Tagged: 便當

0

【銅鑼灣新開抵食日式外賣店 主打腐皮壽司+方格魚生丼】為食龍

喺銅鑼灣行街行到肚仔餓,可以去邊極速醫肚呢?為食龍就幫到你喇!講緊嘅係呢間主打日式輕食嘅外賣店,主打外型精緻嘅腐皮壽司、十幾款特色口味嘅飯糰同惹味日式便當。 叫得「為食龍」,店內裝飾都以恐龍做主題,牆上有一大隻噴火恐龍,立食嘅枱面又有恐龍公仔,非常趣緻! 呢啲就係舖頭自創嘅人氣腐皮壽司喇!全個腐皮系列(HKD18-22)一共有九款,今次就精選其中六款介紹俾大家。 每件腐皮壽司都脹卜卜,勁足料㗎。其中甜蝦蟹籽腐皮壽司(HKD20/右)就喺滿滿嘅蟹籽上面鋪咗四隻甜蝦,蝦肉食落幾新鮮。而黑松露炒蛋估唔到都可以做壽司喎,呢款黑松露炒蛋腐皮壽司(HKD20/左)面頭啲蛋多到滿瀉,非常澎湃。炒蛋夠滑身,唔會過熟,加埋黑松露醬就夠晒濃味。 鍾意食魚生刺身嘅你就可以試吓呢兩款,蔥吞拿拖羅蓉腐皮壽司(HKD22/右)啲拖羅粒都幾鮮味肥美,入口即溶,油香十足;黑松露帶子粒腐皮壽司(HKD22/左)上面嘅帶子厚身又大塊,配黑松露又幾match喎! 另外,啖啖肉嘅鰻魚玉子燒絲腐皮壽司(HKD20/右)同炙燒過嘅柚子左口魚腐皮壽司(HKD22/左)都係必食之選! 呢度賣嘅六款便當(HKD28-58)會配埋味噌湯或煎茶,喺同區算平喇,而且分量唔少,大家去開附近不妨去試吓啦。特別推介呢款即叫即整嘅方格魚生丼(HKD58),有齊大家鍾意嘅三文魚、炙燒左口魚同吞拿魚三格魚生,再加埋青瓜、玉子絲、紫菜同蟹籽,用料非常豐富! 而溏心蛋薑蔥雞扒丼(HKD48)就夠晒惹味!喺煎香咗嘅雞扒淋上薑蔥油同醬油,味道更加濃郁脆口,配埋半邊溏心蛋食就更perfect喇。   為食龍 地址:銅鑼灣耀華街3號百樂中心地下G01號舖 電話:3580 2874 營業時間:星期一至日:12:00-20:00

0

【台版「深水埗明哥」大愛 餘廚加料送暖流浪漢】食焦

唔好咁多怨氣喇!睇多啲好人好事,有時候個心都會暖啲㗎!香港有「深水埗明哥」派飯送暖,直頭係正能量代表,喺台灣都有個「明哥」翻版,一樣係暖男典範,最近俾台灣傳媒同網友讚爆!話說喺台中有間意大利餐廳「Dona多納pasta」,老闆兼大廚嘅呢位何宇淨先生,就為餐廳附近嘅流浪漢同露宿者街友,送上愛心便當。 每當深夜時分,喺台中公園附近街邊嘅變電箱上面,總會發現大概有十份包裝整齊嘅便當,就係由愛心大廚阿淨哥包辦。喺佢自家意大利餐廳打烊之後,淨哥都未收得工,佢會將當晚餐廳嘅餘廚,再加料炮製,好似上個星期寒風來襲,佢會將雞髀加米酒,整返味燒酒雞;又會用餐廳嘅蝦高湯熬生米煮粥,再加入皮蛋,真係食到暖笠笠。 寒冬嗰時就煮熱粥整米酒燒雞,又好似近幾日天氣暖返啲喇,淨哥就會煮茄汁鯖魚雞蛋麵,連唔同天氣溫度啱食啲乜,佢都諗好埋,真係超細心!煮好晒之後佢就會整成便當,有埋餐具set好晒,一份份咁擺喺餐廳對面街邊嘅變電箱度,等流浪漢自己嚟攞。 呢個舉動俾台灣嘅網友大讚感動,話淨哥送暖係台灣最美的風景添。今年32歲嘅淨哥,由洗碗出身做到大廚,舊年終於做老闆開埋餐廳,佢接受台灣傳媒訪問嗰時話,知道餐廳附近試過有流浪漢乞食情況,佢話知道每個人都有尊嚴,所以佢通常放低便當就轉身走人,佢話:「不必看見誰拿了食物,不必親手發放,不打擾的愛心就是尊重」。淨哥上個星期就喺fb度po咗段文,「9點送出奉食……剛剛10點去偷瞄一下……沒了!6盒炒飯&14碗雞湯都沒了!!!」呢份大廚愛心餐,好窩心呀!