Author: toofullforfood

0

【爆CP值$3XX酒店豪嘆 3款雞尾酒×3道美饌】Mirage Bar & Restaurant

Mirage Bar & Restaurant喺9至10月推出全新雞尾酒配對晚餐(HKD398),由主廚同調酒師悉心挑選三道菜配上三款雞尾酒。榮獲2016年Giffard雞尾酒大賽前4名既Rashid Joshi,特別調配12款城市風味雞尾酒,坐喺25尺高嘅中央吧台,淺嚐一杯,帶你一晚穿梭12個城市。 作為本地薑,帶頭介紹嘅梗係代表香港「海港風情」啦:由香草、檸檬同覆盆子嘅清新配搭,就好似港灣吹埋嚟嗰陣海風咁舒服,成個人醒哂。 9月嘅晚餐主題係「雞尾酒配對晚餐歷奇之旅」,前菜日本油金魚配氈酒西瓜、加杯沖繩代表 「搖擺木馬」,主菜喺USDA美國肉眼扒配厚切薯條及穀物芥末蛋黃醬,聽到都胃口大開!食完甜品,飲埋杯「上海紳士」同代表吉隆坡嘅 「班蘭芳香」就Perfect。 至於10月「非凡雞尾酒配對晚餐旅程」,就有北海道帶子他他配布吉「甘蔗邂逅」,前菜已經鮮味十足,主菜係加利西亞八爪魚配豬腩肉,加杯鳴門市「海之古典酒」,最後嘆埋Mirage嘅提拉米蘇同北京「胡同風韻」,中西合壁都玩曬。 除咗上面介紹嘅7款雞尾酒,仲有孟買嘅 「印度瑪格麗塔」、峇里島嘅 「五味莫吉托」、新山嘅 「大馬冰茶」、成都嘅 「烟熏松露」同埋西貢嘅 「酒醉金迷」,12個城市12種風味,即刻同朋友一齊去體驗咁有特色既城市旅程啦!   萬麗海景酒店Mirage Bar & Restaurant 地址:香港灣仔港灣道一號萬麗海景酒店大堂 電話:2808 8888 時間:星期一至日: 18:30-22:30

0

【日日排隊等位 米芝蓮都推介!】金滿庭京川滬菜館

相信不少香港人都認識金滿庭呢間京川滬菜館,由2002年到今日,大大話話都已經15年喇!餐廳不論內在環境同菜單都力求完美,所以好短時間內得到好多飲食獎項,仲拎過米芝蓮推介添!一班追求品質,對食物有要求嘅吃貨,又點可能錯過。唔好成日覺得同屋企人先會食中菜,其實同一班識飲識食嘅friend出嚟食飯,都可以去呀。小編最鍾意去銅鑼灣時代廣場食通天嘅金滿庭,方便就腳之外,朋友遲到都唔怕,可以去商場shopping! 唔好以為叫得三文治一定同麵包有關,呢個豆腐三文治(HKD68)用滑溜豆腐夾住肉鬆同榨菜,入口滑得嚟味道又夠香濃! 如果鍾意食包點,可以試下黃金腿蓉卷(HKD36),外皮夠晒脆口,裡面嘅火腿蓉鹹香四散,食完個口仲有陣陣香味。 究竟紫薯點解會咁有魅力?點解每個女仔見到紫薯都會心動?就連金滿庭都要推出紫心蕃薯浸莧菜(HKD86),俘虜各位女士嘅心。 招牌擔擔麵(HKD44)講到明得獎,叫得做擔擔麵天王,點可以唔試!麵條彈牙,花生碎夠多食落有口感,湯底亦唔會太杰身,食得出有啲功架。 榨菜肉末配叉子燒餅(HKD98)燒餅香口得嚟食落唔會覺得油,將啲榨菜同肉末一羹羹塞入去,味道香濃唔會膩。 食京川菜又點可以唔嗌返碟辣嘢食下?巴蜀辣子雞丁(HKD98)腰果夠晒脆口,配埋雞肉同辣椒一齊炒,夠晒麻辣刺激又香口! 大力推薦要留肚食金滿庭嘅甜品,好食過出面糖水舖!酒釀桂花丸子(HKD34)滑捋捋丸子入面有流心黑芝麻,絕對唔hea!甜度適中,淡淡桂花味,感覺非常養生。 金滿庭京川滬菜館 電話:2506 2525 地址:銅鑼灣勿地臣街1號時代廣場13樓1301號舖 營業時間:星期一至五:11:45-16:30,17:45-23:00;星期六至日:11:45-23:00;公眾假期:11:45-23:00

