Tagged: 伏食

0

【網民控訴老扒房三大罪狀 牛扒冇肉味質素似快餐】伏務台

有時食扒都會去啲港式懷舊扒房,鋸扒之餘又食吓氣氛。但係深水埗有成40年歷史嘅飛鷹餐廳就有唔少網民俾負評,仲提出三大罪狀添!究竟出咗咩事?睇埋落去等小編話你知啦。 罪狀一:留座唔俾人入 小編喺平日1點半左右入坐,店內只坐滿三分一。唔少網民提及嘅留座問題當日都存在,明明等候嘅食客唔多,但有三分一嘅枱都放咗「留座」嘅牌。有啲食客坐好先被要求調位,而小編都無一倖免。 罪狀二:餐湯冇味 小編點咗羅宋湯,蔬菜分量足但味道奇怪,飲落好似茄汁加水咁,陣甜味好重,唔似蕃茄本身嘅原味……有賣相但內涵欠奉,同場都聽到有客人話喺屋企煲罐頭湯都好飲過佢喎。 罪狀三:鐵板唔熱,牛扒過熟冇牛味,落咗勁多鬆肉粉 嚟到扒房梗係叫返個鐵板餐啦!究竟呢份配黑椒汁嘅新西蘭肉眼餐(HKD98)有冇網民提及嘅罪狀呢? 店員會幫客人淋埋汁先上菜,不過鐵板夠熱,上菜都聽到吱吱聲,未有發生網民講鐵板唔夠熱嘅情況。不過黑椒汁太多又太鹹,已經蓋過咗肉味。小編落單要牛扒5成熟,切開都見到肉心係粉紅色,但唔見有血水。雖然呢塊肉眼扒幾厚肉又大份,但肉味淡到近乎冇,質素同快餐店牛扒不相伯仲,但質感就冇網民講嘅落勁多鬆肉粉而太鬆軟。不過配菜方面就少咗啲咁,薯條數量十隻手指數得,哂得八條!仲有啲椰菜同一塊蕃茄,而成個餐最食到原味嘅就係塊蕃茄喇。其實嚟得扒房鋸扒都係想食得滋味啲,但質素似快餐的話真係勁扣分囉……   小編伏氣:4星(5星滿分) 入伏點:飛鷹餐廳 入伏價:新西蘭肉眼餐(HKD98,另收加一)[跟餐包、餐湯同餐飲] 中伏by #MOMO 美術by #MOMO 攝影by #MOMO 《伏務台》歡迎各界報料。

0

【檳城馳名手信咪亂買 實測4款小食味道極端】伏務台

小編飛去檳城參加朋友嘅婚禮,順路叫佢推薦當地出名,實質口味地雷嘅手信。親身試完之後,精選咗4款有潛在伏味嘅馬來西亞手信俾大家,等你哋避得就避,想挑戰嘅有得挑戰,因為有名連鎖店嘅出品都唔一定係大眾口味㗎! 打頭陣有百年歷史嘅華人餅店馨香餅舖,呢度出名做傳統酥餅,但亦有一款當地特產! 鍾金泉甜鹹荳蔻乾 | 伏氣: 4星(5星滿分) 雖然當地有好多荳蔻產品,但千祈唔好覺得一定人人啱食呀。呢款荳蔻果乾一打開就有股強烈藥油味,聞落已經唔開胃,食落口感似厚切嘅壽司薑片,唔止有齊甜鹹味道,仲有一陣隱隱約約嘅酸澀味。就咁睇標籤只有糖、鹽,防腐劑同添加劑,唔知酸味係來自其中一種成分定本身天然嘅荳蔻味呢? 跟住去埋檳城知名連鎖土產店萬香餅店,以為品質味道有保證?點知呢度搵到密集式地雷呀! 翡翠方塊 | 伏氣: 2星(5星滿分) 呢個方塊系列豆沙餅係佢哋最新出品,一共有12種口味,但其中一款港人大愛嘅味道竟然係伏……翡翠口味即係斑蘭,食第一啖都試到啲班蘭味,但慢慢會甜到好似食方糖咁。睇返成分表真係嚇死小編,每100g就有52g糖!一包都有成十幾粒,唔聲唔聲就食咗成包方糖,買俾咩人做手信都唔多適合囉。 咸魚香脆薄餅 | 伏氣: 2星(5星滿分) 入口甜中帶鹹,一開始都有鹹魚味,好似唔錯,點知食多幾啖就鹹到苦。雖然明白鹹魚係鹹嘅,但同食緊真鹹魚冇咩分別咁,轉做零食應該要調節得好啲囉。不過都有鹹魚愛好者同事表示鍾意,小編就替佢嘅健康表示擔心喇。 萬香芒果 | 伏氣: 5星(5星滿分) 呢款濕芒果係今次手信之中嘅伏中之伏,唔好睇佢包裝正常分量重秤,一開頭入口甜到似啫喱糖咁,慢慢變成一股死鹹,仲同荳蔻乾一樣有陣酸味添!雖然今次成分有寫到醋同二氧化硫,但係食完之後口腔同牙齒有啲榎歰歰,要不斷飲水洗口囉。呢款味道四不像,完全唔似香港嘅濕芒果,小編食咗一細啖都頂唔順吐返出嚟。 入伏點:馨香餅舖 入伏價:鍾金泉甜鹹荳蔻乾(MYR 3.7 / 約HKD 7.03) 入伏點:萬香餅店 入伏價:翡翠方塊(MYR 5.5/ 約HKD 10.45)、咸魚香脆薄餅(MYR...

