Author: 大食積

0

【鬼怪風日式燒肉放題店 任食高質和牛拼盤回本】燒鬼

食日式燒肉都可以玩味十足的話,非呢間銅鑼灣新開嘅燒鬼莫屬喇。餐廳以日本鬼怪傳說做主題,大走暗黑古怪風。最平嘅日式燒肉放題(HKD298)就已經任食超過10款來自鹿兒島同宮崎嘅高質和牛燒肉,其中更有罕見嘅腹脅肉;而且有多款魚生刺身、一系列日式料理都係任食,可以話CP值爆晒燈呀! 店內無論喺裝潢設計、食物細節上都加入唔同嘅暗黑鬼怪元素。不過暫時只做晚市,記得提早預約就唔怕摸門釘啦。 呢度嘅日式燒肉放題會供應超過10款來自鹿兒島同宮崎嘅A4和牛燒肉,其中必試呢款牛鬼拼盤。拼盤內有8款和牛部位俾你到唔同口感同味道層次,包括前胸肉、胸腹肉、上小排肉、橫隔肌、腹脅、中腹肉、內側腹肉同上肩肉。牛肉部位會視乎日本時令限定而轉換,身為食肉獸嘅小編望到都流晒口水呀! 其中市面上少有嘅腹脅肉都喺拼盤內可以搵到,呢款肉靠近牛大腿根側嘅牛五花肉部位,每隻和牛只有8-10公斤腹脅肉,所以特別矜貴㗎。牛肉嘅雪花紋理均勻,味道比其他五花肉清爽,入口充滿牛味但竟然一啲都唔膩! 如果想再滋味啲,可以升級加配熊本F1肉眼或西冷(各HKD100),包保你有燒牛扒嘅感覺呀!不過唔使擔心淨係得牛肉,放題都有上等美國牛肉、豬肉、雞肉、海鮮同蔬菜俾你任點嚟燒烤㗎。 醬料可以提升燒肉嘅惹味程度,餐廳就準備咗三款自家製醬汁,有用咗大量京蔥加埋日式醬油整成嘅蔥油醬(左)、惹味嘅辣味噌醬(中)同埋比較清新嘅蘋果柚子紅酒燒汁(右)任你蘸。 雖然係燒肉放題,但都一樣有各款鮮味嘅魚生刺身。 其中鰹魚同埋用芥末漬蠑螺嘅蠑螺鬼都係比較少見嘅刺身款式。 另外,仲有柚子醬油和牛壽司、明太子醬帶子炙燒壽司、枝豆、泡菜豆腐、日式泡飯等日本料理都可以任食,試勻全部真係捧住個肚走呀!   燒鬼 地址:銅鑼灣駱克道459-461號The L. Square 9樓 電話:2856 0226 營業時間:星期一至日:17:30-23:30 價錢: 星期一至五:HKD298 (17:30-19:30)、HKD388 (19:30-21:30)、HKD348 (21:30-23:30) 星期六、日:HKD308 (17:30-19:30)、HKD398 (19:30-21:30)、HKD358 (21:30-23:30)

