Tagged: 上環

0

【新開高療癒度Dustykid主題茶食亭 自創四味果茶+烘焙輕食】心事如塵茶食亭

茶飲店愈開愈多,呢間喺上環嘅心事如塵茶食亭又有乜特別呢?原來呢度係本地人氣插畫「Dustykid小塵」啱啱開嘅主題茶飲店!一向擔當療癒角色嘅Dustykid,今次就以茶食呢個形式同大家見面,其中酸、甜、苦、辣四味為主題嘅茶飲同烘焙小食做主打,仲有即食果乾cheer up各位香港人添。 呢間茶食亭嘅裝潢幾簡約,一邊擺滿唔同款式嘅小食、果乾,另一邊就主要賣茶飲。店面有唔少Dustykid嘅圖畫同字句,門外仲有張長櫈俾客人坐喺度借閱Dustykid嘅書relax吓。 創作Dustykid嘅本地插畫家Rap Chan認為茶食亭呢個渠道更容易接觸到唔同人,令更多人得到呢份治癒感。「希望嚟呢度嘅客人無論有咩心事都好,都可以透過茶飲、食物,同埋喺度搵到嘅字句安慰返你。」 右邊呢款爆檸什酸梳打(HKD35)標榜無糖,以青檸、西柚、檸檬、鮮橙幾款水果再加入梳打,呢幾款橘類水果配搭特別match,飲落好清新,有水果本身天然嘅酸甜味。而左邊就係芝士奶蓋四季春(HKD36),芝士奶蓋厚得嚟面頭灑上岩鹽,令飲品嘅層次更豐富。 其中一款主打飲品係仙草三青茉莉綠(HKD32),以甘苦為主題嘅特飲用咗青瓜、苦瓜同西芹做成「三青」,平時唔飲五青汁嘅小編都覺得幾易入口。呢款飲品有一定嘅排毒同美顏功效添,係注重健康人士嘅首選。 除咗手調飲品之外,呢度仲有冷泡18個鐘之後茶底濃郁而唔苦澀嘅冷泡茶。冷泡塵茶王(HKD24)係鐵觀音,而冷泡塵茶后(HKD24)就係白桃烏龍,兩款茶選用嘅茶葉都係來自台灣南投㗎。 舖頭有賣唔同款式嘅自家製即食果乾(HKD15/包;HKD40/3包),全部都以原塊水果製成,全無添加劑同糖分。其中火龍果乾、蕃茄乾、西柚乾等等喺出面比較少見。 烘焙小食(HKD15/包;HKD40/3包)有鬆脆曲奇、手工蛋糕同布朗尼蛋糕三個系列,可以隨意配搭自己鍾意嘅口味。其中伯爵茶牛油蛋糕真係以伯爵茶葉而唔係茶精整嘅,茶味香濃。而每款小食上面都印有唔同嘅插畫同字句,好有心思喎。 想加入環保行列,仲可以買埋呢個咁可愛嘅Dustykid手搖杯套(HKD100)返屋企添。   心事如塵茶食亭 地址:上環皇后大道中255號曼哈頓大廈地下G01B號舖 電話:2784 1882 營業時間:星期一至日:12:00-20:30

