Tagged: 中環

0

【精選3間粵菜食府冬至飯 必食鮑參名菜+片皮鴨】家上海、逸東軒、Mott 32

冬大過年,無論點都要同屋企人齊齊整整食餐飯嘅。要照顧家中長輩嘅口味,梗係去粵菜食府啦,小編精選3間中菜俾大家,入屋啲嘅有、米芝蓮質素又有,甚至新派啲都有! 1. 上海菜 主打傳統家常滬菜嘅上海小館家上海,店內設計走中式餐館風格,仲可以邊食邊睇到廚房即製熱辣辣嘅美食添。佢哋嘅YOHO同奧海城分店喺今個冬至推出四至十二位用嘅冬至套餐(HKD1,680起),當中有好受歡迎嘅金牌小籠包、 上海煙燻脆皮雞、流沙奶黃千層酥等菜式。 不過大家要留意,YOHO店同奧海城店嘅菜單有啲唔同㗎:   家上海 地址:元朗元龍街9號形點一期1樓1058號舖 電話:2602 2218 營業時間:星期一至日:11:30-23:00   2. 米芝蓮食府 如果要大魚大肉,梗係搵間有名氣啲先有信心保證啦。米芝蓮一星中菜廳逸東軒就有四至十二位用嘅逸東冬至慶團圓套餐(HKD3,288起),有蟹肉燴蒸窩、鮮蘆筍炒乳龍蝦球、十八頭鮑魚扣遼參等名貴海鮮菜式。 如果想單點菜式都一樣有暖笠笠嘅時令菜式㗎,好似南安油鴨脾鴛鴦腸煲仔飯、生炒臘味糯米飯、馬友鹹魚肉餅煲仔飯、芙蓉乳龍蝦球等等。想睇真啲就望埋菜單啦: 逸東軒   地址:九龍彌敦道380號Eaton HK B2樓層 電話:2710 1093 營業時間:星期一至五:11:00-15:00,18:00-23:00,星期六、日及公眾假期:10:00-15:00,18:00-23:00   3. 與時並進廣東菜 除咗鮑參翅肚,片皮鴨都係大時大節經常出動嘅菜式。雖然Mott 32今年冇出冬至套餐,但佢用蘋果木燒嘅42天飼養北京片皮鴨(HKD750/隻)都係好吸引人㗎!片皮鴨最少要提前一日預訂,記得訂枱嗰時訂埋呀。而且呢度晚市除咗小菜,都有燒味、小量點心同Cocktail供應,啱晒老老嫩嫩一齊嚟食啦! Mott 32 地址:中環德輔道中4-4A號渣打銀行大廈地庫 電話:2885 8688 營業時間:星期一至日:12:00-15:00,18:00-00:00

0

【麻迷必試5間麻辣專門店 平食麻辣燙+串串香放題】辣妹來了、湯火功夫麻辣燙、麻辣妹、爆汗串串、Chilli Fagara

麻辣控一見到麻辣菜就流晒口水,尤其依家呢啲涼涼哋嘅天氣更加令麻辣癮發作。今次小編搵咗5間專賣麻辣菜式嘅專門店,要平嘅有,要精緻嘅有,要任食都一樣有!   1. 速食麻辣燙 喺葵涌廣場嘅辣妹來了HKD25起就有一大碗麻辣燙,辣度有四級,仲好似車仔麵咁自選配料。配料有HKD4、HKD6、HKD8同HKD10四個價,有成52款食物,嗌一碗當餸買返屋企食都得喎。   辣妹來了 地址:葵芳葵涌廣場1樓1183號舖 電話:3622 1353 營業時間:星期一至日:11:00-22:00   2. 麻辣燙變拌麵 喺銅鑼灣嘅湯火功夫麻辣燙有招牌麻辣燙、蕃茄湯底、泰式冬陰功湯底同經典麻辣拌(劃一HKD37)四款兩素一葷麻辣燙,唔夠可以另外加配料,不過一碗嘅麵量其實都幾多。每張枱仲有麻椒油、辣椒油同醋俾你任加,咁樣你想要幾麻幾辣都得啦!如果覺得太辣,可以加啲醋中和吓。   湯火功夫麻辣燙 地址:銅鑼灣謝斐道482號兆安廣場地下4-6號舖 電話:2148 6788 營業時間:星期一至日:11:00-23:00   3. 麻辣菜館 旺角嘅麻辣妹有四款麵食,其中重慶小鍋(HKD25)可以揀米線、薯仔粉、紅薯粉或水晶粉,而辣度就有五級。配料價錢分HKD6、HKD8同HKD9三個類別。不過想食飽啲仲可以嗌麻辣小食(HKD15-68),例如配特製辣椒粉嘅潮州魚蛋、可以自選麻辣度嘅口水雞、豬大腸、海帶等。   麻辣妹 地址:旺角通菜街27號 電話:9309 5990 營業時間:星期一至日:12:00-23:00   4. 串串香放題...

