Tagged: 佐敦

0

【阿拉斯加蟹兩食歎特大甲羅燒 蒸蟹腳鮮味肉厚帶酒香】神燈海鮮酒家

懷念兒時味道到自己開餐廳尋味,呢份魄力你唔一定要有,但可以直接去佐敦新開嘅神燈海鮮酒家食到!呢度嘅負責人細個就跟屋企人成日去廟街食嘢,人愈大就愈掛住當時嘅味道,依家就用當年嘅酒家名自己開返間;唔止除時食到焗魚腸等懷舊粵菜,亦加入新式阿拉斯加蟹兩食呢啲大熱口味,令大家嘅味蕾有更多衝擊,即刻睇吓有幾正啦! 地下係獨立房,而一樓就係大廳同大房;裝潢簡約,座位之間幾闊落。 阿拉斯加蟹新式兩食(HKD1488/4公斤[4人份])嘅蟹蓋可以揀甲羅燒或三色芝士焗蟹蓋,而二食就可以雞油花雕蒸蟹腳或清蒸。今次小編就試甲羅燒同雞油花雕蒸蟹腳,真係啖啖肉好滋味。 蟹蓋差唔多有8吋長,放滿白雪雪嘅蟹肉、蟹膏、蟹籽再加隻蛋。 咁大份甲羅燒會易燒焦,所以有專人喺你面前即燒,撈勻煮到咁上下會加入少量花雕酒,蔥花就可以按你喜好加入。雖然咁大份但冇過鹹,仲平衡到鮮味添,而且分到4人分量多少少,真係令人好滿足! 不過重頭戲真係二食嘅雞油花雕蒸阿拉斯加蟹腳,蟹腳充滿花雕酒嘅香氣,蘸埋汁水就更香滑。而且每條蟹腳都好厚肉,係絕對鮮味嘅真蟹柳!而近蟹身嘅肉比較爽口結實,同蟹腳係兩種質感,令你有第三次嘅滿足感! 呢度仲有唔少特色菜,柑桔醬燒蝦球(HKD128)外脆唔厚粉,蝦肉爽口大隻,一啖都食唔晒。味道微微酸甜醒胃,食多幾隻都得。 蜜椒金薯牛肝連(HKD148)就用腹部邊近肋脊嘅「牛肝連」部位,一隻牛只有大約5%咋!肉味香濃,口感似爽口嘅腩肉;配上金薯、蜜椒、黑椒一齊炒,微辣香口幾惹味。 仲有負責人最鍾意菜式之一嘅富貴版招牌焗魚腸(HKD108)!將肥美嘅鯇魚腸配以日本空運農場雞蛋、15年上等陳皮炮製升級富貴版做法;而且魚腸有別一般先蒸後炸嘅煮法,反而生焗保留魚腸嘅甘香同油份。 好似炸雞脾咁大隻嘅椒鹽豬手(HKD46/件)兩件起落單。皮脆內嫩,一啲都唔韌,仲好似食緊骨膠原咁添。第一啖椒鹽味相對淡啲,不過食晒成隻就啱啱好喇。   神燈海鮮酒家  地址:佐敦長樂街14-20號18廣場地下及一樓 電話:2866 6177 / 2866 6292 營業時間:星期一至日:06:00-02:00

