Tagged: 伏務台

0

【嘉樂冰廳轉手後質素下滑 奄列嚡口兼重美極豉油味】伏務台

荃灣嘅嘉樂冰廳有四款名物,分別係奄列、鮮牛蛋治、豉油王雞翼同炸雲吞,但小編留意到好多網民話佢轉手重開後,奄列同鮮牛蛋治出晒事。今次小編就試奄列、鮮牛蛋治同豉油王雞翼,睇吓係咪真係咁伏先。 首先試小奄列(HKD32),雖然睇落大大份好抵食咁,但真係食兩啖就鹹到唔想食落去。佢個蛋太依賴美極豉油嚟調味,而且落得好重手,令到成個奄列鹹得嚟又重味精味兼冇晒蛋香,咁用再多嘅蛋整都冇用啦。加上蛋皮煎得有啲老,但又唔脆口,真係幾失望。而火腿入口竟然係粉粉哋同霉霉哋嘅質感,連埋蛋一齊食仲鹹上加鹹添。 然後試鮮牛蛋冶(HKD31),雖然叫鮮牛,但有網民話佢用咗沙嗲牛整係貨不對版,不過上網搵返轉手前嘅相都係用沙嗲牛整嘅。但係小編食落味道偏鹹,而夾住嘅蛋就同奄列有相同致命點,都係太依賴美極豉油嚟調味。 最後係豉油王雞翼(HKD36),同上面兩款比的話,呢味較為出色同問題唔大,只係同樣鹹死人!因為連豉油王雞翼都有美極豉油味呀!好彩小編今次唔使排隊,如果等勁耐而食呢種質素會真心嬲囉。   小編伏氣:3.5星(5星滿分) 入伏點:嘉樂冰廳 入伏價:小奄列(HKD32)、鮮牛蛋三文冶(HKD31+烘底HKD2)、鼓油王雞翼(HK36) 中伏by #MOMO 美術by #MOMO 攝影by #MOMO 《伏務台》歡迎各界報料。

0

【日本過江龍都會中伏!漢堡扒又乾又硬仲賣得貴】伏務台

過江龍係咪真係巴閉啲?以為總係離唔開大排長龍,好似個個都要仆住去朝聖咁,但事實證明並唔係間間嘅食物質素都有保證㗎,呢間喺沙田嘅日本過江龍就伏到小編應一應喇! 呢間來自日本嘅過江龍MOKUOLA(唔講真係唔知佢係過江龍囉!)主打西日料理,開咗都有一段時間,店內環境都唔差。臨近晚市,附近餐廳都開始出現人潮,但唯獨呢間餐廳淨係得兩、三枱客,未入去都已經feel到唔多妥喎! 小編揀咗呢款漢堡扒咖喱飯(HKD88),呢個係單嗌價錢,唔包飲品。一上到枱賣相都叫正正常常,清楚見到有沙律、薯條、咖喱飯加塊漢堡扒放埋一齊咁,望落主角只係佔咗三分一,分量有啲細喎。另外唔通係小編見識少?通常啲主菜一係揀飯或者薯菜,好少見兩樣都有喎,更加未見過會將薯條同飯擺埋一碟上。 薯條用咗麥記嗰隻幼薯條,就咁睇似乎炸得唔多夠火喉,一啲都唔金黃,講真睇落已經唔多吸引。食條試吓,凍嘅!仲要乾噌噌硬堀堀,似擺咗段長時間喎! 喺飯旁邊啲薯條全部都黐滿飯粒,變晒呢啲「飯粒薯條」,個樣仲要幾嘔心吓。咁究竟係食緊薯條定飯呢?小編已經分唔清喇…… 點都要試吓主角嘅,切嘅過程已經感受到塊扒幾咁硬,要花啲力氣先切得開。本來一塊漢堡扒都冇話要求佢要有肉汁,但起碼俾返少少油分吖,呢塊扒真係乾到唔正常,食落嚡口,蘸咗咖喱汁都仲係覺得乾就知咩事啦。 飯上面個咖喱汁係普通日式咖喱,味道偏鹹微辣;汁入面冇平時日式咖喱見到嘅甘荀、薯仔,淨係得少少洋蔥。咖喱飯都擺得入口嘅,但就稱唔上好食㗎喇!   小編伏氣:88蚊一個咁嘅飯仲要加一,成百蚊其實都可以食到個唔錯嘅扒餐㗎喇,但偏偏就喺度中晒伏。薯條又凍又乾,仲第一次食到飯粒薯條添!連漢堡扒都可以整成咁,小編真係唔知可以講乜。成個餐得沙律係正正常常,所以話過江龍都唔一定好食,隨時中晒大伏呀!   入伏點:沙田MOKUOLA 入伏價:漢堡扒咖喱飯(HKD88) 中伏by #大食積 美術by #車雲 攝影by #大食積 《伏務台》星期一伏務大眾,歡迎各界報料。