0

【率先試汴京茶寮中環旗艦店 榻榻米茶座歎手沖精品茶】汴京茶寮

去蘭桂坊竟然唔係飲酒,而係品茶?澳門人氣嘅汴京茶寮最近終於登陸香港,喺中環蘭桂坊附近開旗艦店呀!呢度唔同澳門嘅外賣式茶飲店,新店佔地2,000呎,客人可以喺店內Chill住咁慢慢歎茶。除咗有近40款茶飲俾你揀,香港仲有茶漬飯同各款和風茶點,其中佢哋自家製嘅特濃抹茶雪糕就最有驚喜。新店嚟緊更會開辦唔同嘅品茶工作坊,啱晒鍾意飲茶嘅朋友仔啦! 店主嘅茶道造詣都毋庸置疑,佢已經去日本考獲所有茶道證書,所以店內嘅品茶會、茶道課都係由佢負責。佢亦想透過開設汴京茶寮,令更多人接觸到茶道文化。全店以日式簡約茶室設計,環境開揚寬敞,而且早晚嘅陳設都唔同㗎!朝早店內以一列木質枱櫈嘅Cafe形式俾客人坐喺度歎茶;到夜晚8點後就會全部轉成榻榻米嘅形式,有品茶會俾客人品嚐更上等嘅茶種。 凍飲嘅八女煎茶(HKD52)透過冰鎮過程為茶降溫,茶葉經過三泡令冰茶唔會因為冷凍而變淡,入口順滑而富茶香,夏天飲佢就透心涼喇。而且呢款茶葉比較嫩綠,係店主直接向農夫購買,可以確保到茶葉嘅質量。 除咗清茶之外,鮮奶系列都好受歡迎㗎。以茶粉加鮮奶沖成,令茶味更濃厚。左邊嘅星野抹茶鮮奶(HKD52)都係用八女茶製成,入口厚滑,抹茶味突出。而右邊嘅焙茶鮮奶(HKD52)就用咗靜岡焙茶粉沖成,茶味冇抹茶味咁強烈,但就多一份烘焙後嘅香氣。而且呢度嘅茶粉分量足,所以鮮奶系列有沉澱效果都係正常嘅。 想體驗吓抹茶可以有幾濃,就要食呢杯特濃抹茶雪糕(HKD54)喇。自家製嘅抹茶雪糕都有加入八女茶粉,食落同抹茶鮮奶個味道差唔多,但抹茶味就更濃郁!質地有啲似雪葩,口感非常獨特,抹茶控必食呀! 午餐有幾款唔同嘅茶漬飯套餐(HKD98-158)供應,呢款茶漬飯Set C(HKD158)就有一碗茶漬飯、兩款配菜、茶凍同茶飲。是日配菜係每日唔同嘅,而當日嘅築前煮同乾煮大根呢兩款都好啱小編口味!以牛蒡、蒟蒻整成嘅築前煮聞起嚟已經有濃濃嘅牛蒡味,全部食材都煮得軟腍,食落感覺好溫暖;乾煮大根就用咗唔同種類嘅蘿蔔削成絲再煮,非常入味。 茶漬飯有4種口味俾你揀,今次就試咗高菜白魚味,其他就係高菜櫻花蝦、雞肉碎同三文魚碎口味。成碗分量都唔少,食落清新有魚香。仲有配咗茶凍做飯後甜品,呢款就帶有桂花香同淡淡嘅玫瑰香,質地Q彈仲係低糖添,入口唔覺甜膩,食多兩粒都唔會滯。 店內仲有唔少日本直送嘅和風茶點,呢款日式迷你飯糰(HKD28)係用Superfood整成,有椰子加雜穀(左上)、螺旋藻加莧草(右上)、巴西紫莓(左下)同大麻籽加藜麥(右下)4款口味,係OL健康清新之選。 趕時間都可以買樽裝嘅冷泡茶Grab & Go,水月煎茶(HKD48/左)同正山小種(HKD44/右)呢兩款高質嘅冷泡茶都係用直接同農夫買嘅茶葉沖製㗎。   汴京茶寮 地址:中環雲咸街38號 電話:從缺 營業時間:星期一至日:10:30-20:00、21:00-01:00 

