Tagged: 刺身

0

【日式料理新店3大主打 壽司×蕎麥麵×日本酒】SUSOSHU

高質嘅日式餐廳都有自己獨特嘅賣點,而尖沙咀新店SUSOSHU就以「壽司 Sushi」、「蕎麥麵 Soba」同「日本酒Nihonshu」三大元素做主打。呢度有正宗日本地道手法嘅午餐同晚餐,無論係料理款式定係壽司款式,都會用上日本多個地方直送嘅新鮮食材,務求令你有置身日本嘅感覺。依家新張期間,午餐第二位仲有7折優惠添。

0

【鬼怪風日式燒肉放題店 任食高質和牛拼盤回本】燒鬼

食日式燒肉都可以玩味十足的話,非呢間銅鑼灣新開嘅燒鬼莫屬喇。餐廳以日本鬼怪傳說做主題,大走暗黑古怪風。最平嘅日式燒肉放題(HKD298)就已經任食超過10款來自鹿兒島同宮崎嘅高質和牛燒肉,其中更有罕見嘅腹脅肉;而且有多款魚生刺身、一系列日式料理都係任食,可以話CP值爆晒燈呀! 店內無論喺裝潢設計、食物細節上都加入唔同嘅暗黑鬼怪元素。不過暫時只做晚市,記得提早預約就唔怕摸門釘啦。 呢度嘅日式燒肉放題會供應超過10款來自鹿兒島同宮崎嘅A4和牛燒肉,其中必試呢款牛鬼拼盤。拼盤內有8款和牛部位俾你到唔同口感同味道層次,包括前胸肉、胸腹肉、上小排肉、橫隔肌、腹脅、中腹肉、內側腹肉同上肩肉。牛肉部位會視乎日本時令限定而轉換,身為食肉獸嘅小編望到都流晒口水呀! 其中市面上少有嘅腹脅肉都喺拼盤內可以搵到,呢款肉靠近牛大腿根側嘅牛五花肉部位,每隻和牛只有8-10公斤腹脅肉,所以特別矜貴㗎。牛肉嘅雪花紋理均勻,味道比其他五花肉清爽,入口充滿牛味但竟然一啲都唔膩! 如果想再滋味啲,可以升級加配熊本F1肉眼或西冷(各HKD100),包保你有燒牛扒嘅感覺呀!不過唔使擔心淨係得牛肉,放題都有上等美國牛肉、豬肉、雞肉、海鮮同蔬菜俾你任點嚟燒烤㗎。 醬料可以提升燒肉嘅惹味程度,餐廳就準備咗三款自家製醬汁,有用咗大量京蔥加埋日式醬油整成嘅蔥油醬(左)、惹味嘅辣味噌醬(中)同埋比較清新嘅蘋果柚子紅酒燒汁(右)任你蘸。 雖然係燒肉放題,但都一樣有各款鮮味嘅魚生刺身。 其中鰹魚同埋用芥末漬蠑螺嘅蠑螺鬼都係比較少見嘅刺身款式。 另外,仲有柚子醬油和牛壽司、明太子醬帶子炙燒壽司、枝豆、泡菜豆腐、日式泡飯等日本料理都可以任食,試勻全部真係捧住個肚走呀!   燒鬼 地址:銅鑼灣駱克道459-461號The L. Square 9樓 電話:2856 0226 營業時間:星期一至日:17:30-23:30 價錢: 星期一至五:HKD298 (17:30-19:30)、HKD388 (19:30-21:30)、HKD348 (21:30-23:30) 星期六、日:HKD308 (17:30-19:30)、HKD398 (19:30-21:30)、HKD358 (21:30-23:30)

