Author: 飽飽

0

【排隊互毆 網上炒價急升 大陸瘋搶星巴克「貓爪杯」】食焦

喺偉大嘅強國土地,真係乜都有可能發生,更荒謬更離奇嘅事幾乎每天上演!今次係為咗一隻杯就搞到要大打出手又搶又爭喇,不過呢隻杯仔又確係幾得人歡心嘅,係抵爭嘅,不過唔使出埋拳頭囉!乜嘢杯咁巴閉搞到全城瘋搶?就係中國星巴克,咪即係STARBUCKS啱啱出咗呢隻「貓爪杯」搞到咁囉! 話說呢隻「貓爪杯」,係STARBUCKS為就快到嘅櫻花季節而推出嘅櫻花杯系列,中國星巴克呢,就喺26號推出咗呢款「櫻花貓爪杯」,喺官方微博一公佈啫,即刻引來轟動,有人仲漏夜搭埋露營帳篷喺店外霸定位排隊,由於每間分店貨量唔多,所以好多人都預咗要爭崩頭㗎喇! 結果一出就斷貨,連喺現場排隊買嘅人都群情洶湧,有網民直擊咗現場情況放上網,見到喺其中一間分店就出現人龍大打出手爭杯嘅畫面,由最初得兩個人互搶,打打吓變咗成堆人喺度圍毆,仲將店內貨架上成排STARBUCKS杯推冧晒喎! 呢隻「櫻花貓爪杯」官方售價係199人仔(約$233港銀),杯身係透明粉色嘅雙層耐熱玻璃,杯中間仲有cute爆「貓肉球」,如果倒啲嘢飲落去,「貓肉球」嘅形狀更加出,好難唔愛上佢啦!依家搞到一杯難求,益咗邊個?梗係班網上炒家啦,有網友話呢隻「貓爪杯」炒家炒高十幾倍都有,曾經出現3000人仔高價!真夠誇張!

0

【元朗烤鴨片附送發霉麵皮 事主:黃膽水都嘔埋出來!】食焦

成日話眼不見為乾淨,咁擘大隻眼清清楚楚見到污糟嘢,咁好難話乾淨喇啩?好似呢位咁唔好彩嘅網友咁,喺元朗一間食川菜嘅餐廳霸王川莊食飯,叫咗碟烤鴨片,好例牌梗係會有埋一碟麵皮上埋枱,夾埋啲片皮鴨一齊食啦,點知見到塊皮上面有一點點嘢囉…… 「頭3片麵皮我們沒有看清楚就吃了,起初誤以為麵皮表面是蔥花」。事主將相po咗喺盡在元朗群組,睇見啲麵皮真係發晒霉咁款喎,好恐怖!估唔到事主竟然會以為係蔥花食鬼埋喎!事主仲話「昨晚肚子開始不適,每次想起發霉的麵皮黃膽水都嘔埋出來,我以後也不會再幫襯」。 其他網友見到都話恐怖啦,又叫事主點解唔即刻叫食環報海關等等,有網友又話事主其實嗰晚餐飯唔使俾錢,又有甜品送又有100蚊禮券又滿意接受晒經理道歉,唔明佢點解刪完個po之後又要再po過出來,咁樣公審間餐廳唔係咁好! 輪到事主又回應喇,佢話唔係錢嘅問題,而係唔想再有人成為受害者啫,亦都希望呢間餐廳能夠以後做好嚴謹監管食物質素,唔好再有同類事情發生咁話!咁又真喎,連咁明顯嘅發霉麵皮都拎得出嚟俾食客,又真係要講出來等人警惕吓先得㗎!

