Tagged: 健康

0

【深水埗居酒屋獨創果味和食 「蟹黃」撈飯配蘋果叉燒】夜館

可能係全港首間主打水果入饌嘅日式居酒屋?!有別於一般日式食堂,深水埗新開嘅串燒居酒屋夜館主打水果做主題嘅健康和食料理,農家蟹黃撈飯配蘋果叉燒、果味雞扒定食、特色釀雞翼等等都係呢度獨創嘅特色菜。呢度更會密密換新菜、推新品,令大家有更多新鮮感,即刻睇吓有咩好食先! 由門口入到嚟店面都有唔少日本裝飾元素,而且仲有唔同品牌嘅日本酒樽滿佈成間居酒屋,好有日本地道小店嘅感覺。 小編見黑板上大大隻字寫上廚師推介,究竟呢道農家蟹黃撈飯配蘋果叉燒(HKD98)有幾特別先?叉燒用自家醬汁加入蘋果燘煮,蘋果香味融入叉燒當中,入口清甜不膩,而且叉燒選用梅頭肉嚟煮,肉質軟腍。另外,所謂「農家蟹黃」就係蟹黃嘅平民版,用咗甘荀、南瓜同薯仔加入蟹汁壓成蓉,做法非常創新,撈飯一流。 呢款果味雞扒定食(HKD55)棄用和食常用嘅味醂同現成日式醬油,自行研發用水果調配嘅醬汁,好食兼有益!雞扒連鮮橙一齊煮,橙汁嗦埋入雞肉度,酸甜開胃。定食裡面仲唔止有一塊大雞扒,仲拼咗兩隻雞翼,相當抵食喎。 去居酒屋就梗係要食日式串燒啦,平時原隻雞翼串燒就食得多,釀咗雞髀肉嘅雞翼又食過未呢?夜館特色釀雞翼(HKD38)係呢度嘅必食串燒,師傅將雞翼拆單邊骨,再釀上撈咗杞子同淮山嘅雞髀肉,燒到皮脆肉嫩嘅雞翼串食落有兩種雞肉質感,果然係心機菜! 賣相咁搶眼嘅響鈴彩椒(HKD38)喺三色椒入面加咗少量雞肉,師傅專登唔釀得咁滿,令佢有好似響鈴咁嘅效果。燒過嘅彩椒可以鎖住釀肉嘅肉汁,都係值得一試嘅佐酒小食! 日式串燒又點止咁少喎,好似即叫即燒嘅鹽燒牛舌(HKD38[上])同鹽燒豚肉(HKD28[下])都好啱佐酒㗎。鹽燒嘅方式可以食到食材嘅新鮮原味,而串燒蘸嘅秘製醬汁都會加入唔同嘅水果嚟提味。 依家唔少地方都有得食水果串燒,其中最受歡迎就係燒菠蘿。呢度嘅焦糖燒菠蘿(HKD58)比平時就咁燒有啲唔同,師傅將原條菠蘿燒到一半之後蘸上砂糖,再燒至融化帶陣焦香,一咬落去啲菠蘿汁唧晒出嚟,夠晒juicy。 除咗嘢食,呢度嘅重點梗係日本酒啦!店主會不時搜羅唔同嘅靚酒同食客分享,仲會駐場為客人調製唔同嘅特色Cocktail添。右邊嗰杯Roku Gin Tonic(HKD88)嘅Gin酒用咗櫻花、柚子、山椒等六種日本草本材料釀造,飲落層次豐富;而左邊嘅Chita Highball(HKD98)就用咗「知多」呢款單一穀物威士忌調製而成,入口比較順滑,唔係咁多地方可以飲到㗎!   夜館 地址:深水埗長沙灣道54號地下4號舖 電話:3596 7891 營業時間:星期二至日:12:00-02:00