0

【尖沙咀現代居酒屋質量取勝 鮮甜刺身配惹味燒物】KAIYO

想食精緻又高級啲嘅居酒屋料理,依家有埋尖沙咀嘅KAIYO可以揀喇。呢度主打各種海鮮料理、串燒、涮涮鍋等菜式,即刻睇吓邊款啱你口味啦! 餐廳裝潢幾有現代感,喺唔同角落都有掛畫,但仍然保留廚師枱俾食客見到刺身等食冷盤嘅製作過程。 呢度嘅食物價位中上,質素都有返咁上下㗎。好似精選刺身定食(HKD388)Set Lunch,有齊金目鯛、拖羅、牡丹蝦、油甘魚、赤貝同左口魚海膽卷,款款都新鮮肥美添。配埋前菜、茶碗蒸、麵豉湯同白飯,食晒都飽肚㗎。 呢度嘅燒物都同樣出色,長芋明太子醬海膽大菇(HKD108)、月見雞肉棒(HKD58)同明太子雞肉棒(HKD48)都好入味,亦唔會過鹹或太乾。 鍾意食魚就一定要試一夜乾馬友魚 (HKD238),size幾大條,都算抵食,而且魚肉嫩滑有油香添。 「飯桶」就推介你試和牛鵝肝丼(HKD268)啦!一打開蓋見到大大件香煎鵝肝,撈勻配埋和牛一齊食特別香滑呀! 想暖笠笠亦有招牌昆布花膠涮涮鍋(HKD798/2人),食完刺身拼盤就潷碗火鍋湯底飲咗先,好清甜滋潤㗎。跟住就可以進攻美國A4牛肩肉、日本A4牛肩肉、日本黑毛豚肉、美國和牛脷、日本豚肉餃子、手打油甘魚丸等食物喇! 厚切拖羅真係好鮮甜,又夠油香。 飲湯梗係連埋花膠一齊食啦。 肉類都好新鮮,丸同餃子都大大件。 牛肉入口滑溜juicy,仲幾有肉香添。 呢度仲有精緻嘅Cocktails俾你揀,好似左邊Passionfruit Ginger Sake Sangria(HKD108)用上日本清酒、薑汁、百香果酒等調製,清香又唔會太甜。右邊Sakatini(HKD98)就用燒酎、日本清酒、接骨木花利口酒同白苦艾酒調製,啱鍾意酒味濃啲嘅朋友。   KAIYO 地址:尖沙咀梳士巴利道18號K11 MUSEA 1樓103A號舖 電話:2117 0985 營業時間:星期一至日:11:00-22:00

0

【灣仔築地過和風聖誕 睇燈飾歎富士山主題美食】築地・山貴水產

仲諗緊聖誕放假去邊?不如去灣仔築地山貴水產市場啦!為咗慶祝開業兩周年,聽日開始會有為期半個月嘅「星光富士」冬季燈飾活動,話到明就係以富士山嚟做活動主題,可以喺室內欣賞到全港最高嘅10呎LED富士山,超壯觀又好feel呀!除咗有得睇燈飾,仲有得食一系列嘅富士山節日美食添,依家即刻跟住小編率先睇吓有啲咩好嘢食啦! 呢個水產市場有壽司吧俾食客揀完水產之後可以新鮮即食,依家除咗有得望住咁靚嘅維港景食嘢之外,仲有10呎高嘅LED富士山陪住你添,想知真貌係點?聽日快啲去打卡喇! 呢款富士山の階梯(HKD228)每層都有唔同嘅海鮮刺身,有每日由日本築地直送嘅刺身、北海道三文魚籽、季節限定嘅北海道白子、宮城縣真蠔,仲有來自世界各地唔同嘅新鮮海產,好似加拿大海膽咁,海鮮刺身嘅種類特別多。刺身隔離仲擺咗兩件有富士山圖案嘅卷物配合返今次嘅主題,靚到唔捨得食囉! 食日本嘢點可以冇日本和牛呢?富士山下和牛燒(HKD188)用霜降牛肝腱肌整嘅,和牛嘅呢個部位油花分佈得比較平均,肉質仲好嫩滑。食落好有油香,牛味十足。喺富士山造型嘅酢飯旁邊放住燒到啱啱好嘅和牛,望到都流晒口水。 同樣以富士山造型嘅酢飯做配搭,但係今次個主角就唔同咗喇。富士山下銀鱈魚西京燒(HKD188)嘅煮法都唔簡單㗎,銀鱈魚先用咗秘製嘅醬汁醃過再燒香魚嘅表面。咁樣啲魚肉入口就會好嫩滑,唔會乾噌噌啦。 食完嘢係時候飲返杯富士山特調(HKD88),呢杯特飲用咗日本燒酒調製,有好濃嘅米香,飲一啖個胃都即刻暖返晒呀!小編好鍾意呢隻漸變嘅藍色,賣相咁靚,要影多幾張相至得啦! 築地山貴水產「星光富士」 舉辦日期:2018年12月14至29日 築地・山貴水產 地址:灣仔灣仔碼頭二樓 電話:3974 5609 營業時間:星期一至日:12:00-22:30