0

【雞批浮在青苔上? 冰室食物配搭錯晒嚇死人】伏務台

伏嘅嘢主要分幾種,可以係味道伏、價錢伏或者外表伏。今次小編就遇到大佬喇,伏嘅點竟然係個配搭喎! 就係呢個喜喜冰室嘅「雞批浮台」,聽到個名都覺得怪啦,雞批就雞批啦,好哋哋浮咩台呢?睇埋張相小編就呆咗喇,係就係浮台……點解浮喺綠色嘅青苔上面嘅?嚇死人喇。 呢個雞批浮台(HKD36)其實即係雞批加綠豆蓉湯,小編唔明點解呢兩樣加埋一齊會work……同埋本身綠豆蓉湯都係一款比較非主流嘅湯種,點解仲要mix埋個雞批呢? 見到佢咁嘅樣,小編其實都有啲心理準備㗎喇。究竟會唔會係小編誤會咗佢呢?或者會好好食呢? 結果小編嘅直覺係冇錯嘅。首先雞批個皮唔脆就梗㗎啦,話晒都浸住晒;咬落完全唔知自己食緊咩,就係一個濕咗嘅批皮,入面個餡微暖。 至於個綠豆蓉湯……飲落好草青味,仲有少少腥腥哋,我諗除非係綠豆愛好者,如果唔係呢個湯都唔太啱飲㗎喇。   小編伏氣:小編覺得呢個配搭完全無厘頭兼完全唔好食,可以話係由頭伏到落腳。各位勇士想嚐鮮之前要三思喇。 入伏點:喜喜冰室入伏價:雞批浮台(HKD36)中伏by:肥仔文美術by:車雲    

0

【冬蔭功火鍋味不對辦 湯底十級鹹海鮮雪味十足】伏務台

有時約唔到飯腳,但係又想過吓邊爐癮,自己食個一人份火鍋既方便又實惠。以為火鍋好難中伏?偏偏小編遇上了!九龍灣稜閣屋呢間日式餐廳,格局同價錢比連鎖快餐店高啲,有個冬蔭公海老Champonの盛鍋好似幾吸引,點知食落冇冬蔭功味,啲蝦仲好唔新鮮,唔怪得接近六點晚飯時間,成間餐廳得幾丁客啦……究竟湯底變成點?啲蝦又點?睇埋落去揭曉啦! 環境偏日式裝潢,都算整齊嘅,六點左右有小編同另一枱客,不過食到七點左右都未滿座,但同區其他餐廳就個別已經出現人龍喇。 呢個冬蔭公海老Champonの盛鍋(HKD108)有加一服務收費,比平時嘅連鎖快餐店都貴咗三十至四十蚊左右,但見到實物已經覺得唔太值,食完就更加唔會點頭囉。 成個餐嘅樣就係咁,海老就係一隻蝦、而餐牌上面寫嘅淡水龍蝦球,其實唔係球,係得一片仔嘅龍蝦肉,嚟近鏡睇吓: 隻蝦同呢一片仔龍蝦肉賣相好唔吸引,不過照煮滾佢試咗先。 煮完之後,隻蝦變到死灰色,唔係橙紅色已經唔敢食;塊龍蝦片咬落非常之爽,只係雪得過耐而煮熟嗰種爽口感,食到嗦嗦聲。小編明白呢個價錢唔係食啲靚嘢,但都應該比平時快餐連鎖店好先啱囉。 如果冬蔭功湯底真係有冬蔭功嘅酸辣味,都可以幫手遮多啲食物嘅雪味。但呢個酸辣味近乎零,反而同日式「精華」濃湯激似嘅味道。點解係「精華」呢?因為小編食到重度鹹味,愈食愈想飲水。滾到咁上下想加湯,即使加咗枱面一早已經準備好嘅清水都依然係鹹味濃囉。 其他食物好似青口、蔬菜、蟹柳都正正常常。不過件豆腐就好假,質感超滑幾Q彈,好似蒟蒻咁,只係冇咁爽口啫,當然亦都冇豆味啦。 而豚肉同烏冬當然都雪到冰晒啦,所以擺吓等佢解凍。呢兩樣食落幾正常,同埋係成個火鍋最好食嘅,真係有啲本末倒置嘅感覺,加埋個麻醬就更加唔覺得係冬蔭功火鍋添。   小編伏氣:呢個火鍋兩大主角冬蔭功同海老都唔掂,湯底味道貨不對辦已經唔多高興,俾咗錢又食唔到原本想食嘅味道。加上雪到啲肉死晒嘅蝦肉,真係買個即食湯包返屋企自己煮都冇咁嬲。仲要呢個一人份嘅價錢再俾多少少,已經可以去連鎖快餐店食到兩份,仲要食物質素好過佢囉。俾錢埋單嗰陣,見到出餐位置擺咗七、八份豚肉出嚟疑似等人落單(眼見現場已有客人食緊,又冇新單叫啦),咁樣處理食物更加唔會返轉頭啦。 入伏點:稜閣屋 入伏價:冬蔭公海老Champonの盛鍋(HKD118.5已加一) 中伏by #為食加菲貓 美術by #車雲 攝影by #為食加菲貓 《伏務台》星期一伏務大眾,歡迎各界報料。