0

【旺角活化唐樓天台變茶室 三式和食×茶香班戟】蟲二

想搵個地方放空吓,旺角嘅蟲二就值得一去喇!呢間天台茶室最近就由百年唐樓活化嘅上海街618,打造成房內同戶外露天空間兼備嘅茶室。喺咁熱鬧嘅市區劃出寧靜一角享受中日料理,仲有兩款喺本店3rd Space人氣極高嘅茶香燒海鹽芝士麻糬班戟添。 蟲二呢個店名其實係指「風月無邊」,當「風月」去邊後就淨低「虫二」喇。雖然本店係上環普慶坊3rd Space嘅西式cafe,但呢度就主打中日料理,風格好唔同!日式擺盤融合中菜元素,室內有好多偏中國風嘅壁畫㗎。而cafe更設有露天空間,上嚟食嘢可以放鬆吓平日緊張嘅心情。 一汁三菜(HKD140/配熱茶)係呢度其中一款招牌料理,日式擺盤賣相好簡約別緻。成set有一款主菜、兩款漬物、慢煮蛋同柴魚湯。以漬物做配菜都落足心思,去皮車厘茄用咗杏脯汁醃製,仲有兩塊花蜜漬山藥添,夠晒特別。而個飯其實有兩種食法,除咗就咁配餸食之外,食到一半可以將慢煮蛋加入飯撈勻,再落柴魚湯當茶漬飯咁食。 三揀一嘅主菜就有赤味噌清酒燉豬肉、紅酒黑醋無花果燉牛肋粒同埋蘋果野菜咖喱日式雞肉,今次就試吓佢哋嘅燉牛肋粒啦!牛肋粒同蘿蔔都切成一口size,方便入口,而且都燉到非常軟腍,肉質有咬口又唔韌。個菜名有無花果,但搵唔到佢?原來無花果已經燉到融晒,令成道菜更加清甜,仲有淡淡無花果獨有嘅果香添! 3rd Space上環店嘅班戟咁出名,嚟到呢度梗係唔可以錯過啦!呢款伯爵茶傳統班戟(HKD85)並唔係梳乎厘班戟嚟嘅,而係比較有口感嘅厚身班戟,質感鬆軟有蛋香。賣點之一就係淋喺香蕉上面嘅海鹽芝士忌廉醬,炙燒後口感薄脆,味道微鹹,就好似濃稠版嘅芝士奶蓋咁,非常特別呀! 一切開原來內有乾坤!班戟中間夾住煙韌嘅伯爵綠茶味麻糬,配埋面頭嘅牛乳雪糕同芝士忌廉香蕉一齊食就夾晒喇! 想fresh啲可以試吓呢杯熱情果梳打(HKD55),入面嘅熱情果醬都係自家調配,酸甜度適中,飲落清爽開胃。 茶座嘅茶具都充滿日式簡約風格,好似香茅薄荷茶(HKD55)就用茶壺裝住上枱俾你慢慢斟嚟飲,唔驚啲茶凍得快。呢款聞落帶有淡淡薄荷香味,入口幾清新舒爽。   蟲二 地址:旺角上海街618號頂樓天台 電話:9220 9785 營業時間:星期一至日:12:00-22:00