0

【帝逸自助餐近百款環球美食 必試爐端燒×紅咖喱雪糕】帝逸酒店Alva House

位於沙田石門嘅帝逸酒店開業唔夠一年,已經吸引好多客人幫襯佢哋嘅自助餐,仲經常full booking添!究竟呢間Alva House有咩咁吸引?佢哋嘅「環球美食巡禮」自助餐有近百款各地嘅精選菜式、即製手工意式雪糕回歸之外,仲會時不時加入新元素。今個月尾就會推出鮑魚龍蝦粥、榴槤主題甜品等冷熱盤。不過咁多嘢食食邊樣先?即刻跟住小編睇吓有咩推介啦!   除咗有各式芝士、Ham等多款開胃前菜,餐廳嘅沙津菜係用同本地農民合作嘅水耕菜作為食材,有機之餘仲有品質保證,新鮮又爽口㗎。 自助餐必歎菜式當然有刺身啦!6款即切時令款式選擇都唔少,帶子、三文魚、舌拿魚等都好肥美,啱晒鍾意食刺身嘅人呀! 至於港人最愛嘅海鮮冷盤有基本嘅龍蝦同長腳蟹,不過連麵包蟹都有真係幾驚喜。海鮮啖啖肉,質素亦相當有誠意。 冷盤之中仲有即開生蠔專區,選用美國生蠔,每隻開出嚟都好肥美,食落仲好creamy! 講到帝逸自助餐嘅主打區域,不得不提即場燒烤專區,呢個區域有即烤爐端燒、厚切鴨肝多士、香煎金菇肥牛卷、即炸天婦羅等特色邪惡料理! 燒烤食物由於係新鮮即整,每道菜式拎上手都熱辣辣,食落去仲好juicy!小編推薦一定要食鴨肝多士,煎到金黃色嘅鴨肝非常甘香仲唔膩添! 即點即切嘅美國戰斧牛扒鮮嫩多汁,肉味濃郁。 呢度少有地提供兩款即點即切牛扒俾大家揀,實物比起相更加震撼,非常足秤。 仲有賣點之一係呢度嘅肉食特別多選擇,唔鍾意食牛肉可以揀烤原隻西班牙乳豬、蜜糖烤雞,或者比較中式嘅京式片皮鴨、沙田特色乳鴿、雞粥、海南雞等。 熱食區亦絕對唔馬虎,除咗基本粉麵區,亦設有新鮮牛肉同埋本地養殖嘅花尾龍躉做賣點嘅粥區, 大大條龍躉放喺你面前,你都咪話唔吸引呀! 食到咁上吓就可以嚟到甜品區,除咗有得任食Mövenpick雪糕,更加要試呢度即場自家製嘅意大利手工雪糕。雪糕質地軟滑之餘,味道亦非常多元化,除咗有蜜柑、榴槤等鮮果口味,其中一款竟然係泰式咖喱紅辣椒味,就咁睇同普通雪糕無異,但食落口就會有濃郁嘅椰香咖喱味,慢慢更會感受到一股辣味嘅後勁慢慢浮現,認真有趣喎! 甜品區仲有大把賣相吸引嘅甜品任你揀,好似呢啲用新鮮生果整嘅靚靚果撻咁。 由六月尾開始,自助餐會有新菜推出,到時過嚟試一定要試鮑魚蟹鉗弼呢啲咁鮮味嘅菜式呀! 仲有一系列榴槤主題甜品都係今個尾推出,榴槤控必試呀!呢度嘅酒店自助餐選擇真係唔少,而父親節慶祝優惠可以俾大家食平啲,想試嘅朋友快啲book枱喇!   「環球美食巡禮」自助餐 午餐供應時間:12:00-14:30 價錢: 星期日至五:HKD328/成人、HKD228/小童及長者 星期六:HKD388/成人、HKD268/小童小童及長者   晚餐供應日期: 18:30-21:30 價錢: 星期日至四:HKD638/成人、HKD418/小童及長者 星期至日:HKD698/成人、HKD448/小童小童及長者 *另須加一服務費   Alva...

0

【中環新場10大話題餐飲 歎嫩滑燒雞+本地手工啤】BaseHall

中環怡和大廈六月開咗個新場,BaseHall匯集咗十間唔同特色嘅話題食店,可以食勻多國料理,仲有兩間風格各異嘅酒吧俾你歎本地手工啤同特調雞尾酒添。喺繁忙時段想食又怕等得耐?又可以電話網上點餐,方便又快捷。以後喺中環,無論係食Lunch定同朋友Happy Hour都多個選擇喇! 新場嘅室內設計行現代化嘅風格,夜晚仲會有現場DJ嘅音樂演出,夠晒有氣氛。有別於一般嘅美食廣場,BaseHall內嘅8間餐廳同2間酒吧都擁有個性、話題十足。依家一於逐間介紹俾大家啦! Pub 1842 Pub 1842由本地手工啤酒品牌少爺啤主理,當然要試吓佢哋嘅主打手工啤酒,另有雞尾酒同每期推介嘅小產量威士忌。開放式酒吧內設有10個生啤酒龍頭,供應啤酒廠內嘅鮮釀啤酒,啱晒同朋友嚟坐低飲杯嘢Relax吓啦! 除咗酒水,店內亦供應各款英式焗批同每日唔同口味嘅咖喱,特別啲嘅有煙肉梅菜批,入面加入中式風味嘅梅菜做fusion,又幾獨特喎。   BaseHall Bar BaseHall Bar就供應充滿亞洲風味嘅特調雞尾酒,另有即磨咖啡、沙冰等選擇。 再配埋份The Classic Sandwich(HKD128)就滿足喇,仲有Daily Special嘅款式俾你揀。   Roti Tori  呢間日式烤雞餐廳Roti Tori 由人氣燒鳥店Yardbird班底主理,必食呢度招牌嘅日式燒雞(HKD68/1/4隻、HKD118/半隻),肉質嫩滑Juicy,仲配埋三種醬汁俾你蘸。 如果唔想食咁飽就可以試吓呢度嘅紫蘇飯糰(HKD25)。   Honbo 呢度同樣食到本地自家製美式漢堡店Honbo嘅出品,佢哋嚴選時令天然食材製作漢堡,經典漢堡(HKD78)大小適中,啖啖都食到濃郁嘅牛肉香。 Return of Lemak 馬來西亞特色嘢食你會諗起咩呢?Return of Lemak嘅娘惹叻沙(HKD128)望落惹味,湯底濃郁,又點可以抗拒呢? 另外,呢間食店主打現代變奏版嘅馬來西亞椰漿飯,呢款炸雞椰漿飯(HKD138)坊間少見,將本地食材同現代煮法完美結合。...

