Category: Prank Station 伏務台

0

【網民控訴老扒房三大罪狀 牛扒冇肉味質素似快餐】伏務台

有時食扒都會去啲港式懷舊扒房,鋸扒之餘又食吓氣氛。但係深水埗有成40年歷史嘅飛鷹餐廳就有唔少網民俾負評,仲提出三大罪狀添!究竟出咗咩事?睇埋落去等小編話你知啦。 罪狀一:留座唔俾人入 小編喺平日1點半左右入坐,店內只坐滿三分一。唔少網民提及嘅留座問題當日都存在,明明等候嘅食客唔多,但有三分一嘅枱都放咗「留座」嘅牌。有啲食客坐好先被要求調位,而小編都無一倖免。 罪狀二:餐湯冇味 小編點咗羅宋湯,蔬菜分量足但味道奇怪,飲落好似茄汁加水咁,陣甜味好重,唔似蕃茄本身嘅原味……有賣相但內涵欠奉,同場都聽到有客人話喺屋企煲罐頭湯都好飲過佢喎。 罪狀三:鐵板唔熱,牛扒過熟冇牛味,落咗勁多鬆肉粉 嚟到扒房梗係叫返個鐵板餐啦!究竟呢份配黑椒汁嘅新西蘭肉眼餐(HKD98)有冇網民提及嘅罪狀呢? 店員會幫客人淋埋汁先上菜,不過鐵板夠熱,上菜都聽到吱吱聲,未有發生網民講鐵板唔夠熱嘅情況。不過黑椒汁太多又太鹹,已經蓋過咗肉味。小編落單要牛扒5成熟,切開都見到肉心係粉紅色,但唔見有血水。雖然呢塊肉眼扒幾厚肉又大份,但肉味淡到近乎冇,質素同快餐店牛扒不相伯仲,但質感就冇網民講嘅落勁多鬆肉粉而太鬆軟。不過配菜方面就少咗啲咁,薯條數量十隻手指數得,哂得八條!仲有啲椰菜同一塊蕃茄,而成個餐最食到原味嘅就係塊蕃茄喇。其實嚟得扒房鋸扒都係想食得滋味啲,但質素似快餐的話真係勁扣分囉……   小編伏氣:4星(5星滿分) 入伏點:飛鷹餐廳 入伏價:新西蘭肉眼餐(HKD98,另收加一)[跟餐包、餐湯同餐飲] 中伏by #MOMO 美術by #MOMO 攝影by #MOMO 《伏務台》歡迎各界報料。

0

【檳城馳名手信咪亂買 實測4款小食味道極端】伏務台

小編飛去檳城參加朋友嘅婚禮,順路叫佢推薦當地出名,實質口味地雷嘅手信。親身試完之後,精選咗4款有潛在伏味嘅馬來西亞手信俾大家,等你哋避得就避,想挑戰嘅有得挑戰,因為有名連鎖店嘅出品都唔一定係大眾口味㗎! 打頭陣有百年歷史嘅華人餅店馨香餅舖,呢度出名做傳統酥餅,但亦有一款當地特產! 鍾金泉甜鹹荳蔻乾 | 伏氣: 4星(5星滿分) 雖然當地有好多荳蔻產品,但千祈唔好覺得一定人人啱食呀。呢款荳蔻果乾一打開就有股強烈藥油味,聞落已經唔開胃,食落口感似厚切嘅壽司薑片,唔止有齊甜鹹味道,仲有一陣隱隱約約嘅酸澀味。就咁睇標籤只有糖、鹽,防腐劑同添加劑,唔知酸味係來自其中一種成分定本身天然嘅荳蔻味呢? 跟住去埋檳城知名連鎖土產店萬香餅店,以為品質味道有保證?點知呢度搵到密集式地雷呀! 翡翠方塊 | 伏氣: 2星(5星滿分) 呢個方塊系列豆沙餅係佢哋最新出品,一共有12種口味,但其中一款港人大愛嘅味道竟然係伏……翡翠口味即係斑蘭,食第一啖都試到啲班蘭味,但慢慢會甜到好似食方糖咁。睇返成分表真係嚇死小編,每100g就有52g糖!一包都有成十幾粒,唔聲唔聲就食咗成包方糖,買俾咩人做手信都唔多適合囉。 咸魚香脆薄餅 | 伏氣: 2星(5星滿分) 入口甜中帶鹹,一開始都有鹹魚味,好似唔錯,點知食多幾啖就鹹到苦。雖然明白鹹魚係鹹嘅,但同食緊真鹹魚冇咩分別咁,轉做零食應該要調節得好啲囉。不過都有鹹魚愛好者同事表示鍾意,小編就替佢嘅健康表示擔心喇。 萬香芒果 | 伏氣: 5星(5星滿分) 呢款濕芒果係今次手信之中嘅伏中之伏,唔好睇佢包裝正常分量重秤,一開頭入口甜到似啫喱糖咁,慢慢變成一股死鹹,仲同荳蔻乾一樣有陣酸味添!雖然今次成分有寫到醋同二氧化硫,但係食完之後口腔同牙齒有啲榎歰歰,要不斷飲水洗口囉。呢款味道四不像,完全唔似香港嘅濕芒果,小編食咗一細啖都頂唔順吐返出嚟。 入伏點:馨香餅舖 入伏價:鍾金泉甜鹹荳蔻乾(MYR 3.7 / 約HKD 7.03) 入伏點:萬香餅店 入伏價:翡翠方塊(MYR 5.5/ 約HKD 10.45)、咸魚香脆薄餅(MYR...

