Author: 大食積

0

【土瓜灣小店掃街食炸物 爆餡韭菜餅+巨型炸雞髀】平霸

平霸搵食搵到去土瓜灣喇!今次就外賣咗三間土瓜灣小店嘅特色炸物,款款都唔超過廿蚊,有唔少食落仲好驚喜添。想知今次試咗邊啲抵食炸物就要睇落去喇!   1. 日昇小食 韭菜餅(HKD15/3件)真係好有驚喜!個皮煎到好金黃,一搣開,入面啲韭菜爆晒餡,係落足料嘅。 嚟到呢度梗要試埋呢款炸豆卜釀魚肉(HKD15/6件),咬開層次分明,魚肉同豆卜本身都有調味,所以唔使加醬汁都夠味   日昇小食 地址:土瓜灣馬頭圍道428號地下C舖 電話:6043 9799 營業時間:星期一至五:12:00-00:30,星期六、日:12:30-00:30     2. 囍囍小食部 轉個彎見到呢間囍囍小食店,廿蚊都唔使就食到大大隻生炸雞髀(HKD18),佢大隻到同塊面差唔多大㗎!雞髀上面嘅粉漿唔算厚,啲皮咬落脆卜卜,肉質夠嫩滑,仲啖啖肉添。 呢度仲有魚柳包(HKD13),雖然入面只有兩條魚柳條都幾單調,但炸魚柳勝在夠脆,而且入面啲魚肉唔乾身,搽咗滿滿嘅千島醬。   囍囍小食部 地址:土瓜灣天光道50號地下 電話:2712 6962 營業時間:星期一至六:08:00-19:00   3. 魚蛋佬 正正喺隔離嘅呢間魚蛋佬同樣主打各款特色小食,成間舖都貼滿Menu,嘢食款式都幾多。 見到魚蛋佬雲吞(HKD10/5粒)就即刻嗌嚟試試佢!個Size就幾迷你,一啖一件啱啱好,店舖亦預先加咗椒鹽提味,連醬汁都唔使落。仲有呢款出面少有嘅「鬼馬雙拼」(HKD11/8條;HKD22/20條),有豬柳條同墨魚條揀,雙拼都仲得!   魚蛋佬 地址:土瓜灣天光道50號地下 電話:從缺 營業時間:星期一至日:10:00-20:30...

0

【師大燈籠滷味登港排長龍 30多款配料自由組合】燈籠滷味

等到頸都長,終於等到燈籠滷味香港店開始試業喇!落戶銅鑼灣登龍街嘅燈籠滷味係繼台北師大夜市本店之後嘅首間海外分店,將夠晒地道嘅台式滷味引入香港,有成30多款配料俾你自由配搭㗎。比起本店,香港店嘅款式更加多元化,除咗有加熱滷味之外,亦有唔同嘅台式小食、飲品同芋圓,即刻睇吓邊款最吸引你啦! 食過嘅都知,呢啲台式加熱滷味類似港式車仔麵,可以依照個人喜好自由揀唔同嘅滷味配料。但如果太多配料令你花多眼亂嘅話,香港店都好貼心咁set咗唔同嘅套餐,有師大人氣配料組合、滷汁滷味精選同有營素食選擇,有選擇困難症都唔使怕!呢度堂食免收加一服務費,不過每人最低消費HKD30。 一大碗滷味有唔同配料擺喺你面前,未食先滿足呀!呢碗「吃你滷味」套餐(HKD56)嘅配料大部分都係用滷汁滷過嘅,仲會配一個自選麵底添。 呢個套餐一共有5種配料,包括滷豬大腸、滷豬腱肉、滷豬耳、滷雞腎同高麗菜,全部都滷得好入味,而且各自有唔同咬口;加埋高麗菜同冬粉嗦晒啲滷汁,咁嘅配搭一流呀! 想有唔同嘅配搭,就要揀「自由是個好東西」(HKD10起)喇!你可以自選唔同配料(每款HKD9-12不等),再包一款自選麵。 大豆皮(HKD10)同米血糕(HKD10)都係台式滷味必食之選,一樣非常入味。除咗呢兩款之外,亦有唔少食材都由台灣直送,配合埋台灣本店以多種中藥材秘製嘅滷湯真係原汁原味呀! 食台式滷味,識食梗係要點王子麵(+HKD2)啦!佢嘅麵質同平時食開嘅公仔麵有啲唔同,不過為咗迎合大眾口味就特別將麵底煮得腍身啲。 除咗滷味之外,呢度有香脆地瓜條、台式香蒜腸等台式小食,嗌午市套餐加HKD12就可以加配其中半份喇。 而呢款綜合芋圓(HKD28/凍)暫時只有晚市供應。有齊芋圓、地瓜圓、紅豆、珍珠等配料;芋圓雖然夠軟腍,但略嫌冇乜芋頭味。 套餐亦可以加配各款飲品,呢度有四季春同桂花烏龍兩款自家製冷泡茶(加HKD13),而汽水(加HKD8)都有台味嘅蘋果西打同黑松沙士。   燈籠滷味 地址:銅鑼灣登龍街39號地舖 電話:2581 2223 試業時間:星期一至日:12:30-17:00、18:30-22:00

