Tagged: 中菜

0

【外賣中西日美食Stay Home 精選主食+甜品著數優惠】2020外賣抗疫

第三波疫情來勢洶洶,唔想去買餸減少同人群接觸就當然要叫外賣啦。小編精選中西日式嘅主菜同甜品,包保你嘅外賣一啲都唔hea,有啲仲低至6折添! 甜品 波仔×台灣超人氣Touched塔吉特 今次唔係想講波仔嘅叮叮飯,而係佢引入呧台灣最紅嘅千層蛋糕Touched塔吉特!一個8吋千層蛋糕可以分到12件,一家人週末做下午茶或飯後甜品就啱晒喇。期間限定推出三款口味之中,芒果多千層(HKD218[原價HKD240])以新鮮愛文芒果肉整成;芒果奶凍千層(HKD180 [原價$210])配搭焦香蛋皮入口酸甜開胃;仲有夾住煙韌珍珠、餅皮都充滿濃郁黑糖口味嘅黑糖珍珠千層(HKD198[原價D240]),總有一款啱你口味嘅。   波仔 專門店位置:https://www.eateasthk.com/retail   HABITŪ HABITŪ嘅Rosemantic Summer「瑰麗仲夏」,喺8間指定分店返嚟喇!雖然指定店舖會佈置成玫瑰花主題俾大家打卡,但主題餐飲買返屋企食會安全啲嘅。其中瑰麗草莓意大利芝士杯(HKD78)用上意大利芝士、以玫瑰蜜糖浸泡過嘅手指餅加入自家製玫瑰士多啤梨果醬,層次同味道都好豐富㗎;玫瑰水晶寒天(HKD68)喺微甜嘅水晶寒天注入了玫瑰花嘅幽香,可食用玫瑰花瓣配埋士多啤梨、葡萄、無花果、蘋果等新鮮水果,素食友都可以一齊食。仲有一系列玫瑰主題夏日飲品(HKD52起),冰搖玫瑰泡沫大麥葉茶、巴西莓玫瑰豆奶碎冰等等都好吸引人。   HABITŪ table 地址:銅鑼灣軒尼詩道500號希慎廣場8樓L804號舖 電話:3543 1313 營業時間:星期一至日:12:00-21:30   中式 楚撚記大排檔 唔去得大排檔,不如外賣返屋企啦!楚撚記大排檔西環同土瓜灣店開設外賣專線,西楚霸王雞、地道港式煎蠔餅、楚撚記黑栢葉爆炒雞腎花等等係佢哋熱點菜式之一,依家仲有加推優惠
,每消費HKD100即送老薑蕃薯糖水或清保涼糖水一碗添。想試嘅朋友留意佢哋嘅抗疫限時優惠
喇: – 外賣消費滿HKD600免一半運費 – 外賣消費滿HKD1,000運費全免 優惠細則: 1. 優惠期由即日至31/8/2020 2. 不得與其他優惠同時使用 3. 送貨地點不包括離島、馬灣、愉景灣、禁區及偏遠地區...

