Tagged: 串燒

0

【九龍城重量級泰式燒烤 觀塘開店設戶外雅座】榕易燒泰式串燒專門店

喺九龍城好出名嘅榕易燒泰式串燒專門店喺觀塘開店喇,依家有埋戶外座位,氣氛夠晒chill呀!除咗招牌串燒之外,仲多咗古法燒鰂魚、炸蠔蛋餅呢啲香口又鮮味嘅菜式。無論係兩小口定三五知己嚟食嘢,都有滿足到你分量嘅菜式,如果係附近返工,佢都有抵食lunch menu喎!

0

【Super Girl Yanny新開打小人餐廳 滑嘟嘟海南雞配香口油飯】圍威喂

唔去鵝頸橋都有得打小人?冇錯呀,因為Super Girl Yanny同朋友一齊喺荔枝角新開嘅東南亞菜餐廳圍威喂,逢星期六14:00-16:00都請嚟喺鵝頸橋專業打小人嘅姐姐駐場,只要點嘢食就可以享用呢個服務發洩吓!如果夾唔到星期六嚟,都可以寫低字句掛上牆。大家發洩完一定有心情食餐勁啦,即刻睇吓呢度嘅惹味人氣菜式先。 呢套就係打小人姐姐嘅專用工具喇。 店內嘅牆畫都同餐廳名一樣,提忙碌嘅香港人要輕鬆啲。 都真係有人將返工嘅怨氣寫低喺度喎。 如果晚市嚟食招牌嘅海南雞(HKD138/2-3人份),半隻雞分量啱啱好可以人人試啲。雞肉滑嘟嘟仲幾多肉添,皮同肉之間亦有層「啫喱」,口感一流。如果想配香口又粒粒分明嘅油飯(HKD18/碗),一碗都幾多,如果兩個女仔可以share食㗎。 檳城炒粿條(HKD98)係惹味啲嘅炒河粉,有爽口嘅蝦肉、油香十足嘅臘腸、嗦晒味嘅芽菜,鹹香得嚟唔會太重口味。 呢度既然主打東南亞菜,梗係要試咖喱啦!呢道黃咖喱軟殼蟹(HKD148)嘅咖喱唔太辣,椰香味會慢慢滲出嚟,絕對要撈飯囉。兩隻軟殼蟹肉質飽滿,沾滿咖喱汁都幾惹味。 鍾意食串燒的話可以點串燒拼盤(HKD188),有齊厚切牛舌、大蝦、沙嗲豬肉同沙嗲雞肉各2串,肉量十足,其實兩個人食都幾飽。 鍾意小食嘅又可以點圍威喂拼盤(HKD128),脆卜卜春卷、彈彈牙魚餅、扎扎跳蝦餅同泰式香葉包雞四款小食之中,後面兩款啖啖肉得嚟,泰式香料味道相對比較重,而雞肉仲幾滑添。 想refresh吓味蕾可以點杯新鮮果昔木瓜奶奶(HKD34/右),果味好重,奶味就偏輕淡;或者好多人鍾意嘅金桔話梅蘇打(HKD22)都一樣出色,杯底有唔少金桔肉,令成杯味道好濃郁,但唔會有甜膩感喎。   圍威喂 地址:荔枝角青山道495號誠信中心地下1號舖 電話:2350 6268 營業時間:星期一至六:07:30-22:00(星期日休息)