0

【深水埗滋補小店以酒入饌 花雕藥膳雞×酒香醉物】醉藥雞

叫醉藥雞並唔係因為佢哋「最弱雞」,而係少有地以酒、藥膳同時入饌嘅主題餐廳。喺深水埗新開嘅小店主打一系列嘅醉物以及唔同嘅養生雞鍋,究竟有幾滋補?睇埋落去啦! 呢度必試嘅砂鍋醉藥雞(HKD68)少有地以雞酒做湯底,雞酒特別用咗糯米酒同三斤三黃雞嚟煮,酒味唔會太濃烈,藥性比較溫和。再加入雲耳、紅棗、淮山、薑呢啲配料,湯底偏甜易入口,特別啱女士同注重養生人士㗎。 而醉雞藥膳湯米線(HKD58)就用熬咗12個鐘嘅雞湯加入當歸、淮山、北芪、黨蔘、圓肉等八種藥材嚟做湯底,火候十足。 呢度仲有唔同嘅醉物冷盤俾你歎,啱晒夏天食呀!當中嘅花雕酒加入桂花糖調味,醉物食落酒味突出之餘又唔苦。 其中嘅原隻醉乳鴿(HKD98)切片上都依然有啖啖肉嘅感覺,乳鴿肉滲透住淡淡酒香,咬落肉質結實嫩滑。 醉物之中小編大推呢款醉蝦(HKD88),驟眼望落分量唔少亦夠大隻。而餐廳對於唔同食材所用嘅花雕酒濃度同浸酒時間都特別講究,連殼嘅蝦浸酒嘅時間會比其他醉物耐,但如果浸得太耐就會令食材變苦,所以醉蝦浸酒嘅時間就大約維持喺2個鐘。咁樣蝦肉就會同樣入味而質感依然爽口彈牙,酒香濃郁喇。 想一次過試幾款海鮮冷盤,又唔想太多就可以嗌醉三鮮(HKD75)喇!除咗醉蝦之外,仲可以試埋彈牙唔韌嘅鮑魚同花螺添。   醉藥雞 地址:深水埗福榮街103號地舖 電話:3705 0477 營業時間:星期一至日:12:00-22:30

