Author: tfffheifung

0

【本土人氣爆谷 避風塘味夠晒新奇! 】Pop Pop Rangers

平時去睇戲,總需要帶啲野食入去食,爆谷無疑係戲院必食排行榜嘅榜首。不過戲院買嚟買去不外乎都係一兩種味道,小編有一日咁啱見到一間專賣爆谷嘅舖頭POP POP RANGERS。發覺店舖內售賣爆谷嘅種類繁多,滿足到貪心嘅小編。聽講依間舖頭入面嘅爆谷來自美國,質素有保證,小編都忍唔住要快啲試下! 店舖喺旺角港鐵站,人來人往,好多人路過都會停低試一試咁多款唔同爆谷口味,亦都有唔少人即場買啲爆谷走。 擺設櫃上擺放咗好多唔同大細嘅包裝,無論多人分享定自私食,總有一個份量會啱你買返去。 店舖內爆谷嘅種類基本上有六種,包括有蜜糖芥末、朱古力、焦糖、避風塘、鹽同車打芝士,各有特色。此外,店舖仲會不定時推出季節限定口味,比顧客耳目一新嘅感覺。 其中四款係小編嘅心水之選。首先避風塘味(左一)感覺非常新穎,入口非常有驚喜,好似食緊避風塘炒蟹,香口惹味,係想試鹹味爆谷同重口味嘅人必試口味;焦糖味(左二)濃濃嘅焦糖包圍住爆谷,令口腔每一啖都充滿焦糖絲絲嘅細滑;蜜糖芥末味(右二)估佢唔到食落酸酸甜甜,好開胃;朱古力味(右一)絕對係皇牌之一,唔太甜,有黑朱古力嘅感覺。 其中有兩個包裝最受歡迎,中(HKD30/左)同細(HKD22/右)嘅包裝不但價錢相宜,而且買嘅份量仲可以當零食周街食。仲可以比你混多一種味,咁就唔駛食得一種味道咁單調啦。 芝士迷要留意啦,車打芝士味爆谷只可以買(HKD42)大包裝。存放時間大約一個星期左右,時間比較長,可以慢慢食,唔需要一時三刻食晒。 除左紙包裝之外,仲有罐裝(HKD70)。紙包裝食完就要掉,唔夠環保。但罐裝食完,仲可以擺喺屋企作為擺設,同擺其他野入去,一舉兩得。 如果想一大班人分享,就要買派對(HKD80)包裝,可以混埋唔同味道。開派對嘅時候,個個都啱食,總有一款口味適合你。 店舖非常貼心,每個細同中嘅包裝都有一個自家製爆谷型嘅萬字夾,呢個小小嘅心思令顧客得到爆谷以外嘅小驚喜。 POP POP RANGERS 地址:葵芳葵富路7號葵涌廣場3樓K28舗 營業時間:星期一至日: 12:00-21:30 地址:旺角港鐵旺角站19號舖 營業時間:星期一至日: 11:00-22:00 地址:太古中心誠品店L108A號舖 營業時間:星期一至日: 10:00-22:00 Online Shop poppoprangers-popcorn.com

