Tagged: 劏客

0

【新宿燒肉店蠱惑餐牌 價錢唔同貴1倍劏遊客】食焦

日本嘢就乜都好?其實,都係嘅,不過樹大總有枯枝!成日話去日本食燒肉又平又好味,點會諗到會去咗間「黑店」俾人劏呢?有台灣網友一心諗住去東京食買玩,其中一餐必然揀返間燒肉店啦,於是佢就搵咗一間喺新宿歌舞伎町嘅燒肉店,結果中晒招呀! 呢位台灣事主喺爆料公社群組度還原當晚情況,當晚事主去到燒肉店預備點餐,店員知道佢哋係遊客,好順手咁就遞咗本有中英對照嘅餐牌俾佢點菜。據事主形容開頭相安無事,仲食得好開心,直到佢要加點嘅時候,見到隔離枱嘅餐牌,咦?咁古怪嘅? 古怪在除咗一個係日文一個係中文之外,最蠱惑嘅地方係兩個餐牌嘅價錢係唔一樣囉!同樣係牛肋骨,圖片係一樣嘅,但喺日文餐牌嘅價錢只係500円(約$35港銀),而喺中文餐牌呢?牛肋骨嘅價錢係1000円(約$70港銀),即係貴咗成倍喎!事主再仔細對照埋其他食物,連牛舌都係咁,幾乎全部都要貴1倍喎! 事主話睇見呢個情況真係連食慾都即刻冇晒,「因為我不是日本人所以價格要貴一倍……結帳時結帳單也註明 【外】 我想應該就是這樣吧……」喺群組度反應好熱烈,有熱心網友仲忍唔住為事主私訊燒肉店,嗰間喺歌舞伎町嘅燒肉店叫做「李苑」,得到嘅回覆係認咗有呢件事喎,話因為系統上不同所以價格都會不一樣。咁難明嘅? 乜嘢系統呢?網友死心不息繼續追擊燒肉店,又有更新回覆話中文菜單嘅價格的確係貴過日文餐牌,但店方就話呢個做法絕冇任何歧視外國遊客嘅意圖,仲話會即日起將中文餐單廢除喎!咁本身個日文餐牌價格會唔會即時調高返呢?