0

【銅鑼灣新開日式居酒屋 牛迷必食26款罕見牛串燒】牛惣居酎屋

日式居酒屋係日本其中一個相當重要嘅飲食文化,放工後會同同事或朋友去飲杯酒,食串燒傾吓偈,齋諗都覺得relax呀!想喺香港都體驗到呢種日本居酒屋文化,可以去近期喺銅鑼灣新開業嘅牛惣居酎屋,佢哋主打即叫即烤嘅日式牛串燒同特色燒酎。呢度精挑細選26款世界各地唔同嘅牛部位做串燒,好似牛心管、牛舌根、牛面呢啲刁鑚部位都有,一定滿足到愈食愈精嘅客人添。另外,呢度有近80款燒酎酒藏,連金菇、青椒、花生呢啲你估唔到嘅特別口味都有,小編真係眼界大開呀!講到咁係咪食指大動呢?即刻入去睇睇啦! 就咁睇門面已經好有日本風格,入到去感覺就同平時嘅居酒屋都差唔多,有一列吧枱睇住師傅處理食物,又可以同佢哋傾吓偈添,感覺特別warm。 呢度主打特色牛串燒有成26款俾你揀,啱晒對牛有要求嘅朋友!其中牛骨髓(HKD34)配辣蘿蔔蓉同蔥花,口感軟腍;牛心管(HKD32)即係大動脈,每隻牛只有一條,相當矜貴㗎;而牛面肉(HKD38)就要由師傅起筋後燒到半生熟,每日限定十幾串咋。 仲有少見嘅牛橫隔膜,鮮嫰又有咬口。由左邊起嘅蜜糖芥辣橫隔肌、 Wasabi橫隔肌、黑燒橫隔肌、蒜香橫隔肌(各HKD36/串)都配咗自家製醬汁,爽甜到重口味都有㗎。 呢個精選牛3點(HKD188)就可以一次過試晒三款牛料理喇!右邊嘅安格斯牛小排他他配蒜片,以略燒咗表面嘅半生熟牛小排配蒜片同辣椒醬一齊食;中間嘅火炙韓色生牛肉就先以香辣惹味嘅韓式醬料調味,再炙燒生牛肉嘅表面,令佢更香口;而左邊嘅牛肝醬配酒盜芝士就喺餅乾上放咗芝士粒、日產鱲魚魚腸同埋牛肝醬,味道非常香濃。 牛尾西京燒(HKD148/原條)選用澳洲牛尾,以日式醬油、料理酒、麵豉醬等醬料調配出嚟嘅西京燒醬醃製,味道濃郁,鹹中帶甜。牛尾肉質嫩滑、有膠質,入口即融。 去居酒屋又點可以唔飲日本燒酎呢?!唔講唔知,呢度有近80款唔同嘅燒酎㗎!唔知點揀嘅話可以試吓佢哋嘅本格燒酎試飲set(HKD98),可以試到四款由米、麥、蕃薯同特別食材釀製嘅燒酎,實揀到款啱你口味嘅。 呢度仲有聯乘人氣格鬥漫畫《北斗之拳》Crossover嘅期間限定清酒,蕃薯燒酎系列(HKD88/杯;HKD880/900ml)酒樽上面印咗主角嘅圖案同佢哋經典台詞,漫畫粉絲絕對唔可以錯過呀!   牛惣居酎屋 地址:銅鑼灣登龍街28號永光中心22樓 電話:2682 3302 營業時間:星期一至日:18:00-01:00

