Tagged: 上海

0

【榴槤鹹蛋黃重口味邊爐 髒髒抹茶火鍋掀起熱潮】食焦

原來珍珠奶茶pizza同珍珠拉麵都未夠激,依家真係愈玩愈過界,呢種mix&match嘅新境界去到火鍋界別又會變咗點呢?係令人完全估唔到嘅都可以溝埋一齊,仲要放埋入口添!好似喺上海一間叫香天下嘅連鎖火鍋店,推出咗好多個千奇百趣嘅重口味湯底同估佢唔到嘅配料,引咗好多網紅同唔少食客去挑戰!好味定難食?有noise最緊要呀! 宣傳聲稱係「可以喝的奶茶奶蓋火鍋」,咁有咩鍋底呢?登登登凳,有髒髒奶茶鍋、榴槤椰奶鍋、芋頭青稞鹹蛋黄肉鬆牛奶鍋、髒髒抹茶鍋,配料更加厲害,有OREO餅乾啦、鹹蛋黃啦、芋圓啦、珍珠啦同埋紫薯都有喎,總之喺茶飲店度見到嘅配料都可以加埋落去咁款! 見到一鍋鍋抹茶火鍋加埋呢啲配料,鹹甜鹹甜咩味都有呀真係,每鍋盛惠138蚊人仔、差唔多160蚊港銀,但係連埋成個榴槤殼放埋落鍋度滾嘅榴槤椰奶鍋就唔同價喇,要258蚊人仔,圍起要成三百蚊港銀一鍋㗎! 價錢嚟講唔算平,但喺強國都一樣掀起咗髒髒火鍋熱潮,成為微博熱搜同喺抖音度洗版,有唔少網民就話受不了呢個暗黑料理,連重慶人咁重口味都話受不了!有人就話寧願買杯奶蓋去食火鍋,為乜要飲奶蓋邊爐喎!講到咁hit,唔知有冇香港火鍋店想跟風呢?

0

【杜拜王子請食飯埋單45萬 上海豪門宴食咩要咁貴?】食焦

一餐8個人嘅晚餐可以食到幾貴?最近有張天價帳單喺網上流傳,8個人食咗20道菜,埋單就要40萬人仔,即係差唔多成45萬港銀!呢場富豪宴發生喺上海一間名店「西郊5號」嘅餐廳,率先po喺微博嘅網友,除咗po咗啲鮑魚呀蟹呀嘅食物相,仲po埋張天價帳單出嚟,引來瘋狂討論同轉發! 喺張天價帳單度發現,20道菜清楚列晒出嚟,見到最貴嘅鱷魚尾燉湯要16800人仔,野生大王魚盛惠15800人仔,仲有第三位貴價嘅係清酒凍半頭南非鮑要12800人仔,每人一隻即係8份已經要過10萬人仔喇!雖則話「西郊5號」係名店,但平常去呢度食一餐嘅消費,人均頂晒籠只係二、三千,去到咁誇真係好罕見! 當議論緊究竟張單係真係假嘅時候,「西郊5號」嘅老闆兼明星廚師孫兆國就跳出嚟認晒成件事,仲話當晚嘅8人豪門宴係由杜拜王子請客,食到咁豪咁貴係因為當晚嘅餐單同食材都係私人訂製,平時係食唔到嘅!佢仲話:「杜拜人請中國人吃飯……在杜拜根本不算什麼!」。即係叫大家咪咁大驚小怪啦! 呢位名廚老闆仲強調當晚嘅食材全部都係合法㗎,好似鱷魚尾燉湯用嘅鱷魚係喺廣東、福建人工養殖場提供嘅,並唔係受保護嘅野生動物。至於有份食當晚豪門宴嘅賓客之一、亦係第一個po張天價帳單出嚟嘅嗰位仁兄,原來真身係一位上海好出名嘅富二代,不過當佢知道搞到咁大迴響之後,就將自己個微博全部鏟清,只係留返張中指圖畫,睇嚟好似好嬲咁款! 呢位富二代仲俾人爆料話,當晚雖然係由杜拜王子負責請客,不過富二代都有來有往㗎,知情人士話富二代當晚自備咗成50萬人仔嘅酒水到場㗎!咁其實計埋酒水,呢餐真係百萬豪宴喎!飲飽食醉邊個最開心?梗係間餐廳啦,天價帳單瘋傳之後,日日爆場勁多客去食呀!無端端變咗另類宣傳,掂啦!

0

【正宗上海風味 俐落刀法片出松子魚】上海小南國1987

喺上海總店已經有30年歷史嘅小南國,進軍香港亦都有15年,位於銅鑼灣時代廣場嘅上海小南國1987分店,除咗秉承上海菜濃油赤醬嘅特色,亦照顧本地口味。講到正宗上海菜,令小編心動嘅絕對係豐富嘅前菜為一餐打響頭炮。 走入上海小南國1987,迎接客人嘅係典雅又摩登嘅格局,門口嘅酒櫃,就令人感受到上海氣派。餐廳仲有包廂提供,絕對提供咗一個舒適嘅環境歎美食! 前菜喺上海菜擔當咗重要嘅角色,而上海小南國1987亦都喺前菜方面花咗好多心思。以小碗上碟嘅紹興花雕醉雞(HKD80),一入口係濃烈嘅花雕香味,肉質仲好滑溜添! 賣相一流嘅當家松子桂花魚(HKD288),師傅以俐落嘅刀法將魚肉片出而不離皮,醬汁輕易就掛喺魚肉身上,每啖魚肉都可以食到酸甜味,直頭內外兼備呀! 一晚至少出三、四十盤嘅如意鍋燒黑豚肉 (HKD298),肉質完全唔會粗糙,非常滑溜,睇上去顏色雖然好深,但絕對唔會過鹹,皮脂肉分佈平均,食落口都唔會覺得油膩。注滿熱水嘅碗座保持溫度,非常貼心! 生拆蟹粉豆腐(HKD158)看似好易做,但要保持滑溜又唔炒到碎開係好考師傅嘅功力,將蟹粉同豆腐融為一體,每一啖都品嘗到蟹嘅鮮味。 上海小南國1987 地址:銅鑼灣勿地臣街1號時代廣場11樓1103號舖 電話:2874 8899 營業時間︰星期一至日 11:30-15:00;18:00-23:00