0

【7-11六大精選新品速遞 花生醬雪糕杯+台茶爆谷】7-Eleven

日韓台便利店成日出唔少吸引嘅新品,有時有得睇冇得食都幾冇癮囉……今次就等小編推介一啲喺香港全線7-Eleven近期推出嘅新品俾大家啦!有唔少仲係獨家發售,睇啱就落街買喇喂。 優先發售 天仁茗茶出品嘅兩款新口味爆谷依家喺7-11優先發售喇。香芋珍珠奶茶味爆谷(HKD24)以天仁茗茶上等阿薩姆紅茶,加上濃郁嘅奶醬同香芋,芋香十足。而黑糖鐵觀音薑茶味爆谷(HKD24)就以天仁茗茶上等台灣鐵觀音,加入黑糖薑茶,食落有淡淡嘅黑糖薑味,夠晒特別。唔好以為爆谷就會好熱氣、好油膩,佢哋嘅爆谷用咗非基因改造嘅粟米粒、以冇油氣炸嘅方式整成,好味又健康,天仁茗茶粉絲絕對唔可以錯過呀! 獨家發售 Skippy花生醬雪糕杯(HKD20)登場喇!Skippy繼前排出完雪條同雪糕批之後,今次再下一城,出埋雪糕杯俾你可以慢慢潷嚟食。招牌花生醬口味嘅香濃雪糕質地幼滑,同藍色包裝嘅花生醬一樣加入花生碎粒粒,有唔同層次嘅味覺衝擊。你話點可以唔試呢?! 呢款ANDEICO香蕉雪條(HKD18)入面真係有香蕉果肉㗎,成分入面有24%係香蕉果汁同果肉,味道香甜唔膩仲幾清爽添。 新品發售 KitKat粉絲就一定要試吓佢哋新出嘅球型朱古力。左邊嘅紅莓果仁朱古力(HKD15)同右邊嘅紅莓果仁紅寶石朱古力(HKD15)都內藏大量堅果同紅莓乾,層次豐富又唔會太甜。不過紅莓果仁紅寶石朱古力味道酸甜啲,唔知係咪因為用咗少見嘅紅寶石可可豆呢? 期間限定 卡樂B又出新品喇!左邊嘅Jagabee芝士煙肉味薯條(HKD20/5小包)嘅芝士味唔算好濃,但鹹香嘅層次控制得幾好。而無辣不歡嘅朋友仔就要挑戰吓右邊嗰款卡樂B 4倍蒜辣味薯片(HKD18/2件),今次除咗增加辣度之外,仲有啖啖蒜香添。 韓國直送 想Keep Fit所以食少啲零食?咁韓國直送嘅ACHIM雞胸肉(HKD18/原味、煙燻味)就最啱你喇,以原塊雞胸整成,味道香口之餘仲有豐富蛋白質;而且仲有以雞胸肉整成嘅ACHIM雞胸肉腸(HKD17.5/原味、香辣味)俾你揀。兩款都係一開即食,用嚟煮麵或做餸都得,夠晒方便。