0

【粵菜放題$278起任食片皮鴨 送奄仔蟹+花膠響螺雞湯】利寶閣

一講放題就好似得日本菜,但粵菜都一樣吸引㗎。有廿一年烹調傳統粵菜嘅利寶閣,佢哋全線五間分店都有「任食2小時高級京菜」(HKD278起),有超過五十款即叫即做嘅中菜俾你任食。每位成人仲額外送三道滋味菜式添,分別係清蒸、雞油花雕蒸或油鹽焗嘅野生時令奄仔蟹、花膠響螺雞湯同原隻鮑魚花菇。唔賣關子喇,即刻睇吓有咩正斗菜式啦! 地方都算闊落,唔使迫住坐埋一齊。 花膠響螺雞湯雖然係送嘅,但一樣落足料!用砂窩長時間燉煮雞隻,味道鮮甜潤喉又養生。 奄仔蟹有清蒸、雞油花雕蒸或油鹽焗三個煮法,想味道特別啲就梗係揀用雞油花雕蒸,以酒香突出蟹嘅鮮味吖嘛。 原隻鮑魚花菇就似平時飲宴嘅口味,食埋就即刻進擊任食款式喇。 五十幾款食物唔知點揀好?當然有啲必食嘅回本菜式呢! 京式片皮鴨(上環分店除外)皮脆肉嫩,配搭青瓜、京蔥、京醬用餅皮包起嚟食,有油香又唔會過肥。 上環分店期間限定嘅西班牙伊比利亞黑毛豬叉燒都係必食之選!呢種黑毛豬食橡木果實為主要食糧,肥瘦適中而且肉味香甜濃郁啲㗎。 香脆又多肉汁嘅脆皮燒腩仔簡直係香港人最愛,肉同脂肪肥瘦相間,表面又燒到甘香脆口,令人想一食再食! 如果鍾意食涼菜,一定要試花雕醉蝦同流心醉蛋。兩款都用花雕酒浸泡冷藏最少一晚,每啖都係香濃嘅酒香。 中菜都有甜品㗎,傳統嘅拔絲香芋同冰糖葫蘆唔係成日食到,當然要過吓口癮啦!   「任食2小時高級京菜」 供應時間: 星期一至日及公眾假期:18:00-22:00(自選2小時) 價格: 星期一至四: 成人HKD278/位(兩位起) 小童HKD139/位* 星期五至日及公眾假期: 成人HKD298/位(2位起) 小童HKD149/位* 其他收費: 按原價HKD488收取加一服務費: 成人HKD48.8/位,小童HKD24.4/位 *1米以下小童免費   利寶閣  地址:尖沙咀彌敦道100號The ONE 17樓 電話:2870 1488 營業時間:星期一至日:11:00-15:00,18:00-23:00

0

【港日台咖啡達人集結PMQ 咖啡市集下星期開鑼】PMQ

下星期長假有咩玩?PMQ元創方喺4月19-22日再舉辦「Coffee Agenda咖啡生活市集」,大家又可以去上環慢活一吓兼打卡喇。想飲得環保啲,可以去現場嘅「GO CUP」走杯攤檔俾HKD20按金借杯,之後去特定沖洗區洗乾淨再還杯就可以攞返按金;如果自備杯去咖啡攤檔買咖啡,仲即時扣減HKD2添。 今年由本地咖啡媒體「啡聞」協辦,邀請咗日本、台灣同本地出眾嘅咖啡師一齊參加,入面仲有世界咖啡賽事冠軍同評審,無論聽咖啡故事定係品嚐咖啡,都一定令你回味。 咖啡覺醒×神諭咖啡嘅咖啡拉花好手會嚟同大家交流,仲帶咗自家意式拼配咖啡,混合咗雪茄、焦糖同黑朱古力味。而單品咖啡豆亦帶有三種唔同嘅耶加雪菲俾大家揀。 Studio Caffeine嘅咖啡師攞過唔少獎,其中攞過2017香港咖啡沖煮賽第一名同2018香港咖啡拉花大賽第三名等等。今次市集帶嚟幾款tonic water,加入濃縮咖啡變出新口味,有帶出檸檬酸度、有充滿草本花香、有清爽茶感等等。 sensoryZERO為市集推出限定嘅咖啡泡泡雪糕,係充滿創意嘅咖啡甜品!當然都有佢哋熱賣嘅美式有氣咖啡,帶著平衡果酸好醒神㗎。現場仲有新鮮烘培嘅咖啡豆同即場開設嘅SCENTONE工作坊。想深入啲可以向佢哋報讀「COFFEE LAB Asia x sensory ZERO專業咖啡課程「,同埋「sensory Artisan香港獨家代理 Bullet R1 V2及SCENTONE T100」預購優惠。 想買咖啡嘅週邊產品都可以喺市集搵到喎,來自日本嘅Trunk Coffee帶嚟自家設計嘅Origami 咖啡濾杯同自家烘焙嘅北歐風味咖啡豆。 一連四日嘅咖啡生活市集仲有好多咖啡體驗班,想參加就click入下面連結登記啦: http://www.pmq.org.hk/event/pmq-coffee-agenda-2019-4-19-22/?lang=ch 「Coffee Agenda咖啡生活市集」 地址:中環鴨巴甸街35號PMQ元 電話:9817 6848 營業時間:4月19日:14:00-20:00,4月20-22日:12:00-20:00