0

【粵菜放題$278起任食片皮鴨 送奄仔蟹+花膠響螺雞湯】利寶閣

一講放題就好似得日本菜,但粵菜都一樣吸引㗎。有廿一年烹調傳統粵菜嘅利寶閣,佢哋全線五間分店都有「任食2小時高級京菜」(HKD278起),有超過五十款即叫即做嘅中菜俾你任食。每位成人仲額外送三道滋味菜式添,分別係清蒸、雞油花雕蒸或油鹽焗嘅野生時令奄仔蟹、花膠響螺雞湯同原隻鮑魚花菇。唔賣關子喇,即刻睇吓有咩正斗菜式啦! 地方都算闊落,唔使迫住坐埋一齊。 花膠響螺雞湯雖然係送嘅,但一樣落足料!用砂窩長時間燉煮雞隻,味道鮮甜潤喉又養生。 奄仔蟹有清蒸、雞油花雕蒸或油鹽焗三個煮法,想味道特別啲就梗係揀用雞油花雕蒸,以酒香突出蟹嘅鮮味吖嘛。 原隻鮑魚花菇就似平時飲宴嘅口味,食埋就即刻進擊任食款式喇。 五十幾款食物唔知點揀好?當然有啲必食嘅回本菜式呢! 京式片皮鴨(上環分店除外)皮脆肉嫩,配搭青瓜、京蔥、京醬用餅皮包起嚟食,有油香又唔會過肥。 上環分店期間限定嘅西班牙伊比利亞黑毛豬叉燒都係必食之選!呢種黑毛豬食橡木果實為主要食糧,肥瘦適中而且肉味香甜濃郁啲㗎。 香脆又多肉汁嘅脆皮燒腩仔簡直係香港人最愛,肉同脂肪肥瘦相間,表面又燒到甘香脆口,令人想一食再食! 如果鍾意食涼菜,一定要試花雕醉蝦同流心醉蛋。兩款都用花雕酒浸泡冷藏最少一晚,每啖都係香濃嘅酒香。 中菜都有甜品㗎,傳統嘅拔絲香芋同冰糖葫蘆唔係成日食到,當然要過吓口癮啦!   「任食2小時高級京菜」 供應時間: 星期一至日及公眾假期:18:00-22:00(自選2小時) 價格: 星期一至四: 成人HKD278/位(兩位起) 小童HKD139/位* 星期五至日及公眾假期: 成人HKD298/位(2位起) 小童HKD149/位* 其他收費: 按原價HKD488收取加一服務費: 成人HKD48.8/位,小童HKD24.4/位 *1米以下小童免費   利寶閣  地址:尖沙咀彌敦道100號The ONE 17樓 電話:2870 1488 營業時間:星期一至日:11:00-15:00,18:00-23:00

0

【父親節飲飽食醉精選合集 免費飲酒任食烤牛肉】Kömune、FRITES Belgium on Tap、逸東軒、花月庭

下星期就係父親節喇,小編為大家精選四間各有特色嘅餐廳同爸爸慶祝!有免費飲酒、任食烤牛肉、米芝蓮夏日中菜、同送禮自助餐,實可以氹到佢開開心心,快啲睇吓邊間啱心水啦! 免費飲酒 黃竹坑有露天花園嘅Kömune,喺6月16日由12:00-15:00推出父親節早午餐(HKD390/成人,HKD195/6至10歲小童)。有精選牛扒淋配淋上自家製荷蘭醬嘅水波蛋,加上香軟薯蓉同鮮炒菠菜好滋味㗎。又有龍蝦班尼迪蛋,或配太陽蛋同夾咗香辣蛋黃醬嘅嫩滑炸雞三文治。想要較清淡嘅主菜亦有淋上車厘茄醋醬汁嘅粟米翠玉瓜沙津配紅魚、蔬菜意大利麵等等。 每位爸爸仲可以免費暢飲啤酒、紅白Sangria同Kömune火辣嘅Bloody Mary。如果你想陪爸爸飲返杯,同行大人可以加配2小時任飲優惠: The Classic(HKD258)包括Cava有汽酒、紅白酒、Bloody Mary、Bellinis同Mimosas雞尾酒。 The Premium(HKD358)就升級至Veuve Cliquot香檳、樽裝啤酒同Kömune精選推介雞尾酒,包括Chinese Ink同Follow the Call of the Disco Ball。 呢求逢星期日12:15-15:00,喺露天花園仲設有現場樂隊演奏添!   Kömune 地址:黃竹坑黃竹坑道64號Ovolo奧華 ∙ 南岸4樓 電話:3460 8157 營業時間:星期一至日:06:30-23:00   任食烘烤牛肉 間中推出牛扒優惠嘅FRITES,今次全線分店一齊同你慶祝父親節!當日12:00-17:00推出「幸福烤肉任食日 Scrumptious Carvery」(HKD295/位),可以無限量享用香氣撲鼻嘅烘烤牛肉呀!   FRITES Belgium on...