0

【串燒唔抵食賣相差 茶漬飯圖文不附零茶味】伏務台

鮨千寿喺將軍澳開新店,但網民就表示即使刺身新鮮都覺得貴;亦有說茶漬飯圖文不符、串燒質素都麻麻哋……小編今次就去試吓刺身以外嘅食物掂唔掂,順便feel吓網民勁投訴話服務差係咪真呢! 個場幾大,午飯時去到都唔算多人,明明都多吉位,但侍應係要帶小編去到邊邊位,仲要張櫈背貼住個窗框,好有壓迫感。服務細心度可以提升之外,全程嘅服務都冇咩問題,唔知係咪換咗人呢? 第一款要試嘅就係三文魚泡飯,網民話實物係綠茶,並唔係圖片嘅淡色喎。不過餐牌有啲亂,小編點呢個係三文魚泡飯套餐(HKD68),但同一時段亦有單點款都係一樣價錢,飯嘅分量又一樣喎,唔小心睇漏眼就冇咁抵。 先上冷盤前菜同沙律,木耳前菜質感滑潺潺,呢樣真係睇你鍾唔鍾意,味就鹹鹹哋,正常嘅;跟住食沙律,芝麻醬好鹹好重味,食唔到新鮮蔬菜嘅清甜囉。 再嚟蒸蛋,um……當以為面頭透明嘅係蒸蛋啲水,一潷落去竟然係啫喱狀嘅嘢……食落係好滑,不過係咪靠呢層「啫喱」令到佢咁滑就分唔到喇,因為成碗都係咁。配料都算係咁,面有蟹柳絲,底有粒白果、雞肉同一粒冬菇。 前菜仲有醃青瓜,成個餐係咁。 重點茶漬飯嚟喇,真係好似網民講嘅咁,實物茶湯係綠色而唔係餐牌嘅淡茶色。咁味道點先?答案係冇咩茶味,反而帶甜。以為前菜太濃味令小編試唔真茶湯嘅味道,於是飲啖茶水沖沖個口再試,點知茶味仲濃過茶漬飯嘅茶湯。要食多幾啖,陣甜味又走返出嚟,不過依然欠缺茶味。見佢有醃青瓜,試吓同飯夾埋一齊食,一咬就酸到小編「乸」埋口面……就咁食的話仲酸…… 跟住到串燒,上面係燒牛脷鹽串燒(HKD58)唔係平,如果質素夠好就算,可惜燒得過咗火乾乾哋,雖然入面仲有汁,但要咬幾耐吓先吞到;下面嘅燒白鱔(HKD68)就咁睇以為燒到好脆口,但其實個皮係燶晒,食落口啲肉質感有啲油,可能係鱔嘅油,但有少少油「益」味。一路咬,三嚿白鱔嘅皮同肉之間有啲軟骨,唔脆亦唔軟,要用啲力咬爛先吞到囉。   小編伏氣:其實茶漬飯餐唔係貴,但睇漏眼變單點就唔抵喇。主角嘅茶湯味道冇應有嘅茶味,仲俾配菜嘅味蓋過晒,咁就味道失衡喇。串燒價錢唔算平,一串白鱔等於一個茶漬飯,但燒得唔脆,牛脷又過咗火,成餐飯計埋加一要成$213,串燒令餐飯貴晒囉。 入伏點:鮨千寿 入伏價:HKD213(已計加一) 中伏by #為食加菲貓 美術by #車雲 攝影by #為食加菲貓 《伏務台》星期一伏務大眾,歡迎各界報料。

