Tagged: 三文魚

0

【蘇豪最新日式小店 巨型牛扒丼飯啖啖肉】真心

喺中環蘇豪區,有唔少西式餐廳,不過最近就有間日式小店真心登陸蘇豪喇,又多個選擇唔使咁悶。真心呢間日式小店,同時亦係間Sashimi bar,有得食刺身之餘仲有唔同嘅酒精飲品,食住刺身飲酒夠晒爽啦!餐廳嘅英文名叫ZEN,玩埋諧音「真心正」咁解! 老闆話除咗食物係真心正之外,每一樣食材都真心對待,連賣相都好花心思去擺靚佢,希望吸引到客人食慾,無論顏值同味道都要做足一百分咁話! 小店面積雖小,最吸睛係牆上嘅壁畫,將日本嘅名勝古蹟同旅遊景點都畫晒落去,等食客見到都好似身處日本一樣咁有feel。 吉列海鮮丼(HKD128)丼飯鋪滿炸生蠔、炸蝦同炸蟹鉗,睇見都令人食慾大增,流晒口水!炸物食起上嚟口感寧舍唔同,因為餐廳用咗自己調配嘅油嚟炸,食落更加酥脆香口。 炸生蠔食落外層酥脆,內裏鮮甜多汁,隱約仲食到少少海水味,一啲都唔腥呀。 炸蝦肉質彈牙,香脆可口,炸粉一啲都唔厚,放咗一陣唔會話即刻就淋晒,唔錯唔錯。 炸蟹鉗肉質同樣彈牙,面頭淋咗一層醬汁,食落甜甜哋,送飯一流。 霜降熊本牛扒丼(HKD198)犀利喇,牛肉由熊本直送,油花均勻,雖然未去到和牛級別,不過都做到和牛腍身嘅口感同油香味,真係好好味!牛肉仲多過米飯,食肉獸見到呢款丼飯真係會好開心㗎! 牛味超級濃郁,仲依稀見到牛肉粉嫩嘅顏色,仲要一啲都唔嚡口,嫩滑口感好滿足! 刺身拼盤A(HKD168)包括三文魚、八爪魚、北寄貝同帶子。呢四款都係大眾比較鍾意食嘅刺身,一上枱見到刺身嘅色澤咁靚已經知道係高質刺身!帶子係北海道頂級靚貨,鮮甜至極,唔需要點豉油,食返本身帶子嘅甜味已經非常足夠。 三文魚用上最靚嘅A grade挪威三文魚,油脂豐腴,又係食唔停。 北寄貝味道偏甜而且好煙韌,好有咬口。 海盜船-海膽吞拿(HKD128),將平平無奇嘅腐皮壽司變成加大碼,上面仲加咗海膽同吞拿toppings落去,又幾得意喎!除咗海膽吞拿呢個配搭,仲有海膽帶子、蟹膏蟹籽、鰻魚玉子等其他選擇。用雙拼形式配搭,一個價錢就食到兩款味道,係店內必食招牌之一! 海膽吞拿full到差唔多滿瀉,平時就咁食吞拿油分會較多,如果將佢減半,配埋海膽嘅鮮甜,中和油膩感之餘,本身又有甜甜哋腐皮壽司做底,味道非常match!三重口感勁豐富! 真心 地址:中環蘇豪士丹頓街21號地舖 電話:6999 6434 營業時間:星期一:12:00-15:00;星期二至四及星期日:12:00-22:00;星期五至六:12:00-23:00

