Tagged: 北角

0

【春秧街街市藏福建美食竇 傳統小食牛肉粳勁有風味】街霸

正所謂香港呢個國際都會美食天堂,匯聚咗各國嘅文化同美食,其實香港除咗廣東人眾多,仲有好多唔同鄉下嘅外省人聚居㗎,今次街霸就帶大家去北角呢個福建人私竇真真美食店! 由北角地鐵站一出,行過長長嘅春秧街街市,差唔多行到尾尾就到㗎喇!呢間真真美食外表超樸實,平日下晝都幾乎爆場,一睇就知係搵平民美食嘅好地方。 一入到去街霸真係覺得自己有啲格格不入呀!事關入面無論係員工抑或客人,大家都好一致咁用福建話交流。小編差啲以為唔用福建話溝通唔到添呀,好彩阿姐見到我唔多似同鄉,就即刻轉channel用廣東話同我落單。正如頭先所講,去得幫襯嘅多數都係福建人,原來喺香港嘅福建人都唔少喎,雖然多數都係上咗年紀嘅姨姨叔叔,但離春秧街幾步之隔竟然有個清一色講福建話嘅食店,真係幾得意呀! 由於老闆同員工都係福建人,咁我諗食物都夠晒正宗啩!老闆娘推介小編食呢個牛肉粳(HKD24),話係福建嘅傳統嘅小食。飲落有啲似玻璃芡咁,個湯頭又好鮮味。牛肉咬落就比較有咬口少少,唔係一般免治牛肉一咬即爛嗰種感覺。 另外呢個煎雞卷(HKD23)亦係招牌小食。用腐皮包住切碎咗嘅雞肉、蘿蔔絲等等,食落頗有風味。 肉包(HKD5)好抵呀,5蚊大大個,入面係菜肉餡,菜同肉分量啱啱好,用嚟做早餐或者下午茶都perfect喎!   街霸最愛:今集最愛就係牛肉粳喇,因為小編覺得呢樣菜最顯得出福建菜同廣東菜嘅唔同之處,通常我哋嘅「羹」,好似粟米羹等等都會有好多樣嘢喺裡面,粟米呀、蛋花呀、蔥花呀咁,但佢哋嘅牛肉粳同魚肉粳都係碗入面只有嗰樣餸,粳嘅顏色亦比較清澈,但都飲得到濃厚嘅鮮味呀。   真真美食店 地址:北角春秧街70號地下 電話:2503 0976 營業時間:星期一至日:07:00-19:00

0

【北角小店$16惹味擔擔麵 $10四隻鍋貼生煎包卜卜脆】平霸

呢間喺北角嘅小店小老板主要做包餃小食、麵食嘅外賣,聽講店主以前喺米芝蓮街頭小食店麥記小食學藝,整出嚟嘅食物真係有返咁上下水準。除咗好食,當然仲要夠平,等平霸睇吓有咩平嘢食先! 舖頭只做外賣生意,店面好細,一眼望入去就會見到有個大煎鍋,用嚟煎鍋貼同生煎包,入面仲有店員唔停手咁包緊啲生煎包添! 見到擔擔麵(HKD16)都幾平,平霸買咗一碗嚟試吓。呢碗擔擔麵賣相唔差喎,不過就唔似平時食開嘅擔擔麵,冇肉碎、花生碎呢啲配料,成碗麵就得蔥花喺面,湯底就比較濃稠,有好香麻醬味,幾開胃。 雖然Menu話呢款麵有辣,望落都有啲辣油,但食落就覺得唔太辣,食唔到辣嘅朋友仲有得叫走辣添。平霸幾鍾意個麵嘅質地,係偏硬身嗰種,分量都幾多,嗌一碗10幾蚊都食得飽! 生煎包(HKD10/4隻)同生煎鍋貼(HKD10/4隻)都係呢度嘅必食,因為真係夠晒平呀!不過平霸買嘅時候,見已經煎好成鍋喺度,生煎包拎上手只有微溫,但睇得出個皮底煎得幾靚,面頭有啲蔥花做點綴,相信如果新鮮熱辣煎好嘅生煎包會更吸引喇。 生煎包個皮唔會好厚,餡料主要係豬肉、菜同蔥。聽講唔少客人都話生煎包有幾多肉汁,但平霸買嘅呢幾隻入面就冇乜肉汁,但食落都唔會乾噌噌。 呢份生煎鍋貼(HKD10/4隻)隻隻都煎得好金黃夠脆口。鍋貼唔算好大隻,一、兩啖就食得晒成隻,入面個餡同生煎包差唔多,不過鍋貼皮都幾薄,個底咬落仲脆㗎!   平霸小評:呢間小店開業咗幾年,雖然名氣冇得過米芝蓮小食推介嘅麥記小食咁大,但食物質素都有得揮,價錢又親民,嗌多幾款都唔肉赤呀!去開北角(其實近炮台山)嘅朋友不妨去試吓,要即買即食先最正呀! 小老板 地址:北角電氣道254號華凱大廈地下A5號舖 電話:6157 5996 營業時間:星期一至日:12:00-22:00