0

【Duck & Waffle必食招牌鴨肉窩夫 香港獨賣巨型雪糕馬卡龍】Duck & Waffle

英國餐廳Duck & Waffle最近喺中環ifc開咗佢哋喺倫敦以外首間海外店,除咗有以招牌鴨肉窩夫為首嘅倫敦熱賣菜式之外,仲推出一系列香港店限定嘅餐點添。快啲睇吓有咩菜式咁特別啦! 香港店都貫徹倫敦店嘅裝修風格,空間夠晒開揚寬敞,亦有標誌性嘅黃色波浪紋天花設計、紅色開放式廚房。室內鮮明亮眼自然感覺都chill啲,食咩都開胃啲啦。 一場嚟到,即刻試佢嘅招牌菜式Duck & Waffle(HKD230)。呢道鴨肉窩夫喺倫敦已經賣出一百萬碟,受歡迎程度爆晒燈。成隻油封鴨髀放喺用白脫牛奶整成嘅窩夫上面,再鋪上煎至半熟嘅鴨蛋,旁邊伴以秘製嘅芥末楓糖漿。話明招牌菜,做法梗係特別講究啦。鴨髀用唔同嘅香料醃咗48個鐘後,慢煮10個鐘,上碟前再油炸,外脆內嫩嘅油封鴨髀就咁誕生喇!而大廚推薦嘅正宗食法就要先將鴨髀拆肉、切碎,疊返喺窩夫上面,再拮穿半熟嘅鴨蛋黃,淋上芥末楓糖漿就食得。鴨髀肉軟腍嫩滑,食落有淡淡楓糖香味,鹹甜交融,層次夠晒豐富! 而Spiced OX Cheek Doughnut(HKD135)同樣都係倫敦店嘅招牌菜,靈感來自中式包點,經改良後就變成依家以冬甩整成嘅鹹點喇。冬甩表面沾滿微辛嘅煙燻紅椒糖,再浸喺橙黃色嘅杏桃醬汁入面。一切開個冬甩,原來內藏慢煮牛面頰同忌廉芝士,入口有多種香料味道之外,蘸埋酸甜嘅杏桃汁一齊食又幾match喎。 鍾意食海鮮嘅你必試呢款Irish Crab(HKD160),而且係香港獨家菜式嚟㗎!入面一絲絲嘅蟹肉選用愛爾蘭蟹,肉質鮮嫩,加入用蠔整成嘅蠔鮮蛋黃醬增添鮮味,配埋旁邊嘅海苔脆片一齊食,口感就更豐富喇。而最令小編驚喜嘅係菜式中加入少見嘅蠔葉,呢種葉生喺蠔生長嘅區域,食落竟然有濃郁而突出嘅蠔味呀! PBJ Macaroon Ice Cream Sandwich(HKD80)嘅賣相係咪夠晒吸引呢?大大個超夢幻嘅粉紅色Macaroon夾住自家製花生醬雪糕、覆盆子同香蕉等食材,再灑上白雪雪嘅糖霜。Macaron入口甜度適中,花生醬雪糕嘅花生醬味還原度極高,味道就濃郁到好似食緊雪凍咗嘅花生醬咁,但奶香幼滑嘅雪糕又冇花生醬嗰種漿住個口嘅質感,容易入口又唔膩。呢款甜品都係香港店獨家推出,記得試埋佢喇。 呢度除咗食物之外,仲有唔少特色飲品㗎。左邊呢款招牌雞尾酒Duck & Stormy(HKD148),用Dark Rum做雞尾酒基調,加入青檸、薑汁同烤椰子調製而成,入口清新醒神。而右邊嘅Snapquack(HKD128)就係香港獨有嘅雞尾酒,以黃色鴨仔咁可愛嘅杯登場,用上菠蘿冧酒混合荔枝利口酒、佛手柑、苦精同紅莓糖調製,飲落層次比較豐富。   Duck & Waffle 地址:中環金融街8號國際金融中心商場 1樓1081舖 電話:2267 6338 營業時間:星期日至四:08:00-22:30、星期五至六及公眾假期:08:00-11:00

0

【鼎·會館一周年新菜限時優惠 順德盛宴+粵式早午餐】鼎·會館

話咁快喺中環嘅鼎·會館一周年喇,鼎爺同粵菜名廚李翔再度聯手炮製唔少新菜式俾大家。晚市有揉合番禺、新會、鶴山、中山等特色嘅「鼎·會館 順德盛宴」;星期六、日同公眾假期仲有「庭園茶聚假日二人餐」添,即刻睇吓有咩正嘢啦! 六位起嘅「鼎·會館 順德盛宴」九月限時優惠(HKD4,888/已包加一小費[原價HKD888/位])要兩日前訂座,究竟有咩特別菜式?即刻睇吓呢道豉酒鵝燴陳村粉特別配上「順德馳名碌鵝」,碌鵝要3個鐘內不停將鵝翻動同淋上秘製醬汁;切件後放喺陳村粉上面蒸,令陳村粉充分吸收鵝汁精華,唔係就咁撈汁咁簡單! 仲有罕見又傳統嘅順德名菜之一均安蒸豬,豬腩肉以秘製調味粉醃製同掃上順德出產嘅二曲酒,醃成3個鐘以上再蒸大約40分鐘。再貼心咁喺豬皮上拮小孔,等油脂滲出嚟之後用冰水沖洗再蒸大約10-15分鐘。咁多功夫令肉香多汁唔肥膩,入口仲會feel到好有骨膠原嘅質感添。呢兩款已經咁出色,其他餸菜都實各有千秋啦。 中式嘅Brunch選擇唔多,依家鼎·會館喺周末同公眾假期推出「庭園茶聚假日二人餐」(HKD768/兩位),入面10款食物之中仲有阿爺芝麻卷、秘製叉燒、香漕滷水鵝肝、梨香釀帶子等鼎·會館人氣菜色添之外,每位仲有一盅花膠燉湯,而貴妃蚌稻庭烏冬可以免費追加一份鮮魚湯魚腐。   鼎·會館 地址:中環皇后大道中80號H Queen’s 23樓 電話:2327 1398 營業時間:星期一至日:12:00-15:00,18:00-22:30