0

【名古屋班戟熱店九龍灣試業 兩味梳乎厘班戟香港獨賣】Hoi Hoi Pancake House

名古屋班戟人龍店Hoi Hoi Pancake House終於嚟到香港喇!喺九龍灣MegaBox嘅新店依家已經開始試業,除咗帶嚟招牌夏威夷果仁忌廉夏威夷班戟等多款日本熱賣口味,仲有兩款香港限定嘅梳乎厘班戟添。呢度同時供應各式鹹點熱食同Lunch Set,喺度食完正餐直落食甜品都得呀! 嚟到呢度梗係要試招牌嘅夏威夷果仁忌廉夏威夷班戟(HKD108)啦!香港店都係選用日本直送嘅原材料,麵粉仲係特別調製,整出嚟嘅班戟鬆軟而有咬口。 今次品牌都專登為香港新店設計咗兩款限定款式,抹茶忌廉梳乎厘班戟(HKD118)就係其中一款喇!以日本滋賀縣有150年歷史嘅名店丸安茶業高級特製嘅抹茶粉,食落甘香味濃而不甜膩。配合埋日本北海道十勝紅豆,係班戟嘅perfect match呀! 另一款香港限定口味就係港人至愛嘅法式焦糖梳乎厘班戟(HKD98)。吉士忌廉醬creamy柔滑,面頭仲有層焦糖脆脆,喺軟綿綿嘅梳乎厘班戟之中增加薄脆嘅口感。 呢度除咗甜品,仲有鹹食㗎!炸豚肉定食(HKD88)用咗鹿兒島豚肉眼,肉質軟滑,加上外層薄脆嘅吉列皮口感層次豐富。配上微酸嘅豬扒汁同日式他他汁,一次可以試到兩種風味。 擺盤咁靚嘅墨西哥Taco飯(HKD78)加入多款墨西哥香料,入口非常惹味。而且配有牛油果、蕃茄等蔬果,清新嘅感覺中和返香料嘅辣味。 秘製慢煮漢堡扒配手造麵包(HKD98)入面塊漢堡扒足足有3cm厚㗎!以歐美免治牛肩肉炮製,肥瘦適中,香口有肉汁添。配埋兩個每日自家製嘅墨魚汁包同櫻仁籽包,蘸汁食就嗦晒啲精華喇。 呢杯玫瑰牛奶咖啡(HKD39)來頭唔小㗎,以本地得獎咖啡師特別為Hoi Hoi Pancake House調配嘅咖啡豆沖製,入口有淡淡嘅黑朱古力同榛子味;加上玫瑰花瓣做點綴,賣相夠靚之外仲充滿花香味添。   Hoi Hoi Pancake House 地址:九龍灣宏照道38號MegaBox 1樓19-20號舖 電話:2461 7000 試業時間:星期一至五:08:00-19:00,星期六、日:12:00-22:00