0

【多國特色大集合 埃塞俄比亞×印度素菜】素學堂

今次素學堂帶大家去上環嘅豆苗居Grassroots Pantry,負責人Peggy唔單止係總㕑,仲係渥太藍帶國際厨藝學院嘅畢業生!呢間多國素菜咖啡店,Peggy話宗旨係追求可持續性同環保,即係點呢?即係堅持使用未經加工、有機同主要採用來自本地有機農場產品做原材料,再炮製成集合唔同國家文化嘅特色菜,連埃塞俄比亞素菜都有喎!小編今次大開眼界呀! 餐廳環境好大好舒適,小編見到menu內有啲圖畫幾得意咁喎,原來有一部份係同本地學校合作,俾學生發揮藝術天賦,睇落都無咁悶,不過暫時只得英文menu。 首先呢味係好多人食過都讚嘅Popcorn ‘Chicken’(HKD90),小編都好鍾意。以猴頭菇仿雞肉再炸,之後加咗沙薑粉,炸粉厚度非常薄,亦唔覺得油膩;配埋coconut kefir sour cream(椰子克菲爾酸奶油)一齊食非常唔錯,味道酸酸甜甜幾開胃! Teff Injera Crisps(HKD135),Teff即係苔麩,苔麩不含麩質之外,仲好有營養含例如蛋白質同鈣等等,亦都係非洲埃塞俄比亞嘅主要糧食。呢道菜加咗印度元素,將苔麩做成一大塊脆片,就咁食就有少少甜同脆卜卜,配埋呢個Urad Dal Salad,由唔同嘅豆類例如杏仁同夏威夷果等等,好有中東感覺。呢道菜亦都配有由本地有機農場進口嘅蔬菜,原來本地蔬菜都可以種得咁靚同colourful㗎,蕃茄仔仲好甜添! 另外呢味Signature Mixed Mushroom Linguini(HKD208),以各種唔同嘅菇類好似冬菇、雞髀菇、松露菇同椎茸等等,再加上白松露油同當季嘅蔬菜做成嘅意大利扁麵條。 最後到飲品Turmeric Chai Latte(HKD65),turmeric解作薑黃,拿鐵裡面有椰子奶、黑胡椒、肉桂同小豆蔻,拿鐵散發住少少辛香,聞落同飲落都有啲似印度香料,椰子味唔算好重,但又唔係難飲喎,呢個味道小編都係第一次試,真係好新奇!   豆苗居 地址:上環荷李活道108號 電話:2873 3353 營業時間:星期一至日:09:00 – 23:00

