Tagged: 中伏

0

【魚生飯爛溶溶似餸頭餸尾 貓飯咁款睇見唔開胃】伏務台

石門開始發展起嚟,但呢區嘅餐廳質素又跟唔跟得上呢?雖然香港人鍾意食刺身嘅程度,係喺冬天食魚生都冇問題,不過呢間京都嘅質素真係不敢恭維囉,免收加一都唔想返轉頭呀! 餐廳服務方面係零分,小編喺平日夜晚7點58分入座,入座率一半都冇,全場三位男侍應都掛住傾偈唔理客人,落單、上菜都唔招呼聲;甚至枱面唔太夠位擺食物,依然聲都唔聲夾硬攝位上菜,不過小編忍,睇埋食物質素係點先! 晚飯想食魚生又飽肚啲,最直接梗係點定食啦。呢度嘅角切魚生飯定食(HKD69)一上菜就好似餸頭餸尾夾埋一齊,擺盤就似小朋友手筆,凌亂中有啲秩序,賣相扣晒分;魚生有爛溶溶嘅,亦有散收收嘅,份量就唔算多。 就咁睇魚生外表顏色比較淡,又唔夠凍去保持新鮮;入口冇鮮味之餘,仲有少少魚腥味同雪味,小編食兩嚿就想舉白旗。而吞拿魚有好多筋,已經夠難食仲要𡁻十幾啖都未𡁻到。成碗飯入面比較有味嘅係希靈魚,但都係有雪味囉。雖然有埋芥辣章魚,但都係唔夠味,而章魚又好似放太耐變到軟腍腍冇咬口。 飯底可以自選壽司飯或白飯,小編就揀壽司飯。碗飯暖暖哋,不過有啲就一嚿嚿黏住晒,有啲就散收收,唔知係咪因為撈唔勻壽司醋,事關一啲有味啲,一啲就淡啲;而且醋嘅味道似中式白醋,質素同伏食之王明將壽司有得揮!不過小編當晚到第二日都攪肚痛,唔肯定完全關佢事,但八九不離十啦。 試完生嘅試熟嘅,呢個和風炸雞定食(HKD68)震撼程度雖然比唔上魚生,不過都麻麻地。雞扒味道用椒鹽調味都正正常常,不過炸得太乾,食落嚡口刮脷,小編個口第二日仲痛痛哋添。麵食有手打烏冬或蕎麥麵,小編就揀咗手打烏冬,口感都正常唔伏嘅,只係煮得唔入味啫。湯底重味精,不過有即食麵嘅質素,如果你唔介意口渴都可能會鍾意。不過食完埋單,小編又要等店員好耐先嚟處理囉……   小編伏氣:4.5星(5星滿分) 入伏點:京都 入伏價:角切魚生飯定食(HKD69)、和風炸雞定食(HKD68) 中伏by #MOMO 美術by #MOMO 攝影by #MOMO 《伏務台》歡迎各界報料。

0

【太子老字號燒味名過於實 叉燒乾過柴味道死鹹】伏務台

小編最近留意到網上指一間喺太子嘅老字號燒味店永合隆飯店有勁多伏評,大多數網民都話啲叉燒乾到好似柴咁,仲瘦過瘦叉添。不過燒味又唔可以齋睇叉燒質素嘅,所以小編試埋佢哋其他燒味,睇吓係咪樣樣都咁伏。 永合隆飯店已經開業大約50年,但近幾年就多咗人話佢名過於實,淪為遊客打卡店。今次小編試咗兩款雙拼飯同一碗例湯,一共四款燒味嚟。 先試叉燒燒肉雙拼飯(HKD63), 就咁睇色澤模樣都幾正常 ,點知入口就出事喇……有陣似燒焦咗嘅燶味,食多兩嚿都有啲難入口;明明個樣唔似瘦叉,但口感仲乾過瘦叉。小編都向員工求證係咪特登用瘦叉嚟整叉燒?點知佢哋否認之餘,仲話係用最好嘅貨嚟整,小編都有啲愕然囉。 至於燒肉味道真係好鹹,而且冇揸勻啲鹽,局部位置極鹹添,食一嚿就要飲啖水嚟中和陣鹹味。而燒肉皮就好睇食客運氣,小編呢碟就有脆有唔脆。 乳豬切雞雙拼飯(HKD63)嘅乳豬同燒肉一樣都係死鹹。而且有一點令小編覺得佢幾冇heart,就係堂食都俾一包包嘅外賣乳豬醬,作為一間老字號燒味店,仲自稱專做燒乳豬,唔係連自家製乳豬醬都冇掛?!切雞雖然味道唔錯都算滑,但小編呢碟就瘦到得幾両肉咁,唔係好夠餸飯囉。 最後唯一唔伏竟然係佢個例湯(HKD10),有料得嚟又清甜,轉行賣湯仲好喎。其實以呢度嘅價錢,可以去酒樓食個質素好啲,出品又穩定啲嘅燒味飯呀。   小編伏氣:3星(5星滿分) 入伏點:永合隆飯店 入伏價:叉燒燒肉雙拼飯(HKD63)、乳豬切雞雙拼飯(HKD63)、例湯(HKD10) 中伏by #MOMO 美術by #MOMO 攝影by #MOMO 《伏務台》歡迎各界報料。