0

【西營盤小巷簡約文青Café 自家製純素甜點件件吸睛】素學堂

今次素學堂帶大家relax吓,去到西營盤一個小巷裡面嘅JOMO Coffee & Cakes放鬆同Chill吓。JOMO嘅意思係Joy Of Missing Out ,想帶出嘅係要享受當前嘅時刻,暫時放下平時工作中繁忙嘅一切。呢間café由三位年青人主理,由炮製咖啡到甜品都有豐富經驗,蛋糕全部都係自家製,賣相好精緻講究,3位店主都知道有唔少人對蛋奶敏感,所以亦都提供咗唔少純素嘅甜品同輕食,好貼心呀! 店內裝修簡約,開放式㕑房,加上Tiffany blue嘅牆色,整個感覺好文青好舒服呀!店裡面用嘅花邊蛋糕碟,每個都係用人手拉嘅陶瓷碟嚟㗎,襯埋件蛋糕真係一流呀! 含蛋奶嘅黑芝麻味戚風蛋糕(HKD52/件)夠哂吸睛啦!蛋糕面頭淋上自家製嘅黑芝麻醬,再放上杞子同桂花,顏色望落好豐富,而蛋糕質感就好鬆軟綿密亦唔會有滯嘅感覺,食得又睇得,小編都忍唔住要相機食先啦! 呢個純素海鹽焦糖蘋果烤酥批(HKD68/件)都好花心機㗎,蘋果切片後一層一層咁疊上去,每一啖都有蘋果肉好足料,而面頭嘅cream同焦糖醬都係人手做,帶少少椰香,令到整個蘋果批嘅豐富度提升。撻皮口感雖未至於好鬆脆,但喺無牛油蛋奶嘅情況下都能夠做到呢個程度真係唔錯㗎,食落仲無咁大罪疚感呢! 生可可撻(HKD58/件)都係純素嘅,用咗有機可可粉,中間嘅朱古力餡食落好似慕絲咁好滑,而撻皮嘅飽肚感就比較重。    草莓撻(HKD58/件)亦都係純素甜品,細細件好適合下午茶品嚐,不過呢個撻就唔喺餐廳menu入面嘅,要睇吓店主嗰幾日有無mood同時間去整啦,話唔定隨時有新味推出㗎! 小編都幾鍾意呢個意式番茄素芝士配酸種麵包(HKD88)。麵包面有一層自家製嘅素芝士,要用腰果浸一晚再發烤而成,味道同芝士相似之外,仲可以補充返素食者容易缺乏嘅營養,例如維他命B12、B6同葉酸。麵包比較硬身少少,切開要比平時用多少少力,但整個味道酸酸甜甜好清新有驚喜,做All Day Breakfast都幾適合! 薰衣草伯爵茶(HKD48/一壺)一陣陣嘅清香撲鼻而來,好適合配蛋糕一齊飲! 香蕉草莓沙冰(HKD50)用新鮮水果整成,而所有純素產品都無用精製糖,呢個就用椰棗代替糖,飲落好fresh有啲似奶昔。   JOMO Coffee & Cakes 地址:西環西營盤水街4號地下D號舖 電話:2762 0258 營業時間:星期一至日:11:00 – 18:00

0

【公審牛涮鍋禁素葷同枱 無理素食者被網友圍攻】食焦

素食者有時都好有堅持,網上仲不時出現素食者同肉食者嘅矛盾大對決添,掀起過好多爭論㗎!最新一單係點呢?就係素食者要去牛肉火鍋放題店食素,究竟係咩玩法呢?最近有素食者喺自家素食專頁開帖,「不會再來這餐廳~牛涮鍋 因為他 “禁止”素食和肉食朋友同枱食 我被迫要”一個人坐開”食團年飯」。 話說事主同屋企人去咗黃埔間牛涮鍋食團年飯,而事主係素食者,佢話店家唔俾佢同屋企人坐埋一枱喎,「是他們質素差,反而我們食素的, 會有種豁達」,仲話以後唔會再幫襯添!此po一出,引來唔少網友分享去其他飲食群組,結果,好多人都覺得事主口口聲聲話自己豁達,但又公然將事件放上網想公審店家,根本係假豁達! 而網友異口同聲都話店主將佢哋分枱坐嘅做法係正常不過,你食素係冇問題嘅,只要你肯俾返食肉者選餐嘅同樣價錢就得,唔肯嘅話,店家要求你分枱坐亦好合理,「如果全枱1個俾肉錢,其餘6個俾素錢然後狂食肉咁點?真係豁達嘅茹素者應該深明此理,無人歧視你!」 網友仲話事主食素要去牛涮鍋都已經夠搞笑,仲好意思想公審店家!咁點先可以同枱呢?原來只要加返10蚊相等於肉食者嘅同價就得,即係事主唔肯自己加嗰十蚊雞,先要分開枱坐啫!自己開po得唔到共鳴,反而仲要俾其他網友圍攻,做人更豁達都受唔住啦!所以呢,眼見群情洶湧,事主拿拿臨刪po,仲連自己個素食專頁都del埋!算唔算攞嚟衰?