0

【木系家俬×文青Café 食cake歎果茶chill到爆】廿一由八

觀塘有唔少樓上Café,想搵間有新意少少?今次有好介紹喇!關於廿一由八嘅歷史,其實之前係一間開喺火炭嘅木具工作室,當時好多客人都話環境好舒服,如果有埋咖啡/小食供應就更加好喇!一不做二不休,趁今次搬新店就決定加入Café元素,俾大家享受吓又舒服又有美食嘅環境。 廿一由八呢個名原來都有段故㗎!由於店舖最初以做傢具起家,名字上想由唔同組合建構而成,而三位創辦人都姓黃,所以將廿、一、由、八,呢四個字打直拼埋,正正就係個黃字,幾咁有創意呢! 店舖主要分成三個區,一邊係木具工作室;另一邊係用餐區同木具陳列廳,店內所有木具傢品都係自己製造,客人上到去除咗可以食件cake、chill一chill仲可以順便睇埋傢具,全部可供訂造㗎!用餐環境被木具包圍住,聞住啲木香,真係好relax! 主廚Shena啱啱喺法國藍帶廚藝學院畢業,所有menu同甜點都由佢一個人包辦一腳踼!大約個半月就轉一次menu,希望可以保持新鮮感俾熟客。 法式紙包焗檸檬香橙三文魚配迷迭香烤榛子馬鈴薯+意大利黑醋沙律(HKD138),因為太多客人想食三文魚,所以主廚就諗咗呢道菜式。三文魚味特別加咗檸檬同香橙嚟調味,再連同香草一齊焗,將魚嘅味道帶返出嚟,魚肉勁嫩滑!薯仔連皮切粒,用石榴籽配搭,入口酸酸甜甜,加埋棒子果仁,口感層次好豐富。 芝士辣肉腸墨西哥餡餅(HKD68)好受客人歡迎!餡餅比薄餅食落更有咬口,芝士辣肉腸仲好惹味! 餡餅外脆內軟,加咗辣蕃茄醬、杏仁碎片、芝士同辣肉腸,芝士味都幾出,上面仲有芥末醬,成個餡餅材料嘅配搭match得啱啱好,話咁快件件清呀! Peach Tea (HKD40),主廚話發覺有啲客人一係好鍾意飲咖啡、一係就唔飲咖啡,所以決定加果茶。蜜桃茶嘅茶底用果蓉打出,之後再加紅茶,飲落清新爽甜,飲完一啖之後陣蜜桃味仲喺口中停留,果然係店內王牌飲品呀! 香梨薑黃吉士蛋糕(HKD38),每日最多只會供應8件,想食要撞吓彩數!用乳酪代替牛油,食起上嚟口感冇咁甜膩!就咁睇賣相好似「硬崩崩」咁,其實內裡非常軟熟㗎! 香梨用薑黃煮過,除咗顏色上同蛋糕match返,仲帶有淡淡薑黃香味,呢個甜點真係完美收場! 廿一由八 地址:觀塘鴻圖道59號鵬光大廈11樓 電話:2321 1738 營業時間:星期二至日:12:00-18:30(星期一休息)

0

【夏天塊面爆汗又爆油 食咩先可以急救控油?】懶健康貼士

夏天又濕又熱,好多人嘅面油多到可以煎蛋呢!已經成日洗面抹面、但好快又再油光滿面?溫度的確同皮膚油脂分泌有關,溫度每上升攝氏1度,皮膚排油量就增加10%;而且夏天仲會出汗,又油又水嘅狀態,就更加油光滿面。除咗同濕度、油性皮膚、荷爾蒙、年齡同性別有關外,其實飲食都有影響㗎,例如經常食高脂、高鹽、辛辣、煎炸同肥膩濃味嘅食物,都有可能刺激皮脂腺變得活躍。 飲食習慣改善到油光面滿? 消化系統出現問題最終會呈現到肌膚表面,所以要有健康肌膚就先要從飲食著手,攝取足夠營養素同維他命係改善膚質關鍵:如進食含有蛋白質嘅魚類、堅果同白肉;穀物類如糙米、蕎麥同藜麥,仲有蔬果類如蕃茄、西蘭花同紅菜頭都係非常有助控油嘅食物。 糙米 | 豐富膳食纖維,排出廢物養成美肌 比起白米, 糙米保留咗好多營養,含有更多纖維素、維生素B群同維生素E等,可以增加膳食纖維嘅攝取量,可以促進腸道蠕動,幫助排便,加速排出體內廢物同毒素。如果經常便祕,毒素不斷累積,容易跟住全身循環影響皮膚,造成粉刺、痘痘等問題! 三文魚 | Omega-3降低發炎,保養皮膚 除咗三文魚,鯖魚、鮪魚、秋刀魚同沙甸魚都含有較高嘅Omega-3脂肪酸,能減少體內發炎反應、幫助調節免疫力,有利於肌膚保養,幫助降低皮膚過敏機會。最好用蒸、烤方式料理,避免油炸、煙燻,以免食到有害物質。唔鍾意食魚愛或者係素食者,可以改食果仁類如核桃,當作植物性的Omega-3脂肪酸來源。 鮮艷蔬果 | 防止皮膚乾燥衰老,維持皮膚表皮同毛孔組織健康 鮮艷蔬果如紅蘿蔔、蕃茄同奇異果等含有豐富維他命A、C、E同天然抗氧化劑,除維持皮膚組織健康同將破壞皮膚嘅自由基清除,以保護皮膚細胞健康同抗衺老之餘,亦能有效對付油脂腺增加分泌油脂而形成的暗瘡。維他命A因有消炎功效,能減低發炎情況同修補組織,而維他命C就有助形成骨膠原同連接組織,保持皮膚平滑同彈性,改善油光面滿。   總之有均衡飲食、多食顏色鮮艷生果蔬菜同多飲水仲要作息定時,記得要放鬆情緒,加上注意個人衞生同埋防紫外光保護,就可以有剥殼雞蛋嘅靚靚肌膚啦!   Michelle Lau 營養諮詢公司NUTRILICIOUS創辦人及首席營養師(加拿大人類營養學碩士)。專注範疇包括運動營養學、體重管理、兒童和婦女營養學。致力推廣均衡營養飲食概念,為多間機構提供營養飲食服務及為顧客提供度身訂造的飲食計劃 。作為一個熱愛跑步和烹飪者,她深信 “Life is so endlessly delicious.” Follow her on ig/fb@nutriliciousss