0

【網民報料油麻地café伏爆 實試漢堡套餐貨不對辦】伏務台

一講中伏餐廳就有網友留言,話油麻地嘅愛麗絲的秘密花園都好伏,仲引嚟一堆網民附和添。小編都做完一輪資料搜集,都發唔少人都有微言,咁梗係去實測吓啦! 呢間以愛麗絲夢遊仙境做主題嘅打卡café,俾大量網民指佢嘅價錢同食物質素唔成正比,單靠打卡都唔可以接受。 小編一入去已經聞到陣酸宿味,座位與座位之間都好迫,想像唔到四個人一齊坐可以點食飯。呢度作為打卡café,先睇睇裝修、影相道具同餐具都有啲殘舊,部分已經爆口,公仔甩毛都冇換新嘅;而且有啲道具裝飾勁厚塵,咁樣食嘢真係唔開胃囉。 不過點都要試埋食物質素,小編叫咗特偉兄弟孖寶(HKD78)。特偉兄弟孖寶係漢堡包餐,但上菜個樣同餐牌嘅圖有出入!明明圖示係雙色漢堡,但出嚟變咗單色;薯角就變咗粗薯條;沙律仲直接消失添!無論作為一間餐廳定打卡地點都好,呢啲落差真係有啲過份呀! 兩個漢堡包都煎得有啲乾同硬,用手大力啲都壓唔扁。中間夾住嘅漢堡扒雖然跟返餐牌做咗牛肉同雞肉豆腐兩款,但牛肉口感鬆散,味道超鹹;雞肉就又乾又實,冇咩雞肉味。 粗薯條貨不對辦已經令人勁失望,冇咩調味,仲條條都唔脆口,圖片嘅沙律醬就變成茄汁,成個感覺頹晒。而且分量唔多,就算以打卡做賣點都彌補唔到呀。 作為café當然要試吓佢啲甜品啦。紅心皇后的餡餅係雜苺軟心慕絲蛋糕,入口有陣隱隱嘅苦澀味同藥水味,甜得嚟都幾假,好似食糖嗰種咁。分量同樣好細,同樣嘅價錢喺街可以買到質素好好多嘅蛋糕或西餅喇。小編同網友嘅評價一樣,真係「不可一,不可再」。就算想影相打卡,同樣嘅價錢可以去新啲又乾淨,食物質素更好嘅café。   小編伏氣:4星(5星滿分) 入伏點:愛麗絲的秘密花園 入伏價:特偉兄弟孖寶(HKD78)、紅心皇后的餡餅(HKD56) 中伏by #MOMO 美術by #MOMO 攝影by #MOMO,BLUE 《伏務台》歡迎各界報料。

