Author: 討厭OT的檸檬茶03

0

【媽!好_辣呀! 6種激辣薯片大檢閱】6種辣味薯片

18禁薯片爆辣係人都知,究竟坊間仲有無邊種辣味薯片可以同佢抗衡或者個辣味超正超好味,唔食會執輸呢?今次小編搜羅咗6種唔係大家由細食到大嘅辣味薯片比大家做一個比較,一齊睇下有邊隻啱你啦!辣度評級參考:熱浪1星,珍珍辣味薯片1星 18禁痛辛咖哩薯片(HKD158) 辣度:★★★★★★ 一眾小編食到紅都面晒,仲要有幾個身體支持唔住,食到胃痛!唔怪得個包裝寫明「痛辛」,真係無錯,簡直係地獄級別! 桃哈多 暴君薯片 – 辣油味(HKD10) 辣度:★★☆☆☆  呢包寫明係辣椒油味,味道真係十足辣椒油咁嘅味,薯片入面混有芝麻,口感似薄Pizza,無乜薯味。 卡樂B 新加坡香辣螃蟹味薯片(HKD8.5) 辣度:☆☆☆☆☆ 聞落有蟹味,但係食落一啲都唔辣,反而都幾甜。試咗幾塊都唔覺得辣,0星是我給的。 卡樂B香辣薄餅味薯片(HKD8.5)辣度:★★☆☆☆ 薯片屬於厚身同埋硬,無乜pizza味,亦唔似得普通pizza味咁惹味開胃。食完之後會有陣陣香辣味喺喉嚨慢慢散出嚟。 MACKIE’S of Scotland 辣椒薯片(HKD12.9)辣度:★★★☆☆ 超濃香草味,食完成個口都係超強香草味同少少麻辣嘅感覺,薯片偏向厚身但係脆口。 湖池屋辣味薯片(HKD12)辣度:★☆☆☆☆ 一擺入口即時諗起熱浪!只係呢包薯味濃啲,帶少少甜味。 不過脆口指數就唔及熱浪,因為質感比較厚硬,唔會係咁食、係咁食、食唔停口。 伏務建議:18禁薯片同其他香辣味薯片根本係2個次元,食之前記得食定胃藥呀! 入伏點:祥華食品批發公司、MarketPlace、零食大王、金田井

0

【幾長龍都要排 5大人氣珍珠奶茶大比拼】天仁茗茶、賞茶、歇腳亭、貢茶、皇茶

今時今日,台式飲品已經係香港人嘅家常便飯,閒閒地一星期飲返三兩杯都唔出奇。今次小編突擊搜查,一次過買咗5個牌子嘅珍珠奶茶(走冰微糖)返嚟比較下,究竟邊間最好飲先! *小編突擊搜查時間係平日星期四下午 (HKD19/350ml),等咗5位,都係等咗5分鐘就有,係最高速嘅一間,店員態度都唔錯。茶香味比較重,珍珠入口都幾煙韌。 天仁茗茶 電話:29868898 地址:鑽石山荷里活廣場G102A (HKD19/400ml),前面有2個人等緊,大約等咗6分鐘就拎到手,店員態度友善。奶香味重,口感係最滑嘅一間,珍珠彈牙仲有少少黑糖味,甜甜地,女仔應該幾鍾意。 賞茶 電話:23483768 地址:荷里活廣場三樓324號舖 (HKD18/510ml)18蚊大大杯係最抵嘅一間!等咗2-3分鐘,無人排緊隊,店員都幾nice。味道溫和,偏向奶香味重,海量珍珠質感腍腍地,就算佢成杯份量咁多都唔會飲到牙骹軟! 歇腳亭 電話:25056877 地址:觀塘馬蹄徑5號寶峰大廈地下1號舖 (HKD18/270ml)雖然小編想買走冰微糖,但係店員搞錯咗,嚟咗杯熱飲。一落完單仲走咗去瞓覺添。講返杯茶先,茶味濃郁略有少少澀,珍珠都幾煙韌有咬口。 貢茶 電話:31050501 地址:觀塘開源道68號觀塘廣場地下G9號舖 (HKD13/400ml)試業期間仲有8折!就咁睇價錢算係好抵,不過飲完就知性價比好低。可能係試業中,小編等咗成24分鐘先有,係最最最耐嘅一間。等到返嚟奶茶味道好淡口,而且珍珠有陣涼粉味,中間個芯仲硬硬地……包裝係唯一一間揭蓋式插飲管,打開嗰陣要小心呀。 皇茶 電話:56164589 地址:觀塘馬蹄徑寶恩大廈1號地下3號舖