0

【海鮮大咖合體酒吧推新菜 刁鑽麻辣串燒爽口彈牙】辣吧

鍾意返大陸食四川菜嘅朋友都可能食過海鮮大咖,呢種用一個大平底盤放滿唔同種類海鮮,再倒入麻辣湯嘅打邊爐食法近年好流行。上年第一間引入呢種食法嚟香港嘅麻辣派,早前由旺角搬咗去尖沙咀諾士佛臺,由20個位增加到有90個,仲改名為辣吧添。新舖除咗有海鮮大咖,仲有多款刁鑽部位嘅麻辣串燒、麻辣烤海鮮同四川冒菜等菜式;另外仲有中式cocktail同啤酒,將麻辣同酒吧合體。不過大家放心,都有極少數食物係唔辣嘅! 新店座位好闊落,亦有吧枱可以俾你飲酒吹水。嚟到新店,小編梗係試新菜先啦! 小編好想試嘅網紅海星(HKD128)真係要問店員點食先啱。廚師烤熟後用海鹽墊底上碟,反轉剪開底部挖綠色嘅內臟出嚟,就咁食幾似食緊蟹膏,濕濕哋有少少汁;正宗啲點芥末豉油亦得,不過會蓋過佢本身嘅鮮甜味,所以小編鍾意點海鹽,因為鹽可以提升鮮味呀!店長話有啲人都因為海星慕名而嚟,不過有人會覺得腥,但小編又唔覺喎,可能因為小編勁鍾意食蟹膏啦。 跟住到麻辣串燒喇,肉類同素菜加埋成四十款,老闆之一Sonic話四川嘅串燒食材比較爽口,有啲部位仲好刁鑽,所以餐廳用料多喺國內運嚟,香港其他地方未必有㗎。上菜嘅時候,會用火一路熱住鐵盤,不過建議大家趁熱食,擺得耐會乾。小編試嘅4款由左至右分別係: 鴨郡把(HKD26/串)係鴨腸同鴨賢之間嘅血管,口感比鴨腸爽口同厚啲,都易咬開。 豬鼻樑筋(HKD26/串)真係估唔到有得食,係呢幾款之中最彈牙,亦係小編最鍾意嘅,因為冇咁肥。 豬天梯(HKD26/串)係豬喉嚨,雖然都爽口,但質感會相對硬少少。 手打牛肉餅(HKD26/串)就係將手打牛丸壓扁整成餅,同煮湯麵嘅手打牛丸比會乾啲,但一樣彈牙。 食完呢幾款串燒,個咀都有啲麻,辣度似譚仔3小辣同2小辣之間,都容易接受。 魚喺燒烤菜式之中,最常見係多春魚,呢度反而烤耗兒魚(HKD32/條),Sonic話鍾意佢嘅肉質夠結實同鮮甜。小編平時好怕食魚要挑骨,但佢好易起肉,細骨亦唔多。 折耳根烤大茄(HKD48/條)面頭唔係蒜蓉,而係落咗折耳根,即係平時煲綠豆沙用嘅魚腥草(臭草),順便清熱一吓又幾好喎。味道就係平時燒茄子咁,微辣但非常多汁,好似右圖咁一壓落去就睇得出幾咁juicy呀! 熱鍋串串(HKD128/揀10款,每款3串)啱晒想輕食又想有食火鍋feel嘅朋友,餐廳煮好就一大碗咁上菜,拎起真係熱到冒煙㗎!葷素加埋有42款選擇咁多,小編揀咗素菜多啲同唔辣嘅蒜蓉汁。其中右邊嘅海帶薄薄哋幾軟滑,左邊嘅麻吉燒喺魚蛋裡面加年糕,煙韌唔覺膩喎! Sonic話好多鍾意食辣嘅人會追辣,因為愈食愈過癮,所以佢哋都有爆菊花系列滿足同好。不過小編仲想有命落樓,只係挑戰5隻辣椒。 湖南小米椒干爆雞軟骨(HKD88)雖然係當日食嘅嘢之中最辣,大約接近譚仔小辣。食嘅時候記住吞晒先好講嘢,否則啲辣粉好易嗆喉㗎。雞軟骨嘅炸漿唔算厚,都幾脆,係好正嘅下酒菜呀! 嚟到當然要試埋辣吧嘅招牌海鮮大咖(HKD288/一人份)啦!呢個大盤裝咗8人分量,但唔需要按人頭落order,如果4-5人可以叫2人分量,可以留肚試埋其他小菜吖嘛。餐廳每日提供6-8款海鮮,會按時節調整款式;仲有配菜俾你揀添,豆卜、芽菜、薯條、冬瓜、生菜、白蘿蔔、土豆粉可以揀四樣,食落都咪話唔飽。湯底有唔辣嘅蒜蓉汁同分大、中、小辣嘅麻辣汁,小編揀咗小辣,惹味又品嚐到海鮮嘅鮮味,依家近距離睇吓質素點先! 膏蟹係深得小編歡心嘅,微微炸過令膏同肉冇咁易散,啖啖甘香嘅蟹膏食到流晒口流㗎! 貴妃蚌同鮑魚仔平排,明顯睇到貴妃蚌堅好肉地,一咬就嗦嗦聲。 蟶子王同魷魚筒都同樣出色,尤其係魷魚筒,好少有咁大隻,一路煮都唔會韌。 酒類可以試吓cocktail,呢兩杯係兩位老闆嘅最愛,所以用返老闆個名命名。左邊SONIC(HKD118)用檸檬草浸嘅龍舌蘭酒、蘋果汁、蘋果花茶、百香果糖水等用料調製,果香中帶甜,不過唔會甜死人。右邊YU(HKD118)用咗廣東米酒、桂花陳酒、Rum酒、菊花茶同菊花糖水調製,真係好似飲菊花茶咁清新下火喎。兩款cocktail嘅酒精濃度唔算高,唔嗆喉,喺食濃味嘢同時可以refresh吓都幾好㗎。   辣吧 地址:尖沙咀諾士佛臺1號1樓 電話:6433 3362(WhatsApp) / 2363 0313 / 2363 7288 營業時間:星期一至日:17:00-03:00