0

【實測網民負評灣仔老茶記 湯麵冇味菠蘿油嗦水氣】伏務台

最近留意到灣仔老字號茶記金鳳茶餐廳嘅菠蘿油同湯麵喺網上有好多負評,湯麵又少湯到變撈麵,小編就去試吓係真係假先。 呢度舖面細細,但出名程度都令佢有唔少客,所以坐得都幾逼。卡位設計都比一般嘅細張,就算兩個成人夏天坐都好易手踭碰手踭,唔好講依家凍啲著多咗衫。 好多網民俾菠蘿油嘅負評係包唔夠熱,外皮唔脆同有水氣,所以小編叫咗特價午餐(HKD49),有餐包或菠蘿包(加HKD3)、奄列同一碗湯麵。不過呢間舊式茶記仍然未裝熱櫃,如果冬天嚟又撞唔唔啱出爐時間,都難啲食到熱辣辣嘅包。 好彩小編去食嗰陣啱啱出爐,所以菠蘿包溫度適中,表面脆口;味道上都只屬一般及冇咩甜味,完全靠牛油嚟支撐;不過塊牛油只係偏室溫嘅溫度,完全唔「冰」,食唔到冰火交融嘅感覺。 雖然包本身都熱,但包底就有嚴重嘅水氣問題,令到包底嗦晒水變成發水麵包咁腍晒。 奄列正常,但湯麵就有網民話少湯到好似撈麵,而且唔夠熱。不過小編又好彩冇遇上呢個問題,取而代之係冇味囉。無論湯麵定係另外再叫嘅沙嗲牛肉烏冬(HKD34),都好似用滾水煮完裝起先加湯,而且兩碗麵條上枱已經有啲發脹。 不過烏冬嘅湯仲淡過湯麵,加上冇味又發脹嘅烏冬,真係有啲難入口。好彩沙嗲牛肉味道合格,唔會太鹹,不過將沙嗲汁撈埋落湯都唔係好救到啲烏冬。之後小編見有兩枱客人淨食餸,烏冬都冇咩點食囉……。成餐只有出名嘅奶茶OK,有時都唔可以因為老字號嘅光環而以為全間舖都有一致嘅水準。   小編伏氣:3星(5星滿分) 入伏點:金鳳茶餐廳 入伏價:特價午餐(HKD52)、沙嗲牛肉烏冬(HKD34) 中伏by #MOMO 美術by #MOMO 攝影by #MOMO 《伏務台》歡迎各界報料。