0

【Chill遊西九文化區食足全日 懶人野餐+全海景歐亞菜】Local自駕遊

西九文化區可以話係近期嘅文青集中地,雖然疫情令唔少文化活動暫停咗,不過呢度開始愈嚟愈多特色餐廳進駐,又有大片草地可以俾你邊吹海風邊野餐,最啱周末同朋友、情人、家人嚟放空啦!   新推懶人野餐組合 喺西九文化區自由空間嘅留白LiveHouse係由本地手工啤酒品牌麥子同一班音樂愛好者創立嘅特色餐廳,可以話係集音樂、美食、手工啤酒、咖啡於一身嘅地方,平時定期會有駐場音樂人、文化工作者喺度演出。而喺疫情期間呢度雖然就暫停咗現場音樂演出,但係佢哋都有新搞作㗎! 想野餐又唔想拎住一袋二袋,就可以試吓佢哋最近新推嘅外野餐盒Set(HKD288/兩人份)喇。成個Set有齊炸雞薯條配黑松露醬、各款沙爹串燒、甜品同飲品。除咗個木餐盒之外,仲齊幫你準備埋啱晒Feel嘅紅白格仔野餐墊,咁就可以兩手空空去野餐啦!不過記得野餐後要交還返個餐盒同餐墊俾餐廳呀。   留白 地址:尖沙咀西九文化區自由空間地舖 電話:2868 4333 營業時間:星期一至四:11:00-18:00、星期五至日:11:00-21:00   藍染cafe Chill住歎啡 唔野餐都有其他選擇嘅,呢間藍染主題cafe唞唞就好受文青歡迎喇。呢度可以隨你喜好自選咖啡杯同咖啡豆,而咖啡價格就視乎選用嘅咖啡豆而定,連咖啡都可以Tailor-made! 而店內亦有少量食物供應,連和牛三文治(HKD318)都有添,隔住個mon都流晒口水呀!   唞唞 Rest Coffee Gin 地址:尖沙咀西九文化區藝術公園地下GF-04號舖 電話:2697 8938 營業時間:星期一:12:00-19:00,星期二至日:12:00-00:00   飽覽西九夜景歎法菜 Hea到差唔多開始肚餓?想食得好啲,不如去同樣都喺西九文化區嘅PANO食餐豐富嘅法國菜啦。呢度幾乎可以睇到全維港海景,餐廳嘅行政總廚Ken更為新店精心設計咗一系列特色菜,唔少名人都係佢嘅捧場客嚟㗎。 行政總廚Ken設計嘅名人Tasting Menu(HKD888/7道菜,HKD1,188/10道菜)揉合咗歐亞飲食元素,每道菜都好獨特㗎。其中呢個椰子味道濃厚嘅香茅椰汁鮑魚花膠雞湯,靈感嚟自Ken細個成日飲嫲嫲煲嘅鮑魚雞湯,依家就用竹絲雞熬製3小時,再加入香茅、椰子同花膠。湯汁充滿精華嘅味道,香濃而唔會互搶雞湯同食材之間嘅味道;而蘋果木煙燻西蘭花燉蛋配馬糞海膽以玻璃蓋住蘋果木煙燻,令鹹香嘅海膽沾上煙燻嘅蘋果木香。連同底層嘅西蘭花同燉蛋一齊食,可以中和海膽嘅鹹味,而口感滑嫩之中更有層次添。   PANO 地址:西九文化區博物館道22號一樓1號舖及天台 電話:2361...

0

【純素法式甜點網店開門市 主打低糖馬卡龍+法式撻】moono

法式甜品就食得多,但純素版你又試過未呢?專賣純素甜點嘅moono由網店起家,最近終於喺深水埗開實體店喇,除咗招牌嘅純素馬卡龍、純素法式撻、手製曲奇外,更有店舖限定嘅件裝卷蛋糕添!呢間小店嘅甜點出品無論係賣相定味道配搭都係由店主主理,甜點外型設計簡約得嚟又小清新,而且味道同製法方面都有唔少嘅突破,希望俾人知道原來純素甜品都可以好好味。新店嘅甜點每日都會轉換唔同嘅限定口味推出,咁就Keep住有新鮮感啦! moono嘅實體門市開喺深水埗嘅「合舍」內,室內木系裝潢貫徹小店簡約風格,有幾個堂食位置,但都係以外賣生意為主。合舍內亦有售賣唔同嘅文學雜誌、書本,絕對係文青們嘅好去處。 店主想純素甜點無論喺賣相同味道都吸引到人,佢哋嘅迷你法式撻就係其中一個好例子喇。左邊嘅橙花水開心果撻(HKD32)底層有濃厚嘅開心果醬,中間唧入加有橙皮嘅橙花水Cream,鋪平後再唧上自家製嘅豆乳忌廉,灑上開心果碎做點綴。而右邊嘅蘋果金寶撻(HKD32)就係小店嘅熱賣之選,內餡有自家焗製嘅焦糖蘋果,喺出面未必搵得到㗎!值得一提嘅係,佢哋嘅撻皮每日都喺自家工作室新鮮焗製,保證撻皮鬆脆。  而件裝卷蛋糕係店舖限定嘅甜品,款式會不定期轉換。當日就食到柚子焦糖純素卷蛋糕(HKD49/塊;HKD185/卷),佢嘅內餡用咗自家製豆奶忌廉,中間加入黑糖豆乳做點綴,質感軟綿綿,味道清新又唔膩。而最近卷蛋糕更出咗新Menu,將會有新口味陸續推出,大家就要期待吓喇! 當然唔少得moono招牌嘅純素馬卡龍(HKD30/塊;HKD175/6塊)啦!當日精選有海鹽黑朱古力、紅桑子玫瑰、伯爵茶、開心果、黑芝麻五款,盒裝口味可以隨意配搭,咁精緻買嚟送俾朋友都好喎! 各款曲奇(HKD58/包)都係用咗自家製嘅植物牛油,確保曲奇入面嘅材料盡量無添加。而且呢度嘅曲奇口味獨特,冇乜地方食到㗎。 曲奇總共有6款口味,包括:京都宇治抹茶曲奇、花生焦糖曲奇、無麩質嘅豆乳雪球、紫蘇曲奇配紅莓醬夾心、味噌曲奇同粟米曲奇。   Moono 地址:深水埗大南街186號地下(合舍內) 電話:從缺 營業時間:星期三至日:12:00-19:00