0

【雞批浮在青苔上? 冰室食物配搭錯晒嚇死人】伏務台

伏嘅嘢主要分幾種,可以係味道伏、價錢伏或者外表伏。今次小編就遇到大佬喇,伏嘅點竟然係個配搭喎! 就係呢個喜喜冰室嘅「雞批浮台」,聽到個名都覺得怪啦,雞批就雞批啦,好哋哋浮咩台呢?睇埋張相小編就呆咗喇,係就係浮台……點解浮喺綠色嘅青苔上面嘅?嚇死人喇。 呢個雞批浮台(HKD36)其實即係雞批加綠豆蓉湯,小編唔明點解呢兩樣加埋一齊會work……同埋本身綠豆蓉湯都係一款比較非主流嘅湯種,點解仲要mix埋個雞批呢? 見到佢咁嘅樣,小編其實都有啲心理準備㗎喇。究竟會唔會係小編誤會咗佢呢?或者會好好食呢? 結果小編嘅直覺係冇錯嘅。首先雞批個皮唔脆就梗㗎啦,話晒都浸住晒;咬落完全唔知自己食緊咩,就係一個濕咗嘅批皮,入面個餡微暖。 至於個綠豆蓉湯……飲落好草青味,仲有少少腥腥哋,我諗除非係綠豆愛好者,如果唔係呢個湯都唔太啱飲㗎喇。   小編伏氣:小編覺得呢個配搭完全無厘頭兼完全唔好食,可以話係由頭伏到落腳。各位勇士想嚐鮮之前要三思喇。 入伏點:喜喜冰室入伏價:雞批浮台(HKD36)中伏by:肥仔文美術by:車雲    

0

【前菜茶錢加一逐樣計唔抵 厚皮煎包腥味黃魚麵送魚鱗】伏務台

想食上海菜,去啲有名氣嘅中菜館以為實冇死啦,點知小編今次就中晒伏。呢間喺尖沙咀嘅南小館,環境就唔錯,食物價錢睇落都幾經濟咁呀,不過真實係另一回事…… 正值新年,成間舖都擺滿新年裝飾,幾有氣氛嘅,但望落好似有啲亂,冇乜格調咁。入面環境其實都幾寬敞,有唔少座位,最入面仲有落地玻璃,可以睇吓景。小編去食嘅時候啱啱完咗午市,冇乜客人,得四、五枱客。 一坐低,店員就擺低咗杯清茶同一份前菜,有辣菜脯同花生,啲菜脯唔係好辣,花生就蒸熟咗,仲有少少濕,都幾開胃。呢度杯菜飲落似玄米茶,但好淡冇乜味。食中菜計茶錢好正常,但埋單至知原來份前菜係要額外收費嘅,9蚊茶芥再加15蚊前菜,即係未嗌嘢食就已經要俾24蚊。提醒返,呢個價錢仲未計加一服務費㗎! 啱啱落完單一兩分鐘,呢份招牌生煎包(HKD48)就即刻送到。小編真係有少少驚訝個上菜速度,即係份生煎包已經整好咗一段時間,唔係即整嘅。有啲蔥同芝麻喺面頭嘅生煎包望落冇乜油,反而似蒸包。 生煎包個底係煎得幾金黃嘅,咬啖試吓先!食生煎包本來都幾驚入面個餡太熱會辣親,一食就知小編頭先嘅擔心係多餘,因為成個包一啲都唔熱!最多只可以話佢係微溫,而且食一啖淨係食到個包皮,根本咬唔到啲餡。唔使小編講,大家都睇到個皮係幾咁厚、嚿肉係幾細粒啦……頭先金黃色個包底原來都係幻覺嚟,食落硬到好似飯焦咁喎。成個包除咗個底有煎過之外,食落根本同食一個蒸包係冇分別嘅。如果大家想食個煎過吓嘅蒸包,仲要係皮厚過餡嘅,都可以試吓佢嘅。 小編仲嗌咗碗雪菜黃魚麵(HKD68)嚟試吓,賣相好似唔多靚仔喎,上枱時湯面已經結咗少少油。啲黃魚冇話特別鋪喺面上,但驟眼睇魚嘅分量都唔少,叫做對得住個價錢。不過賣相都唔係重點,味道最實際。 雖則望落好似有唔少魚咁,原來唔係嚿嚿魚都有肉食㗎,有啲薄到淨係得返塊魚皮。可能係小編唔好彩,食第一啖就食到一大片好硬嘅嘢,應該係魚鱗嚟,有啲扣分喎。再食多啖,今次冇食到魚鱗喇,但啲魚腥味就喺個口裡面慢慢滲出嚟……真係幾難頂喎!諗住飲啖湯,辟吓口入面腥味啦,點知原來最腥嘅唔係嚿魚,而係個湯,連雪菜味都可以被蓋過就知腥得有幾誇張啦,真係有幾多雪菜都冇用呀! 其實食完嚿魚,飲埋啖湯,小編都唔係幾敢再掂呢碗嘢,但係都勉強試埋個麵啦。呢個應該係上海麵嚟嘅,麵嘅粗度就喺米粉同米線之間,食落太腍身,個感覺似食緊發脹咗嘅米粉囉。 小編伏氣:估唔到食間有啲名氣嘅中菜館都可以中晒伏!個招牌生煎包唔知係嚿肉太細粒定個皮太厚,皮厚過餡係咩玩法,小編睇唔透。對於碗雪菜黃魚麵,除咗伏之外,真係唔知講咩好。由嚿魚到個湯,再到啖麵,可以用一個腥字形容晒,小編依家諗返嗰陣腥味都驚呀!總之就不可一、不可再啦!   入伏點:尖沙咀南小館 入伏價:招牌生煎包(HKD48)、雪菜黃魚麵(HKD68) 中伏by #大食積 美術by #車雲 攝影by #大食積 《伏務台》星期一伏務大眾,歡迎各界報料。

