Tagged: 中伏專員

0

【牛筋驚現毛髮超噁心 牛肉嚡口湯底死鹹重口味】伏務台

最近有朋友食完呢間小王牛肉麵,即刻同小編呻爆中晒伏!上網睇返真係各區分店都有唔少劣評喎,最多人彈佢個半筋牛肉麵,有網民留言「湯底相對上較鹹,可能是味精放得太多吧,吃完後口很渴……牛筋反而煮得過份軟腍……湯頭醬油同味精味好濃,完全失去水準……」,咁小編又要出動喇! 下午茶時段,價錢比正價平,半筋牛肉麵(HKD47),唔使等好耐,上菜速度都幾快。 不過睇真啲有啲唔對路喎,小編呢碗麵,牛筋上面有條疑似頭髮嘅物體,小編表示好驚慌,見到都唔想食啦! 即刻同店員講啦,店員就解釋話係牛筋啲毛,但係小編橫睇掂睇都覺得似頭髮多啲喎,店員見到咁嘅情況,都識做話即刻換過碗俾我,唔係點敢食落肚呀! 終於換過碗麵喇(希望呢碗乜毛都冇啦),呢個下午茶餐包埋飲品,小編叫咗杯熱桂花雪梨茶,唔係講笑,呢杯熱飲真係唔飲好過飲!見到啲桂花糖漿沉晒喺底,攪勻飲啖味道勁死甜,一啲桂花味都飲唔到,似杯熱嘅糖漿水呀!輪到個主角牛肉麵喇,上到枱係聞到香係幾香,不過飲啖湯試真啲,個湯底真係鹹到飛起,好重口味呀!冇晒牛味香料味藥材味,只有死鹹嘅湯底,成個麵又點會好食呢? 湯底出事,牛筋又點?正常牛筋應該有少少煙靭口感,但呢款就好似食緊一嚿棉花糖咁,全冇嚼頭,以為食緊嚿大肥膏,嗰種質感令人怕怕呀! 牛肉就嚡口到不得了!入口好靭又唔夠入味,完全破滅咗我對半筋牛肉麵嘅幻想,一啲台灣風味到冇! 麵條叫做正常少少,雖然偏腍身冇乜咬口,但對比起個湯底同牛筋,算係咁。   小編伏氣:一間食店仲要連鎖式經營,見到咁多負評係咪要認真改善吓食物質素呢?食物衛生問題更加要正視啦,就算條毛真係牛筋毛,都要洗乾淨晒先得㗎!呢間小王牛肉麵果然夠伏呀! 入伏點:小王牛肉麵 (將軍澳分店) 入伏價:半筋牛肉麵(HKD47) 中伏by #愛吃的旅人 美術by #車雲 攝影by #愛吃的旅人 《伏務台》星期一伏務大眾,歡迎各界報料。

0

【台式三杯雞冇雞味 餐具污糟見到都驚】伏務台

台式小店小時光啱啱開嗰陣,都曾經引起過一陣熱潮,不過最近小編就發現網上有負評出現喇,仲要係一面倒咁大彈添喎!等小編去探吓虛實啦,睇吓係咪真係好似網民所講嘅「三杯雞又鹹又柴」、「餐具超級污糟」、「 啲筷子全部都唔乾淨、有味。」!  小時光走懷舊文青路線,用咗充滿校園味嘅舊式全木枱櫈呢種懷舊擺設,食嘅就係台式食物。小編去到當日,店員會提醒你所有點餐取餐都係自助形式,而且店內亦設有自助區提供水呀、牙籤呀、餐紙巾同醬汁等! 好,係時候試吓個三杯雞飯究竟如何先! 台式三杯雞便當(HKD42),原價60蚊,但喺14:30-17:30呢個happy hour時段有七折優惠,仲會附送飲品添,要凍飲就加2蚊,所以下晝去食價錢係抵嘅!呢個便當仲會額外附上3種前菜,有辣菜脯、小唐菜同埋酸蘿蔔,不過味道就真係麻麻,個菜脯死鹹又重口味,食咗一嚿已經頂唔順了! 到咗主角三杯雞,同網民所講嘅一樣,真係「又鹹又柴」,一啲都唔嫩滑仲要全冇雞味喎,雪藏味就有喇! 出色嘅三杯雞係醬油、麻油同酒香三味混雜,最後加埋九層塔嘅點綴先夠圓滿!之但係,呢度嘅三杯雞完全唔係嗰回事喎,味道得個甜字,零酒香同麻油香呀!而嗰幾條乾到裂嘅九層塔,完全同雞肉分離冇拌勻過,又點能提升到香氣同味道呢? 食物質素真係好有改善嘅空間喇,不過小編最接受唔到係衛生情況喎,啲餐具真係有陣味呀!連飲嘢嘅杯都有見得到嘅裂痕又有污漬,咁唔衛生,真係食乜落肚都唔開胃啦!   小編伏氣:終於明解小時光會有咁多負評了,食物質素大把嘢要改善,不過衛生問題真係要正視吓喇! 入伏點:小時光 入伏價:台式三杯雞便當(HKD42) 中伏by #愛吃的旅人 美術by #車雲 攝影by #愛吃的旅人 《伏務台》星期一伏務大眾,歡迎各界報料。