0

【父親節茶饌懶人包 輕易煮出日式茶漬飯】mui mui家政課

上個月母親節,mui mui教大家整咗2個花系料理;依家輪到父親節,一於以茶入饌,用綠茶同埋烏龍茶,炮製日式三文魚茶漬飯同埋烏龍茶西米布甸,送俾我哋嘅「超人爸爸」啦! 日式三文魚茶漬飯 材料與分量: 三文魚塊(細) – 1件 白飯 – 1碗 綠茶/玄米茶包 – 1包 水 – 300毫升 日本醤油 – 1茶匙 味醂 – 1茶匙 茶漬飯味素 – 1包 做法: 1. 平底鑊落油,燒熱鑊。下三文魚煎香兩面,拆絲備用。 2. 300毫克水煮滾熄火,放入茶包,浸泡至出茶味,約十分鐘。 3. 茶包出味後,拿起棄掉,開火煮滾,再放入日本醤油和味醂。 4. 碗內依次放入白飯、茶漬飯味素同三文魚。...

0

【15蚊兩件抵食手卷 平靚正足料又好味】平霸

平霸搵食,今次輪到呢間隨您鍾意,主打超平價手卷,係一班食客嘅至愛呀!小編都唔執輸,幫大家試吓係咪又平又好食先! 特價手卷(HKD15/2個),有鰻魚手卷、三文魚手卷同什錦魚生手卷。小編就叫咗鰻魚手卷同三文魚手卷(講明先,小編係唔鍾意食刺身嘅,基本上餐牌上有得揀三文魚,都係唔會叫嗰隻)。不過,奇蹟發生了!我竟然食晒手卷嘅三文魚!!連我自己都唔敢相信呀。事關佢啲三文魚肥美得嚟又唔油膩,唔加豉油同wasabi就咁食都接受到,係正㗎喎;而鰻魚手卷就有少少遜色喇,鰻魚質地係幾彈牙嘅,不過就有啲啲腥味,但見佢咁足料,ok嘅! 軟殼蟹手卷(HKD18/2),未見過軟殼蟹手卷可以平到咁,仲要係有2件喎,抵到爛啦!食落去味道都唔錯㗎,軟殼蟹炸到酥酥脆脆,好香口,好食!唯一要彈嘅就係食完會好口乾囉! 新鮮海膽手卷(HKD12),嗱嗱嗱,凡事唔好睇表面呀!呢個海膽就咁睇好似得少少咁,但打開其實入面都仲有㗎!海膽好鮮甜,12蚊就有咁嘅質素,算係咁喇! 平霸小評:老老實實,其實呢間啲食物水準一啲都唔差㗎,又抵又好食!不過,服務態度就認真麻麻喇,如果可以改善埋呢點,咁就一流啦! 隨您鍾意 地址:灣仔堅拿道西15號地舖11號 電話:2833 2876 營業時間:星期一至日:11:00 – 01:00 《平霸》平食四方,歡迎各界報料。

0

【朕の御宴!享盡中環中日fusion菜】吱吱朕Chi Chi Cham

身邊總有一個朋友好鬼鍾意自稱「朕」,香港地咁多個皇上,究竟邊度用饍先襯得起佢地?唔怕,今次小編轉身射個三分波,變身成為「朕」帶晒咁多位卿家一齊微服出巡,去中環一個啱晒我地吱吱朕吹水嘅好地方! 吱吱朕無論係擺設定係食物都混合中日元素,由裝潢到食物都你彷如進入後現代帝王生活。 皇上嘅御宴正式開始啦,眾卿家準備好未呢? 聖旨到!餐廳嘅餐牌叫做「聖旨」,用佢點菜真係好盞鬼!首先呢個極上夜光杯(HKD108),其實係拖羅蓉加三文魚子嘅海膽杯。每一啖都混合晒三種海鮮嘅鮮甜味道,入口融化為一,御饍廚房真係做到野㗎! 皇上嘅江山點少得肥美嘅海鮮!呢一個冒出白煙嘅就係吱吱朕生蠔(HKD228/半打),入口滑溜鮮甜,加埋少少香蔥同蟹籽,脆卜卜又帶點清香,確實係奢華嘅體驗。 嘩,呢個三文魚刺身(HKD58/3件)真係超厚切!肥美嘅三文魚一啲雪味都無,極級鮮甜爽口。咁多位卿家想食真係要帶夠銀兩,因為真係好容易上癮! 臥虎藏龍(HKD128)朕微服出巡咁多次,用煲仔嚟放沙律真係第一次見。眾卿家如果鍾意食加州卷一定會鍾意呢個牛油果三文魚魚子沙律煲,入口第一啖感覺好清新,生菜同牛油果配合好清爽,食完之後三文魚子同三文魚嘅鮮甜味道仲會留喺口入面,真係臥虎藏龍! 吱吱朕Chi Chi Cham 地址:中環蘇豪卑利街53號地舖 電話:2386 9718 營業時間:星期一至六:17:00-01:00 星期日:18:00-01:00