0

【偷懶煮少餐 出街同家人細味最好】鍾廚

有無人知道鍾廚其實係稻香旗下其中一間食肆?呢間新派粵菜嘅菜色以無添加、無色素、無味精作為賣點,希望俾到客人好似喺屋企食飯嗰種親切嘅味道!雖然有家嘅感覺,但係鍾廚都不失獨特風味。粵菜融合新派煮法,好有心思,比起屋企食飯多咗份新鮮感。唔洗一定要過時過節先約屋企人出街食飯嘅,閒時想煮少餐飯,去銅鑼灣食通天夠晒就腳啦! 廢話少講,即刻介紹下個宮廷蘿蔔(HKD38)先,酸酸甜甜嘅涼菜小食,尤其係夏天無乜胃口就最啱喇,非常醒胃! 橙味?係!真係橙味,你無睇錯。同樣係涼菜嘅橙味蓮藕圈(HKD55)好爽口,淡淡香橙味原來配合蓮藕可以變成餐前開胃小食,真心佩服呢份創意! 傳統粵式炒蝦球大家不論係去飲宴定係做節都已經食過無數次,難得出街食飯當然要食特別啲啦!個雙味脆蝦球(HKD128)一碟裡面有香草白汁同甜酸醬兩種味道,蝦肉粒粒都好夠份量,食落又夠晒爽口彈牙! 咕嚕肉大家就食得多喇,呢個冰鎮咕嚕肉(HKD108)就夠晒特別!碟同肉之間擺滿咗冰,外層凍冰冰又夠脆,內裡肉質熱得嚟又夠軟滑,咬落去仲要超級多汁添。成個菜酸酸甜甜,醒胃又消暑! 食完一輪,最後梗係要食返個菜啦,XO醬金鉤椰菜銀絲煲(HKD98),XO醬味道夠晒濃郁,配埋椰菜清甜味道同粉絲滑捋捋口感,惹味得嚟又夠清新。就算係食肉獸都會胃口大開! 鍾廚 電話:8300 8005 地址:銅鑼灣勿地臣街1號時代廣場12樓1201舖 營業時間:星期一至日:10:00-16:00;18:00-23:00

0

【食餐好慰勞屋企人 正宗上海菜卅年精粹】上海小南國1987

小南國1987年上海開設第一間店舖,15年前喺香港開立第一間分店,真係唔講唔知原來佢已經開左一段好長嘅日子。可以做到今時今日,食物當然有一定水準,不論同親朋好友或者招呼客人食飯都絕對唔失禮。位於時代廣場食通天嘅分店最近都已經裝修完畢,為慶祝開立30週年,以全新升級形象「1987小南國」同大家見面。 裝修之後餐廳環境變得非常有格調,仲有獨立間格圓檯,坐得更舒適! 位置咁方便,週末好多人都一家大細嚟歎返餐高質上海菜。 冷菜拼盤總共有7款可以任選4款:特別推介秋葵拌木耳/紹興花雕醉雞/本幫糖醋小排/老醋海蜇頭(HKD198)唔好以為望落去細細份,其實份量都唔少! 薺菜馬蘭頭乾絲(HKD58)薺菜同馬蘭頭香港人聽落可能會比較陌生,因為唔係廣東人一般會食嘅菜,但係佢地原來係南方人好普遍嘅養生菜!尤其係馬蘭頭,對高血壓同喉嚨發炎都有幫助。 金網生煎窩貼(HKD58)非常吸睛!除左靚之外,保證有內涵,一咬落去即刻爆出濃郁高湯,要小心食啊。 揚州雞火煮乾絲(HKD98)係傳說中乾隆皇帝都食過嘅名菜,底部個清雞湯完美配合一絲絲豆腐乾同爽口蝦仁。 餐廳一定要有返咁上下功力先可以將平平無奇嘅伴麵做得好食!呢份南國蔥油開洋拌麵(HKD48)果然無令我失望。 最後當然要食埋個甜品啦,抹茶水晶糖不甩(HKD48),晶瑩剔透嘅外皮加埋花生芝麻粒粒,口感好豐富呀! 上海小南國1987 電話:2874 8899 地址:銅鑼灣勿地臣街1號時代廣場11樓1103號舖 營業時間:星期一至日:11:30-15:00;18:00-23:00