0

【蘇豪最新日式小店 巨型牛扒丼飯啖啖肉】真心

喺中環蘇豪區,有唔少西式餐廳,不過最近就有間日式小店真心登陸蘇豪喇,又多個選擇唔使咁悶。真心呢間日式小店,同時亦係間Sashimi bar,有得食刺身之餘仲有唔同嘅酒精飲品,食住刺身飲酒夠晒爽啦!餐廳嘅英文名叫ZEN,玩埋諧音「真心正」咁解! 老闆話除咗食物係真心正之外,每一樣食材都真心對待,連賣相都好花心思去擺靚佢,希望吸引到客人食慾,無論顏值同味道都要做足一百分咁話! 小店面積雖小,最吸睛係牆上嘅壁畫,將日本嘅名勝古蹟同旅遊景點都畫晒落去,等食客見到都好似身處日本一樣咁有feel。 吉列海鮮丼(HKD128)丼飯鋪滿炸生蠔、炸蝦同炸蟹鉗,睇見都令人食慾大增,流晒口水!炸物食起上嚟口感寧舍唔同,因為餐廳用咗自己調配嘅油嚟炸,食落更加酥脆香口。 炸生蠔食落外層酥脆,內裏鮮甜多汁,隱約仲食到少少海水味,一啲都唔腥呀。 炸蝦肉質彈牙,香脆可口,炸粉一啲都唔厚,放咗一陣唔會話即刻就淋晒,唔錯唔錯。 炸蟹鉗肉質同樣彈牙,面頭淋咗一層醬汁,食落甜甜哋,送飯一流。 霜降熊本牛扒丼(HKD198)犀利喇,牛肉由熊本直送,油花均勻,雖然未去到和牛級別,不過都做到和牛腍身嘅口感同油香味,真係好好味!牛肉仲多過米飯,食肉獸見到呢款丼飯真係會好開心㗎! 牛味超級濃郁,仲依稀見到牛肉粉嫩嘅顏色,仲要一啲都唔嚡口,嫩滑口感好滿足! 刺身拼盤A(HKD168)包括三文魚、八爪魚、北寄貝同帶子。呢四款都係大眾比較鍾意食嘅刺身,一上枱見到刺身嘅色澤咁靚已經知道係高質刺身!帶子係北海道頂級靚貨,鮮甜至極,唔需要點豉油,食返本身帶子嘅甜味已經非常足夠。 三文魚用上最靚嘅A grade挪威三文魚,油脂豐腴,又係食唔停。 北寄貝味道偏甜而且好煙韌,好有咬口。 海盜船-海膽吞拿(HKD128),將平平無奇嘅腐皮壽司變成加大碼,上面仲加咗海膽同吞拿toppings落去,又幾得意喎!除咗海膽吞拿呢個配搭,仲有海膽帶子、蟹膏蟹籽、鰻魚玉子等其他選擇。用雙拼形式配搭,一個價錢就食到兩款味道,係店內必食招牌之一! 海膽吞拿full到差唔多滿瀉,平時就咁食吞拿油分會較多,如果將佢減半,配埋海膽嘅鮮甜,中和油膩感之餘,本身又有甜甜哋腐皮壽司做底,味道非常match!三重口感勁豐富! 真心 地址:中環蘇豪士丹頓街21號地舖 電話:6999 6434 營業時間:星期一:12:00-15:00;星期二至四及星期日:12:00-22:00;星期五至六:12:00-23:00