0

【減肥中的零食控 食一包保證跳到崩潰 】10種香港人至愛零食

成日聽到有人話食零食好肥仔,小編精選咗10款大家成日食嘅零食計一計數話你知,究竟食一包零食,要做返幾多運動啦!香港地方少,夏天又多雨,十萬年都唔做運動嘅小編以跳繩做單位,粗略計算一下,食一包零食要跳幾耐同要跳幾多下先消耗到! 撇除年齡、性別、體質等等嘅因素,一個50kg嘅人,持續跳繩30分鐘(60-80下/每分鐘)所消耗嘅卡路里係225(Kcal)。假設無論跳咗幾多分鐘都好,平均1分鐘都可以保持跳到70下左右,咁樣食一包零食要跳幾多下! *記得大前提係:1分鐘60秒裡面跳到70下呀。(Keep到話你叻) 日版固力果百力滋(沙律味) :3267下 1盒有兩包嘅百力滋原來有成350Kcal,食晒一盒兩包就要跳3267下。食晒唔駛兩分鐘,要跳走佢就要47分鐘。真係跳到樓下盞吊燈飛埋落街都未必跳完!好彩百力滋都算方便開心share,千祈唔好自私食,一個人食晒全部呀! 時興隆芝士圈 : 3258下 童年最愛嘅芝士圈(中包裝)都有349 Kcal,食一包要跳足47分鐘!好彩當年有體育堂消一消脂咋,無做開運動真係要諗諗先! 媽咪麵:2610下  出事喇,原來開一個藍毛毛演奏會所需卡路里係279.6Kcal,閒閒地都要跳繩跳返38分鐘,想開個唱真係唔做運動唔得。 繽紛樂 :2278下  唔好意思,我繽紛樂緊……脆卜卜嘅朱古力外皮真係會令人忍唔住口食完一啖又一啖,不過小編話你知1包繽紛樂有成244Kcal,食1條就要繽紛樂33分鐘!唔想跳2千幾下,都係分幾格比人食啦。 童星點心麵(炒麵味) :1876下  前排轉咗吉祥物嘅童星點心麵,好多人都鍾意就咁倒晒入口,原來細細包都暗藏200.9Kcal!食晒成包唔駛1分鐘,但要消耗佢呢,就要27分鐘喇。 泰版熊仔餅:1672下  之前伏務台介紹過泰版同日版熊仔餅嘅分別,比較常見兼易買嘅泰版有179.1Kcal,玩下手就要跳24分鐘,都唔講得笑。 卡樂B蝦條(原味):1578下  睇戲良伴非蝦條莫屬。中包裝有169Kcal,要跳23分鐘,比起薯片算抵食。唔想做咁多運動,呃蝦條食之前都係要諗下先。 卡樂B熱浪薯片 :1270下  唔少香港人都係食熱浪食到大,原來細包裝已經有136Kcal,細細包已經19分鐘,諗諗下都係唔好再得閒就塞落口先得。 魚仔餅(紫菜味) :1247下  童年回憶其中一個經典,紫菜味魚仔餅1盒133.65Kcal,一跳就係18分鐘。最伏之處係食完唔覺自己食咗嘢,飽足感近乎零,好易搭單食其他嘢又要瘋狂跳。 善字魚肉腸(原味):327下 雖然包裝麻煩又難開,但係得閒無事食返條心情真心好!殘酷嘅係1條有35Kcal,食1條就要跳327下,救命呀! 入伏點:祥華食品公司