0

【4大開運盆菜最後召集! 送埋Le Creuset琺瑯鑄鐵鍋】大家樂、叙福樓金閣、忠誠盆菜館、大官廳

盆菜有十幾款餸,要矜貴嘅有、要傳統口味又有,最重要係唔使辛苦媽媽或老婆大掃除之後仲要煮一大餐。小編精選咗四間唔同級別嘅四至六人份盆菜,由抵食、老字號酒家、傳統圍村味、到送Le Creuset高級廚具都有,睇吓想揀邊款團年同開年啦!   經濟又方便 大家樂 大家樂咁多間分店,隨時屋企樓下就有,論方便程度真係冇得輸!如果用信用卡網上訂購仲有優惠添,好似6位用嘅原粒瑤柱福袋盆菜(原價HKD688/6位用),用DBS信用卡只需要HKD548(約八折),其他信用卡就HKD578(約八四折)。呢個盆菜包含19味餸,有原粒日本宗谷瑤柱(6粒)、黃金褔袋(6個)、茄汁中蝦(6隻)、日本蠔豉、玫瑰豉油雞、燒鴨、花菇、南乳炆蓮藕、炸魚蛋、沙嗲豬皮、沙嗲魷魚、蠔菇、鴨掌、芋頭、蘿蔔同西蘭花等等。集矜貴、傳統食材同好意頭於一身㗎。 如果訂完盆菜仲想加料,可以睇吓呢幾味追加菜式啱唔啱你: 組合一(HKD236):外層金黃鬆脆,內裡爽口彈牙,用蝦膠整成嘅百花釀蟹鉗(2客共12隻)。 組合二(HKD316):福祿原隻蠔皇鮑魚(6隻)以蠔皇汁熬製,味道鮮甜;再配百花釀蟹鉗(6隻)。 組合三(HKD296):橫財就手(10件)係用南乳炆到滑腍又有膠質嘅豬手;再配順德巧手家鄉菜順德煎釀鯪魚(2磅),味道甘香又寓意年年有餘添。   大家樂 查詢電話: 2601 8484 網上訂購:cny.cafedecoralfastfood.com (亦可以到各分店訂購)   老字號酒家 叙福樓金閣 叙福樓集團話晒都係老字號酒家之一,出品一定有保證。今年集團旗下嘅叙福樓金閣、御苑皇宴同御苑都有呢個手工滿盆(滿足價:HKD838/6位用,原價:HKD1,238),有花膠、蠔豉、瑤柱、遼參、虎蝦、北菇、圓蹄、燒腩、燒鴨、切雞、髮菜、芋頭、蓮藕、雞髀菇同蘿蔔等十幾款材料。如果想再食得豪氣啲,可以改訂鮑魚手工滿盆 (滿足價:HKD1,038/6位用,原價:HKD1,538),咁就有埋原隻8頭鮑魚。如果有食多幾隻,仲可以用HKD38/隻逐隻追加添,不過記得提前一日預訂盆菜呀。   叙福樓金閣 地址: 天水圍天華路33號T Town North1樓N106-109號舖 電話: 2528 1798 營業時間:星期一至日:06:30-23:00 御苑皇宴 地址:尖沙咀麼地道68號帝國中心1樓 電話: 3962 1188...

