Tagged: 九龍灣

0

【名古屋班戟熱店九龍灣試業 兩味梳乎厘班戟香港獨賣】Hoi Hoi Pancake House

名古屋班戟人龍店Hoi Hoi Pancake House終於嚟到香港喇!喺九龍灣MegaBox嘅新店依家已經開始試業,除咗帶嚟招牌夏威夷果仁忌廉夏威夷班戟等多款日本熱賣口味,仲有兩款香港限定嘅梳乎厘班戟添。呢度同時供應各式鹹點熱食同Lunch Set,喺度食完正餐直落食甜品都得呀! 嚟到呢度梗係要試招牌嘅夏威夷果仁忌廉夏威夷班戟(HKD108)啦!香港店都係選用日本直送嘅原材料,麵粉仲係特別調製,整出嚟嘅班戟鬆軟而有咬口。 今次品牌都專登為香港新店設計咗兩款限定款式,抹茶忌廉梳乎厘班戟(HKD118)就係其中一款喇!以日本滋賀縣有150年歷史嘅名店丸安茶業高級特製嘅抹茶粉,食落甘香味濃而不甜膩。配合埋日本北海道十勝紅豆,係班戟嘅perfect match呀! 另一款香港限定口味就係港人至愛嘅法式焦糖梳乎厘班戟(HKD98)。吉士忌廉醬creamy柔滑,面頭仲有層焦糖脆脆,喺軟綿綿嘅梳乎厘班戟之中增加薄脆嘅口感。 呢度除咗甜品,仲有鹹食㗎!炸豚肉定食(HKD88)用咗鹿兒島豚肉眼,肉質軟滑,加上外層薄脆嘅吉列皮口感層次豐富。配上微酸嘅豬扒汁同日式他他汁,一次可以試到兩種風味。 擺盤咁靚嘅墨西哥Taco飯(HKD78)加入多款墨西哥香料,入口非常惹味。而且配有牛油果、蕃茄等蔬果,清新嘅感覺中和返香料嘅辣味。 秘製慢煮漢堡扒配手造麵包(HKD98)入面塊漢堡扒足足有3cm厚㗎!以歐美免治牛肩肉炮製,肥瘦適中,香口有肉汁添。配埋兩個每日自家製嘅墨魚汁包同櫻仁籽包,蘸汁食就嗦晒啲精華喇。 呢杯玫瑰牛奶咖啡(HKD39)來頭唔小㗎,以本地得獎咖啡師特別為Hoi Hoi Pancake House調配嘅咖啡豆沖製,入口有淡淡嘅黑朱古力同榛子味;加上玫瑰花瓣做點綴,賣相夠靚之外仲充滿花香味添。   Hoi Hoi Pancake House 地址:九龍灣宏照道38號MegaBox 1樓19-20號舖 電話:2461 7000 試業時間:星期一至五:08:00-19:00,星期六、日:12:00-22:00