0

【酒店自選海鮮自助餐周日買2送2 狂食3款生蠔+海膽回本】普慶

佐敦Eaton酒店自從翻新之後推出唔少停新變革,今次就到普慶餐廳喺自助晚餐推出自選即煮海鮮市場,成為8大冷熱盤食物區之一。而且過百款食物款款高質,定價非常合理抵食。依家做緊嘅普慶餐廳海鮮市場自助餐晚市時段仲可以喺「海鮮市場」自選海鮮同煮法,加上周日凡兩位成人就送兩位小朋友嘅優惠,啱晒一家人假日食餐好。 每次食自助餐都必去嘅第一個區當然係冷盤區,呢度有齊波士頓龍蝦、長腳蟹、爆膏麵包蟹等款式之外,連生蠔都有3款咁多!一次試勻重海水味、creamy同兩者中間嘅層次。另外仲有唔少火腿、芝士同沙律添。 跟住就要去海鮮市場喇,只要攞住你嘅枱號竹籤,就可以喺度自選海鮮同烹調方法,煮起就會攞去你張枱。師傅會挑選當日三款新鮮食材,而煮法都會有蒸、炒、燒三種。 旁邊仲有唔少海鮮熱盤每日更新,其中辣酒煮花螺好大隻,煮得入味仲有咩沙添。另外,燒龍蝦、青咖喱蟹、泰式大蝦、海鮮濃湯、海鮮粥等都好鮮味,仲會時不時轉款。 香港人鍾意嘅日式料理除咗有刺身同各式前菜之外,壽司、即煮串燒同天婦羅款式都俾人好大驚喜!好似甜蝦壽司、花之卷、海膽手卷、燒蒜子、燒飯糰等都唔係一般自助餐食到㗎。 燒烤區就唔止有肉眼扒,仲有烤黑毛豬同各式烤蔬菜,滿足埋戒牛人士同素友需要添。而旁邊嘅東南亞美食就有咖喱、薄餅等熱食。 中菜區就不得了喇,有鑊氣小炒、蒸魚、各式燒味。其中米芝蓮一星叉燒同19.30推出嘅片皮鴨係一定要試㗎!不過片皮鴨只有兩隻,而且好多人排隊,最好早少少去等喇。 呢度嘅甜品區超大!入面仲細分咗朱古力、雪糕、蛋糕、中西甜點、凍餅款式。仲有師傅喺度即整班戟,想好玩啲可以自己唧雪糕筒。 飲品方就有啲懷舊feel,維他奶、各式汽水同啤酒都係任飲!   食自助晚餐有住宿優惠 依家每2位成人嚟食普慶海鮮自助晚餐仲有住宿優惠添,可以揀入住「逸.雅」(優惠價HKD388),或「逸.家」家庭套房(優惠價HKD588)一晚,同時可以享用酒店設施㗎。 入住的話可以玩埋酒店設計,重新裝修後嘅露天泳池充滿摩洛哥風情,唔游水都要嚟打卡啦。   「普慶餐廳海鮮市場自助餐」 午餐供應時間:即日起至11月30日:12:00-14:30  價錢: 星期一至五:HKD308/成人、HKD198/小童及長者 星期至日:HKD378/成人、HKD278/小童小童及長者 晚餐供應日期:即日起至11月30日:18:30-21:30 價錢: 星期一至五:HKD568/成人、HKD398/小童及長者 星期至日:HKD618/成人、HKD448/小童小童及長者 普慶餐廳 地址:九龍彌敦道380號Eaton HK B1樓層 電話:2710 1901 營業時間:星期一至日:06:30-21:30