0

【Mott 32摩登中菜姊妹店 口水和牛夾西瓜咁都得?】莊館

中環出名食片皮鴨嘅Mott 32,最近喺銅鑼灣開咗間親民版姊妹店莊館,菜式設計亦傾向精緻啲,兩、三個人嚟食都可以試多幾款。餐廳另一個特別之處係酒吧,唔單止收藏逾400枝琴酒,中間嘅4枝大型琴酒柱,每枝裝滿自家釀製嘅琴酒添,真係chill住食,chill住飲囉。不過入到去先揀個靚位,因為餐廳每個角落都大玩摩登feel,想打卡影靚相都可以有唔同感覺。 大廳有啲似酒店大堂,座位設計隨意啲,俾人悠閒嘅感覺。同酒吧相連,叫啲小食飲兩杯幾寫意。 大廳左邊感覺古典啲,卡位設計模仿舊式火車箱。 當然大枱都係唔少得嘅,間開位置,私人空間感重啲。睇完環境,係時候開餐喇! 滿缸紅(HKD220)雖然紅卜卜,其實唔係好辣,仲有啲清甜慢慢滲出嚟。羊肉用番紅花天然顏色染紅,再以蔬菜汁醃,令口感非常鬆軟易咬。最好係冇咩羶味,令怕羶嘅朋友都食到。墊底嘅麵包脆脆都不容忽視,乾身又唔油,就咁食都好味。 口水雞食得多,但隨咗雞仲可以配咩?慢煮口水和牛面頰(HKD135)就嚟個大突破,亦係小編至愛呀!和牛面頰慢煮過後好軟腍,肉之間又有啲類似牛?嘅爽口筋腱,口感層次豐富。而最特別嘅係夾西瓜一齊食味道好夾,咬落爆出嚟嘅清甜果汁減退口水汁嘅油膩感,令辣味更有層次。 叉燒俾人嘅印象就係用豬肉做,但莊館就選用和牛喎!澳洲和牛叉燒(HKD280)口感一啲都唔覺油膩,因為澳洲和牛油膩比日本和牛少啲。肉味唔算好重,質感仲比平時食嘅叉燒鬆化啲。仲特別將薑蓉打勻溝埋一齊,方便食嘅時候完全點到蔥同薑,味道平衡啲。 中式點心之中,腸粉係必食之選,而且莊館嘅點心全部每朝新鮮自家製,咁就更加要食啦。軟殼脆蟹腸粉(HKD115)以坊間嘅春風得意腸為靈感,但餡料轉用炸軟殼蟹。睇落好似唔係好嚿,點知一啖入口係會塞滿咀,但啖啖肉真係好正! 墨汁小籠包(HKD65)唔止將餡料都轉用全海鮮,混合彈牙嘅手打蝦膠、墨魚膠同少少菇菌。連湯都係墨魚湯添,鮮甜味道令人想一食再食。 頭先提過莊館有自家釀製嘅琴酒,分別係薰衣草、菊花、風乾蕃茄同煎茶。想清新啲不妨試TANGERINE & CHRYSANTHEMUM(HKD145),呢杯Gin & Tonics有菊花琴酒、橘子普洱茶、枸杞同Fever Tree Aromatic Tonic,味道好似菊花茶加輕量酒精咁,fresh嘅感覺就咁飲又得,當餐酒亦得啫。   莊館 地址:銅鑼灣新寧道1號利園三期B1樓B01-B10號舖 電話:2327 1398 營業時間:星期一至日:12:00-15:00,18:00-22:30