0

【疑過期菊花沖出30幾條蟲 網友驚呼:好恐怖好嘔心!】食焦

想沖返杯菊花茶飲吓,點知沖出來發現有好多條蟲,你會有咩反應呢?有網友諗住買包有機菊花以為夠晒健康啦,仲要標榜係無任何農藥喎,用保溫杯焗咗5個鐘,預備飲嘅時候就發現好多條狀物體咁浮吓浮吓,驚現30幾條蟲生勾勾咁郁郁吓,畫面好嚇人呀! 呢包嘢原來係網友購自有機商店點點綠嘅「特級杭白菊(無農藥)」,網友開po咁講:「好驚⋯ 差啲飲到成肚蟲⋯話就(說)今日焗左杯菊花枸子蜜飲下⋯ 用保溫杯焗左5個鐘,倒落杯到想飲果陣,發現有好多雪白色嘅條狀物體係到浮浮下!再倒落隻碟到就睇得好清楚⋯ 有紋里,頭有黑點⋯ 原來係蟲,最小有30條⋯ ⋯ 好嘔心! 好彩睇到⋯ 」 網友仲話喺好多棵菊花芯入面都發現有蟲,「眼力差啲都中伏!」最後就開名曲線讚「點點綠~ 比個讚你! 真係無農藥!」有片又有圖,的確見到有好多條毛毛蟲喺度,其他網友就回覆話同樣覺得嘔心,但亦有唔少網友話證明起碼真係無落到農藥喎,有啲仲覺得事主大驚小怪添,話佢食蟲好過食農藥喎! 有人問事主係咪買咗好耐,但係事主就答覆話係剛剛買返來就沖,即係唔係擺咗好耐先搞到咁啦!不過事件曝光之後,點點綠回應傳媒嗰陣就話從相片睇就係舊包裝,而呢款包裝嘅生產日期係2016年7月,食用期為一年,即係話已經過咗成年半有多喎,仲話即時檢查過現貨都冇發現任何蟲類物體,亦冇收到任何相關投訴。都係嗰句啦,以後記得要睇清楚包裝上嘅每粒字呀,無謂口同鼻拗喇!

0

【榴槤鹹蛋黃重口味邊爐 髒髒抹茶火鍋掀起熱潮】食焦

原來珍珠奶茶pizza同珍珠拉麵都未夠激,依家真係愈玩愈過界,呢種mix&match嘅新境界去到火鍋界別又會變咗點呢?係令人完全估唔到嘅都可以溝埋一齊,仲要放埋入口添!好似喺上海一間叫香天下嘅連鎖火鍋店,推出咗好多個千奇百趣嘅重口味湯底同估佢唔到嘅配料,引咗好多網紅同唔少食客去挑戰!好味定難食?有noise最緊要呀! 宣傳聲稱係「可以喝的奶茶奶蓋火鍋」,咁有咩鍋底呢?登登登凳,有髒髒奶茶鍋、榴槤椰奶鍋、芋頭青稞鹹蛋黄肉鬆牛奶鍋、髒髒抹茶鍋,配料更加厲害,有OREO餅乾啦、鹹蛋黃啦、芋圓啦、珍珠啦同埋紫薯都有喎,總之喺茶飲店度見到嘅配料都可以加埋落去咁款! 見到一鍋鍋抹茶火鍋加埋呢啲配料,鹹甜鹹甜咩味都有呀真係,每鍋盛惠138蚊人仔、差唔多160蚊港銀,但係連埋成個榴槤殼放埋落鍋度滾嘅榴槤椰奶鍋就唔同價喇,要258蚊人仔,圍起要成三百蚊港銀一鍋㗎! 價錢嚟講唔算平,但喺強國都一樣掀起咗髒髒火鍋熱潮,成為微博熱搜同喺抖音度洗版,有唔少網民就話受不了呢個暗黑料理,連重慶人咁重口味都話受不了!有人就話寧願買杯奶蓋去食火鍋,為乜要飲奶蓋邊爐喎!講到咁hit,唔知有冇香港火鍋店想跟風呢?