0

【前菜茶錢加一逐樣計唔抵 厚皮煎包腥味黃魚麵送魚鱗】伏務台

想食上海菜,去啲有名氣嘅中菜館以為實冇死啦,點知小編今次就中晒伏。呢間喺尖沙咀嘅南小館,環境就唔錯,食物價錢睇落都幾經濟咁呀,不過真實係另一回事…… 正值新年,成間舖都擺滿新年裝飾,幾有氣氛嘅,但望落好似有啲亂,冇乜格調咁。入面環境其實都幾寬敞,有唔少座位,最入面仲有落地玻璃,可以睇吓景。小編去食嘅時候啱啱完咗午市,冇乜客人,得四、五枱客。 一坐低,店員就擺低咗杯清茶同一份前菜,有辣菜脯同花生,啲菜脯唔係好辣,花生就蒸熟咗,仲有少少濕,都幾開胃。呢度杯菜飲落似玄米茶,但好淡冇乜味。食中菜計茶錢好正常,但埋單至知原來份前菜係要額外收費嘅,9蚊茶芥再加15蚊前菜,即係未嗌嘢食就已經要俾24蚊。提醒返,呢個價錢仲未計加一服務費㗎! 啱啱落完單一兩分鐘,呢份招牌生煎包(HKD48)就即刻送到。小編真係有少少驚訝個上菜速度,即係份生煎包已經整好咗一段時間,唔係即整嘅。有啲蔥同芝麻喺面頭嘅生煎包望落冇乜油,反而似蒸包。 生煎包個底係煎得幾金黃嘅,咬啖試吓先!食生煎包本來都幾驚入面個餡太熱會辣親,一食就知小編頭先嘅擔心係多餘,因為成個包一啲都唔熱!最多只可以話佢係微溫,而且食一啖淨係食到個包皮,根本咬唔到啲餡。唔使小編講,大家都睇到個皮係幾咁厚、嚿肉係幾細粒啦……頭先金黃色個包底原來都係幻覺嚟,食落硬到好似飯焦咁喎。成個包除咗個底有煎過之外,食落根本同食一個蒸包係冇分別嘅。如果大家想食個煎過吓嘅蒸包,仲要係皮厚過餡嘅,都可以試吓佢嘅。 小編仲嗌咗碗雪菜黃魚麵(HKD68)嚟試吓,賣相好似唔多靚仔喎,上枱時湯面已經結咗少少油。啲黃魚冇話特別鋪喺面上,但驟眼睇魚嘅分量都唔少,叫做對得住個價錢。不過賣相都唔係重點,味道最實際。 雖則望落好似有唔少魚咁,原來唔係嚿嚿魚都有肉食㗎,有啲薄到淨係得返塊魚皮。可能係小編唔好彩,食第一啖就食到一大片好硬嘅嘢,應該係魚鱗嚟,有啲扣分喎。再食多啖,今次冇食到魚鱗喇,但啲魚腥味就喺個口裡面慢慢滲出嚟……真係幾難頂喎!諗住飲啖湯,辟吓口入面腥味啦,點知原來最腥嘅唔係嚿魚,而係個湯,連雪菜味都可以被蓋過就知腥得有幾誇張啦,真係有幾多雪菜都冇用呀! 其實食完嚿魚,飲埋啖湯,小編都唔係幾敢再掂呢碗嘢,但係都勉強試埋個麵啦。呢個應該係上海麵嚟嘅,麵嘅粗度就喺米粉同米線之間,食落太腍身,個感覺似食緊發脹咗嘅米粉囉。 小編伏氣:估唔到食間有啲名氣嘅中菜館都可以中晒伏!個招牌生煎包唔知係嚿肉太細粒定個皮太厚,皮厚過餡係咩玩法,小編睇唔透。對於碗雪菜黃魚麵,除咗伏之外,真係唔知講咩好。由嚿魚到個湯,再到啖麵,可以用一個腥字形容晒,小編依家諗返嗰陣腥味都驚呀!總之就不可一、不可再啦!   入伏點:尖沙咀南小館 入伏價:招牌生煎包(HKD48)、雪菜黃魚麵(HKD68) 中伏by #大食積 美術by #車雲 攝影by #大食積 《伏務台》星期一伏務大眾,歡迎各界報料。