0

【深水埗新開長龍店中伏 石磨腸粉唔滑菇味茨汁怪】伏務台

深水埗不嬲都有好多隱世老字號,不過最近就難得有間受人熱議嘅新店開張喎!就係呢間五嫂石磨腸粉!平日下午都見佢排晒長龍,好似真係好得咁喎! 排得長龍好似好有信心保證咁,不過小編中得伏多,試新嘢之前上網check吓呢間嘢風評如何啦!呢間新店都有其他飲食媒體報導過㗎,失敬失敬! 不過亦都見到唔少網民嘅反應好似麻麻喎,不過為咗一證食評真偽,小編決定明知山有虎,偏向虎山行!今次就試吓最簡單嘅雞蛋腸(HKD18)。 落單時店員有問我堂食定拎走,咁我就答堂食啦,因為腸粉熱辣辣一定最正!正如網民留言所提到,堂食都竟然係俾發泡膠盒同即棄筷子,咁其實同外賣冇乜分別?差個膠袋咁囉!雖然知佢係立食舖,但其實好多腸粉小店嘅堂食都會用膠碟裝,大家食完就順手交返,慳返唔少即棄餐具㗎!五嫂嘅堂食服務呢方面真係0分喇! 一打開個盒就見到滿滿嘅茨汁浸滿腸粉,感覺真係麻麻喇。直覺覺得佢嘅汁應該係豉油茨啦,點知冇乜豉油味得嚟仲帶有陣菇味……小編覺得菇味汁同雞蛋腸真係唔係咁夾喇。食咗一啖已經唔想再食落去,腸粉質地偏厚,唔夠薄之餘仲唔夠滑,同時又好吸汁,令到嗰種帶有微腥菇味嘅汁更加難頂。 開頭夾第一嚿腸粉都仲算夾到,不過小編影咗2張相之後,兜嘢已經迅速吸滿晒汁,仲有啲發脹嘅感覺添!跟住就一夾即散,碎濕濕咁,難以下手呀。最後要好似扒飯咁扒先食得完。   小編伏氣:嗱,小編好公道嘅,其實18蚊嚟講佢分量真係唔少,不過……都要食得落口先得㗎!其實18蚊食腸粉喺深水埗真係有好多選擇,米芝蓮級別嘅都有。雖然佢哋舖頭主打每日新鮮石磨,但問題係佢石磨出嚟反而不及街外腸粉滑同薄,至於個菇味茨汁就真係超趕客喇,寧願佢落普通豉油算囉! 入伏點:五嫂石磨腸粉 入伏價:HKD18 中伏by #肥仔文 美術by #車雲 攝影by #肥仔文 《伏務台》星期一伏務大眾,歡迎各界報料。