0

【實測網民負評灣仔老茶記 湯麵冇味菠蘿油嗦水氣】伏務台

最近留意到灣仔老字號茶記金鳳茶餐廳嘅菠蘿油同湯麵喺網上有好多負評,湯麵又少湯到變撈麵,小編就去試吓係真係假先。 呢度舖面細細,但出名程度都令佢有唔少客,所以坐得都幾逼。卡位設計都比一般嘅細張,就算兩個成人夏天坐都好易手踭碰手踭,唔好講依家凍啲著多咗衫。 好多網民俾菠蘿油嘅負評係包唔夠熱,外皮唔脆同有水氣,所以小編叫咗特價午餐(HKD49),有餐包或菠蘿包(加HKD3)、奄列同一碗湯麵。不過呢間舊式茶記仍然未裝熱櫃,如果冬天嚟又撞唔唔啱出爐時間,都難啲食到熱辣辣嘅包。 好彩小編去食嗰陣啱啱出爐,所以菠蘿包溫度適中,表面脆口;味道上都只屬一般及冇咩甜味,完全靠牛油嚟支撐;不過塊牛油只係偏室溫嘅溫度,完全唔「冰」,食唔到冰火交融嘅感覺。 雖然包本身都熱,但包底就有嚴重嘅水氣問題,令到包底嗦晒水變成發水麵包咁腍晒。 奄列正常,但湯麵就有網民話少湯到好似撈麵,而且唔夠熱。不過小編又好彩冇遇上呢個問題,取而代之係冇味囉。無論湯麵定係另外再叫嘅沙嗲牛肉烏冬(HKD34),都好似用滾水煮完裝起先加湯,而且兩碗麵條上枱已經有啲發脹。 不過烏冬嘅湯仲淡過湯麵,加上冇味又發脹嘅烏冬,真係有啲難入口。好彩沙嗲牛肉味道合格,唔會太鹹,不過將沙嗲汁撈埋落湯都唔係好救到啲烏冬。之後小編見有兩枱客人淨食餸,烏冬都冇咩點食囉……。成餐只有出名嘅奶茶OK,有時都唔可以因為老字號嘅光環而以為全間舖都有一致嘅水準。   小編伏氣:3星(5星滿分) 入伏點:金鳳茶餐廳 入伏價:特價午餐(HKD52)、沙嗲牛肉烏冬(HKD34) 中伏by #MOMO 美術by #MOMO 攝影by #MOMO 《伏務台》歡迎各界報料。