0

【中環親民價任食日式Brunch 3小時大歎高質爐端燒】魚治

放假食乜好?不如試吓呢間主打正宗爐端燒嘅日式居酒屋魚治啦!佢哋最近新推出非常抵食嘅周末Brunch Menu,可以任食店內超過廿款高質招牌菜式,連平時百幾蚊份嘅烤魚一夜干都係任食,入座仲送每人一份刺身拼盤添。即刻睇吓有幾正! 餐廳裝潢走日式工業風,以木質為主俾人一種溫暖嘅感覺。呢度嘅食材都由日本新鮮直送,客人無論平時定食Brunch,都可以喺開放式廚房親自挑選當日時令食材,師傅就會幫你炮製菜式,亦可以同師傅多啲互動添。 而餐廳新推出嘅Weekend Brunch(HKD298/成人;HKD98/小童;6歲以下免費)會喺每個星期六、日12:00-15:00供應,有超過廿款招牌菜俾你任食。除咗烤牛肋骨之外,menu上其他菜式都可以無限量任嗌,仲要全部都係單點嘅size,大大份非常抵食! 呢個周末任食嘅Brunch入座送嘅時令刺身拼盤係一人一份,而相入面嘅係二人分量。五款時令刺身全部都由日本直送,肥美新鮮。其中嘅油甘魚刺身啲油脂分佈均勻,入口即化。 其中一款前菜係三文魚籽半熟蛋,開邊嘅半熟溏心蛋加上三文魚籽同簡單嘅調味;三文魚籽喺口度爆開,鮮味中仲有淡淡蛋香添。 鯷魚醬伴鮮野菜都係前菜之一,用咗日本唔同地區嘅時令蔬果,冰鎮過後食落清涼新鮮;尤其係香甜嘅蕃薯片,入口又腍又粉,蘸埋鯷魚醬一齊食就甜中帶鹹,幾特別。 呢款只可以點一次嘅烤牛肋骨點解咁矜貴?佢經過60度慢煮180分鐘,帶粉紅色嘅牛肉冇特別調味或醃製,但牛味非常突出又嫩滑,夠晒高質! 必食之選有呢款白汁烤焗海膽三文魚籽,喺烤焗過嘅香濃白汁芝士通粉面頭鋪上新鮮馬糞海膽同三文魚籽,趁熱食仲有拉絲效果㗎:濃郁嘅芝士配搭鮮味海膽都冇蓋過海膽嘅鮮甜,加上三文魚籽飽滿嘅口感真係好夾! 最令小編驚喜嘅係呢款楓糖忌廉芝士拌薄脆!唔好睇佢得幾塊薄脆片再加嚿忌廉芝士醬咁簡單,佢哋嘅忌廉芝士醬係自家調配,用咗鮮忌廉、牛乳、兩種芝士mix埋再加入楓糖;配薄脆片一齊食非常滋味,獨特嘅味道絕對要encore呀! 烤魚一夜干都係呢度嘅招牌菜,以爐端燒嘅方式令烤魚肉質有彈性,微脆嘅外層鎖住烤魚嘅肉汁。海鮮都係時令款式,小編當日食呢條魚肉質鮮甜滑溜,係佐酒嘅絕配囉。 魷魚筒伴魷魚肝醬同樣係爐端燒菜式,烤過嘅魷魚筒彈牙煙韌又唔痴牙。魷魚肝醬就偏鹹,好啱用嚟蘸烤物,呢個配搭好完美。 嚟得居酒屋就梗係有靚酒飲啦,Brunch時段只要加HKD168就可以任飲多款清酒、梅酒、生啤同高球雞尾酒。如果唔飲酒都可以加HKD98任飲果汁、汽水㗎。   魚治 地址:中環威靈頓街2-8號M88威靈頓廣場7/F 電話:2217 8880 營業時間:星期一至日:12:00-15:00、18:00-00:00