0

【尖沙咀茶理史甜度太飄忽 芋奶香精竹炭奶茶得苦味】伏務台

依家好多間台式飲品店好似無論咩時候都要大排長龍,呢間連鎖台式飲品店茶理史都唔例外,仲愈開愈多分店。不過小編喺尖沙咀呢間分店飲咗兩杯嘢都中晒伏,睇吓究竟出咗咩問題啦! 小編喺閒日嘅四點幾去到,人流唔算多,買嘅時候前面應該有3-4個客人等緊,結果兩杯嘢飲大概等咗十分鐘,都算合理嘅。不過喺小編買完之後,就一度出現人龍,加上門面堆咗好多貨喺度,令到地方都幾逼吓,有啲混亂,直到走之前都仲未見有人執呢啲貨。 呢杯竹炭鐵觀音白玉奶茶(HKD26)望落都OK喎,起碼有兩截色,仲有啲漸層效果添,白玉嘅分量正常,但係啲白玉嘅色就黃黃哋咁。當小編用飲管攪勻之後,成杯就變晒上層嗰隻灰黑色,都正路嘅,係竹炭嘅顏色嘛。但係唔好俾佢外表呃咗,一飲就出晒事喇…… 第一啖入口個苦澀味好重,冇茶香。之後再飲真啲,係有陣鐵觀音味,但應該俾苦澀味蓋過搞到冇晒茶香,都係完全冇奶味。明明係竹炭鐵觀音奶茶,但小編完全唔覺得自己飲緊奶茶,似係飲緊無乜味嘅苦茶囉。嗌咗半糖(50%)係一啲都唔甜嘅,唯一係啲白玉本身有少少甜味。 再講返呢啲睇落黃黃哋嘅白玉,係有啲甜味應該浸過糖水,咬落粒白玉度個心係硬身嘅,煮得唔透心喎。 將剩低嘅希望放喺另一杯芋香鮮乳地瓜小芋圓(HKD26) 身上,呢款招牌飲品又係點呢?見到成杯嘢都係芋紫色,但如果飲開芋頭鮮奶嘅都知用新鮮芋頭整出嚟係唔會出到咁樣嘅紫色。入面地瓜圓同小芋圓嘅分量都算幾足,之不過有啲細細粒嘅沉澱物喺杯嘢飲中間,有少少礙眼咁喎。 同樣攪勻試一啖先,嘩!第一個感覺係好甜呀!即刻睇吓個店員有冇落錯單啦,冇錯呀,的確係嗌咗微糖(25%)㗎噃,但係呢杯嘢真係甜得好誇張,好似飲緊個芋頭味嘅糖水咁。 芋頭味亦都好明顯係用芋頭香精溝出嚟,陣味有啲假囉。係有加返啲芋頭碎入去嘅,原來就係啱啱睇到嗰啲沉澱物,叫做多返啲層次,但係唔知係啲芋頭碎太粉定杯嘢飲太甜,飲完個喉嚨係會仲乾,唔好諗住買佢嚟解渴。啲芋圓就不過不失,係硬身咗啲,無咩芋頭味。點解小編仲未提到啲奶?因為啲奶味一啲都唔出,淨係飲到好甜嘅芋頭香精味,差啲唔記得鮮奶先係杯嘢嘅主角嚟!   小編伏氣:解唔到渴都算,但起碼都要好飲先至有價值,但對於茶理史呢兩杯嘢,小編真係搵唔到佢哋嘅價值囉!竹炭鐵觀音奶茶冇茶香冇奶味,似飲緊苦茶;芋香鮮乳地瓜小芋圓個香精味重兼甜到震。作為連鎖台式飲品店,好應該有固定嘅品質,起碼唔同飲品嘅甜度比例唔應該相差得咁遠。半糖一啲都唔甜但微糖就鬼咁甜,不禁令小編開始懷疑人生,面對咁飄忽嘅甜度,真係唔知應該點嗌先至啱……   入伏點:尖沙咀茶理史 入伏價:竹炭鐵觀音白玉奶茶(HKD26)、芋香鮮乳地瓜小芋圓(HKD26) 中伏by #大食積 美術by #車雲 攝影by #大食積 《伏務台》星期一伏務大眾,歡迎各界報料。

