Category: 未分類

0

【KiKi茶新推秋冬限定 爆多珍珠伯爵蛋糕茶味濃】茶米

九月中先喺香港太古廣場開業嘅KiKi茶@茶.米,最近又有新搞作喇,就係邀請咗一位日籍米芝蓮星級大廚為旗下招牌KiKi麵設計咗秋冬限定麵食,另外仲推出咗一系列令人期待嘅甜品同暖笠笠嘅茶飲。有幾吸引?即刻睇埋落去啦! 環境都幾闊落,好有空間感,唔會覺得逼。 有個沖茶飲嘅開放式吧台對住客人,成個沖製過程一眼望晒,幾咁開揚。 呢款秋冬期間限定嘅KiKi溫泉蛋肉味噌拌葱油太麵(HKD118),就係由日籍米芝蓮大廚設計出嚟。同樣係用KiKi招牌日曬麵做拌麵底,再加上肉味噌同溫泉蛋,台日配搭好match。一拮隻溫泉蛋,蛋漿即刻流晒落碗麵入面,撈埋一齊食除咗有蔥油香之外,仲有濃濃嘅蛋香添。 梗係唔少得最吸引嘅甜品啦!伯爵戚風蛋糕配黑糖珍珠(HKD68),唔止以英式伯爵茶嚟做戚風蛋糕,上面啲Cream都加咗伯爵茶,成個蛋糕都有好濃郁嘅伯爵茶味;另外仲有乜都有佢份嘅黑糖珍珠喺面頭做點綴,既有蛋糕嘅鬆軟,又有煙韌嘅口感,味道一啲都唔單調。 表面有一個個綠色波波、賣相咁得意嘅就係綠茶提拉米蘇(HKD68),平時嘅提拉米蘇係用可可粉,但佢哋就一反傳統,用日本綠茶粉取代,感覺新鮮,綠茶味食落仲好濃添。 之後可以試吓焙茶布丁拌黑糖珍珠(HKD38),以香濃嘅焙茶整成布丁,估唔到,焙茶味同奶香又係夾到一絕,加埋咁煙韌嘅黑糖珍珠,特別有台灣味。 KiKi烤茶泡芙(HKD38)入面係加咗鐵觀音忌廉,茶味十足。一啖咬落去,食到酥脆嘅泡芙皮同好幼滑嘅忌廉,仲浸出鐵觀音嘅香味! 冬天熱飲不可少!自家桂圓紅棗茶(HKD32)用料絕對唔求其,用返台灣當地嘅紅棗同桂圓每日新鮮煮嘅,女仔飲仲夠晒滋補。 仲有用黑糖熬煮而成嘅黑糖紅棗薑母茶(HKD34),加埋薑就更加暖胃。怕凍嘅朋友仔喺寒流來襲飲返杯就真係暖笠笠喇!   茶米 地址:香港金鐘金鐘道88號太古廣場1樓112號舖 電話:2117 5903 營業時間:11:00-22:30

0

【潮食夏威夷魚生飯】POKE

終於有間夏威夷魚生飯殺到入銅鑼灣喇!位置就係銅鑼灣人氣雪糕王Via Tokyo旁邊,燈牌夠晒搶眼。POKE讀[POH-KEH]係魚生飯嘅意思。唔講可能你唔知,其實夏威夷嘅一直以黎都聚居好多漁民,而有好大部份都係日本人。呢班日本漁民最鍾意將夏威夷盛產嘅吞拿魚即劏切成一粒粒,再加入醬油、海帶同壽司飯撈埋一齊就食嫁喇!然後慢慢海邊附近都開始賣呢種魚生飯,變成夏威夷特色食品之一。 POKE創意主廚曾經喺香港最頂尖餐廳學過廚,經驗豐富,對食材同品質亦好有要求。因為唔想一次過推出所有款色拖抵食物質素,所以暫時餐牌上面款色未算太多,先推出以下5款rice bowl等大家過下口癮先! 挪威三文魚日日全條新鮮運到日日劏,而所有調味醬料都係即叫即撈,保持住魚生本身質感同味道! 調味用嘅海鹽由夏威夷出產,海鹽之所以有顔色,原來係源自豐富礦物質嘅海藻泥!而每個rice bowl飯面都會放日本芝麻同紫菜。 如果唔想食成碗飯,可以選擇以下呢款反傳統嘅Go Green(HKD98), 用沙律菜代替飯再配果仁碎同三文魚。唔好睇少佢呀,食晒都夠飽嫁。 唔食魚生都可以過黎幫襯,The Vegan(HKD58)專為素食者而切!就算小編唔係食素都好enjoy呢個rice bowl。一半係炆冬菇,另一半豆腐配杏仁醬同芝麻。 餐廳用正宗日本芝麻,磨好先用,所以特別香特別好味! POKE招牌rice bowl當然唔少得用吞拿魚做主角嘅Poh-Keh(HKD88),配上新鮮海帶,蟹子同木魚醬油,完全食得出傳統漁民風味! 大啖大啖魚生同壽司飯,比食壽司暢快得多啊! 主廚話呢款Ahi-San(HKD88)稱得上係佢地餐廳殺手鐧!個醬汁用乳酪同wasabi混合在撈賣吞拿魚,乳酪可以淡化wasabi辣味但保持住wasabi本身香味,wasabi迷記得要試。 POKE 地址:銅鑼灣禮頓道124號地下 電話:59866398 營業時間:星期一至日: 11:30-21:30