0

【竹筒飯專賣店冬季限定新品 松葉蟹盛鮮味啖啖肉】竹虎京堂

九龍灣嘅竹筒飯專賣店竹虎京堂開業一陣已經吸引唔少人嚟食,尤其依家轉涼,食個暖笠笠嘅竹筒飯就啱晒喇。呢度主打各式海鮮,而大廚以前喺日式食府做過Omakase,所以呢度嘅配菜都好花心思設計,有啲仲幾特別添。冬天係松葉蟹當造嘅時間,佢哋都特別喺日本訂咗批松葉蟹,推出蟹盛新set,啲肉多到嚇親小編啦! 店內環境行日式風格,盡量令食客有完整嘅日餐體驗。 松葉蟹係限量供應,大約550g一隻,都幾多肉㗎。 蟹盛新set(HKD338)一份套餐有齊冷熱前菜、主菜同甜品,加埋有成8款食物,夠晒豐富呀! 竹筒飯上加入大量松葉蟹蟹肉同蟹籽,就咁食已經好鮮甜,撈埋味噌蟹膏就會濃味啲又帶陣鹹香。 味噌蟹膏(右)就咁食會鹹啲,另外仲有松葉蟹凍蟹腳、 天婦羅松葉蟹蟹腳、松葉蟹蟹鉗,每啖都係濃郁嘅鮮味呀! 仲有季節限定嘅雲丹竹筒飯(HKD128)都值得一試,以紫菜伴日本海膽嘅竹筒飯,撈埋生蛋黃之後口感更加香滑。 呢份套餐嘅前菜(左)係甜蝦、北寄貝同海帶裙邊。另外同樣有少見嘅冰頭漬(右),即係魚嘅眉骨位置,咬落爽口又有啲啫喱嘅感覺,幾特別。 呢度亦有其他人氣竹筒飯,柚子牡蠣竹筒飯(HKD208)以蠔為題,隻隻都咁飽滿,唔怪得多人食啦。 配菜就有焗蠔同分別落咗兩款醬汁嘅冷盤,一次試勻鹹、開胃、清新嘅味道。 汁煮牛舌定食(HKD79)就係抵食之選,牛舌大塊又爽口,分量都好足。 呢度亦有好多小食,其中彈牙嘅雞腿骨香腸(HKD13)、juicy嘅蟹肉流心燒賣(HKD28)同爆餡紫薯餅(HKD22)都值得一試。   竹虎京堂 地址:尖沙咀彌敦道132號美麗華廣場一期低層地下B142號舖 電話:3572 0846 營業時間:星期一至四:11:30-22:00,星期五:11:30-23:00,星期六:11:00-23:00,星期日及公眾假期:11:00-22:00

0

【冬蔭功火鍋味不對辦 湯底十級鹹海鮮雪味十足】伏務台

有時約唔到飯腳,但係又想過吓邊爐癮,自己食個一人份火鍋既方便又實惠。以為火鍋好難中伏?偏偏小編遇上了!九龍灣稜閣屋呢間日式餐廳,格局同價錢比連鎖快餐店高啲,有個冬蔭公海老Champonの盛鍋好似幾吸引,點知食落冇冬蔭功味,啲蝦仲好唔新鮮,唔怪得接近六點晚飯時間,成間餐廳得幾丁客啦……究竟湯底變成點?啲蝦又點?睇埋落去揭曉啦! 環境偏日式裝潢,都算整齊嘅,六點左右有小編同另一枱客,不過食到七點左右都未滿座,但同區其他餐廳就個別已經出現人龍喇。 呢個冬蔭公海老Champonの盛鍋(HKD108)有加一服務收費,比平時嘅連鎖快餐店都貴咗三十至四十蚊左右,但見到實物已經覺得唔太值,食完就更加唔會點頭囉。 成個餐嘅樣就係咁,海老就係一隻蝦、而餐牌上面寫嘅淡水龍蝦球,其實唔係球,係得一片仔嘅龍蝦肉,嚟近鏡睇吓: 隻蝦同呢一片仔龍蝦肉賣相好唔吸引,不過照煮滾佢試咗先。 煮完之後,隻蝦變到死灰色,唔係橙紅色已經唔敢食;塊龍蝦片咬落非常之爽,只係雪得過耐而煮熟嗰種爽口感,食到嗦嗦聲。小編明白呢個價錢唔係食啲靚嘢,但都應該比平時快餐連鎖店好先啱囉。 如果冬蔭功湯底真係有冬蔭功嘅酸辣味,都可以幫手遮多啲食物嘅雪味。但呢個酸辣味近乎零,反而同日式「精華」濃湯激似嘅味道。點解係「精華」呢?因為小編食到重度鹹味,愈食愈想飲水。滾到咁上下想加湯,即使加咗枱面一早已經準備好嘅清水都依然係鹹味濃囉。 其他食物好似青口、蔬菜、蟹柳都正正常常。不過件豆腐就好假,質感超滑幾Q彈,好似蒟蒻咁,只係冇咁爽口啫,當然亦都冇豆味啦。 而豚肉同烏冬當然都雪到冰晒啦,所以擺吓等佢解凍。呢兩樣食落幾正常,同埋係成個火鍋最好食嘅,真係有啲本末倒置嘅感覺,加埋個麻醬就更加唔覺得係冬蔭功火鍋添。   小編伏氣:呢個火鍋兩大主角冬蔭功同海老都唔掂,湯底味道貨不對辦已經唔多高興,俾咗錢又食唔到原本想食嘅味道。加上雪到啲肉死晒嘅蝦肉,真係買個即食湯包返屋企自己煮都冇咁嬲。仲要呢個一人份嘅價錢再俾多少少,已經可以去連鎖快餐店食到兩份,仲要食物質素好過佢囉。俾錢埋單嗰陣,見到出餐位置擺咗七、八份豚肉出嚟疑似等人落單(眼見現場已有客人食緊,又冇新單叫啦),咁樣處理食物更加唔會返轉頭啦。 入伏點:稜閣屋 入伏價:冬蔭公海老Champonの盛鍋(HKD118.5已加一) 中伏by #為食加菲貓 美術by #車雲 攝影by #為食加菲貓 《伏務台》星期一伏務大眾,歡迎各界報料。