0

【服務態度幾好都救唔返!死鹹烏冬乾雞扒怪味螺肉】伏務台

食得伏食多,小編大致上都有個「伏食雷達」喺心入面,通常伏食都離不開呢幾樣嘢:環境唔太OK、極端嘅價錢同埋相對差嘅服務態度。小編行走江湖咁耐,真係冇試過去一間服務態度超好,但食物就強差人意嘅餐廳…… 今次去呢間鳥炎屋,其實小編覺得應該唔伏㗎喎,因為佢位於尖沙咀旺區嘅樓上舖,樓下有個易拉架做宣傳,望落正正常常! 上到去嘅時候,有一個好熱情嘅男店員招呼我,熱情到令我覺得自己去咗間超高級餐廳咁款喎。望返餐牌,最貴個餐200蚊有找啫!竟然有咁熱情嘅服務質素,小編真係超欣賞。午市時段斷斷續續有客人入嚟,雖然冇爆場,但目測成間餐廳唯一嘅樓面就係剛才彬彬有禮嘅男侍應喇,小編不禁覺得飲食業真係唔易做呀……小編點咗一個幾穩陣嘅網燒雞扒木魚湯烏冬(HKD88),套餐包餐前小食-味付螺肉同麵豉湯。 飲一飲個麵豉湯,小編忍唔住皺一皺眉,雖然望落都係麵豉湯嘅樣,但係味道真係好淡,淡到唔係好知自己飲緊咩;試埋個味付螺肉,其實螺肉正常都係現成貨再解凍㗎啦,點會伏呢?呢個螺肉望落比平時食開嘅淡色少少,食落係爽口,但係個汁真係……會唔會太清?清得嚟仲唔知點解隱約食到少少水喉水嘅味道,唔通係佢哋自家配方嘅味付螺肉?小編真係唔識欣賞呢個「水味螺肉」喇。 主角嚟喇,呢個烏冬其實望落都靚靚仔仔吖,同埋個湯底我叫得木魚湯都係預咗比較清嘅,點知試飲一啖湯竟然鹹到爆炸!應鹹嘅唔鹹,唔應鹹嘅又鹹到咁,一飲就知係落多咗味精嘅味道。烏冬煮得有啲太耐,咬落唔彈牙兼爛爛哋添。 個烏冬一路飲住熱茶一路食都叫做勉強可以充到飢,點知塊雞扒仲過份,咬落乾柴都算,個汁又係鹹到莫名奇妙。如果佢醬汁另上我都可以選擇點幾多汁,或者直頭唔點,依家佢幫我淋咗上面我就真係有啲無奈……結果我諗住用個木魚湯沖淡吓再食,搞到個湯又鹹多幾錢重……   小編伏氣:雖然侍應哥哥真係好有禮貌,成個用餐過程無論係上菜抑或斟茶都笑容滿面,服務的確係一百分,但係食物又負返100分喎!小編真係好想知個廚房究竟發生咩事,可以將咁平凡嘅食物整到非凡地伏!利申:小編真係第一次食到難食嘅味付螺肉。 入伏點:鳥炎屋 入伏價:網燒雞扒烏冬餐(HKD88) 中伏by #肥仔文 美術by #車雲 攝影by #肥仔文 《伏務台》星期一伏務大眾,歡迎各界報料。