0

【意式雪糕新浪潮】GROM

雪糕友召喚!係咪一直心思思想試晒多國雪糕呢?意大利品牌GROM終於喺香港開首間分店啦!店舖位於中環國際金融中心商場,都幾方便㗎! GROM全部gelato都係源用意大利傳統食譜製作,空氣和脂肪比例比一般雪糕低。為咗確保使用嘅食材夠晒優質,仲自家設置有機農場,提供原材料!仲要無添加人造色素、香料、任何防腐劑或乳化劑,再加埋只選用自家農場嘅新鮮時令水果製作,邊個仲敢話食雪糕唔健康先!   GROM嘅招牌口味係Crema di Grom (Medium HKD69),以經典奶油口味gelato混合厄瓜多爾朱古力同自家烘焙嘅粟米曲奇,口感好豐富呀! 另外最為人熟悉仲有開心果味gelato (Medium HKD69),開心果選用產自中東嘅Mawardi,有「Perfect Green」嘅美譽,果仁味突出,啖啖都食得好開心。 如果雪糕滿足唔到你,唔緊要,仲有鮮果雪葩 (Medium HKD69)!以意大利Siracusa檸檬製作嘅清新口味Limone同香桃味Pesca,使用自家有機農場栽種的蜜桃,果香十足。 仲唔夠?放心,GROM香港店仲會出售意式沙冰Sicilian granita、奶昔、雪條,甚至可以喺gelato加忌廉(HKD6)!成分同其他系列一樣,全部都係全天然,仲不含麩質㗎。唔講咁多住喇,小編要去約朋友食下先! GROM 地址:香港中環金融街8號國際金融中心商場1023號店 電話:2454 2777 營業時間:10:00a.m.-10:00p.m.

0

【爆紅火辣盆菜宴】紅館

去紅館睇演唱會,小編就試得多啦,係咁咦閒閒地都同一萬幾千人一齊大合唱。最近喺鰂魚涌都有一間紅館,不過就唔係開個唱嘅場地,而係以外賣爲主嘅特色菜小店!特色到盆菜都有得你食,盆菜本身俾人感覺好似有啲old school,但係加咗麻辣,又確係出奇地夾喎,開party嗌一盆都無人話老土!小編試過正嘅,梗係要介紹返俾大家!黃金麻辣盆菜(HKD768),喺15/9之前預訂仲有優惠價(HKD588),有4人分量架。講得係麻辣盆菜,湯底當然好重要啦!個湯底每日新鮮爆炒5-6個鐘,確保原汁原味完全保留。仲要唔會隔夜,每日新鮮製造,真係少啲心機都唔得㗎!辣度有大、中、小辣任你揀,食得辣嘅你就要挑戰下大辣。如果地方就近嘅話仲可以要求預先加熱,拎到返去即刻有得食!提提你,想試呢個盆菜就記得提前三日預訂啦! 盆菜特色係食材層層疊,越煲越入味,越食越滋味,成棚人一齊圍住食!成個盆菜一共有13種唔同食物,分別有大海蝦、雞、五花腩片、牛肉串串香、金錢展、金錢肚、豬肚、招牌大波波魚蛋、豬紅、支竹、蘿白、豬皮、薯粉。十分豐富,材料會不定時有改變。未食已經聞到非常香辣,加熱之後聞落味道香濃惹味。大量手剁花椒,再加上芝麻、蔥花結合得天衣無縫。其中小編最愛大海蝦,大大隻辣子海蝦係嗜辣者必試,鮮甜又肥美。 8月先推出嘅極爽麻辣醬(HKD86)由20種材料爆炒而成,特別之處係用原隻指天椒爆炒,特別麻辣惹味,亦不添加任何水分,係紅館獨一無二生招牌嚟㗎!最適合做火鍋配料或者撈湯粉麵,仲要係百分百全人手香港製作,真材實料, 每次仲要係批量發售,真係手快有手慢就等下一回啦。 小編當然唔會只得介紹食物咁簡單啦,仲有優惠帶俾大家!而家買2罐極爽麻辣醬就即刻送一包醇黑麻油海蜇皇啦! *小店周六、日及公眾假期休息。 *黃金麻辣盆菜需要提前三日預訂。 紅館 地址:鰂魚涌海堤街18-22號D7地舖 電話:3580 2920 營業時間:星期一至五: 11:30-22:00 *記得密切留意佢地facebook啦 https://www.facebook.com/theredcuisine/