0

【主題Café首創刺蝟導賞團 老闆:大家唔好棄養呀!】KURI CAFÉ

鍾意小動物嘅朋友相信對貓狗Café應該都唔陌生,最近九龍灣就開咗全港第一間刺蝟主題KURI CAFÉ,Café以自助點餐形式運作,入面好多刺蝟圖案嘅小擺設,另外亦有刺蝟精品俾大家選購。 用餐區隔離有個Home of Hedgehog(刺蝟之家),大家可以預約導賞團,會有專人同大家介紹關於刺蝟嘅小知識,可以有機會同小刺蝟近距離接觸,但要留意嘅係,刺蝟嘅性格比較細膽,大家探望佢哋嘅時候唔好太興奮呀! 首先同大家介紹吓Café嘅食物先,小編點咗一杯熱鮮奶咖啡(HKD28)。每杯咖啡上都有可愛嘅刺蝟圖案,真係唔捨得飲呀! 呢個芝士白汁海鮮焗飯(HKD58/包$25飲品)面頭鋪滿芝士,一潷起就成塊芝士扯起晒,好邪惡呀!海鮮有蜆肉、蟹柳同魚柳等等,口感幾豐富! 食完正餐就點返個甜品先。哪裡有彩虹告訴我(HKD40),總共有七小球唔同口味嘅雪糕,再加上彩虹糖針同七彩棉花球,色彩超繽紛,令人心情好愉快。雪糕上仲插有刺蝟嘅小卡片,少女心大爆發! 鮮果繽紛窩夫(HKD50)亦好吸晴,有兩大球雪糕同埋伴碟生果,主角窩夫質感比較鬆軟,食落有微微嘅空氣感,唔會食到成口粉咁。夾埋雪糕同朱古力漿一流呀!50蚊大大份,仲可以支持到佢哋收留被棄養刺蝟嘅刺蝟之家,小編覺得值喎! 刺蝟之家除咗作導賞團用之外,亦係一眾小刺蝟休息嘅地方,刺蝟區內有恆溫暖風機,保持24-29°C。為咗保護刺蝟,導賞團期間要乖乖哋安靜聽講解,眼看手勿動呀。老闆Kenneth話近年香港愈來愈多人養刺蝟,不過棄養個案亦非常多。佢自己之所以開始養刺蝟亦係因為見到有人棄養,出於同情心下收養。開Café除咗係一圓自己嘅創業夢之外,更希望可以分配更多時間照顧呢班「小朋友」。搞呢個導賞團係完全唔收費嘅,用意係想大家可以喺領養刺蝟前先了解呢班小生命,再考慮係咪有時間同心機去照顧佢哋。 Kenneth話多數決定養刺蝟嘅人都係因為覺得「好可愛」,但其實養刺蝟有好多學問,而刺蝟亦唔同貓貓狗狗咁會好主動同大家玩,佢哋比較細膽,同時又係夜行性動物,所以好鍾意匿埋喺暗嘅地方。食物方面除咗食刺蝟糧之外,亦需要食活蟲去補充蛋白質同所需營養;同時佢哋嘅大小二便非常頻繁,所以經常需要清理㗎!小編聽完之後真係覺得照顧佢哋需要非常有責任心同愛心呀,大家如果有興趣想養刺蝟,不妨先去KURI CAFE了解吓先,應該會有幾多收穫!   KURI CAFÉ 地址:九龍灣牛頭角道3號得寶商場地下T104A號舖 電話:9297 9821 營業時間:星期一至日:12:00-22:30