0

【日本過江龍連開兩店 挑戰重量級牛肉山蓋飯】牛布拉日式牛肉麵

由日本殺嚟香港嘅牛布拉日式牛肉麵,有幾受歡迎?睇佢開馬鞍山店同旺角店前後只差一個月就知啦!咁受歡迎,因為主打嘅牛布拉拌麵同牛布拉蓋飯肉量驚人囉,一眾牛肉迷又點會錯過呢!小編今次去旺角新店,除咗試佢切到好似一塊塊布咁嘅牛肉拌麵之外,仲有其他香港店獨有嘅丼飯、小食同飲品。提提大家,食拌麵嘅時候唔好一上枱就撈勻呀,因為有4個步驟,睇埋落去你就知係點㗎喇。 餐廳以木做裝潢,感覺放鬆啲,悠閒啲。 大受女士歡迎嘅辛味牛布拉拌麵(HKD88/70g),呢個最細分量女仔食都夠飽,男士多數揀130g(HKD118)或者190g(HKD148)。未撈勻之前,先夾一塊牛肉食佢嘅原味先。牛肉以鹽、黑胡椒調味,然後用300度高溫焗製,之後再慢煮個半鐘煮成。本身已經肉嫩多汁,仲咬到好似牛𦟌嘅爽口筋腱位,口感一級棒。跟住就可以做第二步,撈勻食喇。 小編搞咗陣先攤開到俾大家睇吓塊牛肉,係咪好似布咁呢?肥嘟嘟嘅麵係粗身白麵,少啲梘水又好吸汁;唔需要煮太耐,麵冇咁易變腍,口感似烏冬咁有彈性。為咗令白麵品質更好,發酵後仲要喺21度嘅室溫存放24小時,真係每條麵都得來不易呀!廚師用特製嘅京都地獄味噌將麵撈好再上枱,你只需將牛肉、肉碎同花生碎撈勻,口感層次就更豐富。佢嘅辣唔係即時爆發,係有後勁慢慢滲出嚟。如果想再辣啲,可以做第三個步驟:加辣油! 食晒成碗麵就到第四個步驟喇,咪以為得返少少醬汁就冇搞作,店員會俾一口飯你撈汁食。雖然只係一口飯,但店長Roy話有時客人已經好飽都仲想試,但會要求一口飯再細份啲囉。 另一款人氣拌麵係忌廉芥末牛布拉拌麵(HKD118/130g),Roy話反而多男士鍾意食呢款喎,唔知係咪覺得佢淡啲呢?忌廉醬汁用日本芝士忌廉醬再加鮮奶溝成,味道的確偏清,好處係冇咁膩,而且同芥末味非常夾!撈勻之後麵同牛肉都滑啲添。 呢款不妨加埋餐廳自家製嘅芥末醬同咖喱炸蒜。芥末醬用鮮山葵磨成,山葵粒嘅味道辣中帶啲清爽。炸蒜幾脆,但加埋咖喱粉就更加香,令成個麵嘅味道層次更加豐富。其實辛味同忌廉芥末味都各有千秋,如果俾小編揀就會夏天食忌廉芥末味、冬天食辛味喇,因為夏天食嘢想清新啲囉。 牛布拉蓋飯(HKD198/390g)係其中一個牛肉迷之選,因為佢係全個menu中最多肉,師傅話差唔多有30塊肉㗎!Roy話唔少人都挑戰呢個重量級蓋飯,男仔多數都成功,女仔暫時就只見過1個可以KO佢。嗱,俾咗貼士你計吓其他分量大約有幾多塊,怕食唔晒又想試就睇吓130g(HKD88)同190g(HKD118)邊個size啱你啦。蓋飯淋咗啲忌廉汁同醬汁煮過嘅爽口鹹洋蔥粒,味道層次相對冇拌麵咁豐富,但食得呢碗梗係重點食牛啦!如果唔夠汁都可以同店員講,可以另外上俾你,唔怕一次過淋上面太重味喇。 跟住要介紹香港店獨有嘅丼飯、小食同飲品喇!爆丼系列之中,雜錦魚生爆丼(HKD128)係最多款刺身嘅。廚師會按當日有咩新鮮食材而決定用邊款,小編當日就有劍魚、吞拿魚、帶子、油甘魚、八爪魚、北寄貝、帆立貝、三文魚、三文魚子同甜蝦,樣樣都好新鮮甜美。呢度嘅丼飯同卷物嘅飯都落咗黑糖壽司醋,比平時壽司飯嘅醋味濃啲但帶少少甜味,好開胃! 下午茶如果想試小食飲杯嘢都有選擇,炸物籃(HKD58)喺14:30-17:30期間供應,有紫芋甘栗餅、忌廉蟹肉薯餅、吉列蠔、炸雞拼野菜沙律。小編最鍾意紫芋甘栗餅,咬到大大粒甘栗,香甜有口感;跟住就係吉列蠔喇,肉地幾飽滿。 飲品全日供應,小編勁like左邊嘅戀戀沖繩(HKD38),椰子、奶同菠蘿味道超夾又濃郁;質感喺奶同奶昔之間,感覺好足料;右邊嘅草莓雪山(HKD48)都唔錯,草莓濃度好高,唔會因為沙冰質感而變淡,同戀戀沖繩比就相對甜啲,不過都接受到。   牛布拉日式牛肉麵 地址:旺角彌敦道700號T.O.P This is Our Place 4樓406-408號鋪 電話:3467 7871 營業時間:星期一至日:11:30-23:00