0

【連鎖Café中等價錢快餐質素 漢堡乾噌噌意粉油淋淋】伏務台

有時你冇諗過會中伏嘅食物先最有機會中伏。就好似小編今次去沙田市中心嘅Parkview水準都幾飄忽,一時差評奇多,一時就突然成堆好評,不過呢度嘅burger同意粉就平均地差喎。 其實呢間曾經係A1 Bakery旗下嘅餐廳,不過今年年頭轉手俾另一間連鎖餐飲集團,點知轉手後啲質素差咗咁多。今次試嘅Lunch Set除咗「正宗美國牛肉(150g)漢堡伴薯條」(HKD138),仲有「香草醬忌廉汁意瓜帶子意粉」(HKD128),即刻睇吓兩樣咁基本嘅西餐可以伏到咩地步啦。 Lunch Set會跟餐包同餐湯,包就冇咩問題,但餐湯就就一般。小編嗰日嘅餐湯係南瓜忌廉湯,冇南瓜味但有咬口,好似一直飲緊冇味但有質感嘅水,唔足料嘅感覺好差囉。 主菜先講正宗美國牛肉(150g)漢堡伴薯條,漢堡嘅麵包冇做過任何處理,冇搽牛油或烘過,拎上手唔夠熱,只係一個單純麵包就上菜,對唔住佢個價錢囉。 而漢堡嘅重點牛肉漢堡扒,乾噌噌冇肉汁同冇咩味。雖然分量有150g,但塊肉厚得嚟煎到又乾又硬,真係好難吞落肚囉,呢個價錢可以喺X記食到漢堡包放題喇…… 香草醬忌廉汁意瓜帶子意粉上菜時賣相還好,頭幾啖都可以,不過食到帶子同食到一半問題就出現喇。 帶子一碟有兩粒,睇樣就煎得唔差,一食就係成碟嘅死罪!帶子好似平時醃牛肉咁醃到過晒火,入口有啲灼喉嘅感覺,冇咗食物原有嘅鮮味,本身仲嫌佢分量少,好彩得兩粒啫。 香草醬忌廉汁就得個樣,唔好睇佢外表綠油油好好味咁,入口又係冇味,全碟最濃味就係啲蘑菇,但其實都係佢本身嘅味。同埋碟意粉愈食愈多油,睇一睇𠴱碟底先知油到同炒意粉一樣,唔知大家又覺得點呢? 小編伏氣:3星(5星滿分) 入伏點:Parkview (沙田店) 入伏價:正宗美國牛肉(150g)漢堡伴薯條(HKD138)、香草醬忌廉汁意瓜帶子意粉(HKD128) 中伏by #MOMO 美術by #MOMO 攝影by #MOMO 《伏務台》歡迎各界報料。

0

【魚生飯爛溶溶似餸頭餸尾 貓飯咁款睇見唔開胃】伏務台

石門開始發展起嚟,但呢區嘅餐廳質素又跟唔跟得上呢?雖然香港人鍾意食刺身嘅程度,係喺冬天食魚生都冇問題,不過呢間京都嘅質素真係不敢恭維囉,免收加一都唔想返轉頭呀! 餐廳服務方面係零分,小編喺平日夜晚7點58分入座,入座率一半都冇,全場三位男侍應都掛住傾偈唔理客人,落單、上菜都唔招呼聲;甚至枱面唔太夠位擺食物,依然聲都唔聲夾硬攝位上菜,不過小編忍,睇埋食物質素係點先! 晚飯想食魚生又飽肚啲,最直接梗係點定食啦。呢度嘅角切魚生飯定食(HKD69)一上菜就好似餸頭餸尾夾埋一齊,擺盤就似小朋友手筆,凌亂中有啲秩序,賣相扣晒分;魚生有爛溶溶嘅,亦有散收收嘅,份量就唔算多。 就咁睇魚生外表顏色比較淡,又唔夠凍去保持新鮮;入口冇鮮味之餘,仲有少少魚腥味同雪味,小編食兩嚿就想舉白旗。而吞拿魚有好多筋,已經夠難食仲要𡁻十幾啖都未𡁻到。成碗飯入面比較有味嘅係希靈魚,但都係有雪味囉。雖然有埋芥辣章魚,但都係唔夠味,而章魚又好似放太耐變到軟腍腍冇咬口。 飯底可以自選壽司飯或白飯,小編就揀壽司飯。碗飯暖暖哋,不過有啲就一嚿嚿黏住晒,有啲就散收收,唔知係咪因為撈唔勻壽司醋,事關一啲有味啲,一啲就淡啲;而且醋嘅味道似中式白醋,質素同伏食之王明將壽司有得揮!不過小編當晚到第二日都攪肚痛,唔肯定完全關佢事,但八九不離十啦。 試完生嘅試熟嘅,呢個和風炸雞定食(HKD68)震撼程度雖然比唔上魚生,不過都麻麻地。雞扒味道用椒鹽調味都正正常常,不過炸得太乾,食落嚡口刮脷,小編個口第二日仲痛痛哋添。麵食有手打烏冬或蕎麥麵,小編就揀咗手打烏冬,口感都正常唔伏嘅,只係煮得唔入味啫。湯底重味精,不過有即食麵嘅質素,如果你唔介意口渴都可能會鍾意。不過食完埋單,小編又要等店員好耐先嚟處理囉……   小編伏氣:4.5星(5星滿分) 入伏點:京都 入伏價:角切魚生飯定食(HKD69)、和風炸雞定食(HKD68) 中伏by #MOMO 美術by #MOMO 攝影by #MOMO 《伏務台》歡迎各界報料。