0

【酸辣米線叫普通酸變咗飲醋 肥牛碎濕濕豬膶滲血苦味】伏務台

好多名氣大嘅食店反而愈做愈差,聽聞呢間喺尖沙咀嘅星林居竟然紅到去日韓,好多日韓旅客會專程去食佢哋嘅酸辣米線,但係唔少本地客人食過都擰晒頭喎!究竟佢哋嘅酸辣米線有咩問題呢? 開喺樓上三樓嘅舖頭喺下午茶時段冇乜客人,但都見到隔離有枱講韓文嘅客人喺度等緊嘢食,似乎真係幾受日韓旅客歡迎喎,唔怪得舗頭啲宣傳海報有晒日韓文對照添啦。 小編叫咗碗明火小鍋米線(HKD26)加肥牛、豬膶同魚皮餃,揀咗普通酸同中辣,三餸酸辣米線盛惠HKD47,喺尖沙咀價錢算係咁。不過喺無咩客人嘅情況下,碗麵都要等咗差唔多20分鐘先送到嚟,唔知多人嘅時候要等幾耐先有得食呢?送到小編面前嘅呢碗酸辣米線聞落冇乜酸辣湯嘅香味,第一個印象係啲韭菜隻色黃到霉晒咁嘅,好似煮得老咗啲喎,個樣唔多討喜囉。驟眼睇米線嘅分量都唔少,啲湯望落好似幾濃,以為可以加返啲分啦,點知食落先知伏! 食酸辣米線第一啖梗係試吓個湯底啦,小編一飲就差啲嗆親,嗌咗普通酸咋喎,個湯酸到好似飲緊醋咁,反而嗌咗中辣都唔係好有辣味,個辣似譚仔十小辣。成個湯俾酸味搶晒,唔係好夠香,冇乜肉碎之餘,竟然仲食到少少碎骨。米線分量望落雖然唔少,但原來係芽菜多過米線,每啖食極都好似淨係食緊芽菜咁。韭菜就唔使講都知煮得太老,小編真心唔多滿意喎。 望住碗米線,小編都差啲唔記得自己加咗肥牛(HKD10),送嚟嘅時候得一塊仔肥牛喺面頭,經小編好努力咁搜索之後,終於撈到呢個匙羹入面嘅肥牛,唔係講笑,真係得咁多。入面嘅分量就係有四塊短過手指公嘅肥牛片,加埋應該連兩條正常size嘅肥牛都冇。呢幾塊碎濕濕嘅肥牛相信應該煮咗幾耐吓,肉質韌到咬唔開嘅。加咗10蚊食呢幾嚿嘢,唔多抵。 豬膶(HKD 6)分量就OK嘅,有5-6片左右啦,但見到塊豬膶仲有少少血水滲出就唔係好開胃。佢吸晒湯嘅酸味,所以一食落係勁酸,之後咬咬吓就有陣苦味,勉強食完第一嚿,已經食唔落第二嚿喇。 成碗米線得兩粒魚皮餃(HKD5),乒乓波咁大粒,夾住已經feel到佢係好硬身,點知食落更加似乒乓波,又硬又膠。雖然隻魚皮餃都有啲肉香嘅,但真係好難咬囉。   小編伏氣:酸辣米線明明揀咗普通酸都好似飲醋咁,但係中辣又唔多辣喎,完全顛覆晒小編一直以嚟對酸辣米線嘅想像,咁仲使咩俾客人揀酸度同辣度呢?湯底冇乜肉碎之餘,竟然食到碎骨,韭菜煮到霉,10蚊肥牛量少肉質韌!當嗌三個餸都冇樣入得口嘅時候,小編係幾失望㗎。食酸辣米線真係食返X仔X哥冇咁嬲! 入伏點:尖沙咀星林居酸辣米線 入伏價:肥牛豬膶魚皮餃酸辣米線(HKD47) 中伏by #大食積 美術by #車雲 攝影by #大食積 《伏務台》星期一伏務大眾,歡迎各界報料。