0

【OK台式叮飯賣相差 重口味肉燥鹹到爆】伏務台

話說早幾日經過OK,小編見到呢個台式叮飯系列,打開一睇,賣相非常唔掂,簡直係圖文不符咁滯,即刻買嚟試吓睇佢伏唔伏啦! 台式肉燥飯(HKD21.5) 一打開,見到啲肉燥已經黐埋一嚿,唔講以為係肉餅飯囉,賣相簡直係見到都唔想食呀!小編睇見都怕了。 味道方面,一路撈嘅時候已經好大陣味,香係幾香嘅,不過聞落都知係好重口味!食落去,肉燥居然仲多過碗飯,真係好鹹又重口味!啲飯仲要係偏濕身,搞到好似食緊粥咁,口感好奇怪呢!不過如果賣相再好啲,冇咁鹹嘅話,都ok嘅。 台式滷肉菜飯(HKD21.5) 一撕開層膠,個賣相又係完全冇美觀可言,睇見都唔開胃! 味道嚟講呢個就偏甜。對比起肉燥飯呢個就冇咁重口味,菜嘅比例都ok,可能因為冇乜汁所以食落冇咁濕。不過佢啲滷肉就瘦肉偏多,當然冇台灣食嗰啲咁正宗啦! 小編伏氣:今次試完呢兩個叮叮飯,小編又要對叮叮系列俾返個空白期緩衝吓,食完呢兩個飯之後,個口即刻好口渴,睇嚟食咗唔少味精落肚喇! 入伏點:Circle K 中伏by #愛吃的旅人 美術by #車雲 攝影by #愛吃的旅人 《伏務台》星期一伏務大眾,歡迎各界報料。