0

【連鎖Café中等價錢快餐質素 漢堡乾噌噌意粉油淋淋】伏務台

有時你冇諗過會中伏嘅食物先最有機會中伏。就好似小編今次去沙田市中心嘅Parkview水準都幾飄忽,一時差評奇多,一時就突然成堆好評,不過呢度嘅burger同意粉就平均地差喎。 其實呢間曾經係A1 Bakery旗下嘅餐廳,不過今年年頭轉手俾另一間連鎖餐飲集團,點知轉手後啲質素差咗咁多。今次試嘅Lunch Set除咗「正宗美國牛肉(150g)漢堡伴薯條」(HKD138),仲有「香草醬忌廉汁意瓜帶子意粉」(HKD128),即刻睇吓兩樣咁基本嘅西餐可以伏到咩地步啦。 Lunch Set會跟餐包同餐湯,包就冇咩問題,但餐湯就就一般。小編嗰日嘅餐湯係南瓜忌廉湯,冇南瓜味但有咬口,好似一直飲緊冇味但有質感嘅水,唔足料嘅感覺好差囉。 主菜先講正宗美國牛肉(150g)漢堡伴薯條,漢堡嘅麵包冇做過任何處理,冇搽牛油或烘過,拎上手唔夠熱,只係一個單純麵包就上菜,對唔住佢個價錢囉。 而漢堡嘅重點牛肉漢堡扒,乾噌噌冇肉汁同冇咩味。雖然分量有150g,但塊肉厚得嚟煎到又乾又硬,真係好難吞落肚囉,呢個價錢可以喺X記食到漢堡包放題喇…… 香草醬忌廉汁意瓜帶子意粉上菜時賣相還好,頭幾啖都可以,不過食到帶子同食到一半問題就出現喇。 帶子一碟有兩粒,睇樣就煎得唔差,一食就係成碟嘅死罪!帶子好似平時醃牛肉咁醃到過晒火,入口有啲灼喉嘅感覺,冇咗食物原有嘅鮮味,本身仲嫌佢分量少,好彩得兩粒啫。 香草醬忌廉汁就得個樣,唔好睇佢外表綠油油好好味咁,入口又係冇味,全碟最濃味就係啲蘑菇,但其實都係佢本身嘅味。同埋碟意粉愈食愈多油,睇一睇?碟底先知油到同炒意粉一樣,唔知大家又覺得點呢? 小編伏氣:3星(5星滿分) 入伏點:Parkview (沙田店) 入伏價:正宗美國牛肉(150g)漢堡伴薯條(HKD138)、香草醬忌廉汁意瓜帶子意粉(HKD128) 中伏by #MOMO 美術by #MOMO 攝影by #MOMO 《伏務台》歡迎各界報料。

0

【魚生飯爛溶溶似餸頭餸尾 貓飯咁款睇見唔開胃】伏務台

石門開始發展起嚟,但呢區嘅餐廳質素又跟唔跟得上呢?雖然香港人鍾意食刺身嘅程度,係喺冬天食魚生都冇問題,不過呢間京都嘅質素真係不敢恭維囉,免收加一都唔想返轉頭呀! 餐廳服務方面係零分,小編喺平日夜晚7點58分入座,入座率一半都冇,全場三位男侍應都掛住傾偈唔理客人,落單、上菜都唔招呼聲;甚至枱面唔太夠位擺食物,依然聲都唔聲夾硬攝位上菜,不過小編忍,睇埋食物質素係點先! 晚飯想食魚生又飽肚啲,最直接梗係點定食啦。呢度嘅角切魚生飯定食(HKD69)一上菜就好似餸頭餸尾夾埋一齊,擺盤就似小朋友手筆,凌亂中有啲秩序,賣相扣晒分;魚生有爛溶溶嘅,亦有散收收嘅,份量就唔算多。 就咁睇魚生外表顏色比較淡,又唔夠凍去保持新鮮;入口冇鮮味之餘,仲有少少魚腥味同雪味,小編食兩嚿就想舉白旗。而吞拿魚有好多筋,已經夠難食仲要?十幾啖都未?到。成碗飯入面比較有味嘅係希靈魚,但都係有雪味囉。雖然有埋芥辣章魚,但都係唔夠味,而章魚又好似放太耐變到軟腍腍冇咬口。 飯底可以自選壽司飯或白飯,小編就揀壽司飯。碗飯暖暖哋,不過有啲就一嚿嚿黏住晒,有啲就散收收,唔知係咪因為撈唔勻壽司醋,事關一啲有味啲,一啲就淡啲;而且醋嘅味道似中式白醋,質素同伏食之王明將壽司有得揮!不過小編當晚到第二日都攪肚痛,唔肯定完全關佢事,但八九不離十啦。 試完生嘅試熟嘅,呢個和風炸雞定食(HKD68)震撼程度雖然比唔上魚生,不過都麻麻地。雞扒味道用椒鹽調味都正正常常,不過炸得太乾,食落嚡口刮脷,小編個口第二日仲痛痛哋添。麵食有手打烏冬或蕎麥麵,小編就揀咗手打烏冬,口感都正常唔伏嘅,只係煮得唔入味啫。湯底重味精,不過有即食麵嘅質素,如果你唔介意口渴都可能會鍾意。不過食完埋單,小編又要等店員好耐先嚟處理囉……   小編伏氣:4.5星(5星滿分) 入伏點:京都 入伏價:角切魚生飯定食(HKD69)、和風炸雞定食(HKD68) 中伏by #MOMO 美術by #MOMO 攝影by #MOMO 《伏務台》歡迎各界報料。