0

【深水埗新開長龍店中伏 石磨腸粉唔滑菇味茨汁怪】伏務台

深水埗不嬲都有好多隱世老字號,不過最近就難得有間受人熱議嘅新店開張喎!就係呢間五嫂石磨腸粉!平日下午都見佢排晒長龍,好似真係好得咁喎! 排得長龍好似好有信心保證咁,不過小編中得伏多,試新嘢之前上網check吓呢間嘢風評如何啦!呢間新店都有其他飲食媒體報導過㗎,失敬失敬! 不過亦都見到唔少網民嘅反應好似麻麻喎,不過為咗一證食評真偽,小編決定明知山有虎,偏向虎山行!今次就試吓最簡單嘅雞蛋腸(HKD18)。 落單時店員有問我堂食定拎走,咁我就答堂食啦,因為腸粉熱辣辣一定最正!正如網民留言所提到,堂食都竟然係俾發泡膠盒同即棄筷子,咁其實同外賣冇乜分別?差個膠袋咁囉!雖然知佢係立食舖,但其實好多腸粉小店嘅堂食都會用膠碟裝,大家食完就順手交返,慳返唔少即棄餐具㗎!五嫂嘅堂食服務呢方面真係0分喇! 一打開個盒就見到滿滿嘅茨汁浸滿腸粉,感覺真係麻麻喇。直覺覺得佢嘅汁應該係豉油茨啦,點知冇乜豉油味得嚟仲帶有陣菇味……小編覺得菇味汁同雞蛋腸真係唔係咁夾喇。食咗一啖已經唔想再食落去,腸粉質地偏厚,唔夠薄之餘仲唔夠滑,同時又好吸汁,令到嗰種帶有微腥菇味嘅汁更加難頂。 開頭夾第一嚿腸粉都仲算夾到,不過小編影咗2張相之後,兜嘢已經迅速吸滿晒汁,仲有啲發脹嘅感覺添!跟住就一夾即散,碎濕濕咁,難以下手呀。最後要好似扒飯咁扒先食得完。   小編伏氣:嗱,小編好公道嘅,其實18蚊嚟講佢分量真係唔少,不過……都要食得落口先得㗎!其實18蚊食腸粉喺深水埗真係有好多選擇,米芝蓮級別嘅都有。雖然佢哋舖頭主打每日新鮮石磨,但問題係佢石磨出嚟反而不及街外腸粉滑同薄,至於個菇味茨汁就真係超趕客喇,寧願佢落普通豉油算囉! 入伏點:五嫂石磨腸粉 入伏價:HKD18 中伏by #肥仔文 美術by #車雲 攝影by #肥仔文 《伏務台》星期一伏務大眾,歡迎各界報料。

