Tagged: 上海菜

0

【北角小店$16惹味擔擔麵 $10四隻鍋貼生煎包卜卜脆】平霸

呢間喺北角嘅小店小老板主要做包餃小食、麵食嘅外賣,聽講店主以前喺米芝蓮街頭小食店麥記小食學藝,整出嚟嘅食物真係有返咁上下水準。除咗好食,當然仲要夠平,等平霸睇吓有咩平嘢食先! 舖頭只做外賣生意,店面好細,一眼望入去就會見到有個大煎鍋,用嚟煎鍋貼同生煎包,入面仲有店員唔停手咁包緊啲生煎包添! 見到擔擔麵(HKD16)都幾平,平霸買咗一碗嚟試吓。呢碗擔擔麵賣相唔差喎,不過就唔似平時食開嘅擔擔麵,冇肉碎、花生碎呢啲配料,成碗麵就得蔥花喺面,湯底就比較濃稠,有好香麻醬味,幾開胃。 雖然Menu話呢款麵有辣,望落都有啲辣油,但食落就覺得唔太辣,食唔到辣嘅朋友仲有得叫走辣添。平霸幾鍾意個麵嘅質地,係偏硬身嗰種,分量都幾多,嗌一碗10幾蚊都食得飽! 生煎包(HKD10/4隻)同生煎鍋貼(HKD10/4隻)都係呢度嘅必食,因為真係夠晒平呀!不過平霸買嘅時候,見已經煎好成鍋喺度,生煎包拎上手只有微溫,但睇得出個皮底煎得幾靚,面頭有啲蔥花做點綴,相信如果新鮮熱辣煎好嘅生煎包會更吸引喇。 生煎包個皮唔會好厚,餡料主要係豬肉、菜同蔥。聽講唔少客人都話生煎包有幾多肉汁,但平霸買嘅呢幾隻入面就冇乜肉汁,但食落都唔會乾噌噌。 呢份生煎鍋貼(HKD10/4隻)隻隻都煎得好金黃夠脆口。鍋貼唔算好大隻,一、兩啖就食得晒成隻,入面個餡同生煎包差唔多,不過鍋貼皮都幾薄,個底咬落仲脆㗎!   平霸小評:呢間小店開業咗幾年,雖然名氣冇得過米芝蓮小食推介嘅麥記小食咁大,但食物質素都有得揮,價錢又親民,嗌多幾款都唔肉赤呀!去開北角(其實近炮台山)嘅朋友不妨去試吓,要即買即食先最正呀! 小老板 地址:北角電氣道254號華凱大廈地下A5號舖 電話:6157 5996 營業時間:星期一至日:12:00-22:00

