Tagged:

0

【深水埗新開長龍店中伏 石磨腸粉唔滑菇味茨汁怪】伏務台

深水埗不嬲都有好多隱世老字號,不過最近就難得有間受人熱議嘅新店開張喎!就係呢間五嫂石磨腸粉!平日下午都見佢排晒長龍,好似真係好得咁喎! 排得長龍好似好有信心保證咁,不過小編中得伏多,試新嘢之前上網check吓呢間嘢風評如何啦!呢間新店都有其他飲食媒體報導過㗎,失敬失敬! 不過亦都見到唔少網民嘅反應好似麻麻喎,不過為咗一證食評真偽,小編決定明知山有虎,偏向虎山行!今次就試吓最簡單嘅雞蛋腸(HKD18)。 落單時店員有問我堂食定拎走,咁我就答堂食啦,因為腸粉熱辣辣一定最正!正如網民留言所提到,堂食都竟然係俾發泡膠盒同即棄筷子,咁其實同外賣冇乜分別?差個膠袋咁囉!雖然知佢係立食舖,但其實好多腸粉小店嘅堂食都會用膠碟裝,大家食完就順手交返,慳返唔少即棄餐具㗎!五嫂嘅堂食服務呢方面真係0分喇! 一打開個盒就見到滿滿嘅茨汁浸滿腸粉,感覺真係麻麻喇。直覺覺得佢嘅汁應該係豉油茨啦,點知冇乜豉油味得嚟仲帶有陣菇味……小編覺得菇味汁同雞蛋腸真係唔係咁夾喇。食咗一啖已經唔想再食落去,腸粉質地偏厚,唔夠薄之餘仲唔夠滑,同時又好吸汁,令到嗰種帶有微腥菇味嘅汁更加難頂。 開頭夾第一嚿腸粉都仲算夾到,不過小編影咗2張相之後,兜嘢已經迅速吸滿晒汁,仲有啲發脹嘅感覺添!跟住就一夾即散,碎濕濕咁,難以下手呀。最後要好似扒飯咁扒先食得完。   小編伏氣:嗱,小編好公道嘅,其實18蚊嚟講佢分量真係唔少,不過……都要食得落口先得㗎!其實18蚊食腸粉喺深水埗真係有好多選擇,米芝蓮級別嘅都有。雖然佢哋舖頭主打每日新鮮石磨,但問題係佢石磨出嚟反而不及街外腸粉滑同薄,至於個菇味茨汁就真係超趕客喇,寧願佢落普通豉油算囉! 入伏點:五嫂石磨腸粉 入伏價:HKD18 中伏by #肥仔文 美術by #車雲 攝影by #肥仔文 《伏務台》星期一伏務大眾,歡迎各界報料。