0

【香港首間KiKi麵店×米芝蓮中廚 新推抄手+鮑魚花膠拌麵】KiKi麵店(KiKi茶)

台灣人氣KiKi麵店(KiKi茶)終於喺香港開實體店喇!今次連同茶店一齊進駐中環國際金融中心ifc,無論麵款同飲品都推出ifc店限定新品,麵款仲由米芝蓮三星中廚歐國強師傅調配添,即刻睇吓邊樣啱你口味啦! 食客可以透過廚窗睇到廚房運作。 先介紹兩杯新飲品,愛文芒果雪絨椰果白桃烏龍(HKD39/左)絕對有驚喜!雪絨奶蓋以奶油、糖同愛文芒打成,輕柔香甜,果味十足;白桃烏龍茶味幾出,仲有果肉同椰果增加口感。另一杯椰果愛玉冬瓜茶(HKD35/右)就以台灣人鍾意嘅冬瓜茶底配椰果同愛玉,味道相對甜啲,但好啱夏天飲。 邊飲咁台式風味嘅茶飲,梗係配返碗KiKi手工日曬乾拌麵啦。兩款由米芝蓮大廚歐師傅設計嘅麵食都滲入食客喜愛嘅元素,呢款KiKi抄手拌麵(HKD98)帶有濃蔥油香氣,麵底加咗鹽蒜水調味,令酸辣味道之中更有層次同惹味。抄手比一口大啲,但六粒加埋都唔少;餡料除咗豬肉,混入唔少蔬菜令口感好爽口。 鮑魚花膠濃湯雞灌麵(HKD138)就用傳統中式燉湯技巧炮製雞湯底,湯清味濃配鮑魚同手絲花膠好夾。 香港店都有台北元祖店獨創嘅招牌菜蒼蠅頭拌麵(HKD98),爆香豆豉炒豬肉碎、韭菜同小辣椒,鹹香又唔會太重口味。 KiKi擔擔麵(HKD98)就用芝麻醬調配醬汁,再加上自製花椒油等醬料。豬肉碎冇用豆豉爆過雖然相對冇咁香,但撈咗花生碎增加咬口受油香。 仲有充滿台味嘅麻辣肉片紅白麵(HKD98)辣度似譚仔5小辣,容易入口。豐富配料有三大件板豆腐同鴨血,加上爽口肉片、滷蛋同蔬菜;當中嘅鴨血更加要浸泡一晚令佢更加味,真係用心製作㗎。如果想一次過試晒呢度嘅招牌,可以點KiKi套餐(HKD148),會包一款小食、一款主食同一杯飲品(古早冬瓜茶或白桃烏龍);甚至食完仲可以喺度買包裝KiKi麵返屋企添。   KiKi麵店(KiKi茶) 地址:中環海景街一號國際金融中心商場二層2017號舖 電話:2114 3426 營業時間:星期一至日:11:00-22:00