0

【全港最貼地街市西餐 招牌脆皮乳豬浪漫主菜】街霸

通常去熟食市場搵食,離不開去吓茶檔或者夜晚叫返碟小炒咁,你又知唔知喺上環皇后街街市入面有間好講究嘅西式餐廳呢?餐廳名好簡單,就算老一輩唔太識英文都一樣噏得出嘅,就係ABC Kitchen。點解叫做ABC呢?老闆之一Joe就話普遍西餐廳都會有一個好難讀嘅法文或者英文名,佢為咗貫徹比較貼地同親民嘅形象,所以就改咗個係人都識又易記嘅名喇! Joe同主廚本來喺一間蘭桂坊嘅西餐廳紮根超過10年,​2009年餐廳決定撤資香港市場,所以二人就決定向外闖喇!最初決定走入街市做西餐,除咗租金比較平之外,仲因為喺街市比較少見西餐。Joe笑住話:「冇人做咁我咪試吓做囉!」。人做我唔做,先可以殺出新血路嘛! 唔好以為開喺街市就乜都hea呀,佢哋喺大圓枱鋪上紅白格仔布,擺盤又一啲都唔馬虎㗎,唔係一般茶記咁將啲刀刀叉叉撈埋一齊放上枱就算,而係由店員慢慢逐樣擺好,細節做到足㗎!而且佢哋亦好堅持上菜嘅順序,會依返次序先上餐湯、前菜、主菜最後甜品,唔會出現食完主菜先有湯飲嘅情況。Joe仲話呢啲就係叫做「將架日本車當歐洲跑車揸」,即係街市地方酒店質素啦!小編超欣賞呀! 前菜呢,老闆就介紹咗煎鵝肝伴蜜餞葡萄(HKD128)俾小編,嚿鵝肝超肥美,睇到口水都流埋。講口感之前先考考大家,你哋覺得個細碗仔裝住嗰堆係咩嚟?三、二、一,答案就係蜜餞葡萄喇,開頭小編覺得有點怪怪的,但原來鵝肝+多士+蜜餞葡萄係超級match㗎!好似食Parma Ham一定要配蜜瓜一樣,水果嘅甜香中和咗鵝肝嘅油膩感,一啲都唔會覺得漏,極力推介呀! 主菜西班牙燒乳豬配焦糖蘋果及薯蓉(HKD178)亦相當有驚喜,燒乳豬即叫即焗,皮脆肉嫩。一刀切落去「咔」一聲,勁清脆呀!熱辣辣嘅燒乳豬配酸味味嘅焦糖蘋果汁好夾喎,食晒成碟都唔會膩呀! 呢個顏色咁繽紛嘅蛋糕Pavlova(HKD58)大有來頭呀,相傳佢係為咗紀念一位著名嘅蘇聯芭蕾舞蹈員Anna Pavlova而命名嘅,不過直到依家都仲唔確定真正發明Pavlova嘅係澳洲人定新西蘭人,兩國嘅蛋糕界到今日依然為呢件事爭論不休!講返呢個以蛋白酥為Base嘅蛋糕先,驟眼睇有啲啲似港式傳統生日蛋糕,表面鋪滿生果同忌廉,不過其實佢中間仲有加兩球大雪糕㗎,所以口感超級豐富,而且要快手食呀,唔係會溶!蛋糕邊同埋底都係蛋白酥,甜甜哋又脆卜卜,海綿蛋糕夠晒鬆軟,中間忌廉又滑溜,作為一餐飯嘅完美句號超正!   街霸最愛:今集街霸覺得Pavlova係真愛呀!鑑於之前冇喺第二度食過呢個甜品,街霸第一次食嘅感覺幾驚艷,除咗好好味之外,竟然喺街市呢個咁中式嘅地方可以食到咁西式嘅甜品,超有驚喜呀! ABC Kitchen 上環皇后街1號皇后街熟食市場7號舖 電話:9278 8227 營業時間:星期一至六:12:00-14:30;19:00-22:30;星期日:19:00-22:30

0

【60年功夫人手製造 潮式糕粿食正宗味】曾記粿品

唔知大家鍾唔鍾意食潮州嘢呢?上環呢間曾記粿品就好出名喇!開業六十幾年,係家族生意嚟㗎,所有粿品都係人手製造,但就正正因為咁,就算開喺熟食中心入面,都keep住不斷有客人去幫襯,乜都抵晒啦! 炒潮式糕粿(HKD32)呢個好有小時候嘅味道,糕粿好似蘿蔔糕同腸粉嘅混合體,但味道係甜甜哋。糕粿入面加咗雞蛋同韭菜去炒,食落又甜又鹹,好特別;而且佢啲醬汁先係靈魂,每一條都炒到脆卜卜,真係好好食㗎! 煎蠔餅(HKD50)又係必食推介! 每一啖蠔餅都有蠔仔,煎到好香脆,完全唔覺油膩,連小編唔係好鍾意食蠔仔都唔覺得腥,就知有幾好食啦! 清心丸綠豆爽白果(HKD20)係好正宗嘅潮州糖水,可以話係曾記名物,老闆娘自己都推介㗎,食落唔會好甜,又有少少綠豆沙味道,重點係清心丸煙煙韌韌,超有口感,好好食呀!用嚟下火啱晒。 話明粿品,點可以唔試佢啲糕粿呢?小編食咗最多人推介嘅韭菜粿(HKD6),入面啲韭菜簡直係滿瀉咁滯,老闆娘建議可以煎一煎咁食,會更加香口同脆卜卜,入面仲超多汁添呀! 另外,佢嘅芋頭粿(HKD6)都好正,芋頭再加埋啲蔥係入面,鹹食又唔會話好奇怪喎! 除咗鹹粿仲有甜粿選擇,小編就叫咗出面比較少見嘅黑桃粿(HKD6),用咗黑芝麻皮包住新鮮嘅綠豆餡,豆蓉夠軟滑,食落又比較清甜,有驚喜喎! 曾記粿品 地址:上環皇后街1號皇后街熟食市場8號檔 電話:2540 6854 營業時間:星期一至六:10:30-18:00(星期日休息)