0

【海南雞飯唔合格黑豉油出事 肉骨茶唔正宗得返薑味】伏務台

食海南雞飯,名店都會中伏,小編諗住試返啲平民快餐啦,結果都係衰咗!好似九龍灣呢間栢檔極品海南雞飯價錢正常,但好易錯漏百出,味道亦有啲奇怪,總之唔對路啦! 座位唔算多,一眼睇晒就係一間快餐店格局。 舖名叫得做極品海南雞飯,咁一場嚟到當然要食栢檔極品海南雞飯(HKD48),油飯唔使加錢,幾抵食,食埋肉骨茶(HKD42)睇吓掂唔掂啦! 上到枱個賣相,normal囉!份雞都係左拼右拼砌出嚟㗎喇,一碟有齊雞髀雞胸肉咁啦。係人都知靚嘅海南雞,雞皮之間有層「啫喱」,小編呢碟就由左邊極厚「啫喱」到右邊冇晒「啫喱」,比例3:7左右啦!講真啲肉係幾嫩嘅,醬汁先係真正出事位。 三個醬汁都好唔正宗,首先辣椒醬似點泰式生蝦嗰款,不過有啲綠色疑似香草嘅物體,但又冇咩香草味喎,感覺怪怪哋;黑豉油就稀過乜咁,似屋企嘅生抽再甜啲,好似蒸魚豉油咁,唔係雞飯又濃又黑嘅醬油會有焦糖嘅香甜;另外碟薑蓉叫做味道正常少少嘅,所以小編只係不停點薑蓉食就算,完全享受唔到海南雞飯應有嘅三種醬料囉! 雞油飯煲得爛咗少少,香味有嘅,但唔算濃,只能夠話對得住個價錢。如果想飲湯或飲品就要加HKD8,但提提你,個湯唔係雞湯!如果對海南雞餐對有要求嘅朋友,呢度未必係你嘅選擇喇! 輪到個肉骨茶喇,一早講明係「單點」,但店員係都要落咗飯餐俾多碗飯嚟!小編又見到隔離枱點咗杯奶茶、結果俾咗檸茶,都幾亂吓喎!講返呢碗肉骨茶,一上嚟就聞到勁重藥材味,點知一入口係好重嘅薑味同藥膳湯嘅感覺!碗嘢見到有杞子、南棗、玉竹同黨參呢啲料,不過完全唔係肉骨茶嘅味,飲到尾仲有啲酸酸哋嘅味出咗嚟添竟然!飲咗半碗,條脷已經俾啲薑味辣到㷫㷫哋,唔想飲落去喇! 好啦,揾肉食啦,一碗有四件圖中嘅肉,呢件係最大嘅,但唔係條條有骨㗎,有啲係豬軟骨嘅位置,完全唔似係肉骨茶嘅肉囉! 勁多豆卜,有啲係煮咗好耐好腍嘅、但係有啲又好似啱啱落鍋咁,層皮硬硬哋喎!真係奇怪!   小編伏氣:價錢唔算貴,但服務真係一般,同店員講我係要單點肉骨茶唔係套餐嘅時候,佢仲黑面。其實隔離枱俾錯嘢飲都係同一個店員落單,佢自己都要檢討吓點解成日錯喇!至於食物味道,俾快餐價唔係要好食到上天,但都應該要正常質素囉,海南雞個怪味黑豉油真係倒米,加上薑味濃肉骨茶,辣到其他食咗乜味都唔知啦! 入伏點:栢檔極品海南雞飯 入伏價:海南雞飯(HKD48),肉骨茶(HKD42) 中伏by #為食加菲貓 美術by #車雲 攝影by #為食加菲貓 《伏務台》星期一伏務大眾,歡迎各界報料。