0

【蛋包飯蛋香欠奉冇色水 咖喱汁重味精冇咖喱味】伏務台

小編有次諗住lunch食好啲,於是去試SHY Xpress觀塘外賣店嘅蛋包飯,貪佢嘅蛋牛治出名,心諗應該做蛋嘅周邊菜式都冇死,點知連累同事齊齊中伏囉…… 心水清嘅網民應該知道SHY Xpress係由前藝員伍文生開嘅蛋牛治外賣店,中午開始仲會做埋蛋包飯。小編叫咗份牛脷蛋包飯(HKD59),本來想即刻試埋招牌蛋牛治(HKD38/全日餐),點知賣晒,唯有第二日嚟賣早餐先試到。 其實小編第一次食牛脷蛋包飯已經中伏,但今次再食依然麻麻哋囉。 話明蛋包飯就先講蛋方面,蛋皮嘅顏色比較淺,食落冇咩蛋味,仲有啲未溶晒嘅鹽粒喺裡面。既然標榜專做蛋治同蛋包飯,蛋皮整到咁就要檢討吓啦。蛋包飯可以配蘑菇汁或咖喱汁,另外可以喺香蔥、粟米、蘑菇同蕃茄四款配料任揀一款。小編揀咗咖喱汁配粟米,但出品仲頹過頹飯囉……咖喱汁口感有啲粉粉哋,好似咖喱粉未開勻嘅感覺;冇咩咖喱味之餘幾鹹吓,有幾位同事試咗啖之後都不約而同講好重味精! 而且飯嘅質感太黏,唔夠粒粒分明,撈埋咖喱汁真係黏上加黏。另外,小編要白飯底,點知佢俾錯小麥飯……其實小編已經避開繁忙時間,三點左右先嚟買,當時得一兩個客,點解仲可以咁大意呢?牛脷就煎得過火喇,韌到好似食皮帶咁,冇啲牙力都食唔到呀。 第二日試埋佢嘅招牌蛋牛治(HKD32/早餐跟熱飲),相比蛋包飯就冇咁出事,但都係有同一問題,唔夠蛋味呀!唔知係咪蛋漿出事,感覺蛋黃嘅比例太少囉……而另一個問題係本身個餐咁貴唔包烘底都算,既然跟深水埗嘅新香園學整蛋牛治,咁就應該學埋佢嘅服務精神,問吓你要唔要加烘底啦,點知冇喎!雖然小編見呢間店唔係伍文生掌廚,但發現佢哋招募緊加盟店,不如同步提升品質同服務啦。   小編伏氣:3.5星(5星滿分) 入伏點:SHY Xpress 入伏價:牛脷蛋包飯(HKD59)、招牌蛋牛治(HKD32/早餐) 中伏by #MOMO 美術by #MOMO 攝影by #MOMO 《伏務台》歡迎各界報料。

0

【太子老字號燒味名過於實 叉燒乾過柴味道死鹹】伏務台

小編最近留意到網上指一間喺太子嘅老字號燒味店永合隆飯店有勁多伏評,大多數網民都話啲叉燒乾到好似柴咁,仲瘦過瘦叉添。不過燒味又唔可以齋睇叉燒質素嘅,所以小編試埋佢哋其他燒味,睇吓係咪樣樣都咁伏。 永合隆飯店已經開業大約50年,但近幾年就多咗人話佢名過於實,淪為遊客打卡店。今次小編試咗兩款雙拼飯同一碗例湯,一共四款燒味嚟。 先試叉燒燒肉雙拼飯(HKD63), 就咁睇色澤模樣都幾正常 ,點知入口就出事喇……有陣似燒焦咗嘅燶味,食多兩嚿都有啲難入口;明明個樣唔似瘦叉,但口感仲乾過瘦叉。小編都向員工求證係咪特登用瘦叉嚟整叉燒?點知佢哋否認之餘,仲話係用最好嘅貨嚟整,小編都有啲愕然囉。 至於燒肉味道真係好鹹,而且冇揸勻啲鹽,局部位置極鹹添,食一嚿就要飲啖水嚟中和陣鹹味。而燒肉皮就好睇食客運氣,小編呢碟就有脆有唔脆。 乳豬切雞雙拼飯(HKD63)嘅乳豬同燒肉一樣都係死鹹。而且有一點令小編覺得佢幾冇heart,就係堂食都俾一包包嘅外賣乳豬醬,作為一間老字號燒味店,仲自稱專做燒乳豬,唔係連自家製乳豬醬都冇掛?!切雞雖然味道唔錯都算滑,但小編呢碟就瘦到得幾両肉咁,唔係好夠餸飯囉。 最後唯一唔伏竟然係佢個例湯(HKD10),有料得嚟又清甜,轉行賣湯仲好喎。其實以呢度嘅價錢,可以去酒樓食個質素好啲,出品又穩定啲嘅燒味飯呀。   小編伏氣:3星(5星滿分) 入伏點:永合隆飯店 入伏價:叉燒燒肉雙拼飯(HKD63)、乳豬切雞雙拼飯(HKD63)、例湯(HKD10) 中伏by #MOMO 美術by #MOMO 攝影by #MOMO 《伏務台》歡迎各界報料。