0

【CP值爆標$268冇限時狂食 塊塊至少2cm極厚刺身】 浪人日本料理

斜陽落下,揸住把武士刀吊吊揈嘅「浪人」比人感覺零舍瀟灑不羈。雖然浪人係班流離失所嘅武士,但憑一身武藝浪跡天涯,努力為自己人生奮鬥,不斷挑戰自己堅持唔放棄,就唔係人人都做到。灣仔嘅浪人日本料理以「浪人」為名,都係提醒自己要一直堅持正宗日本料理,保持放題質素。嚟到呢度食,大家都要好似佢哋咁,堅持再堅持呀!因為佢哋無限時任食,希望大家個肚仔黑洞夠大,可以裝滿回本啦。 餐廳地方都算闊落,整潔企理。仲設有卡位,坐落好舒服,而且放題唔限時,可以放心同朋友慢慢食慢慢傾。 有人話「魚生究竟有啲乜咁好食?」雖然魚生唔似得火腩咁要落火煮,但係每件魚生都好考刀功同食材新鮮度。三文魚、油甘魚、劍魚腩、帆立貝、北寄貝同馬刀貝各有特色,件件厚切超肥厚,口感都算爽身。魚生唔會好似一般放題咁,淨係得陣雪藏味,反而略帶少少海水味,未必人人都食得慣。 各式各樣嘅魚生,唔同配搭就會有唔同化學作用。鍾意唔同花款嘅你,就要試下各種手握壽司,(左起)黑魚子虎蝦、炙燒鵝肝、花之戀、鰻魚、炙燒牛油帆立貝,件件都經過悉心配搭。其中小編比較推薦花之戀,三文魚捲住脆卜卜蟹籽,一粒粒喺口入面爆出鮮味。 食放題除咗魚生,都會想食下熱辣辣香口炸物。呢度串燒、炸物、鍋物全部即叫即製,小編都點咗唔少炸物,好似吉列廣島蠔、吉列海蝦、唐揚魷魚圈,炸得啱啱好炸漿夠薄身,脆口又唔嚡。怕熱氣仲有不同小食,好似芝麻雞翼同章魚小丸子,夠晒日系好點題。 呢度放題嘅選擇都幾多,無論冷熱食物都有齊,係咁咦睇返張相就覺得肚餓喇!小編提提你,佢哋個放題包埋無限熱茶、一杯特飲品同一份甜品,記得要點埋呀! 放題價錢: 晚市放題 星期日至四18:30-22:30 星期五、六、公眾假期及前夕 成人HKD268 成人HKD298 小童.長者HKD168 小童.長者HKD188 午市放題 星期六、日及公眾假期 成人HKD168 小童.長者HKD118 (另設加一服務費) 浪人日本料理 電話:3568 5355 地址:灣仔駱克道181號京城大廈商場2樓 營業時間:星期一至日:11:30-15:00;18:30-22:30

0

【成磅花膠擺喺你面前 超滋補花膠螺頭雞湯鍋】鍋匠

早前介紹過嘅鍋匠中日火鍋專門店,揉合咗中日特色,滿足晒一班火鍋控!最近佢哋仲推出咗唔少新嘅火鍋靚料同特色湯鍋,其中包括備受好評嘅養顏花膠螺頭雞湯鍋!想知道有咩好嘢食?一齊跟住小編睇下啦。 同朋友仔打邊爐,未必個個都食得辣。呢個養顏花膠螺頭雞湯鍋(HKD98)就可以一次過就晒大家口味,唔止唔會辣,仲可以順便滋陰補下身添!份量超足,成磅花膠一大碟呈上,加埋螺頭同雞湯真係非常滋補不得了!啱晒女仔食完變靚靚。平時呢個鍋原價係(HKD318),但係而家只要幫襯火鍋套餐,再加(HKD98)就可以享用到,1/3價錢都唔駛,真係好抵呀! 好多人都鍾意打邊爐食埋雞煲,呢個鍋匠雞煲就啱晒你。可以揀大、中、小辣、不辣同麻辣,以秘製醬汁炮製,每件雞塊都散發濃香,超足料啖啖肉又唔嚡!火鍋嘅價錢係根據你所選擇嘅牛肉而定,一共有四種牛肉可以揀:特上牛肉放題(HKD188) ,手切安格斯牛肉放題(HKD248),手切Prime雪花牛肉放題(HKD298),日本極上黑毛和牛放題(HKD438)。嫩滑嘅牛肉沾上雞煲嘅香濃湯汁,非常惹味香濃,味蕾大滿足! 如果你揀手切安格斯牛肉火鍋或以上嘅套餐就會送出時令海鮮盛盤一份,非常鮮味,有齊6款海鮮:原隻鮑魚、蠔,連蟶子都有埋,想嚐鮮就要試試! 而家去鍋匠,特定時段仲會有優惠㗎! 星期日至四:19:30前離座及21:30後入座 星期五至六:19:30前離座及10:00後入座 鍋匠 電話:2481 1388 地址:旺角彌敦道613號飛達商業中心1樓 營業時間:星期一至日:16:30-02:30 延伸閱讀: 【火鍋之匠人!必試旺角中日合璧火鍋餐】鍋匠:https://goo.gl/4kue9A