0

【抹茶控注意!食住雪糕遊世界】Kafulin Gallery

你喜歡旅行嗎?想逃離香港嗎?相信大家無時無刻都會有去旅行嘅打算。小編喺灣仔見到一間以旅行為主題嘅雪糕店,店舖內外都有店主周遊列國嘅相片和擺設。小編見到之後,十分羨慕店主有咁多咁美好嘅回憶。據說成日去旅行嘅店主仲親身到日本拜師學藝,所以店內主打日本雪糕,雪糕味道比坊間更加正宗! 單單喺店舖外就已經知店主熱愛旅行,玻璃窗貼上世界大地圖,非常搶眼。每個人都好想去曬地球上每一個地方,小編都唔例外,依間店舖真係望梅止渴,充滿旅行感覺。 牆上掛滿店主喺唔同國家影過嘅照片,顧客嚟到可以置身於唔同國家感覺之中,慢慢享受美味嘅雪糕。佢地仲會不時轉下主題,而家呢期係日本軍艦島,嚟到就可以睇下軍艦島有咩靚相啦! 日本京都宇治抹茶阿法奇朵(HKD36) 首先,抹茶雪糕嘅質感細滑。要做到依種效果,相信需要下唔少嘅苦功,再倒上熱嘅抹茶Latte,冷熱同時喺口腔交織。抹茶豐層次感,味道更為突出。 宇治抹茶軟雪糕筒 Premium Cone (HKD43) 雪糕用咗日本京都宇治抹茶做成,加上日本白玉丸子、十勝紅豆、蕨餅及自家製的抹茶曲奇,配上香脆窩夫雪糕筒。抹茶雪糕香濃軟滑,紅豆香稔加上煙韌白玉丸子,口感非常豐富。 草泥馬芭菲(HKD42) 以秘魯草泥馬為主題,牛奶軟雪糕雪糕上加上一塊草泥馬造型藜麥曲奇,可愛得嚟又非常健康。自家製黑糖蛋糕粒同楓糖焗南美藜麥,口味獨特之餘帶點異國風情。蛋糕嘅綿密、雪糕嘅軟滑同藜麥嘅香脆,入口後真係點食都唔夠喉。 京都宇治焙茶拿鐵 (HKD30/Hot) 香濃日本焙茶加上奶泡,細滑之餘又保留到濃郁嘅茶味,絕對係雪糕之外又一好選擇。 紫薯拿鐵(HKD30/熱) 未飲已經聞到紫薯香味四散,入口之後濃濃紫薯香氣更留於口腔縈繞,紫薯控應該會好鍾意! Kafulin Gallery 地址:灣仔巴路士街17-21號樂景大樓地下4號舖 電話:3709 8434 營業時間:星期一至五:12:30-22:00;星期六、日及公眾假期:12:00-22:00

0

【Café+庭院 西環最強慢活組合!】Opendoor Cafe + Courtyard

小編作為偽文青,喺繁忙工作背後,時時都想喺午飯時間有一個寧靜悠閒空間,靜靜整理自己嘅思絮,而唔需要好趕咁係茶餐廳食個快飯。小編喺西環搵到一間隱世Cafe,除咗可以坐低慢慢食,仲有一個特色庭院可以比大家坐低傾下計!想知係點?等小編帶你去睇下啦! 餐廳有一個別有洞天嘅庭院,有唔少植物做擺設。配合埋牆上嘅特色壁畫,令環境增添氣氛。如果想靜靜享受獨處嘅空間,或者想三五知己談心,依個地方都絕對適合你。 Smoked Salmon Cauliflower ‘Rice’ (HKD72) 用咗椰菜花取代米飯作為主材料。依款菜式不但減少米飯嘅糖份,而且加上大量椰菜花同燈籠椒,合符多菜少肉嘅原則,適合健康人士。 Spinach Chicken Pasta(HKD70) 依款看似簡單嘅菜式,但落足晒心思。首先將菠菜磨成蓉,然後再加上蒜頭、洋蔥、雞肉、長通粉同其他配料。雞肉選用雞胸肉,肉嘅油份唔多,醬汁非常清新,又一健康之選。 Full All Day Breakfast (HKD108) 食物十分豐盛,包括蛋、香草肉腸、煙肉、蕃茄、蕃茄豆,蘑菇同多士。每款食物份量不但多,而且煎得十分香口,未食已經聞到陣陣香氣,所以唔單止作為早餐,午餐都能夠飽餐一頓。 Refuel Smooth (HKD48) 材料有香蕉、雜莓、薄荷同鮮奶。香蕉含有果糖,可以提供能量,而薄荷有提神醒腦嘅作用,唔怪得會以「加油」命名。原來係想大家飲完依杯飲品之後,精神奕奕迎接新一日! Spicy Old Fashioned (HKD68) 打破傳統框架,喺酒入面加上花椒八角,味道帶啲嗆烈,飲落去精神為之一振。 Minty Mocha (HKD58) 就算係簡單一杯飲品,餐廳都有花心思。好似會喺杯邊沾上朱古力粉,令入口味道更為香濃。同時薄荷嘅味道,亦令朱古力味道更為特出。 Opendoor Cafe + Courtyard 地址:西環干諾道西120號舖地下 電話:3460 3880...