0

【葵廣重慶小食中伏 手撕雞慳料撈埋涼皮怪味】伏務台

葵廣多好嘢食就係人都知,但其實一個唔小心都會瀨嘢㗎,小編今次就中晒伏喇!依家葵廣開咗好多檔重慶四川嘅麻辣小食,不過唔係間間都咁有保證呢,好似喺二樓呢間叫重慶小食嘅舖頭,就真係保證咁……伏喇! 舖頭幾大間,而且招牌紅噹噹好顯眼,貌似幾有重慶風味,事實係點呢? 有酸辣粉、手工涼皮同重慶涼麵,配菜就有九款,款式唔算多。今次小編就揀咗手工涼皮再加手撕雞同腐竹兩樣餸,小辣,盛惠HKD40,價錢唔平喎! 店員阿姐隨手拎咗碗涼皮倒落個大兜度,就開始調味,落啲配料,撈咗兩吓就倒返落個碗度喇。 之後就喺呢一個白色闊身碟度夾起咗啲肉,然後放埋落去涼皮個碗度,嗰啲肉……原來就係我叫嘅手撕雞呀?真係一啲手撕嘅feel都冇喎,仲要感覺唔多新鮮咁,個樣完全唔似平時食開嘅手撕雞,只係似一條條細雞肉絲囉! 腐竹未撈落涼皮之前,一串串穿住,賣相算正常嘅。  交到小編手上嘅呢碗手撕雞腐竹手工涼皮(HKD40)望落賣相ok,啲腐竹分量好多,幾乎遮住晒啲手撕雞同涼皮。之不過,聞落就唔多似平時食重慶嘢嗰隻麻辣味喎,點解會有少少酸餿味嘅? 所謂嘅手撕雞其實即係急凍碎雞肉,肉質都幾老吓,幾大陣雪藏味添;成碗嘢淨係得一篤仔雞肉,分量勁少,要加HKD10先得幾條肉,過份咗啲噃! 反而多到過咗籠嘅腐竹撈咗落碗涼皮之後,又皺又長,勁似抹枱布。食落又乾又韌,擺明浸得唔夠腍,認真麻麻。 講返個手工涼皮,齋買一碗已經要HKD25,所謂配料就係幾條榨菜、啲啲芫荽同幾粒粟米粒,又唔算大碗,真係唔抵食囉!一食落去,涼皮太厚搞到一啲都唔入味,好似食緊加咗辣椒油嘅膠咁。醬汁除咗有少少麻味之外,辣味係完全唔出,仲係有啲酸酸餿餿嘅味,真心伏呀!   小編伏氣:呢碗手撕雞腐竹手工涼皮,同小編嘅想像實在太大出入,手撕雞變咗碎雞肉,條腐竹絕對可以用抹枱布嚟形容呀!唔止手撕雞同腐竹呢啲配菜出事,連主角手工涼皮都咁伏,又厚又冇味,個重慶麻辣醬汁本來應該係成碗嘢嘅精髓,但係麻辣味就feel唔到喇,反而有陣酸餿怪味,連一向鍾意食重慶嘢嘅小編都表示不行了! 入伏點:葵廣重慶小食 入伏價:手撕雞腐竹手工涼皮(HKD40) 中伏by #大食積 美術by #車雲 攝影by #大食積 《伏務台》星期一伏務大眾,歡迎各界報料。

0

【日本最新紅豆餃子醬烏冬 甜到甩牙味道唔夾超級伏】伏務台

凡係聽到係日本製,通常都覺得唔會衰得去邊咁,心諗日本嘢即係高質嘢啦!不過,有時真係有例外,因為日本人咁鬼追求創新,好多時都會將啲九唔搭八嘅嘢Mix埋做Crossover,的確令人幾有好奇心想試嘅,但係,呢啲咁創新嘅Product通常都係伏到震。 好似今次呢盒最新日本直送嘅即食紅豆餃子醬烏冬(HKD18.9),睇到個名小編已經O咗嘴,究竟點先會諗到夾硬將紅豆、餃子同烏冬要做朋友?烏冬係鹹食嚟嘅,你逼佢變甜實冇好結果㗎喎! 雖然我個心已經斷定呢盒嘢係伏,但好奇心戰勝咗一切,人一世物一世,點都試吓啦。打開有三包醬,一包寫住夜店乜乜燒咁、一包就寫住乜乜液體;最後有一包摸落係芝麻粒之類嘅Toppings。根據指示,首先要將個麵用滾水淥5分鐘。咦,明明包裝寫烏冬,點解會變咗麵?算唔算違反商品說明條例? 原來係撈烏冬嚟嘅,所以5分鐘後就要用隔水孔將水倒走,好似平時食炒麵王咁。 隔完水之後就要落調味料喇,首先打開夜店乜乜燒嗰包,一陣濃濃紅豆味撲鼻而來,嘩,好難頂呀大佬。陣紅豆味好假,同埋平時就算真係食紅豆都冇咁濃烈嘅「紅豆蓉味」。陣味真係太恐怖喇,小編惟有落完呢包開第二包。 呢包寫住乜乜液體嘅應該係日式餃子醋之類嘅物體,聞落有少少酸味,小編望一望果堆紅豆醬「烏冬」,再望住手上拎住嘅醋類物體,唉,是但啦,可能咁樣撈埋個味好正呢!最後合埋眼落埋包芝麻就可以撈勻佢喇! 一路撈一路聞到勁濃烈嘅紅豆味,陣味甜到爆炸!食一啖發覺根本就係將日本鯛魚燒裡面啲餡倒晒落個麵度撈勻,味道即係點?即係唔make sense囉!點解紅豆要配烏冬?乖乖地整返紅豆味嘅甜品唔好咩?不要玩食物啦!   小編伏氣:除咗麵質唔係烏冬而係麵之外,佢個名叫得紅豆餃子醬,都真係紅豆同餃子醬都分別有齊嘅!但至於味道呢,小編覺得留返$18.9暖吓銀包個胃比較好喇!陣味真係伏到不可一不可再!除咗有鯛魚燒味之外,仲有少少好似燒焦咗嘅味道,再加埋好似倒瀉咗樽糖嘅甜味,冇錯係一樽!小編真的輸了。 入伏點:一田超市(觀塘分店) 入伏價:HKD18.9 中伏by #肥仔文 美術by #車雲 攝影by #肥仔文 《伏務台》星期一伏務大眾,歡迎各界報料。  