0

【聰嫂煮素菜一樣好手藝 鑊氣小炒惹味到流口水】素學堂

聰嫂最出名係糖水甜品,但原來聰嫂本人食咗廿幾年齋,直到兩年前搵到人睇實糖水舖,終於可以抽身喺北角開聰嫂.原素,一圓開齋舖嘅心願。餐廳走親民路線,平均幾十蚊一碟小菜。煮法方面忠於食材原味,啱晒追求健康嘅素客。最重要係聰嫂煮小菜嘅廚藝高超,未開糖水舖前已喺香港電台主理員工飯堂,一味「劉華雞翼」係廣播道名物。 小編食咗咁多年茄子,第一次食茄子發現新嘅口感喎!椒鹽脆茄子(HKD61)竟然做到外脆!內軟!茄子炸到金黃後灑上椒鹽,鹹鹹哋好香口。 椒鹽素鮮魷(HKD63)用菇同豆類仿製,造型好似平時食鮮魷咁𠝹花,真係見微知著呀!口感同真嘅似到十足十,仲好Q彈添,有啲似魚蛋。雖然冇魷魚嘅鮮味,但陣陣菇香都好正。 蕃茄芝士素豬扒焗飯(HKD50)像真度幾高,不過只喺午市供應,蛋炒飯底好香,焗完都仲濕潤唔乾㗎!蕃茄切粒增加口感之餘,亦令味道更鮮甜。面頭濃郁嘅芝士好夠味,拉絲效果都好得!素豬扒係炸過嘅麵筋,質感幾厚實,仲有陣豆香,亦比真豬扒少咗種飽滯感。 芝士芥末素吉列豬扒漢堡配薯條(HKD45)係下午茶之選,特別在自家調製嘅芥末沙律醬,第一啖有少少攻鼻,跟住會散發出奶香,幼滑嘅口感好正;夾埋芝士同脆口素豬扒漢堡一啲都唔乾。 跟住要介紹嘅菜式新到連餐牌都印唔切㗎!聰嫂間唔中就設計新菜式,所以有時趕唔切更新menu,想食新嘢最好問清楚店員呀!呢兩個煲仔菜都係11:30後供應,黑松露九層塔什菌豆腐煲(HKD68)落咗金不換好夾,令成個餸香氣up up up!豆腐片完全吸晒超濃嘅黑松露醬汁,一咬成口充滿黑松露香氣,啱晒重口味朋友。 泰式香茅蕃茄草菇煲(HKD68)落重香茅同金不換,原來香茅有排毒、幫助消化同降低膽固醇功效,又幾健康喎!豆腐、甜椒、草菇同椰菜花等蔬菜令湯底更清甜。豆卜一咬就爆汁,完全係點睛嘅配菜呀!   聰嫂.原素 地址:北角英皇道康威大廈地下03號舖 電話:2877 9411 營業時間:星期一至日:09:00-22:00

0

【北角抵食小店街坊讚 鍋貼脆底多汁又爆餡】平霸

平霸又出動喇!今次輪到食呢間之前拎過米芝蓮推介嘅小食店麥記美食。呢間小店喺北角已經出晒名,喺街坊口中一早響咗朵,話佢係出色嘅街頭上海小食!等小編即刻試吓係咪真係咁巴閉先! 嗰日小編11點左右去到,已經有唔少食客幫襯,眼見大部分人都點咗酸辣湯(HKD16)大碗,小編都唔執輸,嗌返碗嚟食。味道如何?入口第一啖係有啲酸,酸到好似檸檬汁咁,酸完之後就會feel到少少辣,辣度唔會話好誇張,係慢慢咁滲出嚟,酸酸辣辣口感好過癮。雖然小編一向對酸辣嘢興趣不大,不過佢啲料就真係好足!啖啖都食到木耳、豆腐同豬皮,16蚊一大碗抵呀! 到咗重頭戲生煎鍋貼(HKD10/4隻)小編期待咗好耐㗎喇!果然不負所望,超級好食!佢個鍋貼底煎到金黃色,食落口香脆多汁,入面好多豬肉餡,好juicy一啲都會唔乾,10蚊有咁嘅質素,高質高質! 平霸小評:終於都明白點解咁多街坊都讚佢!鍋貼的確係無敵,有機會一定要試埋佢個生煎包至得! 麥記美食 地址:北角堡壘街21-23號美嘉洋樓地下 電話:2887 7851 營業時間:星期二至六:11:00-22:00;星期日:11:00-20:00;星期一休息