0

【實測杜拜杯麵有幾伏 原味咖喱落芒果醬變咩味?】伏務台

講本地伏食講得多,今次小編就講吓其他地方嘅伏食之選啦!話說咁啱小編有朋友啱啱去完杜拜公幹,帶咗兩個喺杜拜好流行嘅杯麵返嚟,小編一於同大家開箱啦!外表望落正正常常,不過聽聞中東口味同我哋亞洲口味唔多啱嘴形,所以做定食伏嘅心理準備先! 今次試嘅分別係Chinese Chow Mein,我估照譯係中式炒麵味啦,另外就係原味咖喱(Original Curry)。就咁睇兩個味都好正常,直至我打開蓋後……   首先打開嘅係炒麵味,嘩,撲鼻而來竟然係一陣酸味,聞真啲仲醙醙哋添!入面係已經有調味粉嘅麵餅,另外有包調味醬,上面寫住SOY SAUCE,我冇睇錯吖,呢個唔係撈麵嚟㗎喎,點解要喺個湯嘅杯麵入面加豉油?我唔明! 當我以為杯麵落豉油已經好驚人嘅時候,我發覺原來咖喱味嘅醬,驚嚇度簡直突破天際,竟然係一包Mango Sauce!雖然依家Fusion菜當道,但小編真係諗唔明咖喱同芒果點做friend喎! 根據指示呢,話落熱水後要等2分鐘,然後要撈一撈再落醬,落完又要再撈,跟住再等2分鐘先食得。工序咁繁複,唔知味道會唔會出乎意料地好呢?btw,個芒果醬真係好核突,聞落仲有啲似變壞咗嘅麥樂雞甜酸醬添。 首先講咗豉油味中式炒麵先啦,個麵質又實又硬,好似食緊紙皮咁,個麵完全唔掛湯,淡而無味,一路食一路聞到奇奇怪怪嘅酸味。呢個係嗅覺補充味覺嘅原理嗎?小編食每一啖都覺得香港嘅杯麵實在太高質,究竟杜拜嘅人係點忍受呢種硬麵餅同埋怪湯嘅呢?原來中東人眼裡,中式炒麵係咁嘅味? 跟住輪到芒果味,唔係,係咖喱味嘅杯麵喇!一打開塊錫紙就有陣酸味湧出嚟,說好的咖喱呢?咖喱味嘅湯汁比頭先炒麵味濃稠得多,可能因為加咗包芒果醬啩,麵質同樣係超硬,完全唔掛湯,所以閉住氣齋食麵都可以勉強入到口嘅!小編懷住必死嘅心情飲咗一小啖湯,嘩,係酸醙味,點解個湯可以濃得嚟咁臭!直頭擺近少少個鼻聞都唔多開胃!小編一路試呢兩隻杯麵一路俾同事用眼神嫌棄…… 小編伏氣:其實未開箱之前都估到佢唔慌好味,但又冇諗過係難食,依家係難食到完全冇嘢食都絕對唔會掂佢。隨杯附送嘅醬汁實在太伏,如果有機會再試,唔落應該會好啲(不過我唔會俾呢個機會發生)。忽然好慶幸自己喺香港囉,如果三更半夜起身淨係得呢隻杯麵…..叫人點食啫! 入伏點:杜拜某便利店 入伏價:約10蚊港幣 中伏by #肥仔文 美術by #車雲 攝影by #肥仔文  

0

【明星效應都救唔返 寶林新開車仔麵唔掂】伏務台

話說最近寶林新開咗間榕記車仔麵,門口鋪滿明星捧場相,有明星效應係咪一定掂? 似乎村民唔係咁諗喎,你有你明星客唱好,市民有市民留言話伏喎! 其實呢間榕記車仔麵係分店嚟嘅,喺九龍城嘅總店已經開咗四年,口碑算唔差嘅,仲被網民大讚係九龍城No.1車仔麵添,同樣有唔少明星去捧場!咁點解去到寶林開分店就有負評出現呢?等小編實測吓啦,睇吓點樣出事先! 接近中午時段去到,人流唔算好多,一入到去店員都好好招呼,態度唔錯嘅。 睇吓menu先,豬骨湯底最平兩餸麵30蚊,而姬松茸蟲草花養生湯/白果胡椒豬肚湯,兩餸麵就要42蚊喇,以車仔麵價錢嚟講,兩餸配特色湯底要$42係貴咗啲!不過一場嚟到,就試吓呢個主打嘅養生湯底咩料先! 姬松茸蟲草花養生湯(HKD47/三餸),小編叫咗幼麵底,三餸(要47蚊㗎!)就點咗芝心丸、雞翼尖同柱候牛腩。牛腩同雞翼尖係分開另上嘅,咁就唔怕影響湯底個味,幾貼心!不過小編就發覺碗麵好似多咗啲其他料咁,問店員就話係湯渣喎!咦,點解唔見蟲草花同姬松茸嘅?得幾粒碎核桃同老黃瓜呢啲「湯渣」咋喎!個湯飲落只有甜味,仲要係死甜嗰隻,唔覺有任何菇味同鮮味,養生湯甜到咁,仲要唔係鮮甜嗰隻喎!呢個湯底伏咗! 幼麵口感又係奇怪,完全冇爽口彈牙感覺,食落似足米粉咁,仲要似煮咗好耐搞到軟腍腍,呢個麵底真係不似預期! 至於幾款車仔麵餸都略失水準,好似雞翼尖咁,睇落顏色頗深,以為係入晒味,點知食落淡茂茂,而且好油膩呀! 柱候牛腩就夠味,不過係重口味呢!鹹到一個點,小編食咗一嚿已經頂唔順,要不停飲水先解到鹹。 芝心丸同平時打邊爐嗰啲有少少唔同,有隻minions印係面,係幾可愛嘅,不過口感同平時食開嗰啲有出入!有網民就話啲丸入面係凍嘅,但今次小編呢兩粒就正正常常,微暖啦!   小編伏氣:小編覺得食物水準真係有待改善,難怪咁多網民話中伏!唔知係咪因為新開分店,好多嘢都似仲未ready好咁,加上價錢又咁「進取」,個所謂養生湯底更令人失望!要贏返食客嘅支持,睇嚟要加把勁喇! 入伏點:榕記車仔麵 (寶林分店) 入伏價:姬松茸蟲草花湯三餸麵(HKD47) 中伏by #愛吃的旅人 美術by #車雲 攝影by #愛吃的旅人 《伏務台》星期一伏務大眾,歡迎各界報料。