0

【鼎爺中環新竇食本味 親傳零味精手工懷舊菜】鼎·會館

中環嘅鼎·會館係鼎爺第2個BB,唔會成日坐鎮喺舖頭嘅鼎爺,已將唔少菜式傳授俾有30年烹調粵菜經驗嘅李翔師傅。李師傅主理過唔少名人飯堂、中菜館同私房菜,點解今次同鼎爺拍住上?「香港仲有幾多師傅識整懷舊菜呢?鼎爺係其中一個吸引到我想跟佢學,有啲菜我都未聽過,未見過。你話難整咩?唔係,但舊時嘅配方就係俾客人品嚐到食材嘅本味,所以我都本住重新學習嘅心態喺度做。當我應承嚟鼎·會館,鼎爺好直接兜口兜面問我:『我呢度絕對唔會用任何添加劑,你做唔做到先?你做唔到唔好嚟!』」 最具代表性嘅粵菜代表係順德菜,李師傅接觸過順德菜、東莞菜、客家菜同川菜等等,但除咗粵菜之外,佢原來好鍾意研究川菜喎。 餐廳格局好開揚,座位好闊落,中式裝潢氣派又時尚。Set menu快起上嚟一個月會轉一次,主餐牌就一季至半年會調整吓,大家預時間嚟喇。 阿爺巧手桑拿雞 (HKD328/半隻,HKD628/全隻)以粟米同蘿蔔煲過嘅雞湯,用傳熱快嘅銅煲蒸熟,李師傅話咁樣一雞兩食係蝕住做㗎,因為要用足料煮出濃郁鮮味,所以一開蓋先會香氣撲鼻。呢度半隻大約配到4碗雞湯,蒸雞時嘅雞汁同桑葉汁會滴返落雞湯提味添,味道濃到好似精華咁但一啲都唔口喝。桑葉可以美顏同降三高,趁熱夾住雞片一齊食,真係有李師傅講嘅滑嫩口感喎。 紫晶生炒骨(HKD298)嘅糖醋汁用咗鼎爺嘅懷舊配方,以酸梅同鮮檸檬汁等材料,完全冇落醋,再以紅火龍果著色,味道好天然舒服。雖然酸酸味味,不過冇「乸」喉感覺。李師傅嘅小炒功力非常到位,生炒骨上咗薄薄粉漿,但炸完撈埋汁都依然外脆內嫩,表面有少少焦糖嘅感覺,煮得啱啱好。配料有好多,夾埋鮮嫩嘅甜椒、菠蘿同紅火龍果食,味道會更清新,完全唔覺得熱氣。 都有啲新式粵菜,好似蔥香梅菜皇炆和牛肋骨(HKD298/位)就係其中一款,大約有十年歷史啦。點解用澳洲或美國和牛而棄用日本呢?「因為日本和牛煎會香滑,但炆就會太多油分,滯啲;而澳洲或美國和牛牛味重啲。」就咁睇好似比較西式,但調味一啲都唔西!和牛先以藥材、柱侯醬、冰糖等醬料同多種蔬菜一齊炆,令味道層次更豐富。唔知係咪因為咁煮,和牛特別腍,近乎唔用刀都得。和牛下面墊咗梅菜頭同炸京蔥再煮成嘅醬汁,鹹度啱啱好,就咁食都好滋味。 鱆魚鲍魚雞粒有味飯(HKD138/位;圖中為3人分量)係頂爺嘅拿手菜,李師傅一樣學識。用鱆魚粒、鮑魚粒同瑤柱一齊煲飯真係好香,而且依然濕潤有咬口,煲底會有啲飯焦添。配上香軟彈牙嘅鮑魚同脆口銀魚乾,口感層次更豐富。 芝麻卷(HKD58/三件)都唔可以睇小,兩、三個鐘先大約做到廿幾、三十條咋!滑到小編夾咗幾次先成功,質感好煙韌彈牙;而且味道比平時食嘅芝麻卷濃味好多,原來淨係將芝麻打漿隔渣都重複4次咁多,食味道之餘都食緊心機囉。   鼎·會館 地址:中環皇后大道中80號H Queen’s 23樓 電話:2327 1398 營業時間:星期一至日:12:00-15:00,18:00-22:30