0

【銅鑼灣居酒屋新場 彩虹串燒絕配七色醬】一鳴燒

冬天食串燒都係一個暖胃選擇,銅鑼灣新開嘅日式餐廳一鳴燒,就以燒物做主打,燒熱吓大家個胃口。 餐廳簡潔嘅裝潢滲透住陣陣日本風味,都幾有日本個室feel喎! 餐廳主打彩虹雞棒(HKD108)不論賣相同食法都好講究。將自家製嘅雞棒燒熟配上七款醬汁:黃芥末醬、自家調製嘅山葵醬、明太子醬、豬肉汁混加沙律醬同木魚、烤肉醬加蔥花、烤芝士同埋蕃茄汁。 由淡味食到濃味,俾味覺唔同嘅剌激。 香草燒羊架(HKD72/2件)係愛羊人士必食之選,香草味調得啱啱好,煎到有少少焦都幾香口。 鍾意海鮮嘅朋友都唔使擔心,呢度有海鮮menu㗎,蒜蓉燒象拔仔(HKD58)清、香、鮮味全部齊晒,一啖咬晒入口夠晒滿足。 食得肉多都要食啲蔬菜嘅,蒜蓉燒原條茄子[辣](HKD62)唔算太辣,蒜蓉又勁多,啖啖都好惹味。 想再清新啲可以揀芒汁青蘋果沙津(HKD68),酸酸甜甜嘅芒果汁配原個青蘋果、青瓜絲同沙律菜,喉嚨即刻refresh晒。   一鳴燒 地址:銅鑼灣軒尼詩道525號澳門逸園中心10樓 電話:2388 9807 營業時間:星期一至日:12:00-15:00,18:00-00:00

0

【潮食過十款惹味醬汁 深水埗巷仔新開串燒店】弄.燒

「弄」喺國內係指後巷嘅意思,位於深水埗橫街同後巷嘅呢間日式串燒店弄.燒就好符合喇!店中以七種基本醬汁,再混合出十幾款唔同口味嘅醬汁,用日本嘅燒肉方法,一邊燒一邊調味,希望食物嘅調味達到最理想嘅效果。 舖仔細細五臟俱全,顏色簡約清新,仲有攬枕俾客人坐得舒服又可以享受到食物,小編都擔心食完會一身燒肉味,不過店主就話佢哋全店係參考日韓燒肉店嘅抽風,咁就唔使驚會成身油煙味啦! 喺多款醬汁嘅串燒當中,最令小編心動嘅就係鮮燒白鱔《照燒汁》(HKD68),白鱔皮脆肉嫩,味道香甜,仲要經廚師好細心咁挑走細骨,食落啖啖肉;仲有一直都唔敢食嘅肥腸,燒香調味之後風味十足,口感仲好彈牙添。 大大隻嘅原隻鮮燒魷魚《薑蔥醬油》(HKD58)好抵食,店主就話呢款男女老幼都鍾意,唔少男客人都會將醬汁淋晒,貪佢濃味又夠香;而女客人就鍾意邊食邊點汁無咁鹹。 淨係食肉嫌太單調?咁就要試吓茶漬飯《鰹魚綠茶帶子》(HKD60),鮮甜帶子配上充滿茶香嘅飯,帶有少少鹹味又唔會搶走茶香,小編好滿意!淋茶之後記得要快手食,唔係就會變泡飯㗎喇! 食太多肉不如又嗌啲生果清一清,有別於常見嘅燒菠蘿,呢度加咗調味變成鮮鳳梨《辣椒、糖燒》(HKD18),入口帶有微辣,食落酸酸甜甜,令人食唔停口。 喺串燒店食甜品,一般通常都係得雪糕之類,不過喺弄.燒就可以揾到大大粒嘅燒棉花糖《紅莓粉》(HKD28),鍾意食甜嘅小編當然唔會錯過! 弄.燒 Backstreet Yaki 地址:深水埗福華街178A地下 電話:3996 9377 營業時間:星期一至日 1200 – 1500 ; 1800 – 2200

0

【美食車踩入迪士尼 首推炭烤牛肋條】The Butchers Club burger

等咗咁耐,米芝蓮星級推介嘅The Butchers Club burger 都參與咗最新嘅美食車計劃,行勻港九新界,就係為咗俾多啲人食到佢哋嘅精選美食。 「The Butchers Truck」首次推出嘅炭烤澳洲黑安格斯牛肋條(HK$35) ,用咗牛肋骨中間嘅肌肉,肉質特別鮮嫩鬆軟,佢仲參考港式魚蛋串嘅經典賣相,平時坐喺度鋸扒有啲悶,不如企係度串住食。 有新都唔會送舊,又點少得米芝蓮星級推介嘅經典牛肉漢堡(HKD80),雖然係漢堡,但絕對唔乾身,肉汁同芝士煙肉食落溶為一體,Perfect match! 太大份驚食唔晒,或者一次過想試勻咁多款嘅可以揀有4款口味嘅迷你漢堡(HKD40起),包括牛肉芝士、香脆嫩雞、素肉醬及手撕豬肉,梗有一款啱你心意。 The Butchers Club burger「The Butchers Truck」 日期:30/10/2017 – 12/11/2017 地點:金紫荊廣場 營業時間:12:00-21:00 除咗金紫荊廣場,「The Butchers Truck」仲會踩入海洋公園同迪士尼樂園,有興趣嘅朋友,就要密切留意美食車嘅路線啦!