0

【蛋包飯蛋香欠奉冇色水 咖喱汁重味精冇咖喱味】伏務台

小編有次諗住lunch食好啲,於是去試SHY Xpress觀塘外賣店嘅蛋包飯,貪佢嘅蛋牛治出名,心諗應該做蛋嘅周邊菜式都冇死,點知連累同事齊齊中伏囉…… 心水清嘅網民應該知道SHY Xpress係由前藝員伍文生開嘅蛋牛治外賣店,中午開始仲會做埋蛋包飯。小編叫咗份牛脷蛋包飯(HKD59),本來想即刻試埋招牌蛋牛治(HKD38/全日餐),點知賣晒,唯有第二日嚟賣早餐先試到。 其實小編第一次食牛脷蛋包飯已經中伏,但今次再食依然麻麻哋囉。 話明蛋包飯就先講蛋方面,蛋皮嘅顏色比較淺,食落冇咩蛋味,仲有啲未溶晒嘅鹽粒喺裡面。既然標榜專做蛋治同蛋包飯,蛋皮整到咁就要檢討吓啦。蛋包飯可以配蘑菇汁或咖喱汁,另外可以喺香蔥、粟米、蘑菇同蕃茄四款配料任揀一款。小編揀咗咖喱汁配粟米,但出品仲頹過頹飯囉……咖喱汁口感有啲粉粉哋,好似咖喱粉未開勻嘅感覺;冇咩咖喱味之餘幾鹹吓,有幾位同事試咗啖之後都不約而同講好重味精! 而且飯嘅質感太黏,唔夠粒粒分明,撈埋咖喱汁真係黏上加黏。另外,小編要白飯底,點知佢俾錯小麥飯……其實小編已經避開繁忙時間,三點左右先嚟買,當時得一兩個客,點解仲可以咁大意呢?牛脷就煎得過火喇,韌到好似食皮帶咁,冇啲牙力都食唔到呀。 第二日試埋佢嘅招牌蛋牛治(HKD32/早餐跟熱飲),相比蛋包飯就冇咁出事,但都係有同一問題,唔夠蛋味呀!唔知係咪蛋漿出事,感覺蛋黃嘅比例太少囉……而另一個問題係本身個餐咁貴唔包烘底都算,既然跟深水埗嘅新香園學整蛋牛治,咁就應該學埋佢嘅服務精神,問吓你要唔要加烘底啦,點知冇喎!雖然小編見呢間店唔係伍文生掌廚,但發現佢哋招募緊加盟店,不如同步提升品質同服務啦。   小編伏氣:3.5星(5星滿分) 入伏點:SHY Xpress 入伏價:牛脷蛋包飯(HKD59)、招牌蛋牛治(HKD32/早餐) 中伏by #MOMO 美術by #MOMO 攝影by #MOMO 《伏務台》歡迎各界報料。

0

【嘉樂冰廳轉手後質素下滑 奄列嚡口兼重美極豉油味】伏務台

荃灣嘅嘉樂冰廳有四款名物,分別係奄列、鮮牛蛋治、豉油王雞翼同炸雲吞,但小編留意到好多網民話佢轉手重開後,奄列同鮮牛蛋治出晒事。今次小編就試奄列、鮮牛蛋治同豉油王雞翼,睇吓係咪真係咁伏先。 首先試小奄列(HKD32),雖然睇落大大份好抵食咁,但真係食兩啖就鹹到唔想食落去。佢個蛋太依賴美極豉油嚟調味,而且落得好重手,令到成個奄列鹹得嚟又重味精味兼冇晒蛋香,咁用再多嘅蛋整都冇用啦。加上蛋皮煎得有啲老,但又唔脆口,真係幾失望。而火腿入口竟然係粉粉哋同霉霉哋嘅質感,連埋蛋一齊食仲鹹上加鹹添。 然後試鮮牛蛋冶(HKD31),雖然叫鮮牛,但有網民話佢用咗沙嗲牛整係貨不對版,不過上網搵返轉手前嘅相都係用沙嗲牛整嘅。但係小編食落味道偏鹹,而夾住嘅蛋就同奄列有相同致命點,都係太依賴美極豉油嚟調味。 最後係豉油王雞翼(HKD36),同上面兩款比的話,呢味較為出色同問題唔大,只係同樣鹹死人!因為連豉油王雞翼都有美極豉油味呀!好彩小編今次唔使排隊,如果等勁耐而食呢種質素會真心嬲囉。   小編伏氣:3.5星(5星滿分) 入伏點:嘉樂冰廳 入伏價:小奄列(HKD32)、鮮牛蛋三文冶(HKD31+烘底HKD2)、鼓油王雞翼(HK36) 中伏by #MOMO 美術by #MOMO 攝影by #MOMO 《伏務台》歡迎各界報料。