0

【本地星級大廚八道盛宴 鮑魚和牛炮製限定餐牌 】Test Kitchen×Butler

間唔中想食餐好?依家機會嚟喇!Test Kitchen同Butler聯手推出一連三日嘅八道菜晚宴以「追憶・尋回最初的味道」為主題,兩位大廚親自炮製八道精緻好味又有故事性嘅菜式,啱晒識食嘅你啦。一次過食到用多款矜貴食材,究竟將鮑魚、鵝肝、M7和牛等整成咩菜式?小編喺度率先同大家介紹其中幾道菜先! 炮製今次盛宴嘅兩位本地星級大廚原來都大有來頭㗎,Test Kitchen主廚Devon Hou(圖左)入廚15年,已經喺唔同嘅米芝蓮星級餐廳任廚,尤其擅長於西班牙菜。而Butler大廚Ray Choi(圖右)同樣有十多年入廚經驗,曾到訪日本大阪嘅La Cime學藝,所整嘅料理充滿個人風格。 平時食香煎鵝肝通常都會好油膩,但呢道鰹魚配鵝肝就唔同喇,除咗將鵝肝煎香,更加入鰹魚、意大利五花肉湯;配合酸瓜同日本生薑,減退油膩感仲增加味道層次添。 杏鮑菇雞肉配鮑魚呢道菜式集三種和而不同嘅口感,加上魚肝醬,令成道菜嘅鮮味更加提升呀! 清淡嘅娃娃菜都可以做主角?呢款紅椒堅果醬配娃娃菜喺娃娃菜加上鹹檸醋同杏仁碎,配合自家製西班牙紅椒堅果醬,兩者味道相輔相成又醒胃。 以「雙蝦」炮製嘅意大利餃子自然鮮味十足啦!餃子加入紅蝦之外,再以日本櫻花蝦、羅勒油提味。 Fine dining又點少得精緻嘅甜品呢?其中一款就係茶味蕨餅配麵包雪糕,加入脆皮酥嘅麵包雪糕同蕨餅,質感豐富。另外,仲有蔥油帶子同黑蒜M7都一樣好惹味㗎,想試就咪錯過今次嘅限定menu喇!   “If We were in Charge”盛宴 地址:西環西營盤干諾道西 158A 號地下3號舖 舉辦時間:2020年2月27-29日 19:00 / 20:30 價錢:HKD1180/八道菜 (HKD480配搭紅白餐酒;HKD380配搭非酒精飲品) 購買門票:https://www.testkitchen.com.hk/devonray  

0

【大圍新開石燒牛扒買一送一 熟成肉眼扒軟滑味濃】Grill’er

大圍最近新開嘅石燒牛扒Grill’er除咗啲扒夠靚,仲可以自由加配鵝肝、虎蝦、北海道帶子等高質食材喎,比平時嘅選擇多啲。呢度嘅石燒牛扒最平HKD78就食到,而少有嘅熟成牛扒都唔係好貴,即刻睇吓有幾正啦! 由依家起至3月13號都有買一送一試業優惠,每晚9點後嗌HKD78以上嘅扒餐都會免費送一客Grill’er精選(HKD78)。 呢度嘅重量級牛扒係超值之選嚟㗎!呢款美國28日風乾熟成帶骨肉眼扒(HKD298/300g)大到同塊石板差唔多size,肉質軟腍仲比一般肉眼扒濃味,蘸埋岩鹽就會更多提點添。 西班牙黑毛豬鞍(HKD108/200g)加配匈牙利鵝肝(HKD29)都係唔錯嘅選擇。豬鞍非常厚身,但入口有油香又幾爽口彈牙喎,想解膩的話可以點柚子汁。 開頭都怕加鵝肝會更油膩,但出奇地煎到少少焦香後入口係惹味而唔肥喎。 鍾意多啲配搭嘅就有牛舌拼海鮮套餐(HKD148),6片厚切牛舌、兩粒大size北海道刺身帶子同埋兩隻越南虎蝦,夠晒豐富呀!呢個組合light啲又鮮味,不過同樣啖啖肉㗎。 呢度嘅抵食之最就係Grill’er精選(HKD78/180g),而且餐廳會因應來貨轉換唔同地區或部位嘅牛扒,確保品質之餘又有新鮮感。 店內一角設置自助沙律吧,因為套餐仲配咗其他食物。 每份套餐都可以任飲任食用牛骨熬煮9個鐘嘅羅宋湯、雜菜沙律同白飯,一定可以食到飽呀!   Grill’er 地址:大圍積信街77-83A號積善樓地下B號舖 電話:從缺 營業時間:星期一至五:17:00-22:30,星期六、日:13:00-22:30  

