,煙霧一邊湧出,效果如仙氣飄飄,雪糕有兩種味道竹炭朱古力味同金手柑味,佛手柑雪糕味道微酸又獨特,配合竹炭朱古力雪葩,口感同味道都好夾。 ATUM Desserant 地址:銅鑼灣駱克道459-461號The L. Square 16樓 電話:2956 1411 營業時間:星期一至五 14:45-23:30;星期六至日 13:00-23:30   金鐘童趣幻想下午茶 另一個女神常出沒嘆下午茶熱點就係高級餐廳喇,位於亞洲協會香港中心嘅 AMMO,樓底足足有五米高喺香港甚為少見。簡約時尚嘅環境 由7 月 16 日起至 8 月 31 日將化身成荷蘭國寶級繪本人物- Miffy 朝聖地!事關餐廳邀得 Miffy 進駐,推出期間限定「AMMO...

0

【無限時任飲任食 雞煲海鮮火鍋打孖上】同人鍋

喺呢個凡事都講求效率嘅社會,就連食餐飯都要嗱嗱臨食完走人,有時想同幾個知己或者一班好耐無見嘅朋友見面食飯傾偈都唔知去邊好。今次小編就有好介紹啦,呢間位於尖沙咀嘅同人鍋就可以滿足到大家需要。唔單止可以無限時任飲任食唔同火鍋靚料,仲可以一次過品嚐兩種唔同嘅味道,對於鍾意打邊爐又好食得嘅朋友,絕對不能錯過! 餐廳座位闊落,利用一列玻璃窗,令餐廳環境更開揚。另外,設多張木長枱同木圓枱,無論三五知己抑或一班人gathering都好適合。雞煲海鮮肥牛火鍋(HKD288)第一波先食個即叫即煮嘅雞煲,雞塊特別以慢煮方式炮製,令雞肉更嫩滑,味道惹味,帶點麻辣香味。緊接加入湯底戰第二波,二人或以上仲有龍蝦湯底同花膠湯底選擇,揀龍蝦湯嘅話就會見到大大隻龍蝦另外奉上。 食火鍋最緊要食材夠新鮮,呢點同人鍋老闆都好看重,堅持海鮮每日喺本地批發商入貨。每款都精心挑選過,種類更多達十幾款:海蝦、生蠔、青口、蜆、帶子,有時連瀨尿蝦都有。 特級手切牛頸脊(HKD198)肉香味濃,牛肉入口即化,肉質細嫩軟腍。食火鍋點可以淨係食雞煲同海鮮,丸類及蔬菜類配料都唔少得。除咗一般粟米、冬菇、龍蝦丸、章魚丸、貢丸、蔬菜外,仲有一啲較少有嘅火鍋配料,例如飛魚籽魚蛋腸、煙肉豬肉腸、龍蝦沙律丸、香草豬肉腸等等。 多款飲品都係任飲,有成十幾款任揀,除咗有汽水、紙包飲品,仲有餐廳自家煲製嘅竹蔗茅根同菊花蜜,配搭火鍋可以清熱。 最後有好嘢益大家,幫襯時記得申請埋同人鍋會員,每次惠顧可按人次獲得1分,累積滿一定分數就可享折扣優惠,另外只要係會員嘅朋友兼可有享折扣,好嘢當然要開心Share。 同人鍋 電話:2392 8433 地址:尖沙咀山林道29-31廣利樓1樓及地下4A號舖 營業時間:星期一至日:17:30-23:30