0

【日本過江龍名過其實 抹茶唔突出紅豆唔夠味】伏務台

香港人對抹茶嘅熱愛一直有增無減,今次小編就試吓呢間頗有人氣嘅日本過江龍辻利茶舗,係咪過江龍就唔會伏先?最近就有餓底同小編報料,話食過覺得麻麻喇! 所以話有時候過江龍都會名過其實㗎!小編嗰日下午去到,見有一條少少嘅人龍仔,現場好多嘢都係自助形式,包括拎餐點、紙巾同餐具等,唔使收加一梗係乜都自己嚟啦! 軟雪糕紅豆沙冰(HKD42),賣相睇落一般般,味道方面,雪糕奶味超級濃郁,仲要幾香滑。 不過,紅豆沙冰就真係出事喇,飲落口真係一啲紅豆味都無,同飲緊冰水冇分別,飲多幾啖先勉強飲得出少少紅豆味,非常失望呀!依家好似冰水溝雪糕咁! 抹茶芝士蛋糕配抹茶雪糕(HKD48),講到明日本過江龍,點可以唔試吓抹茶產品呢!今次揀咗呢款,可以一次過試晒兩款抹茶產品。抹茶芝士蛋糕,我本身諗住佢隻味會係比較creamy,比平時食開嘅抹茶芝士蛋糕會再濃味啲,但食落去完全相反。呢個抹茶芝士蛋糕咬入口係散嘅,竟然好似食海綿蛋糕咁! 而個餅底就一啲都唔脆,抹茶味又一啲都唔出,得返死甜,失分!抹茶雪糕就更加失望了,同樣食唔到抹茶味!   小編伏氣:今次呢間辻利茶舗,未至於話要排好耐隊先食到,不過食物質素就真係有待改善喇!紅豆沙冰要加返重啲紅豆味啦,依家搞到好似飲緊雪糕溝冰水咁!希望真係做得返日本嘅水準呀! 入伏點:辻利茶舗-apm店 入伏價:軟雪糕紅豆沙冰(HKD42),抹茶芝士蛋糕配抹茶雪糕(HKD48) 中伏by #愛吃的旅人 美術by #車雲 攝影by #愛吃的旅人 《伏務台》星期一伏務大眾,歡迎各界報料。

0

【OK台式叮飯賣相差 重口味肉燥鹹到爆】伏務台

話說早幾日經過OK,小編見到呢個台式叮飯系列,打開一睇,賣相非常唔掂,簡直係圖文不符咁滯,即刻買嚟試吓睇佢伏唔伏啦! 台式肉燥飯(HKD21.5) 一打開,見到啲肉燥已經黐埋一嚿,唔講以為係肉餅飯囉,賣相簡直係見到都唔想食呀!小編睇見都怕了。 味道方面,一路撈嘅時候已經好大陣味,香係幾香嘅,不過聞落都知係好重口味!食落去,肉燥居然仲多過碗飯,真係好鹹又重口味!啲飯仲要係偏濕身,搞到好似食緊粥咁,口感好奇怪呢!不過如果賣相再好啲,冇咁鹹嘅話,都ok嘅。 台式滷肉菜飯(HKD21.5) 一撕開層膠,個賣相又係完全冇美觀可言,睇見都唔開胃! 味道嚟講呢個就偏甜。對比起肉燥飯呢個就冇咁重口味,菜嘅比例都ok,可能因為冇乜汁所以食落冇咁濕。不過佢啲滷肉就瘦肉偏多,當然冇台灣食嗰啲咁正宗啦! 小編伏氣:今次試完呢兩個叮叮飯,小編又要對叮叮系列俾返個空白期緩衝吓,食完呢兩個飯之後,個口即刻好口渴,睇嚟食咗唔少味精落肚喇! 入伏點:Circle K 中伏by #愛吃的旅人 美術by #車雲 攝影by #愛吃的旅人 《伏務台》星期一伏務大眾,歡迎各界報料。