0

【串炸都玩Fusion 日本師傅串出新口味】Jan Jan 串揚專門店

串燒?炸物?唔知點揀?一次過喺Jan Jan 串揚專門店食晒啦!總店係來自大阪有名嘅Jan Jan Kushikatsu,係當地人氣串揚連鎖專門店。香港唔係好多地方有得食地道日本風味嘅串揚,佢哋連整麵包糠嘅麵包都喺日本運嚟,唔怪得有唔少日本人嚟捧場啦。  呢度有吧檯同日式廂房揀,如果星期五、六嚟要早2-3星期book枱。佢哋月尾仲有新menu推出,約定朋友就差唔多有得食喇。 總店派咗有12年經驗嘅日籍大廚嚟香港坐鎮,佢知道要影相就好細心咁設計盤景介紹埋用咗咩材料添。 Minced Duck Breast(HKD31/串)將鴨胸肉人手切碎,炸過之後肉香噴噴,裡面溝咗少少洋蔥碎仲增加口感同甜味。雖然啲肉切到極幼細,但咬開之後都唔會散開㗎。面頭灑上少少紅蔥同芥末,但唔會覺得辣。 唔想淨食肉咁罪惡感?King Trumpet Mushroom(HKD32/串)裡面係用豬肉包住雞脾菇,好煙韌彈牙。上面係自家調製嘅蠔醬配有山上魚子之稱嘅地膚子,口感都真係幾似魚子㗎。可能因為蠔醬嘅關係,都幾鮮味。 海膽湯葉卷(HKD39/串)湯葉係日本腐皮,味道雖然比中國腐皮清新啲,但豆香味依然好濃郁。卷埋紫菜一齊炸,兩者嘅味道相輔相成,北海道海膽都非常鮮甜㗎。 黑松露芝士(HKD36/串)用黑松露、薯仔、芝士溝勻,口感煙韌得嚟有啲creamy,但又唔會係流心嗰種feel。黑松露香氣突出,就算面頭再配巴馬火腿再加少少黑松露都唔會好鹹同膩。 呢度食嘢唔怕熱氣,老闆會無限量提供椰菜俾食客清熱㗎。   Jan Jan 串揚專門店 地址:灣仔皇后大道東100號2樓 電話:2157 1408 營業時間:星期一至四: 12:00-15:00;18:00-23:00,星期五:12:00-15:00;18:00-00:00,星期六:13:00-15:30;18:00-00:00,星期日:13:00-15:30;18:00-23:00

0

【㷫烚烚居酒屋 炭燒連子鯛隊啤最啱】炎丸居酒屋

話明食串燒,個燒字梗係關鍵啦!喺銅鑼灣嘅炎丸居酒屋就有日式傳統原始燒,成個備長炭爐喺你面前,仲可以睇埋廚師表演添。 試過重頭戲原始燒先至叫食過炎丸居酒屋嘛,呢種係日本傳統直立式備長炭燒方法,令食物外脆內軟又唔會直接俾火燒。你可以睇住食物慢慢烤煮嘅過程,嗰陣香味會令你食指大動囉。 六款魚之中連子鯛(HKD438)係中間價位,燒完之後連魚鰭都好香脆,記得食埋唔好嘥呀。魚肉好嫩滑,廚師真係將火候掌握得啱啱好! 燒得興起又點可以唔食串燒呢!鹽燒熊本和牛串(HKD98)肉味濃郁,燒到少少焦香好惹味,想再開胃啲就加青檸汁啦。 炎丸壽司卷(HKD238)一次過食到唔同嘅新鮮厚切魚生,有吞拿魚、三文魚、海膽等等,係炎丸大熱嘅招牌壽司卷嚟㗎! 炎丸有九款麒麟一番搾Frozen生啤(HKD68/杯),由原味到果味都有。左邊嘅白桃味同右邊嘅荔枝味就大路啲,想有新鮮感可以試吓乳酸味喎。   炎丸居酒屋 地址:銅鑼灣勿地臣街1號時代廣場10樓1001A號舖 電話:2721 9955 營業時間:星期一至日: 12:00-15:00;18:00-23:00