0

【太子老字號燒味名過於實 叉燒乾過柴味道死鹹】伏務台

小編最近留意到網上指一間喺太子嘅老字號燒味店永合隆飯店有勁多伏評,大多數網民都話啲叉燒乾到好似柴咁,仲瘦過瘦叉添。不過燒味又唔可以齋睇叉燒質素嘅,所以小編試埋佢哋其他燒味,睇吓係咪樣樣都咁伏。 永合隆飯店已經開業大約50年,但近幾年就多咗人話佢名過於實,淪為遊客打卡店。今次小編試咗兩款雙拼飯同一碗例湯,一共四款燒味嚟。 先試叉燒燒肉雙拼飯(HKD63), 就咁睇色澤模樣都幾正常 ,點知入口就出事喇……有陣似燒焦咗嘅燶味,食多兩嚿都有啲難入口;明明個樣唔似瘦叉,但口感仲乾過瘦叉。小編都向員工求證係咪特登用瘦叉嚟整叉燒?點知佢哋否認之餘,仲話係用最好嘅貨嚟整,小編都有啲愕然囉。 至於燒肉味道真係好鹹,而且冇揸勻啲鹽,局部位置極鹹添,食一嚿就要飲啖水嚟中和陣鹹味。而燒肉皮就好睇食客運氣,小編呢碟就有脆有唔脆。 乳豬切雞雙拼飯(HKD63)嘅乳豬同燒肉一樣都係死鹹。而且有一點令小編覺得佢幾冇heart,就係堂食都俾一包包嘅外賣乳豬醬,作為一間老字號燒味店,仲自稱專做燒乳豬,唔係連自家製乳豬醬都冇掛?!切雞雖然味道唔錯都算滑,但小編呢碟就瘦到得幾両肉咁,唔係好夠餸飯囉。 最後唯一唔伏竟然係佢個例湯(HKD10),有料得嚟又清甜,轉行賣湯仲好喎。其實以呢度嘅價錢,可以去酒樓食個質素好啲,出品又穩定啲嘅燒味飯呀。   小編伏氣:3星(5星滿分) 入伏點:永合隆飯店 入伏價:叉燒燒肉雙拼飯(HKD63)、乳豬切雞雙拼飯(HKD63)、例湯(HKD10) 中伏by #MOMO 美術by #MOMO 攝影by #MOMO 《伏務台》歡迎各界報料。