0

【網民報料油麻地café伏爆 實試漢堡套餐貨不對辦】伏務台

一講中伏餐廳就有網友留言,話油麻地嘅愛麗絲的秘密花園都好伏,仲引嚟一堆網民附和添。小編都做完一輪資料搜集,都發唔少人都有微言,咁梗係去實測吓啦! 呢間以愛麗絲夢遊仙境做主題嘅打卡café,俾大量網民指佢嘅價錢同食物質素唔成正比,單靠打卡都唔可以接受。 小編一入去已經聞到陣酸宿味,座位與座位之間都好迫,想像唔到四個人一齊坐可以點食飯。呢度作為打卡café,先睇睇裝修、影相道具同餐具都有啲殘舊,部分已經爆口,公仔甩毛都冇換新嘅;而且有啲道具裝飾勁厚塵,咁樣食嘢真係唔開胃囉。 不過點都要試埋食物質素,小編叫咗特偉兄弟孖寶(HKD78)。特偉兄弟孖寶係漢堡包餐,但上菜個樣同餐牌嘅圖有出入!明明圖示係雙色漢堡,但出嚟變咗單色;薯角就變咗粗薯條;沙律仲直接消失添!無論作為一間餐廳定打卡地點都好,呢啲落差真係有啲過份呀! 兩個漢堡包都煎得有啲乾同硬,用手大力啲都壓唔扁。中間夾住嘅漢堡扒雖然跟返餐牌做咗牛肉同雞肉豆腐兩款,但牛肉口感鬆散,味道超鹹;雞肉就又乾又實,冇咩雞肉味。 粗薯條貨不對辦已經令人勁失望,冇咩調味,仲條條都唔脆口,圖片嘅沙律醬就變成茄汁,成個感覺頹晒。而且分量唔多,就算以打卡做賣點都彌補唔到呀。 作為café當然要試吓佢啲甜品啦。紅心皇后的餡餅係雜苺軟心慕絲蛋糕,入口有陣隱隱嘅苦澀味同藥水味,甜得嚟都幾假,好似食糖嗰種咁。分量同樣好細,同樣嘅價錢喺街可以買到質素好好多嘅蛋糕或西餅喇。小編同網友嘅評價一樣,真係「不可一,不可再」。就算想影相打卡,同樣嘅價錢可以去新啲又乾淨,食物質素更好嘅café。   小編伏氣:4星(5星滿分) 入伏點:愛麗絲的秘密花園 入伏價:特偉兄弟孖寶(HKD78)、紅心皇后的餡餅(HKD56) 中伏by #MOMO 美術by #MOMO 攝影by #MOMO,BLUE 《伏務台》歡迎各界報料。