0

【臥虎藏龍飲食篇 星級主廚坐鎮神級串燒】三品-燒鳥專門店

過去唔少港人同日本客都會去食嘅米芝蓮推介燒鳥店「錦」嘅主廚,今日已經轉戰元朗,喺三品-燒鳥專門店大展拳腳喇。佢地除咗專注喺燒鳥料理之外,仲加入埋日本海鮮爐端燒添,想食大師手藝就要嚟試下喇! 烤爐、醬料同食材都係串燒嘅靈魂,烤爐係特登喺日本訂購,務求火力平均,將食材均勻咁燒熟。汁燒嘅醬料親自調製,鹽燒用沖繩海鹽同岩鹽調味;另外店內安裝咗強力抽油煙機,點燒法都唔會令人覺得大油煙。店內裝修講究格調,好多細節都好用心為食客著想,大家嚟到可以舒舒服服歎返餐。 小編嚟到即刻試咗吉列炸蠔2人前套餐(HKD398)包括前菜、沙律、三品中華冷麵同廚師發辦嘅精選串燒6串。套餐除咗蠔之外仲可以揀吉列炸豬扒或者鹽燒鯖魚。 串燒食材大部分由日本入口,堅持逐串逐串起肉拆骨串起,而且係即點即燒,等一陣就可以食到熱辣辣充滿肉汁同肉香嘅串燒喇!(左起)一骨雞翼(HKD28)、雞軟骨(HKD28)同紫蘇雞肉棒(HKD38)。 除咗2人前套餐,佢地仲有唔同類型嘅串燒同炸物可供選擇,(前排左起)一骨雞翼(HKD28)、汁燒白鱔(HKD48)、青椒仔(HKD28),同碗入面盛載嘅雞肉棒棒(HKD38),其實佢係免治雞肉棒嚟!佢嘅雞肉仲係每日新鮮手打,即叫即燒。食落勁Juicy,仲可以跟個人喜好沾蛋黃食,入口會更加滑! 串燒好拍檔非啤酒莫屬,呢度仲有提供幾款手工啤酒,喺慢慢享受每一串心機嘅同時可以配搭唔同口味啤酒,同朋友仔輕鬆渡過用餐時間。 三品-燒鳥專門店 電話:2321 1185 地址:元朗教育路61號紫荊樓一期地下K舖 營業時間:星期一至日:12:00-14:30;18:00-22:00

0

【異形口水出沒注意 攪攪震嘔泡啫喱】moringa新感覚かけまぜゼリー

小編行經一田睇到呢個青色啫喱,即刻覺得伏伏地!睇真啲個包裝,佢聲稱自己申請緊炭酸技術專利,將炭酸融入啫喱,講到超勁咁!就係咁,又搞到跣手買返盒嚟試下。 其實呢舊嘢係蜜瓜梳打味啫喱嚟,打開一邊係黃色醬,一邊係淺藍色啫喱。個盒嘅設計係拉起黃色果邊,就可以倒晒啲醬落去又唔會整污糟!讚!一倒完惡夢顏色就出現喇!藍加黃係變~毒!青BB咁嘅色,再跟埋包裝所講,係咁撈撈撈…… 噢撈!傳說中嘅炭酸嘔泡青色啫喱就出現喇,真係超多泡泡!只要你忍受到佢咁驚嚇嘅顏色,其實食落都幾好味,清清甜甜咁。藍色啫喱係波子汽水咁嘅味,微微帶酸,黃色醬呢……小編就食唔出蜜瓜味喇,淨係覺得甜甜地。啱晒夏天成班人去Camp、BBQ、出去玩攪到核核突突再拎嚟做懲罰整蠱人! 伏務建議:密集恐懼症咪攪。 入伏點:一田

