Tagged: 北海道

0

【日日過百客電話追問 老三陽:冇蟹賣做乜生意?】食焦

依家已經十月尾,往年通街大閘蟹情景消失咗!今年因為內地大閘蟹批文遲遲未出,想食太湖、陽澄湖大閘蟹已經冇機會,有食店就轉為入口日本北海道大閘蟹同台灣貨,衰在上星期又驗出台灣桃園大閘蟹樣本二噁英水平超標,要即時暫停進口。總之今年想食隻靚嘅大閘蟹真係難上加難! 蟹痴冇蟹食梗係慘,不過可以當慳返筆同忍吓口,點都唔夠食店同蟹舖頭痕。小編去咗賣蟹老字號「老三陽」睇睇,一直以賣正宗陽澄湖出產嘅「老三陽」,以往呢個時候實擺到成間舖都係大閘蟹,但係今年呢?放大閘蟹嘅凍櫃,變咗擺晒紅豆粽呀鹽水鴨呀咁,一隻大閘蟹都冇啦!見到店長陳先生忙住接電話,聽見佢話:「大閘蟹?冇呀!冇呀!唔知幾時!」問佢係咪好多客都想知幾時先有大閘蟹?佢就話:「日日百幾個電話打嚟啦,個個都問幾時有?我都答唔到㗎!」 問佢係咪因為咁搞到生意差咗好多?店長冇晒心機:「好慘呀!冇蟹賣做乜生意?唔係話差咗幾多,係直頭冇!你睇到成間舖一隻蟹都冇,點有生意呀?」有食店同蟹商就轉為入貨北海道大閘蟹頂住檔先,但係「老三陽」就寧願冇蟹賣,點解都唔入吓北海道或者台灣貨呢?佢話:「日本嗰啲唔好食㗎!完全唔係嗰回事,根本地方唔同水質又唔同,好難同大陸啲大閘蟹比,有啲客食過嘅都話唔好食,話冇味嘅!」 咁批文有冇轉機,會唔會仲有得食內地大閘蟹?店長都話唔多寄望,「冇人知(幾時有)、亦都冇乜解決辦法啦,就算話嚟緊會有,其實都已經過咗最啱食嘅時候啦!」今次大閘蟹荒,搞到好多蟹舖都好愁,「老三陽」堅持唔入其他地方蟹,「今次損失慘重梗係慘!」

0

【激罕北海道正宗沾麵】梅光軒

之前介紹過銅鑼灣希慎地庫既拉麵店「梅光軒」,最近加盟左太古AEON Style開左新分店喇!由正宗日本師傅主理,湯底一樣係北海道本店原汁原味急凍直送!小編食完新推出北海道沾麵之後,飲晒成個湯底你就知有幾正啦。 同銅鑼灣格局差不多,舖面簡潔,客人都絡繹不絕,客似雲來。 坐鎮主廚及店長(左邊:細尾洋介)係百分百日本師傳,而新店開業期間,北海道梅光軒本店派埋始祖直屬傳人(右邊:Komatsu Shingo)由日本專程過黎香港打點一切,確保食物質素同北海道店一樣高水準!可想而知梅光軒對食物係絕對有一份非常高嘅要求同執著。 拉麵店堅持全部湯底由日本密封直送到港,保證同北海道質素一致,令每位食客都感受到原始風味! 梅光軒北海道本店師博於現場講解沾麵製作過程,講解激動又認真,原來要做出一碗好麵絕對不簡單,好多細節要注意!師傅為左令麵條質感更彈牙,煮好麵條後會特別處理,務求做到盡善盡美。 つけ麵 (沾麵)(HKD93)暫時只限太古AEON店出售,依款沾麵湯汁經過特別調配,濃郁帶一點點香辣,辣度平易近人,平時唔食得太辣都可以一試!店長特別配上鰹魚粉,令味道層次更豐富。 一食落口,香辣味瞬間爆發出來!沾麵特別選用粗身曲麵同一般拉麵中曲拉麵有點不同,令到麵條更「掛湯」,意思係令每一條麵條都可以「掛」上更多湯汁,非常有心思。 食完個麵通常都仲有濃湯剩底,依個時候就可以叫師傅加入清湯,咁好味當然唔可以浪費,成碗飲晒佢! 怕食太重口味?無問題!如果想飲到湯頭的真正味道,可選鹽味拉麵(HKD75),或放日本海鹽做調味,便可飲到湯頭內豬骨,雞,沙甸魚熬煮的真正味道。食落麵質彈牙,叉燒鬆軟,加上蔥花味道,令每啖口感都極為滿足。 另外仲有人氣醬油拉麵(HKD75)!想特別再提提大家拉麵上面嘅厚切筍都係北海道直送,好多識食之人都會再追加多一份厚切筍嫁。 梅光軒 太古分店地址:太古康怡廣場Aeon地下 銅鑼灣分店地址:銅鑼灣軒尼詩道500號希慎廣場B2層 電話:28703072

0

【北海道 真 ‧ 湯底】梅光軒

銅鑼灣希慎地庫有個超市Jasons,裡面有間拉麵店「梅光軒」,外表好似好低調,其實大有來頭!本店源自北海道號稱拉麵王國嘅「旭川」,1969年開業,成為第一間得到旭川拉麵大賞之【最優秀拉麵大獎】嘅拉麵店,仲未講完,佢間北海道本店亦喺2012年被選為米芝蓮推介食店!係咪估唔到佢咁威威豬呢? 可能喺依一刻你就會諗,車,係威都係北海道威啫,香港點同。咁你就錯喇!香港間梅光軒所用嘅湯底由北海道急凍直送,成個湯頭裡面包括每一滴水都保存住北海道原汁原味,問你服未!係咪真係要試下先。 首先食人氣No.1嘅旭川拉麵(HKD75),湯頭用豬骨、雞、沙甸魚、昆布, 熬煮多過10個鐘,有濃郁鮮味,整體味道比較清淡。 用心望下啲筍,同一般拉麵店扁扁一塊嘅筍係有分別嫁!連筍都係北海道直送,條條又厚身又夠爽脆,加多20蚊就可以再追加多8條! 另外就係香港限定麻辣拉麵(HK85),味道一樣做得非常細緻,係重口味之選,仲有半隻流心蛋添。見唔見到中間個蒜蓉醬,好好味啊。 人氣小食之一芝士餃子(HKD42),望到啲拉絲就知道點解係人氣小食啦! 雖然大家近年來都食韓式炸雞多,但係依個日式炸雞(HKD38)配埋個芝麻醬都唔輸蝕嫁,一樣好味。同場加映,梅光軒對面有間木屋仔放住好多日本口垃濕,樣樣都好似好好味。 試左個Wasabi味北海道魷魚絲(HKD90),好正,力推! 梅光軒 銅鑼灣軒尼詩道500號希慎廣場B2層Jasons‧Food & Living內 星期一至星期日:10:00 – 22:00 電話:28703072