0

【翠亨邨逾十款限定龍蝦新菜 六式炮製爽口惹味龍蝦】翠亨邨

生猛鮮味嘅龍蝦可以變出乜嘢新花款?粵菜館翠亨邨最近就用蒸、炸、燴、炒、熬、焗六種粵式烹調手法,將十至十二両重嘅加拿大龍蝦炮製成七款晚市菜式同四款午市點心。呢個鮮嫩彈牙嘅「龍蝦珍味」系列由即日起至9月8日喺港九全線三間分店都食到,鍾意啖啖龍蝦肉嘅朋友一定要試呀! 晚餐梗係要飲啖湯啦!呢個以龍蝦殼同老雞熬成嘅鍋巴龍蝦濃湯(HKD88/位)配埋香脆嘅鍋巴俾你蘸濃湯,香口之餘又冇咁熱氣喎。 唔少人食龍蝦都鍾意食個鉗,呢款君度橙汁酥炸鮮龍蝦鉗(HKD98/件)就啱晒你喇!酥炸麵包絲外層咬落脆卜卜,入面嘅新鮮龍蝦鉗再包上蝦膠,啖啖肉又有雙重彈牙嘅口感。蘸埋用君度酒同檸檬汁調配而成嘅醬汁,酸甜中帶有酒香添。食完炸嘢,整返個木魚龍蝦肉蒸蛋白(HKD68/位)潤吓先,蛋白入面加咗鮮龍蝦肉同特製龍蝦濃湯,好足料㗎! 呢款黃金有米龍蝦(HKD268/隻)將成隻龍蝦浸喺蛋白入面攞去蒸,係咪好似蒸魚咁盞鬼呢?上碟之前,面頭淋上南瓜汁,再灑咗啲自製蛋香脆米,令口感同味道有多重層次。除咗食龍蝦肉,記住食埋啲滑嘟嘟嘅蛋白呀,因為龍蝦嘅鮮味滲晒入去,係呢個菜式嘅精華所在。 龍蝦伊麵食得多,刁草龍蝦伴黑松露醬稻庭烏冬(HKD248/隻)又食過未呢?以特製龍蝦濃湯同刁草燴煮而成嘅開邊龍蝦夠晒入味,而稻庭烏冬就掛滿黑松露醬同龍蝦汁;扁身嘅烏冬口感幼滑,西日fusion嘅配搭又別有一番風味喎。 講到中菜又點少得鑊氣十足嘅爆炒菜式呢?呢個香茅金不換炒年糕龍蝦煲(HKD238/隻)就係系列入面最有鑊氣嘅煲仔菜喇。將龍蝦切件泡油,再加香茅、金不換同沙嗲醬等配料爆炒,仲有煙韌嗦味嘅上海年糕,夠晒香口惹味呀! 芝士焗龍蝦唔止係西餐嘅專利,呢道香檳巴馬臣焗開邊龍蝦(HKD198/隻)喺芝士焗龍蝦嘅基礎下,以微酸嘅秘製香檳忌廉汁調味,可以突出龍蝦嘅鮮味同芝士嘅鹹香。 除咗晚市咁豐富嘅龍蝦主題菜式之外,午市都新推出四款以龍蝦入饌嘅精緻點心㗎,包括金箔魚子龍蝦蒸餃(左上:HKD68)、龍蝦灌湯餃(右上:HKD88)、脆皮龍蝦春卷(左下:HKD68)同埋加咗黑魚子醬嘅翡翠龍蝦燒賣(右下:HKD68)。   翠亨邨 地址:銅鑼灣波斯富街99號利舞臺22樓 電話:2409 4822 營業時間:星期一至五:11:00-15:00,18:00-23:00,星期六、日:11:00-16:00,18:00-23:00

0

【Black Sheep多國菜餐廳巡禮 平食米芝蓮+英印食堂】「黑羊‧美饌」餐廳週

想平食高級多國菜餐廳?機會又嚟喇!Black Sheep Restaurants餐飲集團喺8月5-11日一連七日再次舉辦「黑羊‧美饌」餐廳週,俾大家以一個超抵食嘅優惠價試到本地多達20間特色多國菜嘅餐廳。入面除咗有米芝蓮星級餐廳之外,仲有最新開業嘅墨西哥餐館同英印食堂添,當然為咗呢個餐廳週亦推出一系列嘅新Menu啦。依家就為大家介紹其中6間Black Sheep精選餐廳先。   1. 全新墨西哥餐館Taqueria Super Macho 今次嘅Black Sheep Week有新餐廳加入呀!呢間以衝浪為主題、充滿海岸風情嘅Taqueria Super Macho主打墨西哥菜,推出以海鮮為主嘅優惠Set(HKD248/五道菜)可以試到香脆魚柳、醃製牛扒、香脆大蝦等多款口味嘅墨西哥粟米捲餅,仲有醃海鮮食添。   Taqueria Super Macho 地址:中環必列者士街33-35號地下 電話:2333 0111 營業時間:星期二至日:18:00-00:00 (星期一休息)   2. 首間英印食堂Rajasthan Rifles 另一間新餐廳就係第一間進駐山頂嘅英印食堂Rajasthan Rifles,呢度有唔少融合咗英格蘭同印度兩地嘅獨特菜式,例如:烤免治牛肉串、印度牛油雞同鐵板三文魚等等都係餐廳嘅招牌菜。佢哋仲將公司三文治帶嚟全新演繹,加入有英式元素嘅酸果醬,味道特別又開胃。   Rajasthan Rifles 地址:山頂山頂道118號山頂廣場地下G01號舖 電話:2388...