0

【新開共享空間設魚素餐飲 植物肉入饌推低碳料理】The Green Room

餐餐大魚大肉好重負擔?依家就介紹呢間最近喺銅鑼灣新開嘅The Green Room俾大家啦!由發展共享空間嘅WeWork同餐飲品牌Leading Nation合作,打造以健康素食同可持續發展餐飲做主題嘅多用途活動空間。等你享用舒適嘅共享空間,同時可以食到輕盈、冇負擔嘅魚素餐飲。 想食頭盤沙律,就有The Green Room Salad(HKD75)同Quinoa Salad(HKD75)兩款健康之選。前者主要用時令蔬菜入饌,再配合有迷迭香、百里香同意大利橄欖油等香料混合而成嘅油醋汁,夠晒清新!而後者呢款藜麥沙律就用咗秘魯100%有機白藜麥加埋芒果、車厘茄同紅洋蔥,面頭仲有嫩滑彈牙嘅本地虎蝦做點綴添。 呢味並唔係普通嘅肉醬意粉咁簡單,而係以「未來肉」整成嘅Impossible Bolognese(HKD115)。所謂「未來肉」即係主要以大豆製成嘅植物肉,代替傳統整肉醬嘅牛肉,但原來賣相同味道都同真肉好似,絕對呃得到人!但食落就比真肉無咁膩,亦冇咁大負擔。 Butter Lobster(HKD350)用咗原隻龍蝦燒烤而成,再以特製嘅沙沙醬汁淋喺面頭。醬汁混合咗鮮蕃茄粒、橄欖油同菠菜碎,突出返龍蝦嘅鮮味添。 嚟到呢度必食Spinach Ricotta Ravioli(HKD120),即叫即做嘅意大利雲吞以菠菜、乳清芝士、日本流心蛋做內餡,配埋檸檬牛油忌廉汁,一切開就有蛋黃流出,夠晒香滑兼IGable呀! 手製薄餅都係呢度嘅特色菜之一,呢兩款薄餅嘅餅皮都係用意大利麵糰經8個鐘發酵而成,口感煙韌有咬口。經典嘅Margherita(HKD95)面頭落咗意大利新鮮水牛芝士同自家種植嘅羅勒葉;而Norway(HKD120)就放咗挪威煙燻三文魚同半熟蛋做配料。 飯後甜品有Caramelized Apple Flambe(HKD55),喺忌廉下面嘅焦糖蘋果有濃郁香料味;做法類似蘋果金寶,但加咗冧酒再用火微微炙燒,將淡淡酒香滲入蘋果當中。 Pancake Stack(HKD75)就加咗野莓同有機蜜糖,班戟蛋味濃郁,簡簡單單嘅甜品都夠晒滿足。 除咗嘢食,呢杯由著名調酒師John Nugent親自調製嘅Berries & Spice(HKD65)有紅黃漸層效果,仲加入五香粉、小豆蔻等唔同香料,喺蔓越莓梳打主調下略帶薑味,飲落幾醒胃。   The Green Room 地址:銅鑼灣謝斐道535號Tower 535 26樓 電話:3689...

