Tagged: 冷麵

0

【牛池灣街市貼地小店 必食隱藏版冷麵+懷舊盅飯】街霸

最近有街坊同街霸報料話牛池灣街市都有好西喎!街霸今集就一於去搵食啦! 舊式街市格局多數都係地下同1樓賣乾、濕貨,2樓就係熟食中心,呢度都唔例外! 第一間去食發記美食中心,舖頭細細但其實Menu都幾多選擇,不過唔少都係「隱藏Menu」,只有街坊熟客先識嗌㗎咋!Menu主要有公仔麵餐呀、普通常餐嘅選擇。今次街霸就要試試街坊們特別推介嘅飛碟(HKD27/連冷熱飲)同招牌冷麵(HKD27/連冷熱飲)。 飛碟總共有2個選擇,今次街霸叫咗芝士鹹牛肉同火腿芝士。飛碟呢種簡單小食,依家都唔係咁多地方食到喇!一隻好食嘅飛碟,除咗必需新鮮熱辣辣之外,烘到外脆內軟亦非常重要! 食芝士乜乜三文治,最怕就係塊芝士成塊唔溶凍冰冰。呢隻飛碟嘅芝士溶化得超完美,同鹹牛肉融為一體,用嚟做早餐超醒神呀!咬落脆卜卜,但內餡又超鬆軟,簡單小確幸呀! 另外招牌冷麵亦非常耍家!呢個冷麵貌似係一個隱藏Menu,因為當街霸問店員阿姐係咪有冷面嘅時候,佢呆一呆講咗句「咦!你又知有冷麵嘅?」睇嚟呢個冷麵唔係咁易食到喎! 麵底用公仔麵,餸有幾塊鴨胸、火腿絲同生菜絲等等。醬料方面酸甜得嚟又帶點辣,食落幾開胃。呢個冷麵喺出面應該真係食唔到㗎喇,因為呢個recipe似係喺廚房即興諗出嚟咁,好似9唔搭8,但食落又幾好食喎! 鴨胸不嬲都習慣攞嚟做冷盤,同酸酸甜甜嘅冷麵食落幾夾! 冷麵分量好足,目測應該唔止一個公仔麵,酸甜汁加埋生菜令到成個麵愈食愈開胃,感覺好fresh。街霸覺得呢個隱藏版冷麵唔錯喎! 行到熟食中心嘅盡頭就會見到呢間都幾多公公婆婆幫襯嘅新源茶樓喇! 街坊話佢哋嘅盅飯最值得食,話因為依家真正將「生米蒸成熟飯」嘅盅飯唔係咁易食到喎! 鳳爪排骨盅飯(HKD21)料非常足,排骨有成6、7嚿,鳳爪亦有一大隻,三隻腳趾齊晒! 排骨咬落頗腍,肉味略嫌有啲啲唔夠,應該係雪藏肉。不過呢個價錢唔可以要求太多喇!因為呢個飯嘅重點其實唔係啲餸,係飯呀! 呢個生米蒸飯真係不得了!我諗只有舊式嘅傳統茶檔先會做到呢個味道喇!飯粒粒粒分明,一啲都冇黐住,撈埋豉油食就最夾喇!21蚊大大碗食到攬住肚仔走!抵喇! 茶檔阿姐話牛肉腸(HKD17)亦好受歡迎,皮薄餡靚,食到腸粉嘅米香。坐底歎個早茶,食個傳統盅飯同點心其實真係人生一大樂事!茶檔風味唔係依家大商場酒樓可以feel到嘅感覺!   街霸最愛:今次街霸最surprise係發記嘅飛碟同冷麵!因為呢種咁學生年代嘅平價小食真係買少見少喇!飛碟外脆內軟,咬落爆晒餡,夫復何求呀!另外隱藏版嘅冷麵亦好好食,雖然唔係啲咩山珍海味、或者好特別好有gimmick嘅食物,就係樸實嘅平民美食囉! 發記美食中心 地址:彩虹牛池灣街市熟食中心2F 2-3號舖 電話:2538 4785 營業時間:從缺 新源茶樓 地址:彩虹牛池灣街市熟食中心 2F 8-9 號舖 電話:2726 4770 營業時間:06:00-15:30