0

【遠離鬧市煩囂 樓梯上的咖啡小店】Common Ground

如果有一日假期,可能好多人都會選擇行街睇戲,但對小編嚟講,行街睇戲已經太疲累……其實一個假期,只需要一間咖啡店,一杯咖啡,就可以消磨一個下午。生活繁忙,一間好嘅咖啡店除左可以品嚐到高品質嘅飲品同食物之外,仲可以令自已身心放鬆,碰上咖啡店Common Ground,就帶比小編依種感覺。 富有歐洲風情嘅擺設,都係經由店主精心挑選出嚟。店內售賣各種手作同精品,每類寄賣作品各有特色,總有樣野你會鍾意。 望住山邊,慢慢令自己生活節奏放慢,調整自己心情重新上路,依間咖啡店的確有種魔力。 Scrambled Egg with Toast (HKD75) 炒蛋嫩滑而充滿蛋香,加上炒雜菇,令人垂涎三尺。多士經過烤焗,香草味散發晒出嚟,質感好鬆脆。沙律菜配上黑醋,酸甜嘅味道為整個組合帶嚟清新感覺。 Latte(HKD42) 咖啡奶泡打得好綿密,入口好滑而且味道香濃。咖啡飲到落底拉花圖案都無乜點變形,滿足晒視覺及味覺。 Common Ground 地址:中環城皇街19 號地下 電話:2818 8318 營業時間:星期一至五:10:00-19:00 星期六至日:09:30-19:00

0

【的確和味!日式居酒屋小店情懷】Shiba East

小編知道堅尼地城有間Shiba,佢地串燒同清酒都相當不錯。除此之外,港島東區都開咗間Shiba East,座落於筲箕灣地鐵站旁,方便區內居民品嚐,選材上乘講究,全部都係店主特意選購最新鮮食材。 牆上貼滿食物同清酒嘅名,感覺置身於日本居酒屋一樣。 牆上佈滿日本電影海報,種類眾多。除此之外,店主仲會根據當日嘅來貨而有特別推介,好貼心。 所有串燒都係即叫即整,保證熱辣辣。此外,坐Bar枱位嘅客人更可以即場見到串燒製作過程,慢慢睇住佢燒到金黃色,小編睇見都流曬口水! 流曬口水嘅小編最終點咗葱蒜牛肉粒(HKD45) 食落牛仔肉味濃郁,一啲都唔韌,加上蔥花蒜蓉嘅味道,滋味濃郁。 酸汁蘿蔔茸牛肉粒(左2)(HKD45) 雖然同葱蒜牛肉粒一樣,都係選用牛仔肉,但呢個版本配以酸汁蘿蔔,新鮮嘅味道即時爆發,牛肉鮮味滿分。京葱柚子胡椒牛肉粒(HKD45) 淡淡胡椒味並無蓋過本身牛肉嘅鮮味,加上柚子,味道酸酸甜甜,好適合女仔。 墨魚棒(HKD35) 採用新鮮墨魚打成,比坊間嘅更加彈牙鮮甜,再加上明太子嘅味道,十分惹味。 Shiba East 地址:筲箕灣筲箕灣道333號樂融軒地下4號舖 電話:2687 1338 營業時間:星期一至日:12:00-14:30;18:00-23:00

0

【動漫珍藏陪住食 天后特色爐端燒!】玩具屋

每個人有自己嘅專屬童年,感覺深刻而令人無法忘懷。小編作為90後,童年都係睇住數碼暴龍同比卡超長大,呢間店舖嘅擺設就以大家童年動漫回憶為主打,啱晒70後80後嘅朋友!門口飾櫃擺滿模型,包括:叮噹、小雲及龍珠等等,仲有星矢、黃金戰士、鐵甲萬能俠、巨靈神等等懷舊超合金同多種模型,令顧客彷如置身於玩具世界之中,回想起童年時嘅回憶。 店內食嘅係傳統爐端燒,格局以傳統酒屋為基礎。店內食物都由日本各地直送,保證新鮮。大家可以喺枱吧前慢慢揀自己鐘意嘅食物,揀完之後再交由廚師即場燒烤,原汁原味!而且呢度仲會按照爐端燒餐廳傳統,料理師傅會用木漿(掘返べら)將燒好咗菜式遞比客人,真係好有特色! 餐廳內仲有一個自成一角嘅小型個室(掘りごたつ),免卻咗其他人嘅騷擾。人客可以一邊食野,一邊飲酒傾計,度過一個開心嘅晚上。 粒貝壺焼(HKD190)內有日本粒貝,十分鮮甜。製造過程相當複雜,要先起肉去內臟,再放回貝殼內加湯燒。食嘅時候,建議先吃肉然後再飲湯,湯水吸收咗貝柱嘅味道,鮮味無窮。 甲羅焼(HKD138)先將松葉蟹肉放喺蟹蓋上面燒,再加上日本生蛋同蟹籽,最後配上法包。日本生蛋不但突出蟹嘅鮮味,而且令到整個口感更為嫩滑。法包經過烘焗,香脆可口,同蟹肉配搭的確天衣無縫。甜蕃薯配抹茶忌廉(HKD52)用料十分講究,選用日本紫心蕃薯配上自家製抹茶忌廉,係大熱之選!一凍一熱,衝擊味覺。甜度適中,食落唔膩,啱晒女仔! 玩具屋 地址:天后銀幕街16號地舖 電話:2348 7800 營業時間:星期一至日: 18:00-01:00