0

【「很讚紅燒牛肉麵」讚唔落 肉燥勁鹹牛肉嚡口】伏務台

肉燥係台灣地道美食嘅靈魂之一,喺長沙灣嘅台式餐廳一碗肉燥就以肉燥做膽,不論飯、撈麵定係湯麵都一定配咗肉燥。咁大膽係咪就一定正宗兼好食?試吓咪知囉! 餐廳係半快餐形式,自己搵位。剔完點餐紙就舉手,等店員埋嚟幫你落單。 反正食台式嘢,梗係要試埋牛肉麵,所以加HKD4由飯變湯麵,點咗很讚紅燒牛肉肉燥湯麵(HKD56),午餐包埋蜂蜜紅茶,冷熱同價,小編就揀咗熱。建議大家check check單,因為店員落錯咗撈麵,好彩改得切,因為落單唔使5分鐘就有得食,砌得好快手。先上飲品,真係有啲嚇親,因為蜂蜜同紅茶好似分開兩件事咁,好唔夾,而且太甜,蓋過咗茶香。麵嘅賣相一般,見到溏心蛋蛋黃邊過熟已經扣分!唔理咁多喇,先試肉燥啦! 近睇肉燥就係一大pat醬,就咁潷一啖會覺得醬多過料,冇咩咬口,反而覺得鹹咗啲。睇真啲(圖右),綠色嗰堆粒粒唔係蔥、係四季豆囉,牛肉麵用四季豆做配料,小編真係未見過喺台灣有咁嘅配搭同賣相囉;肉碎呢?愈咬愈乾、另外又夾雜唔少嚿肥膏;冬菇粒就好似醃到本身水份流失晒嗰種腍! 然後試佢自己讚自己嘅很讚紅燒牛肉,入口喺腦海中即刻出現係「好鹹」兩個字……調味太重手喇。肉質有啲嚡,又炆到乾柴咁款,真係讚唔落口喎。 麵條似刀削麵加鳥冬嘅感覺,不過唔知係差少少火喉定係麵質問題, 咬落有啲硬同實淨。不過麵條太粗,唔似台灣麵嘅風味。食到咁上下,食四季豆清清味覺,點知係成陣草青味!咬落跟本未熟,外層仲硬硬哋添!食到呢個時候,小編都冇講過個湯,因為就係帶味精嗰種鹹鹹哋嘅湯囉,冇特別。   小編伏氣:成碗麵就係兩種味,就係「鹹」同「青草味」。最鹹係「很讚」紅燒牛肉,鹹到眼都凸;第二鹹係肉燥,不過咁多醬浸住,似乎叫肉燥醬適合啲囉!冇諗過四季豆都可以唔煮熟,小編想食都食唔落。如果要改善,煮腍啲四季豆同麵條,鹽用少一半會好好多。 入伏點:一碗肉燥 入伏價:HKD56 中伏by #為食加菲貓 美術by #車雲 攝影by #為食加菲貓 《伏務台》星期一伏務大眾,歡迎各界報料。