0

【主打日式素食料理 $38歎即製素鰻魚便當】素學堂

舖頭細細嘅知味駅素食隱身喺沙田愉翠苑街市,雖然座位得幾個,但知音人多籮籮,尤其係家長呀,訪問期間眼見好多人嚟買外賣!因為呢度主要售賣日式素食料理,連素刺身都有,俾小朋友食都唔使驚呀!菜式都有唔少選擇,由壽司、刺身、天婦羅、便當樣樣有,全部新鮮即製添!佢哋都有做到會服務,素食朋友想開Party都冇難度啦! 呢度價錢親民,但用料絕對唔馬虎!好似天婦羅,老闆就用咗日本南瓜,用料靚連非素食者都會嚟幫襯㗎。 手撕雞冷麵(HKD38)不論外形同味道都同真嘅極度似,配榨菜絲、青瓜絲、芝麻醬一齊食好香口!白色素麵口感幾清爽彈牙,夏天食就最啱喇。 日式燒汁素鰻魚飯(HKD38)用圓形日式便當盒裝,同餐廳比都唔失色。飯選用珍珠米,壽司醋只係落少少,味道唔會好酸。素鰻魚扒由腐皮卷成,層層疊幾有口感;淋咗燒汁同炒香咗嘅白芝麻好香口。最後食埋黃蘿蔔、酸薑同埋青瓜仲可以消滯添。 香芒吉列卷(HKD26/4件)顏色鮮艷好吸睛。芒果好香甜,壽司卷入面包咗炸素魚塊、子薑同青瓜,入口酸甜清香,都幾開胃。 老闆建議台式燒肉刈包(HKD22/2件)新鮮即食係最好,刈包熱食會軟熟啲,口感同味道似中國嘅饅頭。入面有一塊香脆可口素炸豬扒、開胃酸青瓜、蕃茄同自家製嘅酸甜微辣芥末沙律醬,好豐富呀!   知味駅素食 地址:沙田牛皮沙街2號愉翠苑街市地下2號舖 電話:9458 5190 營業時間:星期一至日:10:00-20:30(老闆隨心放假,記得留意佢哋Facebook呀)

0

【易到爆至fit食譜 涼浸浸低卡柚子冷麵】懶健康貼士

天氣熱無胃口又唔想出街食,呢個低卡柚子冷麵就幫到你喇!健康又好味,最緊要係5分鐘就食得,手殘都識煮呀! 柚子寒性,有止咳化痰、潤肺清腸等功效。柚子含有豐富維他命C,有助吸收鐵質,減輕缺鐵性貧血情況;而柚皮甙可以降低膽固醇同血液黏度,減低血栓形成及中風嘅機會。 柚子冷麵 材料: 幼麵 1人前 麻油 1-2湯匙 豉油 2-3湯匙 醋 1-2湯匙 鹽 1茶匙 柚子醬 1湯匙 海苔 隨意 青瓜絲 隨意 蘿蔔絲 隨意   1. 幼麵煮熟後用冰水過冷河,然後用麻油撈麵。 2. 將豉油、醋、鹽溝勻做冷麵醬汁。 3. 淋上冷麵醬汁、柚子醬及海苔就食得。 紅都面晒無添加,零胭脂都唔再怕。