0

【通往東京隨意門 西環東瀛居酒屋】Shiba

放工去傳統和風居酒屋飲杯喺香港並唔算太流行,因為香港人娛樂選擇多,行街睇戲食飯,應有盡有。但係對於日本人嚟講,收工後去居酒屋就係佢地主要消閒娛樂減減壓嘅好地方,三五知己一齊談天說地,實在係人生一大快事。SHIBA位於堅尼地城,依一年開咗港鐵之後,就有更加多人可以去到SHIBA品嚐。 微微暗黃嘅燈光之下,氣氛特別浪漫。再加上其他日系擺設,顧客好似置身於日本居酒屋,充滿和風感覺。 酒櫃裡面擺放咗多種清酒,餐廳就住顧客唔同口味,對外選購唔同特式清酒,務求滿足大家。 飲酒嘅時候,當然要有佐酒小食。SHIBA嘅佐酒小食質素絕對高,依三款小食係餐廳嘅招牌小食--紫蘇免治鶏雞肉(HKD42/串)、 芝士年糕 (HKD48/份)和甜蕃薯(HKD26/串)。 芝士年糕(HKD48/份)燒到外脆內軟,內有流心芝士。夾起會聞到微微炭香味,內裡流心芝士一咬就會流晒出嚟,芝士味道久久不能喺口腔消散。 甜蕃薯(HKD26/串)燒烤燒至少許焦黑,入口香甜美味。一串邊夠小編食,正所謂一不離二,食完一串之後即刻叫多一串。紫蘇免治鶏雞肉(HKD42/串) 餐廳用心咁將紫蘇葉加入雞肉,不但更為健康,仲增加雞串口感。 免治雞肉另外仲可以配上日本雞蛋同醬油,增加細滑口感。蛋漿加醬油包圍住雞肉外層,入口味道更為濃郁。 Shiba 地址:西環堅尼地城士美非路1-15號美新大廈G樓E號舖 電話:3568 2425 營業時間:星期一至日: 18:30-00:00

0

【謝霆峰最強秘傳配方 年輕得碰著黑蒜包】16 Shell

講到名人飯堂,你又點可以唔識店名簡單易記嘅16 Shell呢?炮台山蜆殼街16號,只要你知道店舖名,就會連佢喺邊都知!聽聞謝霆鋒同其他明星會經常都會嚟食飯,話唔定嚟到隔離個枱全部都係大明星!小編心郁郁即刻去碰碰運氣。 小編去到雖然見唔到謝霆鋒,但餐廳裝潢高雅古典,成功吸引到我留住係度!最令人估唔到係入面嘅菜式驚喜不斷。 店主對擺設特別用心,櫃上所有裝飾都整整齊齊一絲不苟,非常有格調。 黑炭黑蒜蓉包(HKD60)依款麵包係餐廳招牌菜,聽聞係謝霆鋒獨門秘方嚟!食落去的確係一個全新嘅體驗!平時嘅蒜蓉包,雖然香脆但蒜蓉太濃味。相反,依度用咗黑炭包,感覺比一般麵包健康同軟熟,而且黑蒜有一種獨特嘅甜味,令人一食上癮,送酒一流。 白酒橄欖牛油煮蜆(HKD90) 白酒煮蜆相信大家都食過,喺坊間西餐廳都係一道常見菜式。依道菜式特別加咗牛油,令到個汁更為濃郁,而且包住蜆肉,啖啖鮮甜。 香燒牛扒配白酒牛油蘑菇汁(HKD320) 牛扒由美國直送,質素非常高,所以唔需要落太多調味料。5成熟岩岩好鎖住肉汁,但同時帶出牛肉鮮嫩嘅肉質,再加埋白酒牛油蘑菇汁,齒甲留香。 Lemonade(HKD28) 食完咁多菜式,有杯野飲作為點綴絕對錦上添花。檸檬水酸酸地嘅味道感覺好清新,大大杯令整頓菜更為滿足。 16 Shell 地址:天后炮台山蜆殼街6-16號寶榮大廈地下B舖 電話:3954 5918 營業時間:星期一至四: 12:00-21:30  星期五至日: 12:00-22:00