0

【是日Go Green! 港島區3大素食巡遊】OVOCAFÉ、心齋、常樂素食

愈嚟愈多人選擇食素,茹素唔單止減少殺生,仲夠晒環保可以減碳。隨住大家對素食嘅追求,素食店都愈開愈多。小編今次精選咗港島區3間素食餐廳,中、西、台式一應俱全,絕對可以洗走素食單調沉悶嘅刻板印象。 星級西式素食之選 OVOCAFE致力於提倡健康同環保嘅生活方式,店內特別設立咗「綠色生活名人牆」,邀請了唔少名人好似王菲、關之琳、鍾鎮濤、林憶蓮、蔡一智等巨星親筆寫上綠色格言,鼓勵更多人茹素。而且佢除咗係一間Cafe之外,仲集素食超市於一身。好多坊間少見嘅素食產品同埋生活雜貨,都可以喺度搵到。 猴頭菇夏威夷薄餅(HKD118)猴頭菇煙韌嘅口感,配以營養豐富嘅牛油果、惹味千島醬、酸甜菠蘿同車厘茄,加上超薄脆Pizza口感,確係一絕。 冷烏冬配野菜天婦羅(HKD68)超級爽脆嘅野菜天婦羅入口感覺唔油膩,冷烏冬煙韌又清涼,配埋紅椒絲同山葵豉油汁,令每啖烏冬都帶有輕輕惹味感覺。 OVOCAFE 電話:2527 6077 地址:中環德輔道中173號南豐大廈1樓 營業時間:星期一至日:11:30-22:00 中式純素宴 如果你係為追求健康而茹素,或者追求純素食。咁呢間使用有機蔬果,而且唔含蛋奶、味精,完全純素純天然嘅心齋就好似為你度身訂造一樣! 餐廳裝飾格調清雅脫俗,啱晒推崇健康飲食,追求自然和諧嘅你。 香草焗淮山猴頭菇(HKD138)成煲上裝到好滿、好足料。餐廳選用有機淮山,比平時食到嘅大塊得多,猴頭菇焗過仍然保持煙韌多汁,入口散發微微香草清香味道。 素心飽(HKD35/3件)師傅話鬆脆嘅雪山皮完全不含人造奶油同雞蛋,餡料用咗多款鮮菌,仲有粟米同貢菜,口感豐富。黑松露野菌餃(HKD35/3件)意外地爽口,水晶外皮包住足料雜菌,好似杏包菇、蘑菇等等,質感好彈牙。最後值得一讚係佢哋嘅腸粉,有得揀紅米或白米腸。呢個紅米金銀腸粉(HKD38),個腸粉皮係自家製,仲可以清楚見到紅米殼,入口腸粉滑溜得嚟有嚼勁,非常有特色! 想食素心飽就要留意喇,因為製作需時,每日都係限量供應,售完即止㗎。 心齋 電話:2525 0552 地址:半山花園道51號科達中心3樓 營業時間:星期一至日:10:30-22:30 台式用心手作素食 常樂素食餐廳老闆茹素超過10年,有感香港素食選擇唔多,特意走到台南學師,返到香港為大家炮製出精緻台式素食。學成歸來,老闆將台南偏甜口味稍作調整,同時加入川菜同粵菜元素。餐廳標榜健康無味精,好多菜式都係手工菜,工序繁複,用心程度值得一試。 紅燒獅子頭(HKD98)獅子頭賣相好精緻,外層好酥脆,食落質感同味道都與真火腿肉十分相似。煲內仲有豆腐、素火腿、香菇、芹菜、姜、甘荀、紅蘿蔔同雲耳等等多種蔬素。 螞蟻上樹 (HKD88) 呢道菜係台灣常見素食菜式之一,主要材料包括素肉、粉絲、燈籠椒和黑芝麻。粉絲嘅粉絲嘅朋友一定會愛上! 常樂素食 電話:3679 3238 地址:銅鑼灣駱克道459-461號 The L. Square...