0

【中西合璧紀念家鄉味道 傳統VS新派川辣出色】1935 壹玖叁伍

壹玖叁伍喺中環蘭桂坊附近嘅商廈開業大約半年,喺商廈19樓都有唔少捧場客。餐廳搵咗擅長煮外省菜嘅大廚坐鎮,點解老闆咁鍾情中菜?其中一個原因係老闆細個喺家鄉四川俾婆婆湊大,時不時都懷念家鄉味道。為咗紀念婆婆 ,仲用佢嘅出生年份(1935)為餐廳名命添!餐廳除咗有川辣菜式,仲有傳統同新派中菜。餐牌同餐具都參考西餐模式,例如湯類可以每位叫自己想飲嘅款式而唔需要叫一煲,令大家更舒服享受中菜。 中西合壁裝潢好優雅,同屋企人或閏蜜嚟都一定盡興。 想有私人空間仲可以包房,就算招呼公司客戶都一樣得體。 黃金淮山葵(HKD105)係天使與魔鬼嘅結合!淮山同秋葵都係健康嘅食材,口感本身亦冇咩特別,但沾上炸漿炸過後,再同炒到起沙嘅厚厚鹹蛋黃撈埋一齊,脆皮加上鹹香味真係冇得頂囉,話咁快就掃清一碟。 話明參考西餐上菜嘅排序,所以食主菜前可以先品嚐金絲和田玉(HKD135)清一清喉嚨。圓碌碌嘅冬瓜球以一串晶瑩剔透嘅白玉葡萄呈現,用瑤柱同鮮雞上湯熬到腍晒,入口爆汁,味道好清新。 鍾意辣嘅朋友有兩款菜係必試推介,水煮牛肉餅(HKD280)嘅香麻味令小編辣到有啲滴汗都仲追住食。佢嘅辣停留喺口腔,唔會落到喉嚨,加上爽彈嘅牛肉餅同吸晒湯汁嘅薯粉,真係好難唔愛上佢囉。 第二係川椒香辣軟殼蟹(HKD225),比水煮牛肉餅再辣啲,但乾炒嘅感覺又唔同;最特別係軟穀蟹嘅炸漿唔係日式嗰種,啱啱煮起就食幾脆口,隔一陣食入面會變到啲似麵包嘅質感,亦冇油淋淋喎。 餐後梗係要食甜品,呢度仲中西混合添。花雕話梅雪糕(HKD55/位)係自家製雪糕,小編一食即刻打咗個震醒晒!原本以為雪糕係清香口味,點知一入口係好濃嘅花雕味,跟住話梅味湧埋出嚟。雖然嚇咗嚇,但慢慢食又幾正喎,質感仲幾滑添。 呢度嘅cocktail唔單止飲得,靚到可以打卡!左邊Dragon Gossip(HKD60)主要用抹茶同開心果醬調製,味道幾清,不過同右邊1935beer(HKD60)相比就會甜少少。1935beer用薑啤加煉奶調製,但有薑啤中和所以唔覺得甜,男士都啱飲! 1935 壹玖叁伍  地址:中環威靈頓街2-8號M88威靈頓廣場19樓 電話:2156 1935 / 9858 1565 營業時間:星期一至日:12:00-15:00,18:00-23:00