0

【經典零食品牌大玩花臣 變奏版新品形象反轉】人生必食

有冇留意到平時食開嘅零食原來識得變身嘅呢?!各大零食品牌喺自家經典零食嘅基礎上,不時都會大玩花臣,為大家注入新鮮感。小編今次就幫零食控搜羅到一大堆創意十足、估佢唔到嘅變奏版零食新品,雖然大部分都未必可以喺香港買到,但Bookmark定,第時見到就記得買嚟試吓喇!   麥提莎朱古力脆餅 平時食嘅麥提莎都係一粒粒嘅,今次推出嘅新品就係一塊塊嘅麥提莎朱古力脆餅,好似將麥提莎壓扁咗咁, 食落既有濃郁嘅牛奶朱古力味,又咬到粒粒麥芽脆米,咁樣嘅新品就更有新鮮感啦!   銷售點:韓國7-11   Oreo「朱古力批」 Oreo嘅產品除咗喺內餡有唔同嘅變化之外,韓國7-11最近嘅新品仲喺餅乾嘅外層搞啲新意思。喺傳統嘅Oreo餅度淋上黑、白朱古力醬,俾朱古力封住成塊Oreo,將Oreo變成好似「朱古力批」咁,朱古力控就啱晒啦!   銷售點:韓國7-11   HERSHEY’S扭紋雪糕筒 人氣朱古力品牌HERSHEY’S經常推出唔少以自家朱古力做主題嘅食品,今次同樣喺韓國7-11就有得賣民款朱古力雪糕新品,朱古力同雲呢拿雪糕扭紋,啖啖都係品牌獨有嘅朱古力濃香。   銷售點:韓國7-11   日本波子汽水糖雪條 由細食到大嘅樽裝波子汽水糖應該大家都唔陌生,但呢款咁經典嘅糖最近就變身成冰品喇。淺藍色嘅雪條正正係熟悉嘅波子汽水味,由雪葩質地嘅外層包住入面較Creamy嘅內層,入面更內藏粒粒波子汽水糖添。   銷售點:日本便利店   明治阿波羅士多啤梨朱古力乳酪 明治其中一款經典零食「阿波羅士多啤梨朱古力」相信大家都唔陌生,原來已經推出咗50年喇!咁開心梗係要慶祝吓啦,最近特別推出阿波羅士多啤梨朱古力同款口味嘅乳酪新品。呢款限定嘅杯裝乳酪(約HKD15/2杯)貫徹朱古力同樣嘅組合,上層係酸甜濃郁嘅士多啤梨乳酪兼有果肉,下層就係幼滑香濃嘅朱古力醬,見到一定要試呀!   銷售點:全日本便利店同超市   原條繽紛樂雪條 放大咗嘅繽紛樂?!kinder推出嘅冰品其中有款十足十繽紛樂嘅樣,仲要係原條上,無論賣相同味道都非常相近,但就多咗一陣雪糕嘅冰涼感。同期亦有推出幾款以皇牌朱古力演變而成嘅雪糕冰品添! 銷售點:外地各大超市、便利店   Skippy花生醬雪糕 人氣花生醬品牌Skippy踩入雪條界,推出一系列Skippy花生醬主題冰品,更喺香港有得賣添!繼早前有花生醬朱古力雪糕批(HKD19.9)同特濃花生醬甜筒(HKD21.9),最近更有特濃花生醬雪糕三文治(HKD19.5)登場。三款雪糕都各有特色,食落都有唔同口感同風味㗎,但一樣嘅係佢哋嘅花生醬都同樣咁突出。梗係要拉埋身邊鍾意花生醬嘅朋友一齊試啦!...