0

【法國人氣烘焙店香港插旗 招牌牛角包推獨家口味】Gontran Cherrier

麵包控絕對唔可以錯過嘅法國人氣烘焙麵包店Gontran Cherrier,上個月底啱啱喺尖沙咀K11 MUSEA開業喇,自設開放式麵包工場即製麵包,新鮮出爐香噴噴㗎。而大家重點關注嘅招牌牛角包除咗原味之外,仲有6款唔同口味,入面有香港現時獨家新品添。想知道被譽為「巴黎最好食牛角包」係點就要去試吓喇!另外,Gontran Cherrier都唔止得Bakery,想食正餐同甜品,可以去埋隔離嘅餐廳同Cafe㗎。 麵包要好食,新鮮都係其中一個重要關鍵。Gontran Cherrier所賣嘅麵包全部都來自自設嘅開放式麵包工場,有師傅密密整麵包再送到對面賣,保證新鮮,經過聞到嗰陣新鮮出爐嘅麵包香味真係難以抗拒呀! 被譽為「巴黎最好食牛角包」,梗係唔係浪得虛名啦。新鮮出爐嘅原味Croissant(HKD24)表面脆身,散發住陣陣香濃嘅牛油味,入面嘅麵包帶有蜂巢狀紋理,咬落鬆軟,新鮮即食就最正喇。 賣相咁精緻嘅Raspberry Cloud Croissant(HKD28)係新口味,暫時香港獨家推出。喺牛角包上面唧上覆盆子味嘅蛋白霜,用火槍炙燒蛋白霜表面,再加上紅莓乾做點綴。雖然入面冇餡料,但食落味道酸酸甜甜,覆盆子味都幾突出。而面頭嘅蛋白霜比較難保存,所以最好都係即買即食喇。 鍾意杏仁味就必食呢款Almond Croissant(HKD26),牛角包表面放滿杏仁片再灑上糖霜,杏仁分量勁多!咬開仲有幾甜嘅杏仁餡,杏仁味夠晒濃郁,不過成個牛角包就偏甜,啱啲嗜甜嘅朋友仔。 Gontran Cherrier貫徹All Day Dining嘅飲食概念,麵包店隔離有佢哋嘅餐廳。店內裝潢以綠色、木質做主調,感覺舒適寫意,約埋朋友喺度食Lunch或者Dinner都幾chill喎。 呢款Gontran Salad(HKD138)喺沙律界嚟講,層次夠晒豐富。有生菜、蕃茄仔、蘑菇等蔬果之外,仲加入牛油果、蘆筍、無花果乾同軟芝士,食材新鮮,入口幾fresh,呢款沙律嘅口感同味道都絕對唔單調呀! 呢個黑白配就不得了喇!Squid Ink Risotto & Seafood(HKD120)喺以墨魚汁整成嘅Risotto,淋上用唔同海鮮煮嘅忌廉汁,海鮮分量仲好多添,creamy之餘又啖啖鮮味。 呢款Fish Fillet in Provencal Sauce(HKD220)都係小編嘅心水嚟,海鱸魚肉啖啖鮮嫩,配埋蕃茄味濃嘅普羅旺斯汁就夾晒喇。   Gontran Cherrier 地址:尖沙咀梳士巴利道18號K11 MUSEA B2樓B205、B206、B207號舖...

0

【潤腸排毒Fruit Smoothie Bowl 顏色鮮艷打卡一絕】懶健康貼士

慢活對都市人嚟講幾奢侈,但係歎一個快速製作,可以打卡又潤腸排毒嘅Fruit Smoothie Bowl就一啲都唔奢侈,睇吓呢個Bowl有咩重點材料啦: 火龍果嘅植物性白蛋白比一般蔬果多,可以同人體內嘅重金屬離子結合再排泄出體外;而佢嘅種子亦有促進消化同潤腸嘅功效。 香蕉有豐富嘅膳食纖維,仲含有果膠添,對潤滑腸道同通便都有效。 奇亞籽既有抗氧化功效,佢嘅可溶性膳食纖維可以促進腸道蠕動,防止便秘。 健康有喇,如果想打埋卡呃like可以提前一晚切好生果,放入冰格冷藏,第二日攞出嚟攪拌後質地會黏稠啲,喺雪糕同雪葩之間;如果放保鮮櫃就會似奶昔,但係擺將其他生果放而會容易下陷。選用唔同顏色嘅生果唔止健康啲,打卡都靚啲。 Fruit Smoothie Bowl 材料: 紅心火龍果 – 2個 香蕉 – 1條 益力多 – 1罐 面料: 藍莓 – 適量 奇亞籽 – 適量 奇異果 – 1個 香蕉 – 1條 做法:...