0

【$30抵食日式套餐 香脆燒餅足料炒麵打孖上】平霸

今次平霸出動去到九龍灣嘅匠工房秀吉搵食,想食平價又高質嘅日本嘢就啱晒喇! 想飽肚,最平$30已經有套餐,有炒麵又有燒餅,真係平靚正!匠工房秀吉有幾間分店,今次小編就去咗德福廣場Piago超市入面嗰間,位置都幾方便。 不過小店就只係得企位,旁邊叫做有個L形嘅立食區位置,起碼唔使揸住食咁狼狽啦! 餐牌一眼睇晒,有齊套餐、小食、主食同甜點,實有一款啱心水。 平霸叫咗SET A-燒餅+炒麵(HKD30),有燒餅同炒麵,即叫即炒,上到枱香噴噴!炒麵本身好夠味,配料有雜菜、蘿蔔、洋蔥同豬肉等。炒麵就咁食會較為乾身,但勝在分量都算多。 平霸最鍾意呢個炒麵嘅質感,唔係腍身嗰種冇乜咬口,反而係有啲韌勁,而且油膩感唔重,唔會食到成口油呢! 除咗炒麵好味,燒餅都十分唔錯!燒餅面頭有滿滿嘅燒汁,再淋上沙律醬同木魚碎,好邪惡吓啫! 燒餅入面嘅材料主要都係雜菜,燒餅邊位燒到脆卜卜,香脆可口! SET B-燒餅+奄列炒麵(HKD32)同SET A大同小異,只係炒麵變咗做奄列炒麵。加多咗隻雞蛋,味道應該唔會相差太遠,點知食落又好唔同喎!雞蛋上面淋上蕃茄醬同沙律醬,將雞蛋連同炒麵一齊食,比起齋食炒麵冇咁乾身,而且味道更突出。 蕃茄醬完全係加哂分,酸酸甜甜好開胃,雞蛋又滑口,滿意呀! 食完正餐平霸又點會咁快滿足,見到餐牌有大判燒,梗係食埋先走啦!大判燒有兩款口味,分別係紅豆同吉士。 大判燒-紅豆味(HKD8),非常鬆軟,未入口已經聞到蛋香味,流緊口水啦!呢個燒餅有啲似pancake口感,紅豆餡料都多喎,味道濃郁又唔甜膩,作為輕食好啱身份呀! 大判燒-吉士味(HKD8),吉士甜度剛剛好,creamy得嚟又有食緊奶皇嘅味道,一咬就爆餡咁滯,like呀!   平霸小評:依家想食燒餅同炒麵唔使捱貴價喇,$30蚊已經可以食晒兩樣嘢,價錢親民又抵食! 匠工房秀吉 地址:九龍灣偉業街33號德福廣場二期4樓Piago內 電話:2997 2731 營業時間:星期一至日:10:30-21:30 《平霸》平食四方,歡迎各界報料。