0

【OK新出芝士小籠包 好難食完全唔OK】伏務台

作為便利店忠粉嘅小編,一知道佢哋出咗新嘢當然要第一時間幫大家試吓味啦!今次OK便利店新出芝士小籠包(HKD10.5),未推出啲反應已經好極端,網民仲留晒言話:「放芝士入去簡直不知所謂!小籠包係食佢入面啖上湯,唔係食嚟做乜?」等小編即刻試,睇吓佢有幾伏啦! 一見到個包裝,小編咀都O埋,包裝細到一個點,連衫袋都放得落,可想而知佢有幾細!不過打開個包裝味道都幾出,係幾香㗎喎。 一盒入面有四粒,跟佢個指示,家用微波爐叮40秒就食得喇。 叮完之後都見到有啲肉汁出咗嚟,不過就細粒咗啲囉,仲細過隻細湯匙呀! 就咁睇其實係搵唔到芝士嘅存在,食到落口,真係難食到一個點!完全係怪味囉!小編好艱難先吞到佢落肚,勁勁勁難食呀!俾埋同事食,佢哋都覺得皮太厚又乾爭爭,唔講係芝士小籠包都唔知原來入面有芝士,淨係食到啲酸酸甜甜嘅味道;同埋一啲汁都冇,咁樣都叫係小籠包? 小編伏氣:其實唔止一次喺便利店中過伏,不過今次真係離譜咗啲喎!有時唔係咩都加芝士都會好食㗎,難聽啲都要講返句,叮叮真係愈出愈垃圾了,不如下次唔好搞熟食啦!對小籠包有陰影,還我多汁小籠包呀! 入伏點:OK便利店 入伏價:HKD10.5 中伏by #愛吃的旅人 美術by #Mui Mui 攝影by #大食積 《伏務台》星期一伏務大眾,歡迎各界報料。

0

【熱爆過江龍枕頭蛋糕 芝士味低調到食唔出】伏務台

上個月由大馬正式攻港嘅熱爆過江龍店占師傅,雖然最近停賣咗好多人排隊買嘅鹹蛋味枕頭蛋糕,但其實原味同芝士味一樣有唔少人支持。小編當日未夠10點去到,舖頭未開門已經有幾個人排緊隊,門口仲寫明每人限買兩盒,睇嚟真係好受歡迎喎! 原味枕頭蛋糕(HKD50) 新鮮出爐嘅枕頭蛋糕,以古早味做賣點,濃濃嘅蛋香,喺排隊嗰陣已經流晒口水。喂喂喂,點解無咗占師傅個Logo印喺個蛋糕面嘅?唔通開咗個幾月就偷懶?同聞落去一樣,食落都充滿蛋香,的確係好有細個食嘅紙包蛋糕味道,呢個高級版就更加鬆軟啊! 芝士味枕頭蛋糕(HKD60) 唔好懷疑自己睇錯台,因為伏嘅正正就係呢個好多港女都熱愛嘅芝士味!聞落去一樣蛋香撲鼻,仲見到有啲芝士喺底層度,不過就無流心啦!食落同原味枕頭蛋糕好似,只係有少少鹹味,芝士味低調到唔係好發現到。 睇真啲!其實啲芝士喺晒底層,要一啖食晒先覺得有少少味囉!真係太低調喇! 豬太郎點指兵兵 其實對枕頭蛋糕無特別情懷嘅小編,對於入口鬆軟呢件事已經好收貨,不過既然佢咁出名,都唔怕大家俾吓意見啩!唔知占師傅睇到豬太郎話佢伏,會唔會考慮吓芝士嘅分佈呢?   入伏點:占師傅 入伏價:原味/HKD 50;芝士味/HKD 60 中伏by #豬太郎 美術by #Mui Mui 攝影by #大肚Dum 《伏務台》星期一伏務大眾,歡迎各界報料。