0

【號稱地上最強 爆汁肉香黑豚肩燒丼】和氣食堂

當大家仲著迷食海鮮丼之際,位於黃大仙新開張幾個月嘅和氣食堂已經超前有埋燒丼,號稱地上最強燒丼飯令人心動想去試試係咪真係咁勁。經小編試探後發現除咗燒丼飯夠吸引,自家製雪糕都係餐廳大熱之選,一於同小編去試下啦! 餐廳座位寬闊,仲設有梳化位。食物種類選擇多,而且頗新潮。食餐飯最緊要就係食得滋味又坐得舒適啦。 號稱地上最強燒丼飯,點可以錯過。黑豚肩燒丼(HKD72) (附泡菜),日本鹿兒島直運到港嘅豚肉。配上自家製醬汁,再高溫烤熟,可以鎖住肉汁,令肉味好濃郁。入口甘香而不油膩,脂肪分佈均勻。另配小泡菜,更加醒胃。小編食到津津有味,非常滿足! 想食刺身嘅朋友唔洗擔心,呢度依然有海鮮丼滿足你。珍寶赤蝦海鮮丼(HKD98)有成7款唔同嘅海鮮,小編都心大心細唔知食邊樣先。超巨型赤蝦,蝦肉晶凝通透;厚切三文魚色澤飽滿,海膽更是入口即溶。仲有印有餐廳名嘅玉子,色彩繽紛令小編都要相機食先。 雞翼食得多,但冷製雞翼都係第一次食。電擊雞翼(HKD48)將雞中翼一分爲二,可以避免雞翼成日卡肉喺骨同骨之間嘅問題喇。冰凍雞翼唔單止唔油膩仲酸甜適中又開胃,外層似搽咗蜜糖甜甜地 ,做前菜好開胃。 呢度仲有自家製雪糕,宇治抹茶芭菲(HKD52)特選日本頂級宇治抹茶粉,抹茶味濃郁而不苦澀,香滑有實感。配合清淡蕨餅同團子煙韌,增加口感層次。底層仲有脆片, 令整杯雪糕更豐富。 和氣食堂 電話:2641 8829 地址:黃大仙正德街103號黃大仙中心南館地下G12A號舖 營業時間:星期一至日11:00-22:15

0

【食包包食飽 嚴選3大特色麵包】麥上日光、ICONIC H 特色熱狗店、好包

如果要問一個人鍾意食某種食物嘅程度到邊?大概就係好似小編,可以一日三餐都食同一類食物咁誇張。佢就係麵包喇!麵包作為一種用五穀磨粉製作再加熱而製成嘅食物,看似普通其實種類大不同。今次小編就遊走九龍新界,一日三餐都食包包食飽。一次過搵齊三種富有特色嘅麵包,有啲更曾風靡一時添,麵包控一定要睇下! 麥上日光 來自奧地利近百年歷史嘅烘焙品牌,秘訣就係自家培植天然酵母,發酵時間長,再加上低油、低糖、全麥高纖,相當健康。天然酵母更用葡萄乾、啤酒花同麥胚芽,低溫發酵9日,先可以做得出咁醇香鬆軟嘅麵包。小編拎嚟做早餐就啱晒! 幾多人大排長龍就為食到佢嘅招牌五層流心芝士軟包(HKD25)(左)用邪惡澳紐忌廉芝士,人手逐層鋪上,麵包外層再灑上芝士粉。一啖咬落,芝士即湧出黎。忌廉芝士幼滑濃郁,麵包相當鬆軟,兩種質感配搭得剛剛好。 同樣有五層流心仲有落重本嘅五層流心法國朱古力芝士包(HKD36)(中),以法國名牌 Valrhona 含 62%可可成分頂級朱古力, 配以澳紐忌廉芝士及朱古力包製成。將邪惡級別推上至高境界。 另一款新產品五層流心熱情果芒果芝士包(HKD32)(右)選用時令熱情果同芒果作主打,加上澳紐忌廉芝士, 特別增添紅莓乾令口感更豐富。 麥上日光 電話:3956 5437 地址:尖沙咀金馬倫道32-34號福橋大廈地下D號舖 營業時間:星期一至日10:00-21:00 好包 麵包控去到邊都想食包,用心製作嘅麵包真係加晒分。好包嘅麵包選用意大利麵粉人手製成,招牌無骨雞翼包系列全部係人手將雞翼去骨,咁貼心啱晒上班族一路食,一路做嘢啦。 香蒜椒鹽無骨雞翼包(HKD35)雞翼經人手去骨再醃製過好入味,雞肉腍嫩又多汁,配上沙律醬、青瓜、洋蔥、綠邊菜,每啖都散發雞油香味,真係啖啖滋味。 另一個招牌秘製慢煮豬腩肉包(HKD42)更落唔少心思。豬腩肉經慢煮8個鐘,再配搭腌製蘋果片、綠邊菜、紅洋蔥、西瓜、自製甜酸醬,賣相夠曬誘人。豬腩肉味道香濃,同外層香脆嘅義大利包好夾。入口唔會過鹹,肉質亦一啲都唔嚡。 好包 電話:6856 4772 地址:元朗西菁街2號興旺樓地下1C號鋪 營業時間:星期二至日:12:30-20:30,星期一:全日休息   ICONIC H 特色熱狗店 紅磡人氣熱溶芝士熱狗店ICONIC H勝在款式多且口味特別,有超過二十種熱狗腸、十多款配料醬汁可供搭配選擇。每個熱狗即叫即製,將熱狗先烘過,再放上香腸同配料醬汁。係香港首創「熱溶芝士熱狗」嘅本地品牌。仲要份量超足料,夜晚唔駛驚肚餓要食宵夜。 熱狗創意無限,至尊海膽狗(HKD138)香港人咁鍾意食海膽點可以唔試。自家製海膽醬,包面鋪滿海膽再配上香滑牛油果,香而不膩,食過返尋味。中間更用皮脆多汁嘅法蘭克福腸配當造嘅韓國馬糞海膽同新鮮菜苗,香氣滿溢! 食個熱狗配返杯菠蘿啤(HKD68)簡直完美配搭。選用原隻菠蘿,粒粒果肉調配加啤酒,冰涼又消暑,飲啖即時降溫。仲有得揀零酒精啤酒嫁。 ICONIC H...