0

【漫遊港島品茶「打書釘」 隱世博物館聽原音唱片】Local自駕遊

周末梗係想放慢步伐、Chill吓啦!如果提起慢活,你又會想做咩呢?歎茶?睇書?聽音樂?咁就啱晒喇,就由中環出發,同大家一齊探索吓熱鬧港島區下嘅淨土啦!   中環茶寮慢活品茶 放假想享受吓寧靜嘅時光,就不如去中環、佔地2000呎嘅汴京茶寮慢慢歎茶啦。全店以日式簡約茶室設計,環境開揚寬敞,而且早晚嘅陳設都唔同㗎!嚟到呢度梗係要試佢哋高質嘅茶啦。凍飲嘅八女煎茶茶葉比較嫩綠,係店主直接向農夫購買,可以確保到茶葉嘅質量。呢款透過冰鎮過程為茶降溫,茶葉經過三泡令冰茶唔會因為冷凍而變淡,入口順滑而富茶香。 店內仲有All Day Lunch同Dinner Set㗎,必試呢度嘅茶漬飯同茶凍。呢款高菜白魚味茶漬飯食落清新有魚香;茶凍就帶有桂花香同淡淡嘅玫瑰香,質地Q彈仲係低糖添,入口唔覺甜膩。另外喺嚟緊三月,逢星期六、日都舉辦咗茶道體驗活動,想參加嘅朋友就留意佢哋專頁喇!   汴京茶寮 地址:中環雲咸街38號 電話:從缺 營業時間:星期一至日:10:30-20:00、21:00-01:00    灣仔月街小茶店 嚟到灣仔都有茶店好推介!呢間BASAO tea正正就係茶葉品牌BASAO嘅首間茶店,有茶師現場即席泡茶,除咗傳統茶飲之外,仲有新派健康茶飲俾你揀添。 呢度同樣除咗茗茶之外,仲有用茶製成嘅甜品,阿里山烏龍蛋糕卷清香淡雅,如果配茶仲可以揀埋大吉嶺霖吉雅莊園春摘,成熟度比夏天採摘嘅茶葉輕啲,帶花香味,成個配搭好lady添。喺度歎茶食蛋糕都係生活上嘅小確幸!   BASAO tea 地址:灣仔月街17號地下 電話:2952 3313 營業時間:星期一至日:11:00 – 20:00   全港第一間人文圖書館「打書釘」 由於疫情關係,康文署轄下嘅圖書館都暫停開放,想睇書嘅朋友就可以去銅鑼灣嘅打書釘喇!呢間私人圖書館有過萬本以文、史、哲、文化研究、城市研究等為主嘅藏書,係由5位本地退休教授捐出,有心人就將藏書整理好,以圖書館嘅形式開放俾大家上嚟「打書釘」,同大家分享閱讀嘅樂趣!不過呢度啲書就唔可以外借嘅,只要俾HKD300訂金整閱讀卡就可以喺度無限時、無限量咁自由閱讀,閱讀卡亦可以隨時退回添。而呢度始終都係公共空間,自己上嚟都要小心注意個人衛生呀。 View this post on...

0

【餐飲業為抗炎前線打氣 多間餐廳請醫護食飯】醫護優惠

醫護人員一直都企喺抗疫最前線,小編都好感激佢哋對港人嘅付出!好多餐廳都用行動支持呢班前線人員,免費請醫護食嘢添。大家都快啲share出去,俾多啲醫護人員知道,為佢哋打打氣啦!   亞玉冰室 – 免費用餐 呢間元朗嘅良心小店亞玉冰室最近除咗派自製搓手液俾食客同街坊之外,更喺店內表示支持醫護人員,每位出示證件都可以喺度免費用餐一份。   亞玉冰室 地址:元朗西裕街17號民康大廈地下4-5號舖 電話:2676 1908 營業時間:星期一至日:07:00-21:00   新記冰室 – 免費用餐 主打芝士撈麵嘅新記冰室就喺官方專頁上表明支持前線醫護人員,凡醫護人員出示相關證件,都可以喺尖沙咀店同荃灣店免費用餐。   新記冰室 地址:尖沙咀金巴利道香檳大廈商埸13舖 電話:2722 4555 營業時間:星期一至日:星期一至四:11:30-23:30,星期五、六:11:30-00:30,星期日:11:30-23:00   和拉麵 – 免費用餐兼送口罩 大埔嘅和拉麵同樣全力支持醫護前線㗎!醫護人員喺度憑證件可以免費用餐之外,仲會免費獲得2個韓國直送嘅KF94口罩,而公立醫院嘅醫護人員就可免費獲贈5個,每人每日限取一次。不過數量有限,派完即止嘅。   和拉麵 地址:大埔運頭街20-26號廣安大廈地下J號舖 電話:2988 1335 營業時間:星期二至日:12:00-15:00、18:00-22:30...