0

【㗎妹甜 韓妹醇 川妹辣 中日韓冷麵激戰連場】韓宮、拉麵來、慶麵

夏天食熱嘢,就算冷氣幾勁都好,一樣可以食到大汗疊細汗,但係食冷麵就可以舒舒服服,降住溫咁食喇。除咗蕎麥麵、冷烏冬同水冷麵之外,下面呢三款中、日、韓特色冷麵你一定要試! 黃埔地鐵站一上嚟就見到韓宮,呢度由一位韓媽媽做大廚,絕對食到正宗韓食嘅味道。唔好以為食傳統韓食就等於一成不變,老闆娘耐唔耐就會引入一啲韓國潮流菜式㗎喇。 呢個冰豆漿冷麵(HKD108)就係依家韓國大熱食品,連冰上嘅冷麵唔太常見㗎。湯底用韓國飛過嚟嘅豆漿煮成,唔會因為啲冰溶咗而變得淡口,清甜無油,成碗湯飲都得。溝埋黃豆粉會杰啲,但豆味會更加香濃,一啖麵一啖湯咁食係最好嘅食法,唔好就咁夾一撮麵咬呀。 韓宮 地址:紅磡黃埔新村民兆街16號地舖 電話:2334 5567 營業時間:星期一至日:12:00-23:00   拉麵來老闆同2010﹣2011年度「全日本拉麵大賽」獲獎嘅日籍拉麵師傅小林宏結緣之後,一齊為香港食客調配出唔同口味嘅拉麵。老闆話日本其實有好多五花八門嘅拉麵,唔係得豚骨湯底、味噌湯底同醬油湯底咁單調。 旺角分店同總店一樣用返日本懷舊feel嘅裝飾,有時空穿越嘅感覺。 未食有機豆乳擔擔冷麵(HKD92)之前,小編以為會好辣,點知一飲啖湯原來係重有機日本豆奶嘅清甜味,之後先慢慢滲出輕微鹹鹹辣辣嘅豆板醬味道,好啱夏天食。湯底預先雪凍咗,而自家製拉麵過冷河之後會更加彈牙爽口,呢樣亦係佢哋嘅賣點之一。配菜用有機豆腐、日本青瓜、日本芝麻、日本京蔥同豬肉碎,集清新、爽甜同香口喺同一碗麵,如果想食齋仲可以走肉碎添。注意:呢個麵係期間限定,10月左右會轉做大閘蟹拉麵,到時想食要等出年喇。 拉麵來 地址:旺角黑布街23號地下 電話:2715 0811 營業時間:星期一至日: 12:00-23:30 拉麵來(總店) 地址:大坑浣紗街20-22號地下B舖 電話:2808 4468 營業時間:星期一至五:11:30-16:00;18:00-22:30;星期六、日及公眾假期:11:30-21:30   大角咀愈來愈多餐廳,慶麵都喺度插旗。老闆身兼大廚,原本想學上海菜,但機緣巧合之下接觸川菜之後,發現佢變化多啲。加上老闆鍾意食辣,所以餐廳就以川菜做主打。 「慶」字嘅來由原來係老闆爸爸個名,細個係爸爸教佢煮餸,咁開餐廳當然要紀念一下啦。 冰火冷麵(HKD34)顧名思義又凍又火辣辣啦!雖然係中菜,但麵底揀咗比正常粗嘅拉麵,老闆話咁樣啲汁會更易掛上麵。質地煙煙韌韌,口感唔錯。撈麵嘅汁用咗幾種辣椒——青麻椒、野山椒同指天椒秘製而成,味道由開頭嘅辣到後尾會變成麻辣,變化出唔同層次。小編食到一半飲啖水,麻辣嘅感覺即刻衝擊成個口腔,愛好食辣嘅朋友必試! 慶麵 地址:大角咀角祥街2號J地舖 電話:2609 0966 營業時間:星期一至日: 12:00-21:00