0

【懷舊風潮新一頁 重延60年代茶記風情】老馮茶居

最近,又一股熱潮襲港,就係懷舊風潮。似乎人人都對過去嘅事物念念不忘,衣着行復古風,餐廳亦以懷舊作招徠。位於元朗嘅老馮茶居就係一間仿照六十年代老香港茶記,可能你會誤以為係一間老字號,但其實餐廳老闆係位80後年輕小子,令人大吃一驚。 店裡裝潢令人如置身於當年舊式廉租屋,鐵閘鐵窗、雜貨店、士多、錢莊等等。座位分開兩邊,中間圓枱摺櫈任君選擇,具有港式風味。 一間懷舊餐廳除咗裝修要有賣點,食物質素都要有水準。老馮茶居就搵咗有40年經驗嘅點心師傅老馮先生坐鎮喇。呢個招牌菜蝦醬蒸腩仔飯(HKD38)用缽仔蒸飯係傳統客家做法,先蒸飯底約五分鐘,再加入紹興酒炒香蝦醬,混合腩仔後再連同米飯蒸多十分鐘,米飯乾身得嚟帶有米香。 令小編覺得有驚喜嘅仲有古法千層糕(HKD22)做法花盡心思,先將肥豬肉汆水,冷卻後再加糖醃成冰肉,混合糖冬瓜、鮮牛油、鹹蛋黃、椰絲,然後冷藏45分鐘,再同千層糕包皮梅花間竹疊起,再分兩次合共蒸45分鐘,工序咁複雜,食落都感受到絲絲甜意。 傳統點心就食得多,鵪鶉蛋燒賣皇(HKD28)都係第一次食,鵪鶉蛋蒸到內裏軟心,連先打嘅豬肉及蝦肉餡,咬出啖啖鮮香。 老馮茶居 地址:元朗大棠路66號地舖 營業時間:星期一至日:08:00-23:00 電話:2659 8826