0

【新界首間日式蛋料理餐廳 新推雲朵意粉+五式玉子燒】Tamago-EN

蛋!全部都係蛋!來自新加坡嘅日式蛋料理餐廳@Tamago-EN繼進駐旺角、北角之後,首間新界分店喺元朗開幕喇。除咗有生雞蛋拌飯、玉子串燒呢啲睇得又食得嘅招牌菜之外,最近更新推出4款雞蛋主題意粉,其中海蝦明太子醬冷意粉有成隻雲朵雞蛋鋪喺面,賣相即刻加晒分呀。快啲睇埋落去有咩正嘢啦! 元朗新店地方都夠晒寬敞,店面全部都以標誌性嘅雞蛋圖案做裝飾,非常易認。 先睇吓呢度必食嘅終極TKG生雞蛋拌飯(HKD39),招牌雲朵雞蛋鋪滿飯面,單睇賣相都好吸引啦。呢種生雞蛋拌飯雖然喺香港少有,但就係日本傳統嘅營養早餐,餐廳嚴選新鮮嘅沖繩雞蛋,將蛋白發打至蓬鬆狀態,食之前戳穿蛋黃,加入醬油、調味料撈嚟食,食落竟然一啲都唔單調,口感細滑富蛋香。除咗就咁食,仲可以加錢配醬漬三文魚、碎金鎗魚腩、牛油果等配料添。 5款特製玉子串燒(HKD68)都係呢度必食嘅蛋料理,蛋皮一層層咁捲,捲足4層先有呢個層次效果㗎。呢款玉子燒偏向關東口味,味道偏甜。上面仲有5款唔同口味嘅配料,包括親子三文魚、鱈魚子沙律、蟹肉、海藻醬同蕃茄仔。 特製TKP・海蝦明太子醬冷意粉(HKD92)係全新推出嘅意粉,得元朗同北角店有得食咋。呢款凍食嘅意粉面頭鋪上雲朵雞蛋,賣相搶眼。配上爽嫩嘅大蝦、明太子醬、沙律菜,配搭獨特,仲略帶梅子嘅酸酸甜甜,特別開胃! 另外推介埋呢款同樣新出嘅日式拿坡里義大利麵(HKD78),仲有盛載住半熟溫泉蛋嘅「雀巢」點綴。呢個「雀巢」係用幼麵炸成嘅麵餅,入口脆身。意粉以酸甜嘅蕃茄汁炒成,口味比較大眾化,大人小朋友都咁啱食㗎。 焦糖香桃梳乎厘班戟(HKD98)即叫即整,班戟面已經唧上焦糖,唔夠仲可以加埋旁邊嘅糖漿。微熱嘅班戟食落口感綿密,入口仍有梳乎厘嘅空氣感,配埋甜蜜嘅香桃同忌廉一齊食層次就更豐富喇。   たまご園 Tamago-EN 地址:元朗朗日路9號形點一期2060號舖 電話:2650 3335 營業時間:星期一至日:12:00-22:00