0

【中村藤吉$80套餐唔掂 飯糰怪味麵豉湯冇味】伏務台

抹茶嘢一向受歡迎,凡係新出抹茶乜乜乜,抹茶控就一窩蜂咁衝。今次小編就去咗金鐘太古廣場嘅京都過江名店中村藤吉,之前網友已經話佢啲雪糕好食,不過啲熱食就冇乜好評喇!好,小編決定試吓金鐘店限定嘅丸十茶香飯糰套餐啦,套餐總共有4款可以選擇,有兩款唔同口味嘅飯團,如果想要食齊飯糰、麵豉湯、茶類同抹茶啫喱,就要點最貴嗰個「月」餐試喇!橫掂都係,小編就點咗呢個喇! 由於舖頭比較細,基本上只for外賣嘅,尖沙咀店先有堂食嘅甜品供應囉!除咗雪糕同埋飯糰套餐之外,呢度仲有啲茶葉、茶包嘅套餐可以買返屋企慢慢沖,另外仲有賣啲抹茶副產品,例如抹茶朱古力同抹茶蛋糕等等。 丸十茶香飯糰套餐「月」(HKD80),包括抹茶鹽煎茶山椒魚乾海苔飯糰(嘩,好似好足料咁喎)、一杯自選茶(中村茶、覆蓋茶、玄米茶、煎茶、煎茶莖茶同埋莖焙茶)、迷你抹茶啫喱、同埋一碗本田麵豉湯。買完之後店員問使唔使幫我泡茶,定係我自己拎茶包返去再沖嘅時候我先驚覺,原來套餐包嗰杯茶係茶包嚟㗎……呢個價錢但飲茶包茶?小編表示有啲失望囉! 呢個抹茶鹽茶山椒魚乾海苔飯糰,個名就夠晒長同埋好有gimmick咁喇,但係一打開張包裝紙,點解成個飯糰都係得啲一點點似調味料嘅嘢,當初小編仲天真地以為咬落去中間可能會有餡啦,諗住起碼都有一兩條魚乾仔食到啩,點知呢,原來係一個山椒魚乾海苔碎嘅飯團,即係呢,就算你咬幾入想搵吓有冇魚乾本人呢,都係搵唔到㗎!感覺就好似食鰻魚手卷,你梗係expect有原條鰻魚啦係咪?點知打開原來得幾粒仔鰻魚咁失望囉!同埋好老實講,飯糰味道係有少少怪嘅,淡味得嚟又有陣煎茶味,另外有一兩啖咬到係有少少辣辣哋,但同整體嗰種淡淡嘅茶味完全唔match,亦食唔出有魚乾喺入面!簡單啲講,冇,下,次! 至於呢個麵豉湯嘅賣相同我哋一般飲開嘅都有啲出入,面浮起嗰幾嚿發晒脹嘅嘢,我都唔知點形容好,個樣真係好伏囉!聞落去唔係好覺有麵豉味,等我撩吓裡面有咩材料先! 其實佢有兩款可以揀嘅,分別有腐皮同豆腐,我就揀咗豆腐。咁佢都有幾嚿豆腐同埋嗰啲發晒脹嘅……腐皮?其實佢發脹到我都唔係好分到佢係咩嚟,有啲似豆卜類嘅嘢啦,但就冇平時飲麵豉湯會有嗰啲海帶喇,同埋個麵豉湯竟然完,全,冇,麵豉味。小編飲到頭都側埋,開頭以為係自己未攪勻啦,但攪極都係咁喎! 經歷完頭先嗰兩款伏食,我對享負盛名嘅抹茶啫喱都開始有啲懷疑喇!佢將底層嘅啫喱同topping嘅抹茶蓉同埋丸子分開咗,應該係出於外帶食品品質保證嘅考慮嚟嘅,呢點算係幾貼心。咁我就先將佢哋撈返埋一齊先。 試吓嚿啫喱先,咦,係幾爽滑嘅,但就冇甜味,只有綠茶嘅甘香味。將啫喱同抹茶蓉撈勻後就覺得味道剛剛好,抹茶蓉嘅甜味同埋啫喱本身嘅茶甘味都真係幾夾。試埋粒丸子,食丸子最驚就係佢極黐牙又淋坺坺咁。好在呢次算得上係好食,煙韌得嚟唔黐牙!好啦,招牌抹茶啫喱總算交足貨! 甜品都食埋,係時候飲埋杯茶喇。小編揀咗呢個莖焙茶,用熱水浸泡嘅茶呈黑色,顏色望落感覺「好蓉」。飲落口第一啖都幾順口,但吞嘅時候就有一種澀味湧出嚟。呢款茶俾我嘅感覺就唔太好,一來是茶包茶,二來佢澀得嚟完全冇嗰種解膩感覺,又唔似綠茶有種清爽感,感覺就係單純嘅澀。如果大家真係要試唔該揀吓其他喇,仲有5款可以試嘅,好飲記住話俾小編知!   小編伏氣:其實80蚊食個飯糰仔真係連女仔都唔係好飽,即使想貪得意試吓都可免則免喇!反而試完呢個set我比較對佢哋嘅甜品有信心,起碼抹茶啫喱我係懷住愉快嘅心情食完㗎!真係寧願佢哋專心啲,淨係做抹茶甜品算喇! 丸十茶香飯團套餐「月」 入伏點:中村藤吉金鐘店 入伏價:HKD80 中伏by #肥仔文 美術by #mui mui 攝影by #肥仔文 《伏務台》星期一伏務大眾,歡迎各界報料。