0

【激鮮刺身日本直送 九宮格嗒足啖啖海膽】花木日本料理

香港日式餐廳選擇多蘿蘿,不過要食餐高質素嘅刺身料理,埋單隨時好和味!想親民價又食到靚日本嘢?最近喺尖沙咀開咗間叫花木嘅日式餐廳,賣點就係貨真價實又有高質享受,而且食材全部由日本即日運送,咁新鮮唔係唔食呀? 花木呢個名仲幾有意思,源於一男一女兩位老闆、代表咗花同木,用花木呢個主題延續落去,由餐廳名、場內環境同食材都以花木做配搭。環境舒適寬敞,裝潢同擺設都充滿和風味! 平成三十花木慶典寶盒(HKD588),完全係一個九宮格概念,先用大葉/紫菜按個人喜好自由配搭材料,以卷物嘅食法用餐,得意呀!用其他食材襯托海膽嘅味道,如果擔心唔知點樣配搭先係最好食,店員會親自介紹返最佳食法,包你每一啖都食到海膽鮮味。特別一提,用大葉包住食嘅時候,香葉本身嘅味會慢慢滲出嚟,配上海鮮味道出奇地夾! 炎燒六式珍味蠔(HKD248),選用日本廣島蠔,原殼運送,絕對唔係冰鮮貨。除咗第一款香蔥蒜蓉比較常見,其他都好特別呢!好似酒糟珍味蠔,用上日本青酒剩底嘅米粒而製成,食落仲有陣清甜嘅酒香味,回味十足! 竹刺身(HKD588),上到枱咁豐富夠晒靚啦,忍唔住相機食先呀!有六款刺身,因為係時令海鮮,所以每日款式都會唔同。海鮮全部都係朝早喺日本魚市場選購,再空運返港直送餐廳,當日食到嘅每一款都鮮甜十足,油脂豐腴,堅高質呀! 生拆鱈場蟹腳日式雲吞配北海道海膽醬(HKD198),用西方做法混合日本元素,都幾fusion喎!師傅會生拆蟹腳,將蟹肉加上雜菜絲做雲吞餡,再用上北海道馬糞,入口鮮甜美味! 串燒拼盤八本(HKD268),除咗味道好,花木每一款菜式都有埋精心嘅擺盤,令人大飽眼福!拼盤串燒有8款食物,採用嘅都係日本雞,燒嘅過程中已經落咗醬汁調味,所以唔使再點其他調味都已經夠晒味! 黑松露鰻魚卷(HKD158),壽司米呈啡色,唔好以為落咗豉油去煮呀,其實係用咗比白醋更高成本嘅赤醋去製造,出嚟嘅米飯一啲都唔酸,反而冇咗刺鼻嘅感覺。鰻魚上面亦有適量嘅黑松露同生椒粉,提升晒成個口感同香氣,食唔停口呀! 提提大家,依家經訂位用餐都會附送是日甜品,而新張期間更加會送三款前菜優惠,咁多著數,大家識做啦! 花木日本料理 地址:尖沙咀天文台道8號3樓2號舖 電話:2617 9222/2617 9555 營業時間:星期一至日:18:00-01:30

0

【大胃王指定Gathering 豪食大閘蟹放題】板燒郎

呢幾年食放題,多咗唔少韓燒同蒸氣火鍋嘅選擇,款式仲愈嚟愈多添!今次介紹呢間位於佐敦嘅板燒郎,趁住蟹季熱潮推出大閘蟹放題,仲有好多唔同嘢食任你揀,呢個放題食到11月底咋,快啲call班大胃王出動啦! 環境方面好闊落,全場梳化位,唔使擔心坐得太逼又行唔到路啦!最特別嘅係放題店竟然有VIP房,仲要有成5間大房,都咪話唔舒服。 梗係要即刻試吓佢哋嘅大閘蟹放題啦,小編當日食嘅係北海道大閘蟹,每隻都有三両半,蟹膏食落夠晒鮮甜,質素都唔差!嚟緊貨源仲會轉用太湖大閘蟹,睇怕小編都要留肚食多次! 泰式料理都好有驚喜,原來係由一位泰國廚師負責,生菜肉碎包,肉碎少少辣,生菜又唔會好細塊,包住啲肉一啖放入口,正呀!仲有泰式生蝦同冬陰功蝦湯等泰式料理。 呢隻船真係大支嘢,裝滿成隻船都係刺身,由三文魚到油甘魚都隻隻新鮮,連甜蝦頭都好正呀!順帶一提,啲魚生唔會有冷藏雪味,值得一讚。 咁多嘢食仲覺得唔夠?加多HKD138仲可以有至尊星級版10款任食,北海道長腳蟹就成日見啦,磯煮鮑魚少見得嚟,食落仲有陣陣酒香。 大閘蟹放題 (至11月尾) 價錢︰HKD388 (10點前);HKD368(宵夜時段10點後) 時間︰兩小時任食 註︰每人每次限叫三隻蟹 板燒郎 地址:佐敦白加士街66號新寶廣場5樓全層 電話: 3543 1183 營業時間︰17:00 – 02:00