0

【煲仔飯終極食法 終極完美脆卜卜煲仔飯焦】利苑酒家

睇《食神》成日都話要去中國廚藝學院度學藝,你又知唔知利苑其實都有「飲食少林寺」同「名人飯堂」嘅美譽呢?因為喺選料過程到烹調技巧都極盡心思,出品要求嚴格,所以喺度做廚師隨時可以練到一身好武功。想睇場戲先再食飯,去時代廣場食通天都唔錯,一落樓下3分鐘就到利苑喇。 食中餐又點可以唔嗌個煲仔嚟食呢?XO醬蟹肉粉絲煲(HKD130)真係無花無假,個煲入面勁多勁多蟹肉,啲粉絲索晒XO醬精華好入味,成個煲勁惹味香濃!一上菜大家就搶晒。 有無人知道其實利苑係一間海鮮酒家?原來佢地啲海鮮都非常不錯啊!鍾意食海鮮就一定要食金蒜金菇蒸元貝(HKD68),元貝大件到切埋分開3件俾你食,配埋蒜蓉香蔥好惹味,一啖食晒成件鮮味爆燈又彈牙。 重點到喇!食好味嘅煲仔飯唔一定要走到街頭,想食勁量飯焦就一定要嚟呢度。蝦乾豬頸肉臘味煲仔飯(HKD160)熱辣辣嚟到,一打開即刻出晒煙,豬頸肉嘅肉香都跟住出晒嚟。將豉油加落個飯度,粒粒米飯都吸晒蝦乾同豉油嘅味道,底下仲有好多飯焦添! 鍾意食飯焦一定要試呀,大過薯片成塊脆卜卜,唔痴牙,焦香又好味! 怕直接食飯焦熱氣?小編提提你呢度可以幫你整埋上湯飯焦,唔會咁熱氣之餘,仲要係免費添!只要你話想整埋上湯飯焦,店員就即刻幫你去煮。 煮出嚟仲留有飯焦嘅少少香味,配埋上湯,加入芫荽調味,更易入口同消化,啱晒唔鍾意食硬飯嘅人又唔會做咗大嘥鬼! 飯後甜品當然要試佢地招牌擂沙湯丸(HKD33),薄薄嘅糯米皮包住黑芝麻餡,口感煙韌,味道夠晒香濃! 利苑酒家 電話:2506 3828 地址:銅鑼灣勿地臣街1號時代廣場食通天10樓 營業時間:星期一至日:11:30-15:00;18:00-23:30

0

【超浪漫玫瑰城堡 女生至愛呃Like法國菜】Roseate Castle

相信唔少女仔都幻想過可以住喺城堡入面,城堡出面仲有一個大大嘅玫瑰園,過住童話式嘅浪漫生活。小編話你知,想喺堡壘歎返餐精緻法國菜不是夢。喺旺角嘅Roseate Castle,店主想將自己working holiday遊歷過嘅城堡同玫瑰園帶返嚟香港,成間餐廳勁有城堡feel仲有精緻法國Fusion菜!大家嚟到可以一嘗做公主嘅感覺! 餐廳入面就好似城堡,周圍都擺滿玫瑰花,地下仲鋪埋草地,喺度行就可以遊緊花園咁。 仲有拱門設計,浪漫又經典,完全滿足到女仔對童話故事嘅幻想!Live happily ever after! 試業期間晚餐包咗頭盤、湯、前菜、主菜同甜品,總共5道菜再加埋餐飲。小編即刻為大家介紹多款浪漫晚餐嘅主菜先啦!低溫慢煮雞胸,腐乳意大利飯(套餐價HKD328)平時食開啲雞胸肉雖然脂肪含量低,蛋白質又夠高,但係都幾嚡口。不過呢個雞胸肉經過慢煮,入口超級滑,直情可以媲美雞脾肉!再加鹹鹹地嘅腐乳,估佢唔到出奇咁夾,好有驚喜! 夏日熱辣辣,熱到無心機就要試下低溫慢煮油封鴨配山楂意大利飯(套餐價HKD368),山楂味道微酸帶甘,配埋鴨腿清新又開胃,完全唔油膩!鴨肉經過慢煮仲好嫩滑添! Fusion最特別之處,就係將食材味道變變變!自家製生牛叉燒配米型粉(套餐價HKD428)牛叉燒嘅奧妙之處就係牛肉都食到叉燒嘅味道,再加埋慢煮,一啲都唔肥又夠腍身嫩滑,相比起嚟平時食嘅叉燒太粗糙喇。「點解要比我食到咁好味嘅叉燒呀?」主廚話佢地嘅甜豉油仲係用十種材料秘製,令醬汁食落有多種層次!配埋米形粉,真係非常有特色! 晚餐仲包埋廚師精選甜品蜜糖Cheese cake,白玫瑰外形夠晒吸睛,其實係用Cream cheese製成,餅底加入咗蜜糖,喺柔軟芝士之中帶出絲絲甜味。 Roseate Castle 電話:9216 7679 地址:旺角砵蘭街215號朗晴坊8樓 營業時間:星期一至日:12:00-23:00