0

【前菜茶錢加一逐樣計唔抵 厚皮煎包腥味黃魚麵送魚鱗】伏務台

想食上海菜,去啲有名氣嘅中菜館以為實冇死啦,點知小編今次就中晒伏。呢間喺尖沙咀嘅南小館,環境就唔錯,食物價錢睇落都幾經濟咁呀,不過真實係另一回事…… 正值新年,成間舖都擺滿新年裝飾,幾有氣氛嘅,但望落好似有啲亂,冇乜格調咁。入面環境其實都幾寬敞,有唔少座位,最入面仲有落地玻璃,可以睇吓景。小編去食嘅時候啱啱完咗午市,冇乜客人,得四、五枱客。 一坐低,店員就擺低咗杯清茶同一份前菜,有辣菜脯同花生,啲菜脯唔係好辣,花生就蒸熟咗,仲有少少濕,都幾開胃。呢度杯菜飲落似玄米茶,但好淡冇乜味。食中菜計茶錢好正常,但埋單至知原來份前菜係要額外收費嘅,9蚊茶芥再加15蚊前菜,即係未嗌嘢食就已經要俾24蚊。提醒返,呢個價錢仲未計加一服務費㗎! 啱啱落完單一兩分鐘,呢份招牌生煎包(HKD48)就即刻送到。小編真係有少少驚訝個上菜速度,即係份生煎包已經整好咗一段時間,唔係即整嘅。有啲蔥同芝麻喺面頭嘅生煎包望落冇乜油,反而似蒸包。 生煎包個底係煎得幾金黃嘅,咬啖試吓先!食生煎包本來都幾驚入面個餡太熱會辣親,一食就知小編頭先嘅擔心係多餘,因為成個包一啲都唔熱!最多只可以話佢係微溫,而且食一啖淨係食到個包皮,根本咬唔到啲餡。唔使小編講,大家都睇到個皮係幾咁厚、嚿肉係幾細粒啦……頭先金黃色個包底原來都係幻覺嚟,食落硬到好似飯焦咁喎。成個包除咗個底有煎過之外,食落根本同食一個蒸包係冇分別嘅。如果大家想食個煎過吓嘅蒸包,仲要係皮厚過餡嘅,都可以試吓佢嘅。 小編仲嗌咗碗雪菜黃魚麵(HKD68)嚟試吓,賣相好似唔多靚仔喎,上枱時湯面已經結咗少少油。啲黃魚冇話特別鋪喺面上,但驟眼睇魚嘅分量都唔少,叫做對得住個價錢。不過賣相都唔係重點,味道最實際。 雖則望落好似有唔少魚咁,原來唔係嚿嚿魚都有肉食㗎,有啲薄到淨係得返塊魚皮。可能係小編唔好彩,食第一啖就食到一大片好硬嘅嘢,應該係魚鱗嚟,有啲扣分喎。再食多啖,今次冇食到魚鱗喇,但啲魚腥味就喺個口裡面慢慢滲出嚟……真係幾難頂喎!諗住飲啖湯,辟吓口入面腥味啦,點知原來最腥嘅唔係嚿魚,而係個湯,連雪菜味都可以被蓋過就知腥得有幾誇張啦,真係有幾多雪菜都冇用呀! 其實食完嚿魚,飲埋啖湯,小編都唔係幾敢再掂呢碗嘢,但係都勉強試埋個麵啦。呢個應該係上海麵嚟嘅,麵嘅粗度就喺米粉同米線之間,食落太腍身,個感覺似食緊發脹咗嘅米粉囉。 小編伏氣:估唔到食間有啲名氣嘅中菜館都可以中晒伏!個招牌生煎包唔知係嚿肉太細粒定個皮太厚,皮厚過餡係咩玩法,小編睇唔透。對於碗雪菜黃魚麵,除咗伏之外,真係唔知講咩好。由嚿魚到個湯,再到啖麵,可以用一個腥字形容晒,小編依家諗返嗰陣腥味都驚呀!總之就不可一、不可再啦!   入伏點:尖沙咀南小館 入伏價:招牌生煎包(HKD48)、雪菜黃魚麵(HKD68) 中伏by #大食積 美術by #車雲 攝影by #大食積 《伏務台》星期一伏務大眾,歡迎各界報料。

0

【食餐好慰勞屋企人 正宗上海菜卅年精粹】上海小南國1987

小南國1987年上海開設第一間店舖,15年前喺香港開立第一間分店,真係唔講唔知原來佢已經開左一段好長嘅日子。可以做到今時今日,食物當然有一定水準,不論同親朋好友或者招呼客人食飯都絕對唔失禮。位於時代廣場食通天嘅分店最近都已經裝修完畢,為慶祝開立30週年,以全新升級形象「1987小南國」同大家見面。 裝修之後餐廳環境變得非常有格調,仲有獨立間格圓檯,坐得更舒適! 位置咁方便,週末好多人都一家大細嚟歎返餐高質上海菜。 冷菜拼盤總共有7款可以任選4款:特別推介秋葵拌木耳/紹興花雕醉雞/本幫糖醋小排/老醋海蜇頭(HKD198)唔好以為望落去細細份,其實份量都唔少! 薺菜馬蘭頭乾絲(HKD58)薺菜同馬蘭頭香港人聽落可能會比較陌生,因為唔係廣東人一般會食嘅菜,但係佢地原來係南方人好普遍嘅養生菜!尤其係馬蘭頭,對高血壓同喉嚨發炎都有幫助。 金網生煎窩貼(HKD58)非常吸睛!除左靚之外,保證有內涵,一咬落去即刻爆出濃郁高湯,要小心食啊。 揚州雞火煮乾絲(HKD98)係傳說中乾隆皇帝都食過嘅名菜,底部個清雞湯完美配合一絲絲豆腐乾同爽口蝦仁。 餐廳一定要有返咁上下功力先可以將平平無奇嘅伴麵做得好食!呢份南國蔥油開洋拌麵(HKD48)果然無令我失望。 最後當然要食埋個甜品啦,抹茶水晶糖不甩(HKD48),晶瑩剔透嘅外皮加埋花生芝麻粒粒,口感好豐富呀! 上海小南國1987 電話:2874 8899 地址:銅鑼灣勿地臣街1號時代廣場11樓1103號舖 營業時間:星期一至日:11:30-15:00;18:00-23:00