0

【米芝蓮大廚炮製私房菜 川味深海龍躉滾到起泡】漁牧

原先喺尖沙咀以食川菜同雞煲出名嘅漁牧,最近搬竇移師九龍灣MegaBox插旗,新店裝修大玩中式feel,牆上壁畫仲係人手畫上去,真係氣派不凡!招牌烤鴨可能好多人都知,不過為免有漏網之魚,依家餐廳將大大個風乾機放喺門口當生招牌添喎。新店新介紹,今次唔講燒魚同雞煲喇,其他單點菜式一樣咁正。依家由米芝蓮大廚鋼師傅掌舵,嚟緊會推出私房菜,小編率先試咗啲,真係擺返圍宴客都好得體呀! 試業一個月,午市時間好爆場,想食就要訂枱啦,唔好博呀。 新店多咗幾間VIP房,呢間仲可以唱卡拉OK添,同親友食飯就更加盡興啦。 鋼師傅之前喺六福菜館由開業做到2009年,攞咗米芝蓮之後就轉戰內地,依家再回歸連帶烹調嘅菜式都帶啲內地風味。小編問鋼師傅有冇喺漁牧引入六福菜館嘅菜式,佢就話只有海鮮類囉。講咗咁多,即刻帶大家睇吓有咩正嘢食啦! 介紹新菜之前,先嚟個涼菜九宮格(HKD188)開開胃,有辣有唔辣,有肉亦有素,啱晒唔同口味嘅朋友。其中麻辣牛?、麻辣豬耳同牛肚係小編最鍾意嘅,香口惹味亦煮得夠腍;之後食件爽甜青瓜粒同木耳,清清喉嚨又可以準備食下一道菜喇。 新菜亦係私房菜之一就係呢味香麻味重,但唔太辣嘅漁牧沸騰深海龍躉(HKD588),用咗沙巴龍躉,另外都有5-6斤重嘅大鯰魚俾你揀。鋼師傅話舊時成日講「老魚嫩豬」,魚愈大條就愈好食,因為肉質結實啲。魚肉用滾水浸到大約7成熟就上碟,即刻淋上子彈椒、炮彈椒、花椒等辣椒同滾菜油。上菜嘅時候仲見到啲油滾到起泡泡,令食客可以品嚐到熱辣辣又啱啱夠熟嘅魚肉,嫩滑彈牙。碟底仲有芽菜同紅薯粉,最好係菜油嘅口感唔肥膩,反而更加滑。 另一味私房菜就係特色香辣龍蝦干鍋,不過仲未定價,想食嘅話建議打去問咗先。餐廳選用本地龍蝦,肉質彈牙多肉汁,即使炸過再炒都好鮮甜。一隻龍蝦有斤幾接近兩斤重,呢碟例牌size有4隻龍蝦,夠10位用㗎!呢味菜用嘅辣椒同漁牧沸騰深海龍躉一樣,不過再加咗辣椒醬、豆瓣醬等醬料一齊炒,所以食嘅時候有啲豆豉嘅香甜,之後先有陣香麻嘅辣味滲出嚟;仲有萵苣、蓮藕、薯仔、青瓜同雲耳做配料,真係好豐富呀! 然後點少得漁牧嘅招牌菜呢,老北京烤鴨片皮鴨(HKD170/半隻)大約5斤一隻,每隻鴨都掛咗個號碼牌,可以追蹤返係來自邊個農場㗎!鴨上咗鴨皮水之後風乾一晚,唔使落醃料。先用電爐烤乾鴨身,再轉用荔枝木呢款果木繼續烤,令鴨肉更加香。呢度嘅片皮鴨唔使加錢都俾埋肉你食,其實幾抵吓。 餅皮幾薄,餐廳好細心咁每塊都用紙隔住易夾啲。包好之後仲可以咬到鴨皮脆口嘅質感,食到「嗦嗦聲」添,最驚喜係鴨皮睇落去肥,食落唔覺油喎。不過肉味會淡咗,因為餅皮嘅香味會蓋咗少少,想試濃啲嘅肉味就建議就咁食。 漁牧混豬(HKD298/半隻)都係好多人點嘅,特別之處係自家調製嘅醃料同三色醬料。100日嘅乳豬用西芹、紅蘿蔔、辣椒等新鮮材料醃製,比平時婚宴食嗰種清甜啲。乳豬燒到後段仲釀埋煮過嘅糯米飯一齊燒,將豬油逼入糯米飯,令味道更加香。食嘅時候除咗有平時嘅乳豬醬之外,仲有加咗沙律醬調製嘅抹茶醬同秘製芥末醬,兩種帶甜但清啲嘅醬料可以減退乳豬嘅肥膩感。不過小編最鍾意係乳豬皮呀!光皮嘅燒法鬆脆啲,唔會好硬,堅食唔停口囉。 曹池汁大蝦配手抓餅(HKD108)嘅醬汁有啲似咖喱炒蟹嘅味道,但質感唔杰身,手抓餅都易沾起醬汁。不過手抓餅記得趁熱食,因為佢用酥油整,凍咗就會有啲酥味喇。大蝦肉質好結實彈牙,啖啖肉勁滋味。 雙色水晶球(HKD48)睇落普通,但用足料㗎!尤其係紅豆苛水晶球,除咗有一粒粒嘅紅豆增加口感,仲好難得咁食到陳皮味呀! 雙色馬拉盞(HKD58)有黑糖同抹茶味,口感鬆軟到似海綿蛋糕,但質感厚啲。味道唔會好甜,做飯後甜味都唔覺膩。如果你係嗜甜嘅朋友,佢配嘅肚臍餅、百力枝同煉奶就啱晒你喇。   漁牧 地址:九龍灣宏照道38號企業廣場5期Megabox13樓5號舖 電話:2529 8383 營業時間:星期一至日:11:30-15:00;17:30-23:00