0

【新派慢活素食】The Herbivores

一提起素食,好多人就會諗到傳統齋舖,但其實西式素食越來越普遍。有人素食,係因爲宗教理由,有人就為咗健康,無論係咩原因素食,小編都有好推介。中環蘇豪區素食店The Herbivores,一向都係不少素食者嘅飯堂,2014年更獲誠品書店邀請,係書店内開分店。誠品店比中環店大咗幾倍,可以坐到五六十人。店内中央放咗一張大長檯,素食者們可以盡情享受悠閒時光。 餐廳行典雅風,擺設都以木製爲主,暖色調燈光環境加上健康美味食物,食得放心又傾得開心。 南瓜卡邦尼意粉 (HKD168) 本身卡邦尼係來自意大利羅馬嘅家常麵食,經過改良之後,少咗煙肉,加入南瓜,中和本身卡邦尼嘅油膩感,加上今次用扁身麵,口感大增。 意式青瓜卷(HKD72) 味道酸酸甜甜,青瓜片卷住芝士,爽脆嘅青瓜包住濃郁芝士,食落好有層次感,再加埋意大利油醋,非常開胃! 黑松露雜菌意大利飯(HKD178)可以自由選擇走蔥蒜或者全素,啱晒各種素食朋友。Menu底部有提示解釋每道菜係”B”(走蔥蒜)或是”V”(全素),素食者們可以根據自己意願選擇,唔洗擔心個人因素錯過美食啦。不得不讚意大利飯加咗Cream,口感軟熟又夠香。 招牌豆腐漢堡配薄脆(HKD128)表面好鬆脆而內裡煙韌嘅麵包,中間夾住似魚柳一樣鬆脆而有彈性質地嘅豆腐,真係估你唔到!小編得知餐廳蔬菜係每天購入,新鮮又健康即刻大啖大啖食。 豆腐盒子(HKD188)賣相相當新穎,唔講係豆腐仲以爲係酥皮麵包。呢個盒子用本地板豆腐同 risotto混合,中間釀入芝士,蒸完再炸嘅芝士汁滲出表面,加上自製麵豉醬同底下墊粟米粒,味道香甜。 The Herbivores 地址:銅鑼灣軒尼詩道500號希慎廣場9樓 (誠品書店內) 電話:2613 2920 營業時間:星期一至日: 12:00-22:30

0

【精緻手工狗狗月餅】Little Furball

一年容易又中秋,你地一個二個食月餅食得咁開心,有無發現屋企個小毛孩望到流晒口水?相信好多人都好錫自己嘅狗狗架喇,又點捨得少左佢嗰份呢!小編最近認識一位非常愛狗嘅網上店主,專賣狗狗日用品同健康零食,對於用料又好講究,希望狗狗食得落肚都要安全同健康。 講緊就係Little FurBall喇!今年店主棄用傳統麵粉皮,鑽研出用新鮮同天然有機蔬果風乾打磨成粉再混入日本及韓風薯,營養十足。有綠黃紫紅 4款口味,每款有特別功效,狗狗食得開心主人又放心!限量供應50份,手快有手慢無啊!(1) <綠悠悠> 綠色: 鴨胸青囗 – 鴨胸含高蛋白質, 陣陣肉香, 配上風乾青口粒粒, 有豐富青邊素及葡萄糖胺有助保護關節。 (2) <黃芝芝> 黃色: 雞肉 自家製狗狗食用低脂茅屋芝士配上無激素巴西雞肉, 香濃芝味! (3) <沖繩紫>紫色: 鱷魚肉 秋天又到, 大人有兩聲咳, 小朋友氣管一樣要做 保健鱷魚: 低脂, 低膽固醇, 高蛋白, 對有氣管敏感同咳嗽的狗狗會有特別功效! (4) <迷人粉> 紅色: 美毛系列 –...