0

【酒店歎日本精進料理 五色五味五法真.天然】素學堂

相信好多人都鍾意食日本菜,素人都唔例外!今次素學堂就帶大家去到逸東酒店Food Court入面嘅MUM日常野菜料理,試吓以日本精進料理做基礎嘅定食。咩係精進料理?其實係指日本傳統素菜,注重營養均衡之外,對食物同製作過程都有三大原則㗎!首先係紅、綠、黃、白、黑嘅「五色」食材;甜、辣、酸,鹹、苦「五味」;同埋煮食方法烤、煮、炸,蒸,切(生食)嘅「五法」。雖然可能有人會覺得淡,但其實淡味唔代表味道唔夠,而係令每樣食物充分發揮本身嘅天然味道同口感,先至係精進料理嘅重點囉! 四項小編今次就試咗日常定食(HKD100/三項;HKD125/四項),定食係會配香菇五穀炊飯、味噌湯同埋麥茶嘅。咪以為味噌湯就係味精呀!係唔同㗎!呢度嘅味噌湯好足料,用昆布同乾冬菇浸出嚟,再加白、紅蘿蔔,飲落去唔會好鹹亦唔會覺得口渴。再睇吓有咩配菜啦! 首先係野菜天婦羅(左)同金平牛蒡(右),天婦羅有秋葵、冬菇同日本南瓜,炸粉非常薄身,面頭亦有曬上海藻鹽;高纖維嘅金平牛蒡就有輕微辣味,但辣味唔會停留好耐,因為加咗醬油同味醂做少少調味,食落會帶少少甜。 秋葵湯葉含煮(左)同山葵鮮淮山(右)都好特別,小編都係第一次食鮮淮山,食落好爽口好似食緊雪梨,但又有少少滑潺潺嘅口感,點埋昆布鼓油同加啲山葵食又幾夾喎!秋葵湯葉含煮就保留咗腐竹嘅原有形態,唔會因爲太腍而散或者爛,面頭有少少薑蓉,豆味好香。 薑蔥汁煑茄子(左)同芝麻菠菜(右)就見到有綠色同紫色嘅出現啦!茄子配洋蔥同薑做汁,食落層次更加豐富但又唔會蓋過茄子味;而芝麻菠菜嘅芝麻醬係自家磨製㗎,菠菜煮熟咗再即刻用冰水浸,之後就整乾身啲,咁就唔會咁易爛又保留到口感喇! 最後到紫薯紅菜頭青蘋果沙津,小編幾推薦大家試呢個,沙津甜甜哋再帶少少青蘋果酸甜,每一啖都食到有紅菜頭粒同青蘋果粒,好開胃添呀!   MUM日常野菜料理 地址:佐敦彌敦道380號香港逸東酒店LG樓8號舖 電話:2762 0258 營業時間:星期一至日:12:00 -20:45

0

【一百有找牛扒餐中大伏 塊扒嚡口𡁻到出渣】伏務台

開心鋸扒、唔開心都鋸扒係小編嘅生活之道。見到逸東酒店Food Court嘅Confusion STEAK有平價牛扒食,即刻爬文睇吓食唔食得過,點知伏評如潮囉……好多都話牛扒勁難食,唔值排個幾鐘去等呀!小編卒之試咗,想講嘅係,希望廚師唔好浪費嚿肉啦! 為咗避開多人嘅時段,小編五點幾就去鋸扒。見到個牌寫按重量計牛扒價錢,以300g一刀起計,最平嘅肉眼扒只需要HKD78就有交易,再加HKD18可轉套餐,有飯、味噌湯、沙律、汽水或烏龍茶俾你四揀三添。話明平食,小編就試最抵嘅肉眼扒餐! 落order時廚師喺你面前即時切肉上磅秤重,小編嘅肉眼扒最終係293g,所以係HKD76+18(轉餐),HKD94都唔錯吖!不過,第一個驚嚇點嚟喇!廚師冇帶手套切肉唔緊要,但撳收銀機同找錢都係用呢隻手喎,就算有抹手都係咁話啦,嚇到小編個心離一離,好想大叫唔夠人手就請人啦! 廚師跟住用類似針機嘅工具拍鬆嚿肉之後就煎。嗱,餐廳貼咗張紙話建議三成熟係最好,而小編平時食開七成熟嘅,希望出到嚟似樣啲啦! 攞到份餐之後都覺得外表好正常吖,牛扒用洋蔥墊底,有啲血水滲出嚟。三款汁小編揀蒜油,諗住同黑椒汁最夾吖嘛,但淋黑椒汁之後,竟然出奇地唔夾喎,仲有少少酸味添。 唔理咁多切肉先,但驚嚇位又嚟喇!隻叉差啲拮唔入塊扒,小編真係眼都凸囉……一切開,入面唔係粉紅色嘅?搞到全熟咁嘅? 唔信邪再切都係咁,切到中間都仲係咁,條筋仲好有力扯住添。雖然失望都咬下啦,不過唔係好咬到,起渣喎。渣嘅畫面太有礙觀瞻,小編就唔影俾大家睇喇。不過依家小編明白點解三成熟係最好,因為出到嚟都係會變咗五至七成熟,應該係,除非唔係…… 轉戰食沙律同飯啦,正常冇咩特別,但唔能夠用肉送飯都冇咩好食囉,惟有飲汽水啦。小編仲聽到隔離枱話下次食貴啲嗰款扒可能好啲,睇嚟佢都齊齊中伏。   小編伏氣:以小編自己喺屋企煎牛扒嘅經驗,都好難過熟到成塊𡁻出渣,更何況出自一間餐廳?件扒食又咬唔落,唔食又好浪費,呢個先係最兩難嘅位。雖然價錢平到笑,但咬到喊,真係補唔返囉! 入伏點:Confusion STEAK 入伏價:HKD94 中伏by #為食加菲貓 美術by #車雲 攝影by #為食加菲貓《伏務台》星期一伏務大眾,歡迎各界報料。