0

【尖沙咀茶理史甜度太飄忽 芋奶香精竹炭奶茶得苦味】伏務台

依家好多間台式飲品店好似無論咩時候都要大排長龍,呢間連鎖台式飲品店茶理史都唔例外,仲愈開愈多分店。不過小編喺尖沙咀呢間分店飲咗兩杯嘢都中晒伏,睇吓究竟出咗咩問題啦! 小編喺閒日嘅四點幾去到,人流唔算多,買嘅時候前面應該有3-4個客人等緊,結果兩杯嘢飲大概等咗十分鐘,都算合理嘅。不過喺小編買完之後,就一度出現人龍,加上門面堆咗好多貨喺度,令到地方都幾逼吓,有啲混亂,直到走之前都仲未見有人執呢啲貨。 呢杯竹炭鐵觀音白玉奶茶(HKD26)望落都OK喎,起碼有兩截色,仲有啲漸層效果添,白玉嘅分量正常,但係啲白玉嘅色就黃黃哋咁。當小編用飲管攪勻之後,成杯就變晒上層嗰隻灰黑色,都正路嘅,係竹炭嘅顏色嘛。但係唔好俾佢外表呃咗,一飲就出晒事喇…… 第一啖入口個苦澀味好重,冇茶香。之後再飲真啲,係有陣鐵觀音味,但應該俾苦澀味蓋過搞到冇晒茶香,都係完全冇奶味。明明係竹炭鐵觀音奶茶,但小編完全唔覺得自己飲緊奶茶,似係飲緊無乜味嘅苦茶囉。嗌咗半糖(50%)係一啲都唔甜嘅,唯一係啲白玉本身有少少甜味。 再講返呢啲睇落黃黃哋嘅白玉,係有啲甜味應該浸過糖水,咬落粒白玉度個心係硬身嘅,煮得唔透心喎。 將剩低嘅希望放喺另一杯芋香鮮乳地瓜小芋圓(HKD26) 身上,呢款招牌飲品又係點呢?見到成杯嘢都係芋紫色,但如果飲開芋頭鮮奶嘅都知用新鮮芋頭整出嚟係唔會出到咁樣嘅紫色。入面地瓜圓同小芋圓嘅分量都算幾足,之不過有啲細細粒嘅沉澱物喺杯嘢飲中間,有少少礙眼咁喎。 同樣攪勻試一啖先,嘩!第一個感覺係好甜呀!即刻睇吓個店員有冇落錯單啦,冇錯呀,的確係嗌咗微糖(25%)㗎噃,但係呢杯嘢真係甜得好誇張,好似飲緊個芋頭味嘅糖水咁。 芋頭味亦都好明顯係用芋頭香精溝出嚟,陣味有啲假囉。係有加返啲芋頭碎入去嘅,原來就係啱啱睇到嗰啲沉澱物,叫做多返啲層次,但係唔知係啲芋頭碎太粉定杯嘢飲太甜,飲完個喉嚨係會仲乾,唔好諗住買佢嚟解渴。啲芋圓就不過不失,係硬身咗啲,無咩芋頭味。點解小編仲未提到啲奶?因為啲奶味一啲都唔出,淨係飲到好甜嘅芋頭香精味,差啲唔記得鮮奶先係杯嘢嘅主角嚟!   小編伏氣:解唔到渴都算,但起碼都要好飲先至有價值,但對於茶理史呢兩杯嘢,小編真係搵唔到佢哋嘅價值囉!竹炭鐵觀音奶茶冇茶香冇奶味,似飲緊苦茶;芋香鮮乳地瓜小芋圓個香精味重兼甜到震。作為連鎖台式飲品店,好應該有固定嘅品質,起碼唔同飲品嘅甜度比例唔應該相差得咁遠。半糖一啲都唔甜但微糖就鬼咁甜,不禁令小編開始懷疑人生,面對咁飄忽嘅甜度,真係唔知應該點嗌先至啱……   入伏點:尖沙咀茶理史 入伏價:竹炭鐵觀音白玉奶茶(HKD26)、芋香鮮乳地瓜小芋圓(HKD26) 中伏by #大食積 美術by #車雲 攝影by #大食積 《伏務台》星期一伏務大眾,歡迎各界報料。

0

【飯粒濕笠笠飯焦兩三粒 廟街 四季煲仔飯跌晒watt】伏務台

呢兩個星期天氣凍凍哋,食返個暖笠笠煲仔飯就啱晒喇!講到煲仔飯,熱門之一可以話係廟街嘅四季煲仔飯!長期排晒長龍咁,本地人內地人外國人都有,好似好受歡迎咁款! 咁受歡迎嘅都係伏?無錯,事關早兩日小編抵住冷風排咗大半個鐘,食完之後深深覺得自己中伏了。 食煲仔飯最重要係有一陣淡淡嘅炭香同埋焦香味,尤其是呢間四季主打炭爐煲仔飯,所以小編對佢嘅期望真係幾高㗎!點知…… 滑雞排骨炭爐煲仔飯(HKD64)一嚟到其實正正常常,個瓦煲蓋熱辣辣幾有feel!不過一打開發覺竟然冇乜飯香味,雖然滑雞同埋排骨料都幾足嘅! 一潷落去就知出事喇!通常靚仔嘅煲仔飯不外乎三個條件:飯粒分明、有飯焦,同食落有咬口!點知呢煲飯啲飯濕笠笠,食落連飯香都冇乜。係,係有少少炭香味,但一煲有炭香味嘅濕飯真係唔係咁好食囉! 挖吓個底諗住睇吓啲飯焦會唔會有啲驚喜啦,挖極都唔係好搵到飯焦類嘅物體。終於食到差唔多最尾,先潷到兩粒焦黑色嘅飯焦。一食入口,苦嘅。   小編伏氣:作為一個煲仔飯,飯粒濕笠笠、飯焦苦到喊,連豉油都救唔到佢呀!可能因為太多人幫襯廚房做唔切,水準先會跌晒watt啩!不過作為煲仔飯界嘅名牌,真係令人失望喇! 四季煲仔飯地址:油麻地鴉打街46-58號電話:從缺營業時間:星期一至日:15:30-00:30