0

【荃灣意粉小店足料外賣 $30高質意粉配大碗薯蓉】平霸

今次去到荃灣,又俾平霸搵到高質好味嘅平價西餐喇!呢間喺小巷中嘅小混混主打西式意粉、小食,一間咁低調嘅小店竟然有高質西餐水準,價錢仲夠晒親民,20蚊就食到各式意粉,認真估唔到喎! 呢間意粉外賣店隱身喺荃灣鱟地坊嘅小巷當中,規模都幾細,當日都只有一個店員看舖,由落單到炮製食物都係自己一腳踢。而且呢間小店只做外賣生意,冇堂食位㗎,淨係得一張高身枱俾你喺度立食。 由於呢間小店規模細,Menu上嘅菜式選擇的確唔多。全店食物簡單分為A、B兩區,A區食物每款HKD20;B區可以食物每款HKD12。想試多款嘅,就可以A+B咁揀,都係HKD30咋,仲可以自由配搭添。 今次就嗌一個A+B餐(HKD30)嚟試吓先,揀咗卡邦尼芝士煙肉意粉(單價HKD20)同黑松露野菌芝士煙肉薯蓉(單價HKD12)。呢度啲嘢食全部都係落單後新鮮即煮嘅,不過當時唔多人,店員亦好快手,等咗十分鐘左右,全部食物就到手喇。 先講卡邦尼意粉先,雖然裝意粉嘅外賣碗唔算太大個,但啲意粉裝到滿一滿,分量都幾多,Lunch食都應該夠飽。而忌廉汁沾滿每條意粉,煙肉碎夠多,入口Creamy,意粉亦軟硬適中,有高質西餐廳嘅食物水準。 呢款黑松露野菌芝士煙肉薯蓉同樣都係超晒班!一打開蓋就有好香嘅黑松露味,偏橙黃色嘅薯蓉質地幼滑,面頭淋滿黑松露野菌汁,仲有細細塊嘅煙肉片增加口感。不過略嫌煙肉比較少、芝士味唔夠突出。而裝薯蓉嘅外賣碗比裝意粉嘅細少少,但分量就同KFC個大薯蓉差唔多,單食呢個做下午茶都幾滿足喎。 平霸仲額外買咗碗蜆肉周打忌廉濃湯(單價HKD12),一樣充滿驚喜呀!雖然只係十幾蚊,但質素一啲都唔Hea。一潷就有勁多蜆肉同細細粒嘅帶子仔,仲有大量粟米同薯仔呢啲配料喺入面添。每一啖都濃稠足料,非常抵飲!   小混混 地址:荃灣鱟地坊80-84號華成樓B座地下B3號舖 電話:5922 8600 營業時間:星期一至日:12:00-22:00 (星期三休息)  