0

【閨蜜嘅浪漫午後 秘嘆仙氣花系High Tea】Cafe Bauhinia

成日聼人講女人嘅錢最易搵,似乎又幾有道理。香港各式餐廳多不勝數,Cafe都可以開到大街小巷都有,有不少特色Cafe更令女生們瘋狂。呢間位於上環嘅Cafe Bauhinia,以花店做主題,由餐廳門面到内部都有好多花飾擺設,就連食物都滲透咗花嘅元素。如果你係愛花之人,一定會對呢間Cafe念念不忘,事源餐廳定時有插花教學課程,可以讓你享受插花藝術嘅樂趣,又可以一嚐可口甜點。最適合喺呢度享受一頓下午茶。 一踏入Cafe呈現喺眼前嘅就係各種時令鮮花,餐廳每個角落都佈置不同植物,打造出一個非常悠然嘅自然環境空間,另外更會聞到陣陣鮮花香氣,讓客人猶如置身在花園之中。 身為粉紅迷嘅小編,對今次呢個下午茶套餐直頭著迷,以粉紅色為主嘅熱帶遊蹤(HKD428 /2人)亮點多多,Flamingo水泡套住菠蘿特飲,一大壺菠蘿汁讓你自由斟,玩味十足。甜點方面都有驚喜,芥末八爪魚沙律味道好清新,做開胃菜最適合不過,再配搭滑溜溜Oreo木糠布甸,口感更上一個層次,除此之外仲有紫薯撻 、紅粉馬卡龍、綿綿士多啤梨花,不同花款甜點。 甜點雖然係下午茶主角,鹹點一樣不可缺少。香煎北海道珍寶帶子,微微煎至金黃色,加上蟹籽喺面層做點綴。日式明太子手羽煎得恰到好處,水份鎖係雞肉中,味道濃郁油唔油膩。另外,仲有芝士龍蝦沙律包食添呀。 餐廳老闆非常貼心,只要食呢個下午茶套餐就有一份小禮物送俾顧客,仲有4個唔同選擇添。 Cafe Bauhinia 地址:上環新街市街23號地下 電話:2368 9339 營業時間:星期一至日 11:30-19:00

0

【美女與野獸未了緣 再聚上環玫瑰傳說下午茶】DK Cuppa Tea

引起大家廣泛討論嘅《美女與野獸》,除咗套戲好睇之外,位於上環嘅DK Cuppa Tea仲出埋主題下午茶,比大家感受一下電影帶比大家嘅感動。一系列主題下午茶、有機茶、咖啡、輕食同甜點,比客人盡情享用!除此之外,餐廳仲會舉辦各式各樣嘅工作坊,以及為客人度身訂造私人派對或者企業活動添。 餐廳佈滿花草,猶如一個世外桃源,大家可以坐低慢慢歎返餐。 事不宜遲,先介紹呢個玫瑰傳說下午茶(HKD298/位 兩位起)甜品包括:玫瑰榛子朱古力,蛋白糖餅,玫瑰甜品杯,玫瑰草莓tiramisu、魚子珍寶帶子配法式焗薯、法國蝸牛、法國黑松露蘑菇蛋批、法式蘆筍薯蓉番茄湯配法國橄欖包同埋玫瑰蘋果有機茶。以玫瑰為主題,係咪令你諗返起《美女與野獸》入面嘅浪漫情節呢? 下午茶當中餐湯法式蘆筍薯蓉番茄湯配橄欖包,以典雅青花瓷碗盛湯,薯蓉配以酸甜蕃茄濃湯,再配搭橄欖包,食嘅時候佐上湯汁,酸酸甜甜嘅暖意盈盈。想享用呢個浪漫滿分嘅下午茶,記得帶埋相機啦! 帶得相機去,梗係要影埋玫瑰下午茶嘅玫瑰甜品啦!款款外型都相當精緻,榛子朱古力、玫瑰甜品杯、玫瑰草莓tiramisu,總有一款口味合你心意。搵日下午茶去試下啦。 DK Cuppa Tea/ DK Aromatherapy (上環) 地址:上環新街市街19號地下 電話:‪2386 3588 營業時間:星期一至日11:30-20:30