0

【即叫即焗大法包人人讚 手臂咁長爆餡足料 】添記法式三文治

舊式快餐小店係香港人嘅集體回憶,佐敦嘅添記法式三文治保留七十年代嘅裝修,出名嘅係用脆口法包做嘅三文治,大size有手臂咁長添!餡料都幾 fusion,豬肝醬、鹹豬手、扎肉都有,一份2個人食都幾飽㗎。 店內有幾個座位,仲有啲乾貨可以選購。 大法包(HKD74)即叫即整,大約等10分鐘就有得食。法包烘到脆卜卜,切嘅時候有清脆嘅嗦嗦聲,彈到成枱都係麵包碎。法包先搽一層好厚嘅自家手打豬肝肉醬,兩星期左右就要整一次㗎喇。肉醬一啲都唔腥,少少鹹又肉味香濃,好惹味。然後夾啲肉脂比例平均又肉質軟腍嘅鹹豬手、勁油香嘅五香腩肉、口感彈牙嘅扎肉;最後係木瓜絲同用糖醋醃製嘅紅蘿蔔絲,酸酸甜甜,口感清爽,令成個包嘅味道都提升晒。如果食得辣,可以加啲指天椒。 如果只係少少肚餓,呢度都有啲輕食。蒜蓉包(HKD9)配蒜香味極濃嘅秘製蒜蓉醬,蒜蓉切碎加入香料,唔辣仲好滋味。 另外有啲越式小食,好似越南春卷、網皮春卷(各HKD13/3件)等等 ,同樣炸得好香脆,絕對係惹味小食。 炸龍蝦片(HKD8)可以買返屋企慢慢食,貨源由越南空運嚟香港先炸,邪惡之處係香脆但唔油呀!   添記法式三文治 地址:佐敦渡船角文苑街30號文耀樓地下A號舖 電話:2385 7939 營業時間:星期一至日:11:00-00:00

0

【回頭率爆燈! 豬頸肉×烤菠蘿漢堡至尊】Burger Lab

99.9%嘅人離開校園就唔會再入實驗室,但喺佐敦嘅Burger Lab你一定會入完再入,用料新鮮、份量足唔在講,兩位老闆仲試驗咗好多醬料同配料嘅mix and match,令每款漢堡包都別有一番風味。 等候嗰陣完全睇到漢堡製作過程㗎。 小編好鍾意呢度嘅包整得又香脆又鬆軟,強烈推介嘅係烤豬頸肉漢堡(HKD58),大大塊豬頸肉用叉燒醬同蜜糖醃,烤完會有少少焦香。中間仲有件20mm厚嘅烤鮮菠蘿,咬落啲汁會爆出嚟,要拎定紙巾食呀,成個包同沙嗲沙律醬仲好夾添。 特級牛肉漢堡(HKD88)嘅特選美國牛肉雙層漢堡扒肉味好濃,只需要極少黑椒吊味,你仲可以揀要幾成熟,老闆就話有客人試過五成熟都好得。如果想再juicy啲可以篤穿隻水煮蛋,啲黃會流晒出嚟。再配上煙肉、蕃茄、生菜、美式芝士同微微酸甜開胃秘製燒烤醬,真係食到舔舔脷。提一提各位細食Lady,成個包差不多13cm高,驚太飽可以揀返經典款。 日燒吞拿漢堡(HKD88)用吞拿魚刺身嘅肉整漢堡扒,為咗保持鮮嫩口感唔會煎到全熟。大蒜都幾多幾辣下,連埋用日式照燒醬煮嘅本菇一齊大啖食會更好,因為有啲甜味中和返。 新鮮即炸芝士馬鈴薯條(HKD28)配秘製醬汁甜甜地,再灑上芝士粉都唔覺好Heavy,小編覺得唔點茄汁仲好味。 7月開始仲會有神秘新品推出——小店試管漢堡,老闆試咗咩食物夾得好先有得買,每個月都唔同㗎。   Burger Lab 地址:九龍佐敦庇利金街14-22號3號舖 營業時間:星期一至日:11:00-21:00 電話:9213 3315