0

【灣仔新店手製漢堡配咖啡 泰式生菜包+三牛漢堡】Mad Burger

食漢堡包就要飲汽水?灣仔呢間新開嘅小店就話你知原來漢堡配咖啡都可以好夾㗎!Mad Burger主打創意特色漢堡,自家製嘅漢堡扒用咗三種牛肉mix出嚟,牛味突出。佢哋更自創出一款泰式肉碎生菜包漢堡,真係成個肉碎生菜包夾喺Burger入面,夠晒創新啦!除咗漢堡之外,佢哋將咖啡呢個元素配漢堡做pairing,唔知又會擦出啲咩火花呢? 呢間漢堡新店店面以白色水泥簡約設計,同外國啲小店一樣咁Chill呀!而呢度係以外賣生意為主,店內只有兩張Bar檯、幾個座位,但就少有地見到漢堡店有一部專業級嘅咖啡機坐鎮喎。 佢哋嘅Burger選擇唔算多,勝在款式夠特別,就連最Classic嘅Right Mad(HKD78)喺度都唔簡單㗎。入面嘅牛肉漢堡扒係自家製,由本地牛小扒、牛腩同美國牛肩胛扒三種部位嘅牛肉,加入牛油blend埋一齊;牛油可以鎖住漢堡內嘅肉汁,食落有牛味之餘仲juicy啲添!另外,Burger內夾咗炒香嘅焦糖化洋蔥嚟增加甜味,成個感覺好和諧。 應該大部分人都同小編一樣冇諗過泰式肉碎生菜包可以做Burger啩?!呢度就好有創意咁研發出呢款Thai Mad(HKD78)喇。佢哋跟足泰國傳統做法炒泰式肉碎,加入金不換、檸檬葉、泰式辣椒粉同米碎等材料一齊炒香,入口微酸都幾開胃喎。 仲有一款素食嘅選擇就係Veggie Mad(HKD78),以牛油果做主角,同樣加入炒過嘅洋蔥,食落味道層次豐富唔單調。Burger除咗單嗌之外,仲可以加配自家製薯條(+HKD20)添。冇錯呀,呢度連薯條都自己整,真係好’Mad’!將本地黃肉薯仔去皮切浸冰水再切條,先焗一次,等客人落單先拎去炸,咁樣會令薯條表面更薄脆,薯仔香味亦會比較重。 小店好有創意咁將Burger同咖啡組合埋一齊,原來咖啡嘅香味係可以提升肉本身嘅炭烤風味,層次都唔同啲!而呢度選用本地烘焙嘅咖啡豆,其中比較特別嘅係呢杯Dirty(HKD38)。以冰凍嘅鮮奶做基底,面頭再加入熱辣辣嘅Espresso,飲嘅時候兩者就慢慢融合埋一齊。 小編當日嘅Pastas of the Day係香辣魷魚意粉(HKD88),以意大利傳統Agli E Olio方式用香蒜、橄欖油同辣椒炒香意粉,再加入新鮮魷魚,鮮甜惹味。   Mad Burger 地址:灣仔灣仔道181A-181G號長春大廈地下A號舖 電話:6792 5926 營業時間:星期一至日:12:00-19:00

0

【疫情下自製「15小時登機之旅」 澳洲家庭還原歐遊樂趣】網上熱話

因為疫情冇得周圍飛?呢個澳洲家庭就話你知唔係喇!佢哋模擬咗成個飛行體驗,喺屋企嘅客廳打造咗一個專屬嘅飛機機艙,由登機前嘅安檢、飛機上嘅餐飲服務,全部細節都一絲不苟。連登機證、飛機餐單等等都自製埋,驟眼睇仲非常逼真!在家隔離都可以「搭到飛機」,成家人喺呢個「飛行之旅」亦玩得好開心添。想睇Russell一家點樣喺疫情下自娛,就要睇落去喇! 事源呢個Russell澳洲家庭本來就計劃好一個長達11個星期嘅歐遊之旅,點知就受到疫症影響而取消咗。喺失望之際就決定一於自製航班,搞返個在家旅遊版! 搭飛機梗係要有登機證啦。睇真啲,原來呢張登機證係自製嘅,都呃得吓人喎! 上機之前過咗安檢嗰關先!俾三個仔女玩埋角色扮演,又似模似樣喎。 個個都坐定定,連頸枕、娛樂設備都準備好晒,正式開始「15小時飛行之旅」喇! 起飛後,先將預備好嘅零食派俾乘客先,再附上飛機餐單一張。 搭長途機最期待嘅飛機餐出現喇!有Burger、薯條、汽水仲有甜品咁,望落都幾豐富喎。 雖然個「飛機餐」冇乜特別,但佢哋依然咁Enjoy呀,睇吓佢哋都食得幾滋味~~ 食飽飽就最好喺機上眠一眠啦! 「多謝乘搭Lounge Chair Air……」話咁快就要落機喇,睇呢個乘客面上嘅笑容,應該都幾滿意呢間「航空公司」嘅Service啦。 呢個澳洲家庭充分表現咗「The best budget is no budget!」,網民大讚澳洲爸爸有創意之餘,仲建議佢哋做戲做全套。繼「登機之旅」後,不如再改建埋酒店房繼續個旅程咁話喎。其實喺屋企悶悶哋,咁樣自娛吓都幾好!   圖片來源:Kirsty Russell@Twitter