Tagged: 包點

0

【佐敦餅店銅板價懷舊酥點 雙層豆沙酥香甜鬆化】平霸

今次小編經過佐敦呢間飽餅皇,唔係想介紹麵包控食嚟買包,而係發現擺喺門口嘅酥餅櫃竟然有唔少懷舊酥餅。選擇夠多之餘,大部分都係HKD4.5-5,望落幾抵食喎,一於揀返幾個試吓先! 同一般舊式麵包店一樣,店入面有工場自製各款新鮮出爐嘅麵包同糕餅。平霸喺下午近六點去到嘅時候,酥餅櫃雖然有啲款式幾乎賣晒,但仍然有唔少選擇,驟眼睇大概有成十幾款酥餅俾你揀。 佢哋外層嘅酥皮基本上款款都一樣,但包住唔同餡料就化身成各款式傳統酥點。酥餅面頭掃上蛋漿再焗,有啲又灑上黑芝麻,賣相吸引。 老婆餅(HKD4.5)裡面有傳統嘅冬瓜蓉,入口幾清甜又唔漿口,連酥皮一齊食就唔會太甜膩。唔少食客試過都大讚呢款酥點,唔輸俾啲大餅家㗎。 最有驚喜就係呢個豆沙酥(HKD4.5)!金黃嘅酥皮外層拎上手冇老婆餅咁鬆散,質地比較厚實。搣開竟然係有兩層豆沙餡,餡料放得好多,一啲都唔慳!豆沙餡整到起沙,亦有少少紅豆微粒。唔使5蚊就食到咁足料嘅酥點真係幾抵喎。 皮蛋酥(HKD5)入面包住蓮蓉同皮蛋,傳統嘅皮蛋酥放酸薑,呢款同樣食到淡淡薑味,但就冇食到有薑粒。 而呢款圓碌碌嘅蛋黃酥(HKD5)內餡就係鹹蛋黃同蓮蓉,啲蓮蓉唔會太甜,食落好似月餅咁喎。不過略嫌啲鹹蛋黃比較少、唔夠香。   飽餅皇 地址:佐敦佐敦道37號G地下 電話:2388 7515 營業時間:星期一至日:06:00-00:00

0

【高CP值手工包點新店熱爆元朗 必食爆汁生煎包+鍋貼】平霸

元朗最近又新開咗間高質小店,講緊嘅就係賣中式小食嘅賀苗記!正所謂「貴精不貴多」,呢度淨係賣生煎包、鍋貼同蔥花卷三款小食,而且全部都係手工即製,每出一爐都好快賣晒㗎。點解咁好賣?因為三款食物嘅性價比夠高囉,睇埋落去你就明㗎喇! 舖頭開喺角落位,專做外賣生意,大家可以透過大玻璃睇到廚房製作食物嘅過程。因為全部食物都係即製,賣晒就要等下一輪;每輪大約等15-20分鐘。平霸去到嘅時候啱啱賣晒,不過可以先俾錢預留食物,出下一爐就可以返嚟拎,如果你都想試的話就預埋等候時間喇! 呢度嘅手工生煎包(HKD22/4隻)用傳統鐵鍋嚟煎,煎到個底金黃焦脆,面頭就灑咗啲蔥花。師傅包到摺痕好平均,賣相幾細緻,但size比一般嘅生煎包大少少。 驚喜嚟喇!一咬落個生煎包度,即刻feel到裡面有好多湯汁爆出嚟,啲湯汁濃郁又唔會過鹹。包嘅上半部軟腍,肉嘅比例啱啱好;包底部就煎到好脆,食落香口,有多重口感。 手工鍋貼(HKD12/3隻)嘅接口完整冇破爛,可以鎖住肉汁喺入面。鍋貼皮比較硬身,底部同樣煎到好金黃,而且肉餡夠多,都有爆汁嘅效果,果然高質呀! 呢款大大個嘅手工蔥花卷(HKD5)就夠晒抵食喇,5蚊個仲差啲大過平霸嘅手掌!啱啱喺蒸爐攞出嚟熱辣辣,人手捲嘅麻花扭紋整得好靚,睇見都想食!雖然呢個蔥花卷入面冇餡,但有好香嘅蔥油味,啱晒鍾意食蔥嘅朋友仔。   賀苗記 地址:元朗大陂頭徑14-24號福星樓地下2B號舖 電話:從缺 營業時間:星期日至五:11:00-20:00,星期六休息

0

【8蚊3個出爐靚麵包 4蚊花生燒餅落足料】平霸

小編除咗鍾意食肉,亦都係一個不折不扣嘅麵包控嚟㗎!路過呢間明華餅家,見到好多人喺度排緊隊,小編又去湊吓熱鬧,睇吓有咩咁正先!行到過去先發現,原來呢間嘅麵包賣緊8蚊3個,仲要有超多款式選擇!咁平,小編都唔輸蝕,買呀! 椰子奶油包(HKD8/3個) 已經好少麵包舖有得買啦,完全係小時候嘅味道,雖然啲奶油好肥,不過久唔久食一次,肥都冇所謂啦!啲奶油真係超級多,但食起上嚟又甜而不膩,好正㗎! 芝麻包(HKD8/3個) 都幾大個吓,本身諗住就咁食會好寡冇乜味,但完全相反喎!食落少少甜甜再帶點芝麻香味,愈簡單嘅食物反而愈好食!入面仲要好鬆軟添! 火腿蛋包(HKD8/3個) 雖然係細包,但起碼入面嘅火腿同蛋冇呃秤,而且一啲都唔難食。8蚊雞食足三個麵包,小編覺得好OK啦! 食完包,小編買埋佢哋嘅花生燒餅同光酥餅,兩款都係4蚊雞,唔係唔食呀? 花生燒餅(HKD4) 本身諗住入面係花生醬,點知竟然係花生絲,有啲驚喜喎!燒餅食落去煙煙韌韌,拎到上手仲熱辣辣,皮薄餡靚,高質高質! 光酥餅(HKD4) 超大塊!就咁食會有少少乾,不過唔乾就唔係光酥餅啦,而且都偏鬆軟,4蚊可以食到飽,力撐香港小店呀! 平霸小評:依家喺香港想食到呢啲平價麵包買少見少,呢間仲要好食又抵食!真係要多謝呢班良心店主,等我哋可以食到又平又正嘅嘢,大家行過記得幫襯吓呀! 明華餅家 地址:旺角煙廠街1-3D 營業時間:星期一至日: 07:00-12:00