0

【進軍世界第一站 佐敦正宗日式鐵板燒】大洋軒

日式鐵板燒比人感覺溫馨又有種獨特情懷,如果想食到正宗嘅鐵板燒就要去佐敦嘅大洋軒啦!原來大洋軒喺日本已經有兩間分店,香港呢間分店係佢地第一間海外分店嚟,想食到正宗鐵板燒就一定要試下啦! 店內裝潢同擺設都充滿日式感覺,令人覺得彷如去咗深夜食堂嘅場景。 牆上貼滿唔同日本酒嘅盒同相關小海報,更加添日式情懷。 鍾意食豬嘅朋友嚟到一定要試試西班牙黑毛豬(HKD250),兩邊燒到脆脆地而裡面嘅肉仍然軟腍嫩滑,咬落去仲會食到啲肉汁咇晒出嚟,惹味香濃又多汁! 鐵板黑松露海鮮湯(HKD120)煮法非常特別,廚師會用食物袋包住蝦、大蜆、黑松露、冬菇同椰菜,再束好擺喺鐵板燒上面煮,超足料!一路煮啲香氣仲一直飄過嚟,飲落好重海鮮味,啖啖海鮮精華,再加埋黑松露獨特味道,令海鮮更惹味! 鐵板廣島蠔(HKD120)燒到啱啱好,肥美嘅蠔肉帶有蜜糖香甜味道,又不失廣島蠔本身鮮味! 明太子雞翼(HKD90)明太子作為餡料份量非常豐富,成隻雞翼漲卜卜。咬入去雞皮夠晒脆,明太子味道同嫩滑嘅雞肉非常夾,值得一試。 大洋軒 電話:9773 5722 地址:佐敦偉晴街29-37號地下6號舖 營業時間:星期一至六:18:00-02:00 星期日:休息

0

【25年Fusion功底 廟街小廚玩轉多國菜!】瑪拉小廚 Mala’s Fusion Cuisine

想食餐「好好味嘅印度咖哩」或者印度菜,唔一定要走到旺角,嚟到廟街瑪拉小廚都一樣有得食,而且仲大玩Fusion,滿足你味蕾享受!餐廳老闆係印度人,本身係一間Fusion菜館嘅總廚,入廚經驗多達25年。嚟到就可以一嚐佢嘅特色多國菜! 餐廳暗花牆配以木製檯凳同燈飾,簡潔嘅裝潢之中帶有異國風情。 呢度沙律有好多選擇,小編揀咗印度烤雞沙律(HKD138),包括多種食材:洋蔥、青瓜、胡蘿蔔、脆脆羅馬生菜、菠蘿、菊苣、黃椒、生菜、車厘茄同牛油果,入口感覺好清爽!再加埋印度烤雞更加帶點異國風味,大家仲可以淋上香草乳酪醬,成個沙律感覺會更加軟滑清新。 食印度菜當然唔少得炸物,可以配好多款唔同醬汁!印式炸魚(6件)(HKD82)魚柳好似手指咁大,以印度香料醃製同油炸,仲可以配埋薄荷、酸果醬同他他醬,甜酸辣任你揀。 呢個好似開花一樣嘅pizza就係墨西哥薄餅(HKD118),材料有水牛芝士碎、辣香腸、意式辣肉腸、白洋蔥、青椒、紅辣椒同新鮮蕃茄片。因為入面有辣肉腸,食落辣辣地加上芝士更覺細膩惹味,薄餅薄身而脆,加上多色椒同蕃茄感覺更清新爽口,係整個pizza嘅清爽亮點! 食印度菜點可以唔食咖哩呢?瑪拉小廚嘅咖哩全部都係自家新鮮製作,確保大家食到正宗印度風味。呢款印度鑊仔雞(HKD105)嘅咖哩汁由新鮮印度香草、燈籠椒、新鮮蕃茄、洋蔥、大蒜、薑同自家製辣香料煮成,咖哩汁唔算好辣,印度香料令咖哩風味十足,香辣嘅味道令人食指大動!再加埋雞肉已經去骨,完全唔駛驚食得麻煩,可以盡情食。 瑪拉小廚 Mala’s Fusion Cuisine 電話:2736 0022 地址:佐敦廟街273-275號寶發大廈地下3號 營業時間:星期一至日:12:00-23:30