0

【新開高療癒度Dustykid主題茶食亭 自創四味果茶+烘焙輕食】心事如塵茶食亭

茶飲店愈開愈多,呢間喺上環嘅心事如塵茶食亭又有乜特別呢?原來呢度係本地人氣插畫「Dustykid小塵」啱啱開嘅主題茶飲店!一向擔當療癒角色嘅Dustykid,今次就以茶食呢個形式同大家見面,其中酸、甜、苦、辣四味為主題嘅茶飲同烘焙小食做主打,仲有即食果乾cheer up各位香港人添。 呢間茶食亭嘅裝潢幾簡約,一邊擺滿唔同款式嘅小食、果乾,另一邊就主要賣茶飲。店面有唔少Dustykid嘅圖畫同字句,門外仲有張長櫈俾客人坐喺度借閱Dustykid嘅書relax吓。 創作Dustykid嘅本地插畫家Rap Chan認為茶食亭呢個渠道更容易接觸到唔同人,令更多人得到呢份治癒感。「希望嚟呢度嘅客人無論有咩心事都好,都可以透過茶飲、食物,同埋喺度搵到嘅字句安慰返你。」 右邊呢款爆檸什酸梳打(HKD35)標榜無糖,以青檸、西柚、檸檬、鮮橙幾款水果再加入梳打,呢幾款橘類水果配搭特別match,飲落好清新,有水果本身天然嘅酸甜味。而左邊就係芝士奶蓋四季春(HKD36),芝士奶蓋厚得嚟面頭灑上岩鹽,令飲品嘅層次更豐富。 其中一款主打飲品係仙草三青茉莉綠(HKD32),以甘苦為主題嘅特飲用咗青瓜、苦瓜同西芹做成「三青」,平時唔飲五青汁嘅小編都覺得幾易入口。呢款飲品有一定嘅排毒同美顏功效添,係注重健康人士嘅首選。 除咗手調飲品之外,呢度仲有冷泡18個鐘之後茶底濃郁而唔苦澀嘅冷泡茶。冷泡塵茶王(HKD24)係鐵觀音,而冷泡塵茶后(HKD24)就係白桃烏龍,兩款茶選用嘅茶葉都係來自台灣南投㗎。 舖頭有賣唔同款式嘅自家製即食果乾(HKD15/包;HKD40/3包),全部都以原塊水果製成,全無添加劑同糖分。其中火龍果乾、蕃茄乾、西柚乾等等喺出面比較少見。 烘焙小食(HKD15/包;HKD40/3包)有鬆脆曲奇、手工蛋糕同布朗尼蛋糕三個系列,可以隨意配搭自己鍾意嘅口味。其中伯爵茶牛油蛋糕真係以伯爵茶葉而唔係茶精整嘅,茶味香濃。而每款小食上面都印有唔同嘅插畫同字句,好有心思喎。 想加入環保行列,仲可以買埋呢個咁可愛嘅Dustykid手搖杯套(HKD100)返屋企添。   心事如塵茶食亭 地址:上環皇后大道中255號曼哈頓大廈地下G01B號舖 電話:2784 1882 營業時間:星期一至日:12:00-20:30