0

【㷫烚烚居酒屋 炭燒連子鯛隊啤最啱】炎丸居酒屋

話明食串燒,個燒字梗係關鍵啦!喺銅鑼灣嘅炎丸居酒屋就有日式傳統原始燒,成個備長炭爐喺你面前,仲可以睇埋廚師表演添。 試過重頭戲原始燒先至叫食過炎丸居酒屋嘛,呢種係日本傳統直立式備長炭燒方法,令食物外脆內軟又唔會直接俾火燒。你可以睇住食物慢慢烤煮嘅過程,嗰陣香味會令你食指大動囉。 六款魚之中連子鯛(HKD438)係中間價位,燒完之後連魚鰭都好香脆,記得食埋唔好嘥呀。魚肉好嫩滑,廚師真係將火候掌握得啱啱好! 燒得興起又點可以唔食串燒呢!鹽燒熊本和牛串(HKD98)肉味濃郁,燒到少少焦香好惹味,想再開胃啲就加青檸汁啦。 炎丸壽司卷(HKD238)一次過食到唔同嘅新鮮厚切魚生,有吞拿魚、三文魚、海膽等等,係炎丸大熱嘅招牌壽司卷嚟㗎! 炎丸有九款麒麟一番搾Frozen生啤(HKD68/杯),由原味到果味都有。左邊嘅白桃味同右邊嘅荔枝味就大路啲,想有新鮮感可以試吓乳酸味喎。   炎丸居酒屋 地址:銅鑼灣勿地臣街1號時代廣場10樓1001A號舖 電話:2721 9955 營業時間:星期一至日: 12:00-15:00;18:00-23:00

0

【晚晚爆場厚切刺身 舌戰板半千層海膽】鮨一

依家食咩都好,「勁量」永遠都係最吸引人。如果食日本菜,厚切刺身同大大份嘅海膽都必定令人群情洶湧,所以去尖沙咀鮨一食嘢要早早早好多訂位,因為都幾爆場㗎! 老闆會挑選一啲特別嘅食材做刺身,認真不時不食。 海葡萄沙律(HKD128)主要用咗沖繩海葡萄同長崎蕃茄,超爆新鮮同清甜。原來新鮮嘅海葡萄放耐咗會縮水,所以撈好醬汁就要食咗先。醬汁少少酸尾尾,都幾開胃。 重頭戲之一嘅特上錦繡刺身 (HKD468)有8款海鮮,每款各兩份——噴火灣帶子肉、三陸海岸真鯖、四國油甘魚腩、韓國紫海膽、北海道連子鯛、北海道目張魚同噴火灣牡丹蝦。厚切刺身充滿魚油嘅滑、甘香同鮮甜味。加多HKD100就可以好似上圖咁,有埋日振島吞拿魚,佢嘅特別之處係喺魚鮫位切出嚟,唔係時時有得食㗎。注意:其他海鮮都有機會因應時節轉換款式。 千層海膽飯(HKD298/大)有成板半韓國馬糞海膽,仲灑咗金箔喺面,好豪氣呀!連埋拖羅蓉同加咗赤醋嘅壽司飯,用紫菜包住一齊食唔會好膩,因為酸酸哋嘅赤醋可以中和到油膩嘅感覺。 靚嘅天婦羅會無咩油印到落紙度,呢份炸蝦天婦羅(HKD78)就做到呢個效果喇,食多幾件都無咁罪惡。 鮨一 地址:尖沙咀厚福街12號藍馬商業大廈18樓 電話:3705 9227 營業時間:星期一至日: 12:00-14:30;18:00-23:00   地址:大埔翠怡街3號翠怡花園 16 號舖 電話:2656 6634 營業時間:星期一至日: 12:00-15:00;18:00-23:00