0

【粉紅打卡甜品店服務差 梳乎厘班戟夾雜粉粒】伏務台

最近小編嘅朋友都不約而同推薦小編試一間超伏甜品店 ,佢哋個個食完返嚟唔止嬲,仲谷到一肚氣!見佢哋咁情緒高漲,小編就實地調查吓啦。 依間位於上環嘅甜品店飲吧已經開張三個月,但食物質素同服務方面都仲未調節好囉…… 一入到去,廚房三個人都集中處理外賣單,但外賣速遞員都等唔落走咗,情況幾混亂。可能真係好多單啦,但店舖應該量力接單囉。而且店員完全將堂食客人置之不理,由得客人俾錢落單後之後呆等,直到全場客人集體催單先開始處理堂食order。其實呢度本身座位唔多,得4、5枱客都搞到咁,真係好差囉,所以小編都等咗15分鐘先成功落到單咋。 小編點咗1款飲品同2款甜品。首先嚟嘅係提子多瑙河梳打(HKD42),雖然呢度標榜喺打卡店,但深棕、深紫色同少量藍色嘅配搭令小編打咗個凸。入口味道奇奇怪怪,提子味好淡,仲膠膠哋咁;而且冇乜梳打水嘅「汽」,唔太甜,似用普通汽水沖出嚟多啲。加上啲味溝唔埋,好似飲緊兩樣咁。 不過兩個甜品先係今次嘅伏食主角,櫻花車厘子梳乎厘(HKD58)等咗30分鐘先嚟,賣相普通已經對唔住佢個價錢,分量同口感先令人最失望!車厘子果醬都係有一陣膠味,而且梳乎厘班戟好重粉味,完全冇蛋香,試咗少少已經唔想食。 本身以為咁已經夠差,班戟唔挺身仲勁濕,食食吓仲分開上下兩層裂開,唔使10分鐘就凍晒。最誇張係小編食到有啲「粒粒」嘅口感,吐出嚟先知係超多未打攪勻嘅粉粒,咁嘅出品真係極求其呀! 輪到漏單,要成45分鐘先上嘅沖繩海鹽檸檬窩夫撻(HKD58)。分量好似喺葵廣嘅小店買咁,窩夫撻硬到無論用叉定用手都要大大力先分得開;而且小編見到店員冇帶手套,直接將窩夫放上手定型,驚嚇度有十粒星呀!而海鹽雪糕除咗藍色有啲feel之外就淡而無味,仲淡過雲呢拿雪糕;雖然配嘅檸檬醬係唯一有味啲部分,但同個甜品好唔夾囉。   小編伏氣:5星(5星滿分) 其實由等15分鐘落單,到要小編發現啲員工好得閒,自行追問先知漏單,實在太粗心大意,食到人都火火哋!埋單盛惠HKD158都唔覺得有食完甜品嘅開心同滿足,每款都係失色又奇怪嘅味道,服務又亂,食完唔嬲先係奇蹟呀! 入伏點:飲吧 入伏價:提子多瑙河梳打(HKD42)、櫻花車厘子梳乎厘(HKD58) 、沖繩海鹽檸檬窩夫撻(HKD58) 中伏by #MOMO 美術by #MOMO 攝影by #MOMO 《伏務台》歡迎各界報料。  

0

【純抹茶味煙仔糖甜到暈 砂糖含量極高冇下次】伏務台

小編曾經喺好奇之下買咗款原味煙仔糖嚟食,點知一試難忘,伏到突破天際,係俾朋友試會立即冇朋友嘅級別。今次行街俾小編見到綠茶味,梗係買嚟挑戰吓啦! 呢款煙仔糖都係日本駄菓子之一(駄菓子範指為小孩製作,平價買到嘅零食),1951年首次喺日本登場,當年只有推出原味,係用可可同薄荷混合而成。小編以前試過半枝已經頂唔順,因為食落係假到一個點嘅香精味,到2006年就出咗今次俾小編巧遇到嘅抹茶味。見包裝上面寫「純抺茶使用」,令小編忽發奇想將佢磨粉沖水飲,睇吓「抹茶」嘅感覺會唔會更突出。 未磨粉之前當然先試佢嘅原本食法啦!佢個樣睇落似粉粉哋嘅太空糖,但實質硬度似叮叮糖。入口抹茶味都幾真,甜甜哋,但癟原味嗰種香精味。 開始磨粉喇, 短短一小枝磨咗小編15分鐘左右,啲粉聞落都幾有抹茶味。 一枝煙仔糖磨粉後加咗大約150ml水,點知一飲甜到飛起,好似飲葡萄糖水咁!小編即刻睇返營養標籤,原來每100g有64.4g係糖,而用得最多嘅材料就係砂糖!雖然佢嘅抹茶味好真,但甜到咁,食少少都太唔健康囉…… 小編伏氣:2星(5星滿分) 入伏點:盈之屋零食超市 入伏價:HKD6/1個 中伏by #MOMO 美術by #MOMO 攝影by #MOMO、BLUE 《伏務台》歡迎各界報料。