0

【Fusion越式三文治新品率先睇 8月首推四川紅燒牛肉】Le Petit Saigon

以為越式三文治來來去去都係差唔多味?咁諗就錯喇!呢間喺灣仔嘅越式三文治外賣店Le Petit Saigon由依家至十二月,每個月會聯同其他餐廳大玩crossover,輪住推出六款每月限定特色越南三文治,fusion台、中、泰、日口味,就連偏門啲嘅旁遮普菜式都有,新鮮感十足!依家小編帶大家率先睇吓其中四款三文治新品啦! 呢間越式三文治外賣店單睇個樣已經充滿越南風情,一入到就望到個放滿法包同各式配料嘅食物櫃。全部三文治都係即叫即整,連法包都係嗌嘅時候先烘熱,保證你拎上手都仲新鮮暖笠笠。雖然呢度主要做外賣生意,但都好貼心咁放咗幾張高腳椅俾大家坐低速食。依家睇吓佢哋嘅出品啦! 嚟緊八月限定嘅越南三文治就係佢喇!呢款中式四川口味越南三文治(HKD88)係由粵菜餐廳口利福主廚Kelvin Ng設計,靈感來自於四川名菜「夫妻肺片」,入面夾咗紅燒牛肋骨同牛舌,牛肉味都幾重;牛肋骨肉嘅軟腍再加上牛舌嘅爽口,有雙重口感添。配埋雲南青辣椒、焦糖洋蔥等等,食落非常惹味! 當越南三文治遇上日式吉列豬扒又會擦出咩火花呢?九月登場嘅日式越南三文治(HKD88)由超人氣居酒屋Fukuro主廚Shun Sato合作推出,以Fukuro自家製嘅吉列豬扒做主角!吉列脆皮厚度適中,肉質鮮嫩;配上酸甜帶微辣嘅惹味豬扒醬同和風芥末醬,外脆內軟好滋味。 而十月份就輪到旁遮普式越南三文治(HKD88),用上米芝蓮星級旁遮普菜餐廳New Punjab Club出名嘅泥窖烤雞入饌,加入多款香料調製成嘅沙律、乳酪、羅望子醬等印巴菜特有嘅配料,香料味特別濃郁,都幾辣吓㗎,重口味人士必食呀! 十一月份同BELON聯乘嘅三文治款式係隠藏版,依家賣個關子先,睇住十二月嘅泰式越南三文治(HKD88)啦!由泰菜餐廳Soul Food Thai主廚Noom設計嘅款式係以咖喱手撕牛肋骨做主角,而一條條脆卜卜嘅就係炸泰北金麵,再加入涼拌西瓜,成個三文治辣中帶甜,層次夠晒豐富呀! 同場加映長青嘅經典越式三文治(HKD88),係舖頭熱賣招牌款式嚟㗎。餡料有獨家秘製嘅豬頭肉凍、醃菜、越南辣椒、青瓜等等,咁多蔬菜令入口感覺清新。食住咁地道傳統嘅越式三文治,差啲以為自己去咗越南添呀。 介紹咗咁多款特色越南三文治,全部都啖啖肉,依家就介紹返一款素食越南三文治(HKD88)啦。中間夾住炸到金黃香脆嘅炸豆腐,外皮香脆入面滑嫩,味道唔會太淡口,亦唔覺膩,可以同素食友一齊嚟喇。   Le Petit Saigon 地址:灣仔永豐街16號地舖 電話:2455 2499 營業時間:星期一至日:11:30-21:00

0

【營養師解剖五大冰品 100%水果棒健康度滿分】懶健康貼士

每個屋企嘅雪櫃到咗夏天一定有雪糕、雪葩或者雪條呢類冰品。雖然食得多凍嘢對身體唔好,但真係熱到好難頂,惟有揀質素好啲嘅冰品啦。註冊營養師Moses比較咗市面唔同製法嘅冰品,話你知邊種製作方法健康啲!   傳統美式雪糕(American Style Ice Cream) | 健康程度: 1 星 傳統美式雪糕嘅基本材料係奶油、牛奶同糖。呢啲係製造雪糕好重要嘅材料,因為牛奶同奶油嘅脂肪可以穩定雪糕嘅結構,令雪糕更加香甜同滑身。不過同時亦增加唔少熱量,而且奶油同牛油屬飽和脂肪,攝取過多會增加患心血管疾病嘅風險。 建議: 買之前先睇營養標籤,盡量選擇較低脂或少糖嘅牌子。 食迷你版雪糕控制分量,例如Dreyer’s Collection Mini一枝約137卡路里。   乳酪雪糕 (Frozen Yogurt Ice Cream) | 健康程度: 2 星 雖然聽落去乳酪雪糕好似比傳統雪糕健康,但唔好跌入呢個陷阱呀!因為乳酪雪糕用較多脫脂奶品,所以總脂肪比傳統雪糕較低,但係糖份會偏高,屬高糖食物。以一茶匙5克糖計算,每100毫升裡面已經有高達4茶匙糖份,導致熱量都偏高㗎。   雪葩 (Sorbet) | 健康程度: 3 星...