0

【3大特色營地親親大自然 BBQ必備海陸空食物】Local自駕遊

想出門又唔想同太多人接觸?今次唔介紹大家四圍走喇,但可以一車車去露營點,喺自己預訂嘅範圍內親近大自然,順便網購特色食物車埋去營地度煮都唔錯㗎。   小木屋度假營  元朗嘅16色小木屋露營區(HKD1,199起/4人)唔止有單一間嘅木屋款式,亦可以揀大草地露營區(HKD200位/成人,HKD80位/3歲至12歲)。如果多人可以預訂Partyroom套餐(HKD4,299起),包埋20-25人嘅食物,仲可以享用私人草地、partyroom內設備同指定遊戲設施添。   小木屋度假營 地址:元朗錦田水尾村DD107 LOT 1787 電話:5499 5445 營業時間:24小時   名樂漁莊 名樂漁莊係一個結合環保、文化、教育同娛樂嘅露營平台,俾大親親大自然又可以BBQ「宿一燒」,可以盡情咁玩。呢度嘅營分為宮[行宮]、商[箱旅]、徵[波子]同羽[童境]4款(HKD800-2,700不等),分別容納2-6人,收費按節日調整。但訂嘅時候睇清楚需要嘅配套設施,因為按款式提供淋浴間、洗手間、煮食用具、雪櫃、廚具、微波爐、焗爐等設施。   名樂漁莊 地址:元朗流浮山上白泥 電話:2891 8263 營業時間:24小時   海迎灘 之前介紹過大嶼山自駕深度遊,但一日來回就冇介紹過海迎灘呢個位於全港最長海岸線長沙海灘上嘅營地。望住三公里長嘅海岸線,曬太陽等數星星真係輕鬆寫意到極點。呢度嘅露營車(HKD1,400-3,500)可以住2-5人,有WIFI服務,最遲入住前三日可以預訂2-4人嘅燒烤或火鍋餐(HKD380-680),都幾方便喎。   海迎灘 地址:大嶼山嶼南道57號 電話:2890-9980 營業時間:星期一至日:10:00-18:00   有地方玩都要有嘢食嘅,依家就介紹幾間特色網店俾你哋訂購食物啦! 1. Double Chefs...

0

【芒果燕窩下午茶載譽回歸 平歎十款矜貴鹹甜點】Angel & Devil

芒果係唔少人至愛,加埋養顏嘅名貴燕窩就更加難以抗拒呀!觀塘Angel & Devil人氣爆燈嘅「嚐芒﹒暮燕下午茶」終於再度登場。三層下午茶中嘅酥點都用咗鮮甜芒果同燕窩入饌,仲有加入黑松露、法國鵝肝等高級食材嘅鹹點,性價比夠晒高。呢個Tea Set聽日就正式推出,仲供應到4月尾添,仲唔book定位同情人、朋友歎下午茶?! 「嚐芒﹒暮燕下午茶」(HKD268/兩位用)喺三層架上都有成十款以芒果同燕窩做主題嘅鹹甜點,全部都一式兩份,仲配埋兩杯特飲,咁就唔使爭啦! 頂層之中嘅燕窩朱古力金寶焦糖燉蛋係Tea Set嘅一大賣點,咁多燕窩喺上面真係夠晒矜貴呀!軟滑嘅焦糖燉蛋加埋脆口嘅朱古力金寶,一啖入口食到豐富嘅口感層次。 中層集合咗四款賣相吸引嘅鹹甜點,有朵「菊花」喺面頭做點綴嘅芒果燕窩蘆薈椰子奶凍(左)層次分明,上面白色嘅係椰子奶凍,下面淡黃色嗰層當然係芒果味啦,兩者加埋都幾夾。而即叫即烘嘅芒果龍蝦意大利多士(前),面頭鋪滿芒果龍蝦沙律,龍蝦肉鮮嫩彈牙,連埋脆卜卜嘅多士一齊食就份外滿足喇。另外,仲有香煎法國鵝肝多士配芒果及燕窩,鵝肝煎到表面微脆,內裡軟滑,配埋芒果同燕窩食落清新唔膩;而芒果英式鬆餅配蜜糖香甜清新,都幾有特色喎。 除咗有燕窩之外,底層嘅黑松露燕窩露荀芝士撻仲加入咗濃香嘅黑松露,配合新鮮焗出嚟嘅芝士撻,呢款鹹點精緻不膩。同層仲有龍蝦春卷同雞肉芒果米紙卷添。 下午茶包埋兩杯自選特飲(念念不芒/樂而芒返),以芒果、菠蘿汁、辣椒、糖漿等特別調製而成,味道清新中帶點輕微嘅辣味,幾刺激喎。   「嚐芒‧慕燕下午茶」 供應日期:2月1日至4月30日 供應時間:星期一至日: 15:00-17:30 價錢:HKD268/兩位用 (另收加一服務費) Angel & Devil 地址:觀塘駿業街58號4樓Club East洞天 電話:3103 3808 營業時間:星期一至四、日:11:30-00:00,星期五:11:30-01:00,星期六:12:00-01:00