0

【大玩mix & match 潮飲太空主題果汁】Bana Bana

相信好多人都鍾意飲啲有味嘅飲品,不過支樽飲品好多高糖分又高防腐劑。如果想飲得健康,鮮榨果汁係一個好好嘅選擇。坊間賣鮮榨果汁嘅店舖好多,但選擇唔多,或者只係得既定配搭。今次小編搵到一間以太空為主題嘅果汁店,可以任意選擇自己鍾意嘅蔬果,多款選擇,總有一款啱你口味。 店舖主調係白色,加上火箭、太空人等裝飾,櫃檯都係行簡約太空路線。 嚟到大家首先要拎一架火箭仔,將你鍾意嘅蔬果擺入去,齊齊化身太空人,去唔同蔬果星球探索。 小編目測,大約有20款嘅水果同蔬菜比大家選擇,大家可以將一至三樣蔬果放喺火箭,然後比錢,又好玩又方便快捷。 如果因為太多選擇而心大心細,唔緊要,店舖好貼心咁推出每日精選,以時令蔬果榨成特選果汁,幫大家揀埋最有營蔬果。 每杯果汁都係HKD28(個別蔬果需加HKD3),每張收據都好貼心咁有埋生果嘅營養資訊比大家參考。 推薦口味有(芒果+野莓+益力多) 三種材料加埋酸酸甜甜,因為入面有益力多,有助腸道健康。 (紅菜頭+梨+蘋果) 紅菜頭有抗氧化功效,可以防癌、抗衰老,加埋其他兩種生果,清甜味道平衡返紅菜頭嘅草青味,達至平衡嘅感覺。 Banabana 地址:旺角染布房街17A號地舖 營業時間:星期一至日: 13:00-23:00 地址:尖沙咀赫德道2A地下 營業時間:星期一至日: 13:00-23:00

0

【藝文青聚腳地 細味匠心咖啡】Green Door Coffee

講到銅鑼灣嘅地標,除咗時代廣場同SOGO之外,就一定要數到香港中央圖書館,貴為香港最大嘅圖書館書卷味重,吸引好多真.文青前往。花咁多時間沉醉喺書海,睇完書當然都要醫下個肚啦。其實喺圖書館隔離,有一間咖啡小店叫做Green Door Coffee,既可以慢慢享用午餐同時間又可以品嚐精品咖啡,喺入面靜靜地睇書,享受一個悠閒下午。 店內佈置同裝潢主要以木系傢具為主,牆上掛畫更突出簡約嘅風格,感覺悠閒舒適。 架上仲會有空間供顧客放置書本,比大家飄流,大家可以以書分享。 Hot Latte (HKD35)  充滿奶香,濃濃嘅咖啡被奶香包住,咖啡豆選用南美出產。咖啡帶點果仁味道,有層次感,無咩其他咖啡豆嘅酸味,相對上易入口。 Iced Cappuccino (HKD35)相比Latte,由於奶泡打過,口感增加咗。加上冰塊,絕對有透心涼嘅感覺。 Peach Tea(HKD35) 咖啡以外,店內仍然有其他選擇。蜜桃茶選用德國製茶包,味道相對其他茶包濃郁,而蜜桃嘅甜味可以令味道昇華。 Banana Muffin (HKD16) 相比坊間,甜度無咁重,食起上嚟不知不覺就可以食曬一整個蛋糕。 Green Door Coffee 地址:銅鑼灣摩頓臺25號地舖 電話:3709 8577 營業時間:星期一至五: 08:00-19:00 星期六、日及公眾假期:09:00-19:00 地址:尖沙咀嘉蘭圍三號地下G3號舖 電話:5226 1426 營業時間:星期一至日: 10:00-20:00