0

【咩人啱食cheat meal瘦身? 4條是非題搵「對的人」】懶健康貼士

你依家有冇食緊健康或瘦身餐單?有冇覺得痛苦,想食餐cheat meal獎勵自己?如果有,你就要繼續睇落去,等My Fitness營養師Moses話你知點樣同幾時可以獎勵自己! 咩係cheat meal「作弊餐」? Cheat meal「作弊餐」又可以叫「獎勵餐」,係健身或健美人士經常用嚟氹自己嘅方法。因為佢哋大部分時間都嚴格跟足指示食得好清淡,所以每星期其中一餐放吓假唔使按原來計劃,可以放縱大量食鍾意嘅食物,然後再繼續原來嘅餐單同訓練。所以依家好多健身人士會利用cheat meal養成平時食得清淡健康嘅動力同習慣,亦引進到減肥人士身上,令大家更有恆心跟足飲食計劃。 堅守作弊「餐」 有人用呢個方法成功瘦身,亦有唔少人最後失控收場。失敗嘅人通常將作弊「餐」變成作弊「日」,甚至作弊「週」嚟補償自己之前嘅痛苦,磅數當然打回原形,甚至反超前啦。所以平時要保持愉快嘅心情去進行健康餐單,避免一下子太清減而令自己覺得痛苦,到cheat meal嘅時候就唔會出盡力去食先補償到自己啦。如果你發現自己好期待cheat meal嘅嚟臨,咁就係身體俾你嘅警號,表示平時嘅餐單太痛苦,係時候要調整喇。 是非題辨認「合適人」! 想知自己依家嘅狀態係咪適合用cheat meal呢個方法,可以回答下面4條是非題搵出答案: 1) 食完cheat meal之後,你係咪覺得內疚? 2) 你開始瘦身餐單之後,係咪大部份時間覺得難捱呢? 3) 你唔能夠控制偶爾嘅放縱? 4) 你係咪做大量高強度運動去抵消cheat meal嘅熱量?* 如果其中一題你答「係」,咁cheat meal嘅模式或你依家嘅飲食方法可能唔適合你,好難持之以恆帶嚟成效。如果你自己試過無數餐單都未能夠抱住輕鬆愉快嘅心情持續進行,可以搵個註冊營養師做詳細嘅飲食評估,搵出致肥原因同提供適合嘅飲食建議。 (*如果平時食多咗少少肥嘢或分量多咗少少而做返多啲運動係冇問題嘅,但因為要食cheat meal而突然做好多高強度運動就會適得其反,有可能因為過量運動而導致肌肉疲勞、免疫力下降、頭痛、抑悶等,影響到我哋平時生活就出事喇。)   Moses Lee 現為“My Fitness”註冊營養師、澳洲營養及飲食治療碩士同澳洲營養師協會會員,擅長體重管理同運動營養。曾於醫院、社區中心、教會同非牟利機構等地方提供營養服務、舉辦營養講座同烹飪示範。現在為有需要控制體重嘅人士同運動員提供營養治療,制定飲食方案。