0

【米芝蓮大廚炮製私房菜 川味深海龍躉滾到起泡】漁牧

原先喺尖沙咀以食川菜同雞煲出名嘅漁牧,最近搬竇移師九龍灣MegaBox插旗,新店裝修大玩中式feel,牆上壁畫仲係人手畫上去,真係氣派不凡!招牌烤鴨可能好多人都知,不過為免有漏網之魚,依家餐廳將大大個風乾機放喺門口當生招牌添喎。新店新介紹,今次唔講燒魚同雞煲喇,其他單點菜式一樣咁正。依家由米芝蓮大廚鋼師傅掌舵,嚟緊會推出私房菜,小編率先試咗啲,真係擺返圍宴客都好得體呀! 試業一個月,午市時間好爆場,想食就要訂枱啦,唔好博呀。 新店多咗幾間VIP房,呢間仲可以唱卡拉OK添,同親友食飯就更加盡興啦。 鋼師傅之前喺六福菜館由開業做到2009年,攞咗米芝蓮之後就轉戰內地,依家再回歸連帶烹調嘅菜式都帶啲內地風味。小編問鋼師傅有冇喺漁牧引入六福菜館嘅菜式,佢就話只有海鮮類囉。講咗咁多,即刻帶大家睇吓有咩正嘢食啦! 介紹新菜之前,先嚟個涼菜九宮格(HKD188)開開胃,有辣有唔辣,有肉亦有素,啱晒唔同口味嘅朋友。其中麻辣牛?、麻辣豬耳同牛肚係小編最鍾意嘅,香口惹味亦煮得夠腍;之後食件爽甜青瓜粒同木耳,清清喉嚨又可以準備食下一道菜喇。 新菜亦係私房菜之一就係呢味香麻味重,但唔太辣嘅漁牧沸騰深海龍躉(HKD588),用咗沙巴龍躉,另外都有5-6斤重嘅大鯰魚俾你揀。鋼師傅話舊時成日講「老魚嫩豬」,魚愈大條就愈好食,因為肉質結實啲。魚肉用滾水浸到大約7成熟就上碟,即刻淋上子彈椒、炮彈椒、花椒等辣椒同滾菜油。上菜嘅時候仲見到啲油滾到起泡泡,令食客可以品嚐到熱辣辣又啱啱夠熟嘅魚肉,嫩滑彈牙。碟底仲有芽菜同紅薯粉,最好係菜油嘅口感唔肥膩,反而更加滑。 另一味私房菜就係特色香辣龍蝦干鍋,不過仲未定價,想食嘅話建議打去問咗先。餐廳選用本地龍蝦,肉質彈牙多肉汁,即使炸過再炒都好鮮甜。一隻龍蝦有斤幾接近兩斤重,呢碟例牌size有4隻龍蝦,夠10位用㗎!呢味菜用嘅辣椒同漁牧沸騰深海龍躉一樣,不過再加咗辣椒醬、豆瓣醬等醬料一齊炒,所以食嘅時候有啲豆豉嘅香甜,之後先有陣香麻嘅辣味滲出嚟;仲有萵苣、蓮藕、薯仔、青瓜同雲耳做配料,真係好豐富呀! 然後點少得漁牧嘅招牌菜呢,老北京烤鴨片皮鴨(HKD170/半隻)大約5斤一隻,每隻鴨都掛咗個號碼牌,可以追蹤返係來自邊個農場㗎!鴨上咗鴨皮水之後風乾一晚,唔使落醃料。先用電爐烤乾鴨身,再轉用荔枝木呢款果木繼續烤,令鴨肉更加香。呢度嘅片皮鴨唔使加錢都俾埋肉你食,其實幾抵吓。 餅皮幾薄,餐廳好細心咁每塊都用紙隔住易夾啲。包好之後仲可以咬到鴨皮脆口嘅質感,食到「嗦嗦聲」添,最驚喜係鴨皮睇落去肥,食落唔覺油喎。不過肉味會淡咗,因為餅皮嘅香味會蓋咗少少,想試濃啲嘅肉味就建議就咁食。 漁牧混豬(HKD298/半隻)都係好多人點嘅,特別之處係自家調製嘅醃料同三色醬料。100日嘅乳豬用西芹、紅蘿蔔、辣椒等新鮮材料醃製,比平時婚宴食嗰種清甜啲。乳豬燒到後段仲釀埋煮過嘅糯米飯一齊燒,將豬油逼入糯米飯,令味道更加香。食嘅時候除咗有平時嘅乳豬醬之外,仲有加咗沙律醬調製嘅抹茶醬同秘製芥末醬,兩種帶甜但清啲嘅醬料可以減退乳豬嘅肥膩感。不過小編最鍾意係乳豬皮呀!光皮嘅燒法鬆脆啲,唔會好硬,堅食唔停口囉。 曹池汁大蝦配手抓餅(HKD108)嘅醬汁有啲似咖喱炒蟹嘅味道,但質感唔杰身,手抓餅都易沾起醬汁。不過手抓餅記得趁熱食,因為佢用酥油整,凍咗就會有啲酥味喇。大蝦肉質好結實彈牙,啖啖肉勁滋味。 雙色水晶球(HKD48)睇落普通,但用足料㗎!尤其係紅豆苛水晶球,除咗有一粒粒嘅紅豆增加口感,仲好難得咁食到陳皮味呀! 雙色馬拉盞(HKD58)有黑糖同抹茶味,口感鬆軟到似海綿蛋糕,但質感厚啲。味道唔會好甜,做飯後甜味都唔覺膩。如果你係嗜甜嘅朋友,佢配嘅肚臍餅、百力枝同煉奶就啱晒你喇。   漁牧 地址:九龍灣宏照道38號企業廣場5期Megabox13樓5號舖 電話:2529 8383 營業時間:星期一至日:11:30-15:00;17:30-23:00