0

【黯然銷魂飯現身佐敦 重新打造高質黑毛豬! 】Baby K 寶貝廚房

想去市區食返個扒,唔一定要幫襯連鎖餐廳嘅。想靜靜喺小店慢慢歎返餐,小編推介位於佐敦嘅Baby K 寶貝廚房,大家可以物超所值嘅價錢,享受用心製作嘅上佳西餐。 餐廳入面格仔檯布非常搶眼,餐廳特色牆同燈飾令人感覺舒適。 作為前菜,鍾意食薯蓉嘅你一定好難抗拒呢個香草田螺焗薯蓉(HKD78),焗過嘅薯蓉喺柔滑之中增添咗幾分香烤味道,加埋田螺作為小食或前菜都十分滋味。 嚟得食西餐,自然會對扒類有期望。K至尊西班牙黑毛豬配薯菜(HKD178)完全唔會韌,食落肉汁豐富,配埋香脆粗薯條簡直一絕!嚟到食個晚餐,仲會包埋餐湯、蒜蓉包同熱飲。 如果想食海鮮,呢個K至尊阿拉斯加銀鱈魚扒配薯菜(HKD228)就啱晒你啦。鱈魚滑嫩而唔會鬆散,鍾意嘅話仲可以配檸檬汁或者特製醬汁加倍鮮味! 選擇困難唔知食咩好,呢個海陸空(HKD128)就啱晒你啦。有齊晒魚柳、豬扒同雞扒,豬扒同雞扒煎得香脆又不失肉汁,魚柳夠晒嫩滑,加埋薯條成餐就夠晒豐富啦! 叉飯就叉飯啦!但係呢個黯然銷魂飯(HKD78)係高級版!因為選用咗西班牙黑毛豬,入口感覺額外爽脆。仲係每日11:00-18:00限量發售10份,售完即止,想食到黯然銷魂飯就要留意啦,食唔到真係好黯然好銷魂呀! Baby K 寶貝廚房 電話:3704 7821 地址:佐敦白加士街7號康寧大廈地下 營業時間:星期一至日: 07:00-23:00

0

【親民街頭食店 享受韓國美食真滋味】Haru Haru

香港人生活節奏急促,一日24小時似乎都唔夠用,呢間位於佐敦南京街嘅Haru Haru,就連個店名都令人聯想同時間有關,Haru Haru譯作「一日一日」。店舖大部分食材均由韓國入口,廚師亦係由韓國人主理。高級質素,但係價錢相當親民,一大碟泡菜炒飯只售HKD45!最適合同好友叫滿一檯食物,一邊吃飯,一邊喝啤酒,享受一頓韓風宴! 小編話你知啦,Haru Haru嘅老闆就係藝人譚淇淇,佢更會不時出現喺餐廳。想撞到佢就要去試下啦! 泡菜炒飯(HKD45)上檯陣陣香濃泡菜味撲鼻,聞到都已經流曬口水。加上蛋汁拌炒飯粒口感更香滑。另外可自行配上香蔥同紫菜,增添風味。 韓國料理必食菜式之一,人參雞湯(HKD118)湯頭濃郁,真材實料。雞肉非常嫩滑,人參味香濃但又唔會嗆,適合冬日飲碗暖下身。 小編就最愛食部隊火鍋(HKD188)啦。貪材料十分豐富,選擇夠多。湯底香濃,每樣食材都非常惹味,令人欲罷不能! Haru Haru 地址:佐敦南京街6C百達大廈地下A2-A3號舖 電話:2751 9900 營業時間:星期一至日: 12:00-00:00