0

【海膽進軍零食店 勁食北海道馬糞海膽手卷】松坂庫 magstore

提起松坂庫,你會唔會即刻諗起佢係專賣日韓零食嘅精品超級市場呢?其實松坂庫不斷有新搞作,除咗出過超 hit 嘅雪糕甜品,仲有做即叫即製手卷,樣樣水準都好高!你仲點可以唔睇下?記得記得,有手卷賣嘅舖頭為數唔多,要留意返佢地邊間分店先有呀! 原來最近推出四款手卷優惠,凡買任何野飲就可以用HKD35 (原價HKD45)優惠價享用,嘩,好似好抵咁,但又要試下係咪咁真材實料先得啦!    首先一試,就係日本拖羅配墨魚籽手卷,拖羅脂肪比例高,食落去同一般赤身吞拿魚口感完全唔同,入口充滿油香,加上墨魚籽味道嘅襯托,感覺矜貴。 馬糞海膽手卷絕對係佢地王牌之一,足半版海膽完全蓋住手卷,食落去並沒有腥臭味,反而充滿甘香,海膽迷唔可以錯過! 松坂庫 magstore(手卷限定) 將軍澳分店:將軍澳新都城2期1124-1126舖 銅鑼灣分店:銅鑼灣軒尼詩道396號德興大廈地下2號舖 旺角分店:旺角西洋菜街(好景商場對面) 尖沙咀分店:尖沙咀金馬倫道35號地下

0

【假日好去處 帶埋寵物潮嘆墨西哥菜】Cali-mex

相信好多人對主打美國加州墨西哥菜嘅Cali-Mex都唔會太陌生,原來佢喺呢3年間已經開達12間分店!由自助快餐形式做到最近開埋幾間餐廳,食物款色多左,又有得坐低慢慢嘆。今次專訪係比較新嘅餐廳分店,位於西灣河「蘇豪東」,係一班狗主好鍾意去嘅地方,該因附近多間餐廳門口位置都歡迎狗狗一齊坐低食。 店長非常雀躍介紹呢杯墨西哥辣椒cocktail (HKD88) ,絕對係Cali-Mex精選飲品之一!入口有一陣陣辣味,再混合青檸、龍舌蘭糖漿同tequila,嗜辣嘅您一定要試下。 有部份飲品由餐廳直接從墨西哥訂返黎,好似呢個Mandarin Jarritos,味道有啲似芬達。調酒師加入埋vodka,gin,rum,tequila等等,酒量要夠好先試啊! (HKD108) 想咩都試下可以叫個墨西哥拼盤(HKD168),有炸魚、墨西哥薄餅、辣肉腸等等。狗狗望到都即刻流晒口水好想食! 仲有抵食美國USDA肉眼扒 (HKD198),呢個價錢有塊高質10安士牛扒,仲要煎得咁完美,算係咁啦!唯一美中不足就覺得鹽粒比較大粒,如果點多左都幾鹹。 點少得墨西哥夾餅 Tacos (HKD78)呢?餐廳非常細心,連個皮都有得俾你自己選擇!包括有麵粉皮、粟米粉皮、脆口粟米粉皮。配料好多,仲可以加錢(HKD18)要埋牛油果醬,更有風味! 夾餅分別有大辣(紅)中辣(橙)小辣(綠),任均選擇。 食墨西哥野點少得Churros(HKD28 for 2/38 for 3/48 for 5)?細細條過下口癮都唔錯。 Cali-Mex Bar and Grill 地址:西灣河鯉景灣太康街45號

0

【留住昔日情懷 高街懷舊車仔麵店】高街麵霸

小編有時都會掛住港式懷舊小食,不過懷舊小食多數都係掃街,無得坐。懶豬小編食親野都想坐低慢慢食。嚟到高街,竟然搵到一間主打懷舊美食又有得坐嘅食店,可以介紹返比大家喎,佢就係高街麵霸! 講得係懷舊小食,又點少得碗仔翅呢?碗仔翅陪伴住大家一齊成長,一碗熱辣辣嘅碗仔翅,入面加啲肉絲、冬菇絲、粉絲、木耳絲等等,加啲胡椒粉、醋就已經好滿足。雖然食得碗仔翅都係「粉絲當魚翅」,但呢度嘅招牌金華火腿火腿碗仔翅(HKD38)堅係翅!個湯仲要濃得嚟唔會煮到一舊舊,材料十足,想用平民價錢食出帝王享受梗係要試下! 滷水鴨舌(HKD45)。鴨舌滷得入味又唔會黏到漿住個嘴,食落彈牙得嚟帶點滷水香,仲唔會好鹹。 小食又點少得腸粉呢?呢款懷舊蛋花炒腸粉(HKD28)一定啱你心水!加咗蛋花之後腸粉更添一分香滑惹味,加埋滑嘟嘟嘅腸粉入口又滑又彈!另外蔥花、甜醬、辣醬、花生醬同芝麻仲任得你要唔要㗎。 想食飽飽仲可以試埋車仔麵,3餸起,麵底(HKD9)每款餸(HKD9),有4種湯底、7種麵,32款餸任你揀!小編就揀咗油麵,滷水豬腩片、滷水糖心蛋、紅腸、豬大腸、魚蛋同時菜。特別推介滷水糖心蛋,除咗滷水入味仲真係流心㗎,淡淡蛋香混入麵裡面好香滑! 高街麵霸 地址:西環西營盤高街39號地舖 電話:2858 2680/2858 8122