0

【暖男熱選西餐廳 浪漫靚裝女神bb勁冧豬】Mr.Right

成日聽身邊女性朋友傾訴幾時先可以遇到自己心中嘅Mr.right,但對於一個鍾意周圍發掘新野食嘅小編嚟講, 搵到一間啱心水而又適合自己嘅餐廳就如同遇上對的人一樣重要。最近,小編就喺元朗發現咗新開張無耐嘅Mr.right喇。想知小編遇上佢會有咩火花?咁就要跟實喇! 餐廳裝潢同擺設都具有時尚感,加上落地玻璃令環境空間感更大,日頭自然光照射下餐廳光線充裕,令人好舒適。就眼睇座位頗多,又夠寬闊,好適合情侶約會同家庭聚餐。 環境已經得分,食物方面都討小編喜歡,呢個法國麵包蟹海鮮盤(HKD368)上檯已經令小編嘆爲觀止,唔單止係法國麵包蟹大隻過塊面,海鮮種類仲好豐富,包括有法國生蠔、日本帶子、車厘蜆、翡翠螺、大蝦。生蠔同帶子令小編一試就愛上,生蠔肉質份外爽口,味道好鮮甜,金屬味唔會過重,帶有細膩層次感。日本帶子肉身豐厚又有彈性,咀嚼口感鮮嫩滑溜,小編都迫不及待緊接食多個。 生蠔迷有福利喇!餐廳依家有優惠活動,南非生蠔(HKD128/6隻)唔會好重海水味,比較容易入口。 黑松露雜菌蟹肉燴天使麵(HKD138)似乎係呢度必點菜式之一。蟹肉味道鮮甜,撈埋散滿黑松露嘅天使麵入口啖啖鹹香,非常惹味!天使麵係意粉中最幼细麵條,口感更爽口彈牙,餐廳選用嘅天使麵配搭簡直中小編心水! 另一道主菜都好用心調製,慢煮西班牙黑毛豬扒(HKD188)講起西班牙黑毛豬,你可能會即刻諗到黑毛豬火腿,但你又知唔知西班牙黑毛豬係食橡果長大,其橡果含豐富油分同蛋白質,令黑毛豬肉質肥美,且肉味更濃郁。黑毛豬經慢煮後再焗至7成熟,切開兩邊仲可以見到肉色呈粉紅,入口好Juicy,肉質軟腍爽滑。 令小編好驚喜嘅係餐廳有埋英國進口嘅梳打飲料,Belvior梳打汽水(HKD38) 係全天然梳打採用鮮花、鮮搾果汁,再加入已烹制過嘅香料連同泉水一同製作,無含任何食品添加劑、防腐劑同人造色素。無論男女老少都好啱飲。 Mr. Right 地址:元朗西菁街23號富達廣場地下32-39號舖 營業時間:星期一至日12:00-23:00 電話:2478 9000

0

【生果多到滿瀉 首爾大熱水果BON BON】Café de Paris

喺韓國一度風靡全城嘅鮮果沙冰店Café de Paris,上年駐入香港銅鑼灣,同樣成爲少女們嘅潮聖熱點。小編好奇點解會叫Café de Paris,原來係創辦人喺法國留學時結識到太太,之後兩人想將呢份浪漫甜蜜帶返韓國,造就呢間好Sweet嘅Cafe。店舖以海外新鮮空運生果Bon Bon為主打,現時有士多啤梨、芒果、青提子、車厘子四款生果口味,店舖亦將推出不同新口味,好期待添。 店內裝潢同韓國本店相似,簡潔白色牆身配上落地大玻璃,陽光折射入黎,感覺好舒適自在。再加上白色小圓檯配搭藍、紅、白色凳,每張檯上仲放有好可愛嘅巴黎鐵塔擺設,作拍攝道具最適合啦。 士多啤梨杯 (HKD128)係呢度嘅熱款Bon Bon杯,面層鋪滿大量由韓國新鮮直運到港嘅士多啤梨,粒粒都好大粒,而且香甜多汁。cream入口相當幼滑,就連怕肥膩嘅小編都忍唔住食多幾啖。食到中間部分仲有冰涼士多啤梨沙冰,就算士多啤梨沙冰都係韓國直運鮮果醬再人手後製嫁。整一杯士多啤梨杯看似簡單,但其實無論係食材定份量都好講究。 熱賣款仲有青提杯(HKD88)提子形成一個小山丘,驟眼睇應該有20~30粒提子,好震撼。提子係美國直運,粒粒青提似乎都有精心挑選過,食完成杯都無粒係唔新鮮嘅。 店主好貼心,因應唔同客人需求,仲特別推出Mini Size嘅生果杯,同樣有士多啤梨(HKD68)、芒果(HKD58)、青提(HKD48)口味,細細杯最啱小朋友啦。 想飲杯野解渴,咁就要試下呢杯西柚汁 (HKD58)杯頂係一大片西柚,你可以一邊飲下面嘅西柚汁,一邊拮埋啲西柚肉食。入口味道酸中帶甜,相當醒胃。 Cafe de Paris 地址:銅鑼灣登龍街18號V Point地下5號舖 電話:6436 2181 營業時間:星期一至日:12:30-22:30