0

【麻辣螺獅粉有陣「噏味」 最離譜係條菠菜黐住篤……】伏務台

麻辣係港人喜愛嘅口味之一,深水埗嘅麻辣皇后個名咁有氣勢搞到小編都想試吓囉,點知出晒事!螺獅粉可以揀麻辣湯底,先唔講夾唔夾,本來聞到餐廳有啲「噏味」已經唔係幾開胃,但竟然可以「噏」到落碗麵度!咁已經覺得伏?未算囉,睇埋落去你就明白呢間嘢下晝兩點都係得兩枱客嘅原因喇! 呢碗牛腩螺獅粉(HKD40)外表普通,究竟佢會唔會有齊螺獅粉酸、辣、鮮、爽、燙嘅風味?當然冇啦。湯底味道唔濃厚,好水汪汪。小編當日叫咗中麻辣,所以辣味好出,麻就唔多覺,隱約有啲酸味嘅,但都係有陣「噏味」,唔怪得之前有網友話螺獅有臭味啦。 螺獅粉似係煮咗好耐咁款,因為一夾起一餅嘢咁,完全係擺耐咗嘅感覺。好在都鬆得返,口感似未煮腍嘅米線。 有說正宗螺獅粉唔會上螺獅肉,只會用嚟熬湯,不過呢度有就試吓啦。其實佢黑到咁,初時都唔係好認得佢,入口有啲韌,冇咩味,真係唔食都得。 其他配料仲有炸腐竹,不過冇浸到湯嘅部分都係軟軟哋,少少脆都冇,有啲失望。 酸菜唔酸,仲好似雪菜咁帶甜;酸筍爽嘅,但都係唔酸。木耳、花生就正常,蘿蔔就煮得太耐喇。 牛腩有六、七粒,少少韌,但仲有啲筋腱爽口嘅質感,算係咁啦。 不過最唔正常同唔能夠接受嘅事,竟然發生喺菠菜身上!食第一條有啲嗦嗦聲,以為夾住湯嘅香料,但再食多條嗦嗦聲再勁啲?小編一大堆黑人問號啦,索性夾大抽啲出嚟睇睇咩料,見到竟然係夾住一篤疑似係泥嘅物體!除咗似泥都真係諗唔到更貼切嘅形容!真係離晒大譜呀,睇見呢篤嘢冇晒胃口呀,即刻懷疑其他食材有冇洗乾淨囉……愈諗愈嬲,即閃!   小編伏氣:其實餐廳有陣「噏味」已經唔OK,食材味道唔對辦,雖然逐樣分開食都還可以,但係加埋一齊就變怪味呢!最最最離奇係,條菜竟然會黐住一篤疑似係泥嘅物體!食到碗咁「污糟」嘅嘢,冇可能再俾機會呀! 入伏點:麻辣皇后 入伏價:牛腩螺獅粉(HKD40) 中伏by #為食加菲貓 美術by #車雲 攝影by #為食加菲貓 《伏務台》星期一伏務大眾,歡迎各界報料。

0

【日本過江龍都會中伏!漢堡扒又乾又硬仲賣得貴】伏務台

過江龍係咪真係巴閉啲?以為總係離唔開大排長龍,好似個個都要仆住去朝聖咁,但事實證明並唔係間間嘅食物質素都有保證㗎,呢間喺沙田嘅日本過江龍就伏到小編應一應喇! 呢間來自日本嘅過江龍MOKUOLA(唔講真係唔知佢係過江龍囉!)主打西日料理,開咗都有一段時間,店內環境都唔差。臨近晚市,附近餐廳都開始出現人潮,但唯獨呢間餐廳淨係得兩、三枱客,未入去都已經feel到唔多妥喎! 小編揀咗呢款漢堡扒咖喱飯(HKD88),呢個係單嗌價錢,唔包飲品。一上到枱賣相都叫正正常常,清楚見到有沙律、薯條、咖喱飯加塊漢堡扒放埋一齊咁,望落主角只係佔咗三分一,分量有啲細喎。另外唔通係小編見識少?通常啲主菜一係揀飯或者薯菜,好少見兩樣都有喎,更加未見過會將薯條同飯擺埋一碟上。 薯條用咗麥記嗰隻幼薯條,就咁睇似乎炸得唔多夠火喉,一啲都唔金黃,講真睇落已經唔多吸引。食條試吓,凍嘅!仲要乾噌噌硬堀堀,似擺咗段長時間喎! 喺飯旁邊啲薯條全部都黐滿飯粒,變晒呢啲「飯粒薯條」,個樣仲要幾嘔心吓。咁究竟係食緊薯條定飯呢?小編已經分唔清喇…… 點都要試吓主角嘅,切嘅過程已經感受到塊扒幾咁硬,要花啲力氣先切得開。本來一塊漢堡扒都冇話要求佢要有肉汁,但起碼俾返少少油分吖,呢塊扒真係乾到唔正常,食落嚡口,蘸咗咖喱汁都仲係覺得乾就知咩事啦。 飯上面個咖喱汁係普通日式咖喱,味道偏鹹微辣;汁入面冇平時日式咖喱見到嘅甘荀、薯仔,淨係得少少洋蔥。咖喱飯都擺得入口嘅,但就稱唔上好食㗎喇!   小編伏氣:88蚊一個咁嘅飯仲要加一,成百蚊其實都可以食到個唔錯嘅扒餐㗎喇,但偏偏就喺度中晒伏。薯條又凍又乾,仲第一次食到飯粒薯條添!連漢堡扒都可以整成咁,小編真係唔知可以講乜。成個餐得沙律係正正常常,所以話過江龍都唔一定好食,隨時中晒大伏呀!   入伏點:沙田MOKUOLA 入伏價:漢堡扒咖喱飯(HKD88) 中伏by #大食積 美術by #車雲 攝影by #大食積 《伏務台》星期一伏務大眾,歡迎各界報料。