0

【鬧市中避世 寄情第三街咖啡屋】The Hideout Coffee House

西營盤除咗多歷史痕跡外,特色食店都唔少。位於第三街嘅The Hideout Coffee House,就係小編Hea嘆新地標。裝修行簡約風,就連店内裝飾都好文藝風。Cafe有兩層,一樓有Bar枱位,可以清楚睇到第三街,邊嘆咖啡邊欣賞街景最適合不過,二樓空間就較大,想同朋友輕鬆享受一杯咖啡嘅時間,就可以上二樓。 Signature Croissant(HKD78) Croissant係每日新鮮運送到店,客人點單後先現場加工製作,夠曬貼心。兩個Croissant分別搭配兩種醬料,咸嘅係蛋黃醬,甜嘅有啲似乳酪味,味道感覺好清新。原隻蘑菇經焗完後,蘑菇汁無流失反而係鎖住喺裏面,再搭配特選煙肉,食起嚟十分滿足,清爽蔬菜更提升清新感覺。提提大家,熱賣嘅Signature Croissant每日供應數量有限,想試就要把握機會啦。 外酥内軟嘅Special Croissant(HKD34)裡面有意想不到嘅驚喜!裡面竟然係煙鴨胸同沙律菜,仲配上蛋黃醬,除咗充滿黄油馥郁嘅香氣,咀嚼時集清新豐腴口感於一身。除咗Croissant,專業嘅咖啡都係亮點。Dark Mocha(HKD46)特別在於帶啲黑朱古力味,但又不會蓋過咖啡香味。咖啡師選用黑朱古力粒做Ganache做成醬,味道回甘轉甜,非常柔滑。 Panna Cotta(HKD48)奶凍加入了伯爵茶調製,香味十分濃郁。頂部再放以紅酒煮過嘅啤梨同埋新鮮士多啤梨玫瑰,酸甜口味嘅配搭特別匹配,瑰麗外形令人一見傾心! 一於約埋三五知己去嘆下啦,夜晚仲會不定時有Party架! The Hideout Coffee House 地址:西環西營盤第三街63號地下B舖 電話:2858 1012 營業時間:星期一至五: 08:00-18:00 星期六、日及公眾假期: 10:30-19:00

0

【買得走嘅健康!巴西直送雞脾外賣飯盒】Healthy Chicken

外賣離不開都係燒味飯,或者三餸飯。多數都係油膩又唔健康,作為上班族嘅大家,日日係咁食一定會變晒三高,變晒做肥仔肥妹。小編特登幫大家搵咗一間健康飯盒外賣店,佢地嘅外賣飯盒營養均衡而清淡,主張100%純天然原料製造,啱晒注意健康嘅一眾巴絲打。 門面裝潢充滿田園風味,同木製枱凳互相襯托,令人入去有一種心曠神怡嘅感覺。 Chicken Leg Meal (HKD72) 識食一定食雞脾!如果你平時嫌豉油雞脾油膩,或者嫌炸脾熱氣,今次嘅雞脾用咗天然香料腌製就啱晒你。佢採用咗烤嘅烹調方法,雞脾嘅肉汁依然保存得好好,再加埋天然香草嘅香氣撲鼻,食起來嚟味道濃而不膩。 雖然雞脾係主角,但其他配料小編都十分喜歡。好似一球綠茶雪糕一樣咁大嘅牛油果同其他蔬菜,好似菠菜、生菜、豆類、番茄、三色椒等等,全部新鮮又好味。加上所配嘅飯並唔係白飯咁簡單,反而採用五穀米,健康之餘又食到蔬菜爽脆嘅口感。 Chicken & Cheese Quesadialla (HKD58) 相信係香港最常見嘅墨西哥料理之一,呢種墨西哥軟皮麵餅一般都係三角形,餅皮非常適合抹上芝士或者其它食材。今次除咗芝士外,仲加上雞肉,軟綿綿嘅芝士令口感更細滑,雞肉沾上墨西哥香料,味道微辣但唔會嗆喉。 Salmon Burrito Bowl (HKD52) 本身唔係捲餅(Wrap),但成份同捲餅好相似,區別在於無咗最外面既薄餅,而係將內裡餡料直接倒喺個碗入面。感覺比較似沙律或者拌飯。今次嘅主材料係蛋白質豐富嘅三文魚,加埋其他蔬菜配料,係女士午餐嘅好選擇。 Chicken Wings (HKD8/1, HKD32/4, HKD52/8) 唔好以為係日常住家自製嘅煎雞翼咁簡單。佢加上咗墨西哥特色醬料,味道酸甜,層次感十足,一定要試試! Kombucha (HKD40) 康普茶係一種名叫紅茶菌氣泡茶飲嘅健康飲料,飲起來微甜,而且帶有少少果味。聽店員講紅茶菌嘅功用好多,包括幫助消化,促進新陳代謝等等,頭先食咗咁多野,飲依個飲品就啱晒啦! Healthy Chicken 地址:鰂魚涌海光街10號地下D8號舖             中環威靈頓街87號群英商業大廈地下A2舖 電話:2682 8609 (鰂魚涌分店) ...