0

【網民踢爆簡體字扮日文 山寨士多啤梨扮日本貨】食焦

魚目混珠、山寨扮正版呢啲情況唔係未見過,有時又真係真假難分,俾啲山寨版呃咗都未知呢!好似人人都貪日本貨水果又靚又鮮更加甜,但係咪真係原產日本直送又係另一回事喇!好似有網友就經日本友人提醒,喺香港地有國產士多啤梨扮日本貨出現! 網友喺巴打絲打Facebook Club群組開po,話自己位日本朋友嚟香港旅行,發現咗有好多假日本貨包裝嘅士多啤梨,「某日本朋友1月9日至12日去第30幾次香港旅行。佢發現好多包装都模仿日本貨,以前常見嘅Google翻訳(譯)超爛日文雖然已經唔見晒,但係仍有好多穿崩之處。」 最後網友溫馨提示大家「假冒日本製造無處不在無日無之,佢(日本朋友)希望各位香港朋友小心慎防産地偽装欺詐」。原po仲登埋3張相出來圖文解說㗎,幾咁細心!第一點呢,係話「福岡」日文咁寫先啱「ふくおか」,但張相係「JAかおふく」;「甜王」「 あまおう」就變咗「おまうあ」;最搞笑係日本漢字「王時」,竟然變咗簡體字,仲有出現咗「武義瑤村」、疑似係浙江省其中一個村名喎! 跟住到生產者個名喇,嗰個日文「イチゴ太郎」根本就唔係日本人 名添啦;最後一個穿崩位就係喺包裝盒上面有成抽日文「赤い色は を呼びかける新しい魂を生み出す」,原來都係假嘅,網友話係連日本人都睇唔明嘅日文喎!有熱心網友再提供埋真嘅福岡甜王士多啤梨包裝係咩樣嘅相出嚟添!其實有個最明顯可以注意嘅係生產地,一定會寫明福岡,如果睇見其他不明來歷嘅地名同文字,實係假啦!

0

【火腿牛角包得幾粒碎仔 連登仔:唔係點叫空氣包?】食焦

成日話百物騰貴,食物成本價高,明嘅明嘅,但係都唔使偷工減料得咁過份啩?可以去到幾盡?話說有網友喺連登開po「啱啱食左(咗)個麵包店既(嘅)火腿牛角包,師父刀功同手勢都係世界級」,真係曲到圓!事主仲po咗兩張相出嚟,係就係牛角包,但火腿呢? 呢個空氣感十足嘅牛角包,少啲眼力都好難睇得出啲火腿喺邊,事主話「可以將火腿砌到極限咁薄 仲可以圈埋佢 買既(嘅)時候如果唔係寫明火腿牛角包 我會以為係搓麵粉時唔覺意跌左(咗)塊火腿碎落去」,再睇埋另一張牛角包相,都係得2忽仔火腿碎! 網友回應話「唔係點叫空氣包?」更多網友叫樓主開名公開究竟係邊間麵包舖,事主就話喺第二張相已經有提示,原來就喺嗰張影到少少麵包袋見到少少logo同幾粒英文字嘅相入面,勁過福爾摩斯嘅連登仔已經知道答案喇,認為呢個空氣包係出自一間叫「FRESH FRESH」嘅麵包舖喎! 事主冇表示係定唔係㗎,只係答返其他網友嘅問題,就係話呢袋火腿牛角包係事主老婆買返嚟,18蚊有4個!而網友就話喺呢間疑似偷工減料嘅麵包舖度,曾經都出過事,仲話呢間舖頭啲嘢食係「金玉其外、敗絮其中」添!