0

【嘉麟樓名廚主理】天澄皇牌奶皇月餅

中秋通常會做啲咩?賞月,玩燈籠,同埋食月餅,依家月餅嘅種類五花八門,但質素就參差不齊,有見及此,小編明查暗訪,終於搵到一間由前半島廚師主理嘅天澄月餅,百分百無添加,天天香港新鮮製造,所以限量發售嫁!小編一於身先士卒,即刻買返盒試下先! 天澄月餅唔止一種口味!雙式月餅禮盒套裝(HKD228),有「酥皮奶皇月餅」同「酥皮芝士月餅」兩種口味。大家重諗緊買咩月餅送禮好?送呢個禮盒套裝就最適合不過啦。不含任何添加物,絕對係送禮及自用佳品。 酥皮奶皇月餅外層酥皮似曲奇皮,入口鬆化,比起傳统月餅少份油膩感,更爲健康。餡料豐富,用料方面絕不手軟,食落去奶皇甘香幼滑,一個既份量就剛剛好。 之後仲試埋酥皮芝士月餅,一切開,聞落去芝士味香氣噗鼻,咬落口感似芝士蛋糕,但餅皮同時又保留住傳統既味道,就連月餅都結合埋中西文化。 銷售點: 天澄閣  紅磡灣海韻軒海景酒店3 樓 馬鞍山鞍駿街29號海澄軒海景酒店地下 松坂庫 銅鑼灣軒尼斯道396-416號德興大廈1-2號舖地下 旺角花園街3-5號鴻威大廈地下10號舖 佐敦彌敦道315號地下 尖沙咀金馬倫道35號地下  

0

【新店限定邪惡吐司】Tom N Toms Coffee

全球分店多達600多間嘅Tom N Toms Coffee終於喺香港開第二間分店啦!今次香港第二店選址觀塘apm,同沙田店一樣,Tom N Toms繼續堅持為大家保留正宗韓國風味,原材料都係由韓國進口。而且沙田同觀塘兩間分店仲有唔同嘅限定食物,即刻同大家搶先報導! 雖然係跨國品牌,但係對所有顧客都一樣非常用心㗎!唔講唔知,原本吐司外層係有埋麵包皮嘅,但考慮到香港人嘅口味,特意將外皮切走。廚師均勻地將朱古力醬抹上麵包四邊同面層,排好棉花糖,擺入焗爐輕輕烤一烤。嘩,香味即刻撲埋嚟!原本白雪雪嘅棉花糖都變晒金黃色,一粒粒好飽滿。不過咁都未完㗎,之後再喺吐司四邊加埋Cream,再落埋煉奶!即時視覺、嗅覺、味覺、邪惡指數都攞滿分! 榛子朱古力棉花糖吐司(HKD55)係觀塘分店嘅限定口味,人氣吐司每個都係即叫即製㗎!漲卜卜嘅金黃色棉花糖真係睇到小編口水都流埋!雖然吐司落重料,但係食落唔膩。上面嘅棉花糖食落好綿密,加埋吐司外脆內軟,再連埋沾上咗嘅煉奶同cream,擺入口真係有種完全融化嘅感覺!提提你,吐司仲可以加$15-25轉套餐有埋飲品! 唔鍾意食甜,仲有期間限定嘅韓式牛肉薄餅(HKD55),薄餅都係即叫即烤,陣陣香氣撲鼻而來。將薄餅 輕輕一拉,即刻拉出長長嘅芝士。入口芝士、牛肉嘅味道同洋蔥甜味融和,加埋薄餅餅底香、脆、薄,好適合鍾意食薄pizza,貪佢夠輕又夠脆嘅朋友。 飲品方面,又點少得人氣飲品藍色檸檬汽水(HKD36)呢?飲品藍色本身已經夠晒吸引,底層仲加咗檸檬果肉,睇落有漸變嘅效果。飲落酸酸甜甜好解渴,加埋檸檬果肉口感豐富,小心極易上癮! 想享受悠閒飲咖啡時光,可以試試咖啡拿鐵(HKD33)。唔止好香嘅咖啡味,飲落仲好滑,奶味同甜度比例剛剛好,叫埋三五知己一齊試下啦! Tom N Toms Coffee 地址:觀塘觀塘道418號創紀之城五期(apm)4樓L4-26號舖 9月1日正式開始試業,試業期間開10:00a.m. – 10:00p.m. 之後營業時間或會延長 **密切留意佢地facebook啦 https://www.facebook.com/tomntomshk/

0

【獨家激賞GIN】Urban Park

又有驚喜啦!Urban Park期間限定優惠一浪接一浪,今次推出Salad Gin Tonic活動,活動由30/8-3/9爲期5日,優惠仲要相當吸引,讓你可以喺炎炎夏日盡情舉杯暢飲GIN TONIC。 想參與期間限定優惠活動?方法好簡單,TFFF成功爭取到大激賞,TFFF Fans只要相機食先,影張靚GIN TONIC相Post上IG或者Facebook,並Hashtag #GinJubilee2016,#Eastimperial ,#saladgintonic ,#HendricksGin ,#UrbanParkCentral,就可以免費送杯原價(HKD139)嘅GIN TONIC嫁!仲唔快啲Like Too Full For Food Page https://www.facebook.com/toofullforfood/ 成爲我哋Fans。 Urban Park 地址:上環德輔道中173號德南豐大廈2樓3-5號店 電話:3708 8083 營業時間:星期一至日: 11:30-22:30