0

【小編直擊首爾膠囊酒店】仁川機場

話明【真假期】,咁重要嘅新聞梗係唔係求其喺網上攞幾張相出嚟hea 你啦!就係呢個韓國仁川機場膠囊酒店正式開張嗰個禮拜,我哋已經特別派左小編(即係我,仲有得玩2日!)同大家做個實地考察加真實圖片,睇下係咪真係咁正! 次次坐親凌晨機去首爾都要搵地方落腳,通常都會去汗蒸幕度Hea。今次為咗測試如果凌晨機攰到死而又有個膠囊酒店比你抖下嘅感覺係點,小編都好不情願咁揀咗呢班機(順便玩多半日)。 機場上個月嘅1月20號,首爾仁川機場終於開咗第一間膠囊酒店Darakhyu,位置喺仁川機場交通中心一樓。由機場出境大堂行過去大概十分鐘,跟住通往地鐵嘅指示,就會搵到,非常方便!有搭過地鐵出市區嘅人都一定知道邊度。 膠囊酒店分開東翼同西翼兩邊各30間房,兩條扶手電梯都可以上去一樓,check-in大堂位於東西翼中間。 Check-in大堂位置寬敞,係24小時休息區。 Check-in完之後,就可以用房卡或者佢地嘅專屬app正式進入膠囊酒店範圍。 膠囊酒店入口分幾個,會根據房間分派到唔同入口。 入到去就見到左右兩排都係房間,每間都係獨立設計,私人空間十足! 小編今次住呢間係雙人房間(連淋浴室)。等我同大家介紹下裡面究竟係點嘅樣!話就話係膠囊酒店,但其實同酒店好相似,用膠囊酒店價錢可以住到呢個質素,真係非常不錯! 開門之後就係咁嘅樣:左手邊係淋浴室,右手邊就係張床。有埋個小小嘅衫架掛下衫,仲有埋洗手盤,仲有個檯面可以放下野,細得黎位置都好實用! 張床一啲都唔細,完全訓得落兩個成年人,有埋床頭燈添,幾好幾好。床下面仲有足夠空間,可以放得落兩個大行李都絕對不成問題! 其實如果選擇唔連淋浴間嘅房間會平多少少,但係想沖涼就要用公共淋浴室。 公共淋浴間其實都幾乾淨(可能因為仲新啦)。 淋浴間有埋洗頭水同沐浴露,仲有乾淨毛巾用! 講到咁吸引,大家當然會關心到收費。收費模式主要分日間同晚間時段。 日間時段早上6點至晚上8點,所有房間最低消費3小時。 單人房間23100won起 (大概158HKD) 單人房間加淋浴間26400won起(大概181HKD) 雙人房間31500won起(大概216HKD) 雙人房間加淋浴間36000won起(大概247HKD) 晚間時段晚上8點至早上6點,所有房間最低消費12小時。 單人房間55000won起 (大概376HKD) 單人房間加淋浴間60000won起(大概411HKD) 雙人房間69000won起(大概473HKD) 雙人房間加淋浴間75000won起(大概514HKD) 超時使用房間每小時都係另加4000won(大概27HKD)超低! Darakhyu Capsule Hotel 網址:www.walkerhill.com/capsulehotel 查詢電話:+82...