0

【點配搭自己話事 上環小清新輕食飯卷】Pokéworld

位於上環嘅輕食小店Pokéworld,主打自己組合輕食。嚟到大家可以揀沙律、壽司卷或者飯做底,再逐一選擇食材、醬汁同配料為自己打造專屬食物!樣樣食材都可以自己配搭,食材又夠晒新鮮,想唔啱食都幾難! Pokéworld以天藍色同白色為主調,喺芸芸小店之中,額外顯得清新。 店內同樣以天藍色同白色為主調,白色予人非常乾淨簡約嘅感覺。 嚟到Pokéworld開餐,大家可以自由組合自己成個輕食,可以揀飯、沙律或者壽司卷做Base㗎!自己組合嘅過程一共有5步曲,包括有:Base、主菜、醬料、小食、配料同配菜,樣樣食材都好新鮮,仲可以自己揀埋素唔素食添! 呢度仲有好多款食材選擇,除咗有海鮮之外,仲可以揀全素添!店員會根據你所選擇嘅配料,喺你面前舀起材料,成個過程一清二楚㗎! 壽司卷(沙律)做Base配埋挪威三文魚同吞拿魚(HKD78/2勺),另外再加上玉子(HKD6),食落非常清新,魚肉極之新鮮,配埋清爽蔬菜感覺好輕盈,份量啱啱好,食完返工唔駛驚飽得滯會眼瞓。 想食得豐盛啲,仲可以揀飯做Base,配埋吞拿魚、三文魚、熟蝦、帶子、豆苗、青瓜、紫菜、彩虹蟹籽同埋中華沙律等等不敗配搭,食完一次好想返轉頭再試埋其他配搭! Pokéworld 電話:2811 2115 地址:上環禧利街8號地舖 營業時間:星期一至五:11:45-21:00 星期六及日:12:15-20:30

0

【邪惡甜品大激鬥】S’more

有無人同小編一樣,食飽飯要食埋甜品先叫滿足!講到甜食界,最最最邪惡既,一定係肥死人不償命的S’more,當然少食是多滋味!今次小編豁出去,走勻多間甜品店,發掘唔同S’more,甜到你漏! 第一站:I’s Land Cafe 天花掛滿綠色植物,好有森林小清新feel,餐廳面積算幾大,環境舒服,好岩同朋友聚腳! 今日主角一定係佢啦!黑森林溫泉泡泡(HKD63配花茶),棉花糖燒到表面脆脆入面軟棉棉,底有朱古力醬! 小編自己都食左半個份量,揀左檸檬草花茶解膩,真係幸福的下午! 環境:★★★★ 味道:★★★★★ 抵食:★★★ I’s Land Cafe 地址:觀塘開源道62號駱駝漆大廈1座6樓A舖 第二站:Cafe Bauhinia 以S’more buffet聞名的Cafe Bauhinia,今次黎到雖然buffet已暫停供應,但見到都有唔少S’more的選擇!好似S’more Tart 都幾吸引,唔使怕甜到濟! 今次簡單點來個S’more Dip(HKD128),用小型鑊把棉花糖烘得金黃,個樣夠晒靚,一口放進嘴裏,份量較mini,邪惡度起碼無咁高,小編一個都可以KO! 見仲有胃口,試埋個S’more Tart(HKD38),喜歡花的店主,愛以花作裝飾,見全部女仔都相機食先,表層布滿棉花糖,內餡是花生醬和黑朱古力餅底,黑朱古力濃度達7成,正好中和棉花糖的甜度!仲可以點Blue Butterfly Pea Vanilla Milk (HKD38/單點;跟餐免費),baby blue顏色好靚,食完飲飽,小編已經too full for S’more! 環境:★★★★★...