0

【韓系4℃夢幻冷麵】The Joomak

嘩!精緻兩個字通常用黎形容西餐,但今次絕對可以用返依兩個字嚟形容韓國菜,韓國菜一諗到就係炒年糕,石頭鍋飯,韓燒等等,好似食黎食去都無啲新意思,但究竟精緻既韓國菜有咩咁特別?同一般韓國菜有咩分別,真係要細心品嚐一下先得。 傳說韓國光州流行一種4 ° C冷麵食法,麵條保持喺4 °C最爽滑!呢款4° C 豚肉冷麵 (HKD78),令你唔駛去到光州都食到地道爽滑冷麵。麵條經過嚴格冷熱調製,控制到唔腍唔硬啱啱好,非常爽滑彈牙。為咗保持麵條喺4 °,食器入面仲擺咗大量冰塊,上枱果陣出晒煙,非常夢幻!建議大家食嗰陣將麵條、配料及醬汁放落碟再拌勻食,仲要喺冷麵上枱之後15分鐘之內食晒呀,咁就最好味啦! 鍾意食芝士嘅朋友一定要試下呢個紫菜x溶岩芝士包(HKD228)啦!事關呢個芝士非常有心思,一共混合咗五種芝士調製,仲非常考究咁將芝士用唔同溫度加熱,先至再即時倒入外皮卜卜脆嘅特製方型麵包裡面混合。拉出一呎芝士絲不是夢!小編推薦食嗰陣將紫菜包住小食,再隨意加上泡菜,沾上特製芝士一啖過!咁樣表層有香濃芝士包住,底層又有小食香脆口感,幾個層次一啖過享受晒!小食一共四款,包括有招牌炸雞、炸韓國年糕、炸魷魚同埋炸翠玉瓜。 ICE STORM(HKD68)呢款士多啤梨冰沙出奇咁香滑,一飲落去酸酸甜甜,再慢慢滲出士多啤梨嘅果香味,令人一試難忘。加埋冰筒有保溫嘅效果,唔會咁快就溶晒,就算抖陣再飲都依然咁香濃! 鍾意拼盤嘅朋友可以試下Joomak Plate (HKD158),入面有家鄉醃菜飯卷、泡菜芝士三文治、甜酸炸雞、士多啤梨慕思同埋沙律。呢個拼盤有傳統菜式之餘亦有新派三文治,加埋充滿肉汁嘅炸雞、香滑士多啤梨慕思同埋沙律,一次過滿足晒小編五個為食願望! Joomak出名鬼主意多,菜單又有創意,混入多種驚喜元素,大蜆泡菜炒年糕意粉(HKD108)就係一個好例子,泡菜同年糕原來已經可以成為一道菜式,但加上大蜆同意粉,口感提升咗另一個層次。 韓式牛肉墨西哥飯卷(HKD78) 如果大家鐘意其他異國風情食物嘅話,依個飯卷絕對適合你,佢混合韓、日、墨西哥風味係依個飯卷上,本身整個以日本手卷為藍本,但用墨西哥餡餅取代紫菜包,最後餡料選用韓式牛肉,牛肉味濃,食落難以忘懷,此外,飯卷以外仲有沙律菜伴碟,盡見心思。 The Joomak 地址:尖沙咀廣東道17號海港城海運大廈3樓LCX 34號舖 電話:2111 0851 營業時間:星期一至日: 11:30-22:30

0

【潮食Fusion車仔麵】Noodies

西營盤一帶尤其係第三街真係宇愈來愈旺,想搵到好野食真係好容易!一向覺得食車仔麵都係頹頹地,油麵米線米粉咁樣,menu上面更加唔會見到英文。除左例牌中式麵之外,仲有齊星馬泰日韓越嘅麵同湯底,想點配搭都得,係咪好新奇呢。門面仲大大隻字標榜無加味精添! 麵店細細間,但座位尚算舒適。 話得係車仔麵就當然有得俾你自由配搭點剔都得啦!基本兩餸麵$46碗,如果再追加標準餸就$6,升級餸好似廣島蠔,帆立貝,糖心蛋就加$12款 留意黑板上面會有每日精選。 如果著住淺色衫驚自己食得太興奮彈烏糟件衫,可以用餐廳提供嘅紙圍巾,好貼心嫁! 有選擇困難症嘅你都唔洗怕!餐牌都有已經set好左嘅麵,唔洗慢慢揀。 由於我都係有選擇選難,一於試個人氣之選!有芝士嘅叻沙湯底你食過未?原來都夾到嫁播! 天氣咁熱,食返個夏日冰之選就perfect啦!有冰鎮薯粉同冷麵醬油做湯底,食落好refreshing!可能我食得慢,d冰一融左醬油味道變得比較淡。如果要食依款麵唔好食得太慢呀! Noodies 西環西營盤第三街56號福滿大廈地下E舖 星期一至日: 11:00-21:30