0

【來佬餐館x Green Monday 新推素肉餅煲仔飯色香味】素學堂

冬天點少得食煲仔飯呀!今次素學堂帶大家去到灣仔來佬餐館,以為淨係得鬼佬西餐食?其實來佬一樣有無肉餐單,最近同Green Monday合作,專登為素人設計咗時令煲仔飯餐單,啱晒依家食啦! 首先登場係梅菜素肉餅煲仔飯(HKD88),即係近來好hit嘅全素肉餅潮流喇!用咗新豬肉Omnipork純植物肉碎(Plant-based minced meat)取代豬肉。用素蠔油同梅菜粒醃新豬肉再蒸,用傳統砂鍋連埋生米一齊煲好,最後淋上餐廳自家秘製煲仔飯甜豉油,食落質感同味道,同真嘅肉幾乎冇分別喎,就算肉食者都包你滿意㗎! 另外一味係松露野菌素肉餅煲仔飯(HKD88)!新豬肉裡面有炒過嘅磨菇、雞髀菇同秀珍菇,食落好有層次感,當一開蓋嘅時候,松露香味已經散發出嚟,而且煲仔飯底唔少得出色嘅飯焦,真係好味又暖入心! 選用咗泰國米嘅黑松露炒飯(HKD118)充滿松露香味,再加入翠玉瓜同甘筍粒等,唔只炒嘅時候落黑松露醬,師傅最後仲喺炒飯面頭大手筆加咗成羹黑松露醬,真材實料! 唔知大家平時下午茶會食咩呢?可以試吓呢個素公司三文治配薯條(HKD82)喎!三文治餡料用麵筋做嘅素肉片同素叉燒,而素叉燒係經過餐廳燒味部嘅師傅精心製作,用素醬汁醃製而且仲做到脆皮效果添! 食完煲仔飯,飲返杯嘢潤吓喉啦!呢兩杯飲品都係師傅每日用新鮮材料煲出嚟,限量供應㗎!小編就鍾意呢杯竹庶茅根薏米水(HKD42/跟餐價HKD18),清甜解膩,除咗薏米分量十足,仲真係有兩條竹庶喺度喎,咬返幾啖先。 另一杯雪梨生薑圓肉茶(HKD42/跟餐價HKD18)係餐廳本月推介,凡喺今個月內跟餐價只需加HKD10咋,啱哂冬天補暖,而雪梨同圓肉嘅甜味平衡咗生薑嘅辣味,味道幾夾㗎!   來佬餐館 地址:香港灣仔杜老誌道5號1樓 電話:3125 3000 營業時間 :星期一至日:12:00- 23:00

0

【網民諗起作嘔 IRVINS致歉 人氣鹹蛋魚皮驚現炸壁虎】食焦

之前掀起過一陣鹹蛋乜乜乜熱潮,最熱門梗係鹹蛋魚皮,其中來自新加坡嘅IRVINS SALTED EGG更加令人食上癮,仲過江攻港開埋期間限定實體店添,大排長龍個個買一大袋!又脆口又有鹹蛋香嘅魚皮確係零食之寶,塊塊炸到脆卜卜,有冇諗過會有一日食落肚嘅唔係塊魚皮呢? 唔係魚皮咁係咩?係條炸壁虎呀!唔係啩?當事人係一位泰國女子,佢喺12月29日將呢段恐怖經歷po咗上facebook,佢話開咗包IRVINS嘅鹹蛋魚皮,阿媽同細佬食食吓竟然發現有隻鹹蛋炸壁虎(gecko)混埋喺入面,事主細佬最初仲以為係魚頭,幾乎想食落肚㗎喇,好彩睇睇吓個樣愈諗愈唔對路,先冇放入口! 事主有圖有真相,清楚見到一隻幼條壁虎狀嘅物體,面頭仲沾滿咗鹹蛋黃咁,真係唔留心嘅話隨時食咗落肚都唔知呀!事主好肯定咁認為隻壁虎係同啲魚皮一齊混埋嚟炸!呢個驚嚇po一出就引來媒體報導,事主接受新加坡《海峽時報》訪問嗰陣,話自己11月初喺曼谷一間超市Villa Market買咗包鹹蛋魚皮,之前都買過幾次同屋企人同埋同事食,佢話喺曼谷買鹹蛋魚皮好貴,一包要成700泰銖,差唔多百七蚊港銀! 咁唔好彩遇到炸壁虎,事主話佢阿媽依家諗返都想作嘔!俾網民瘋傳鹹蛋炸壁虎相,IRVINS SALTED EGG創辦人Irvin Gunawan喺1月2日,立刻喺官方fb專頁度回應,表示感到震驚同難過(very shocked and devastated),向事主致歉,仲話公司會作出退款同支付相關醫藥費,重點係佢話公司已轉用另一間生產工廠,會更嚴謹控制檢驗過程同衞生情況咁話喎!