0

【懷舊冰室南豐紗廠試業 地道茶餐+手搖茶飲1折起】王牌冰室、王牌冰茶

作為打卡聖地之一嘅荃灣南豐紗廠,入面啲餐廳都極具特色。啱啱由大圍殺過嚟,喺南豐紗廠開新店嘅王牌冰室同王牌冰茶都有唔少打卡位,店外有特色百子櫃,店內有懷舊霓虹燈牌配「是是旦旦叉燒蛋飯」搞笑句子等等。試業期仲有唔少激筍優惠,5月20日開始一連九日嘅平日,堂食指定套餐同桂花系列手搖茶飲首日一折,第2日二折,第3日三折,如此類推至第9日就九折。講咁耐,即刻睇吓有咩人氣菜式先! 熱門麵食 王牌特濃沙爹牛肉麵(HKD36/早餐;HKD44/常餐)之所以做到王牌推介,係因為佢唔同一般茶餐廳只係喺雞湯底上面淋少少沙嗲汁,而係直接將沙嗲汁加入湯底煮成「沙嗲湯」!成碗麵味道超濃厚,仲慢慢滲出花生醬味,食過一定返唔到轉頭!牛肉煮得入味同夠滑,分量仲幾多添。個餐跟埋牛乳炒蛋、牛油多士同熱飲,亦可以轉蒜蓉多士(加HKD2),咩時段嚟食都夠飽啦。 爆香蔥油煎豬扒撈公仔麵(HKD49)嘅豬扒大塊到要摺埋上碟,食晒其實幾飽肚。撈勻啲麵仲聞到蔥油香,色香味齊全喎。 王牌鑊氣推介 招牌之一嘅特濃牛乳炒滑蛋叉燒蝦仁雙拼飯(HKD58/午餐;HKD64/晚餐)俾滑嘟嘟嘅蛋皮包住,見到juicy嘅蛋汁同秘製甜豉油已經流口水囉。加上大大件又軟腍嘅叉燒,配埋爽口大蝦,啖啖肉勁滿足! 餐廳專登搵懷舊嘅圓形麵餅整成脆炸肉絲炒麵(HKD52/午餐;HKD58/晚餐),幼身麵條炸得好鬆脆,仲夾得好方便添。而且餸料另上,唔會浸腍麵餅。 另一款特色菜係咖喱吉列豬扒飯(HKD54),同樣有超大大塊豬扒,炸過依然肉嫩多汁。吉列脆漿夠薄又唔會油淋淋,加埋香濃嘅咖喱汁撈飯一流! 邪惡下午茶 好多人出街食飯都想喺邪惡同家庭味之間攞個平衡,香煎肉餅飯限定下午茶(HKD30)就啱晒喇。煎到微微焦香嘅肉餅撈埋蛋汁一齊食,係加分嘅配搭呀! 沙爹牛肉潛艇(HKD32)夾滿牛肉,麵包吸埋沙爹湯汁,可以將所有精華食晒。 經典常餐 瑞士汁雞翼撈麵(HKD46)係冰室不可或缺嘅菜式之一,雞翼煮得超入味,肉質軟腍嫩滑。想濕口啲可以揀湯麵,跟埋牛乳炒蛋、牛油多士同熱飲都幾滿足。 三款爆餡三文治之中,芝士鹹牛肉炒蛋(HKD36)係最受歡迎。想食到滑溜嘅口感就唔好掛住影相喇,趁熱食呀!   9日「瘋狂折扣」低至一折 堂食指定套餐就有優惠喇。 健康手搖茶飲 王牌冰茶主打健康手搖中國茶飲,所以用咗冰糖控制甜度,即使正常甜度都有清潤嘅感覺。特別之處仲有品牌自製健康配料,手工桂花珍珠(HKD4)、清香桂花凍(HKD5[右])同蜂蜜洛神花凍(HKD5[上])都好有咬口㗎。 5月20至30日期間嘅平日,桂花系列四杯飲品同樣有「瘋狂折扣」優惠,每人每日限購一杯。如果想要香濃茶味有桂花珍珠 • 觀音王(HKD27[左]),鍾情台式風味又有桂花珍珠奶茶 • 龍井(HKD27[右])。 5月31日至6月30日又有「追加優惠」,只要點豐乳奶蓋(HKD29)或黃金奶蓋 • 觀音王(HKD35[左])就可以按對應日子,用優惠價追加同款奶蓋一杯,星期一加HKD1,星期二加HKD2,如此類推。 呢度嘅奶蓋質地幾綿滑,又唔會過濃而掩蓋茶香。焦脆奶蓋 • 觀音王(HKD35)薄薄嘅焦糖脆片令奶蓋鹹中帶甜。介紹咗咁多款,說好的健康手搖中國茶飲出場喇,選擇多到不能盡錄囉: 佛檸馬蹄 • 龍井(HKD26[左])清甜爽口;王牌鮮果茶(HKD38[中])有多款足料水果;冰燉雙柚觀音王(HKD30[右])就幾解滯。 女士恩物桑寄生赤棗普洱(HKD26[左])同赤棗桂圓茶(HKD23[右])都有size大粒嘅赤棗,齋睇已經feel到滋補,飲完食埋啲料更加不得了!...