0

【中西日台款式齊集 多元化新派素食飯堂】素食分子

新派素食飯堂愈開愈多,北角嘅素食分子就係其中一間代表喇。佢哋嘅用料唔會淨係得麵根呀、菇呀呢啲一般齋料,係玩多元化!做出嚟嘅款式仲橫跨中、西、日、台等款式。 呢度設計時尚,格局都幾寬敞,有唔少年輕一代同外國人嚟食㗎,今次同大家推介中台菜式啦。 台南三杯雞煲(HKD88)同平時食嘅鍋一樣,上菜已經「滋滋」聲,香噴噴!用猴頭菇做嘅「雞」肉,不論質感同味道都令我誤以為食緊肉,像真度達90%!加上九層塔嘅甘香,令呢個小菜更惹味。 咪以為松子粟米炒蝦鬆(HKD78)平平無奇,「蝦肉」用蒟蒻整成,真係爽口彈牙幾得意,小朋友都會鍾意食。加上西芹、粟米、淮山同松子呢啲清甜嘅蔬菜,炒完都唔會覺得油膩。 牛肝菌福果浸時蔬(HKD98)係比較傳統嘅菜式,如果老人家接受唔到新派嘅就可以食呢味啦。銀杏、牛肝菌配豆苗都有唔同嘅口感。 呢度除咗單點之外,午市同晚市都有超值自助餐,只係HKD68起,食多幾次都ok啦。   素食分子 地址:北角堡壘街2號 電話:2856 6238 營業時間:星期一至日:11:30-22:30

0

【內外兼備!養顏×護膚餐】北角海逸酒店×APIVITA

而家北角海逸酒店同護膚品牌APIVITA攜手推出「味遊希臘地中海」下午茶同甜「蜜」情人節晚餐。全部套餐都會奉送APIVITA面部套裝,實行有無情人都可以愈食愈靚!而家預訂仲有早鳥優惠,今次真係早買早享受,又有得護膚好享受! 「味遊希臘地中海」(HKD178)以「均衡飲食」、「豐富營養」為創作基礎,設計咗10款美點,好味又健康。唔止咖啡或茶無限量供應,比你舒服享受下午茶時光之外,仲可以超優惠享用APIVITA全方位面部護理套裝 (HKD350)添! 甜點: 味道香醇冧酒黑朱古力希臘乳酪蛋糕 外型別緻、口感幼滑細膩嘅番石榴芝士慕絲餅 橙味濃厚同營養豐富嘅香橙杏桃奶凍 輕營健怡藍莓蛋白撻 鹹點: 清新之選青瓜松葉蟹沙律 輕盈迷你牛角包碎蛋沙律三文治 希臘經典傳統美食希臘烤肉卷 香脆可口焗希臘芝士卷 軟腍充滿香草味嘅橄欖露絲瑪莉雞 帶有陣陣花香、口感鬆軟嘅薰衣草杏桃鬆餅配蜜糖同杏桃果醬 款款都啱晒女士心水,不過要留意優惠名額有限,所有禮品送完即止㗎! The Point大堂酒吧 (北角海逸酒店2樓) 推廣日期:2017年2月1日至4月30日   15:00-17:00 訂座電話:2185 2018 用eShop付款仲有獨家折扣75折!(網址:http://eshop.harbour-plaza.com/northpoint) 除咗下午茶,仲有甜「蜜」情人節晚餐,情人節大家想過得靚仔靚女就可以試下啦。綠怡咖啡廳嘅甜「蜜」情人節晚餐(HKD999) (兩位用)同另一半甜甜蜜蜜食西餐之餘,仲可以享用APIVITA高效修護面部套裝(價值HKD465),甜蜜又實用,真係冧死人啦!套餐仲會奉送紅或白餐酒一支㗎! 扒和牛伴秋葵及紫薯茸配蜜糖黑蒜油醋汁 (甜「蜜」情人節晚餐主菜) 除咗西餐,海逸軒中餐廳仲精心設計咗情人節中式海鮮套餐(HKD858)(兩位用),夠晒心思!如果大家想喺情人節食中菜或者幫爸爸媽媽準備驚喜可以試試!推薦菜式有香脆爽口嘅帶子配香煎鍋巴、美味滋補嘅蟲草花松露花膠燉竹絲雞湯同埋嫩滑清香嘅荷香籠仔蒸龍躉球,一定啱晒鍾意食中餐嘅情侶!每對情侶一樣都會獲贈紅或者白餐酒一支㗎! 綠怡咖啡廳 (北角海逸酒店2樓) 推廣日期:2017年2月11日至14日 18:30-22:00...

0

【超綿密!鮮草莓窩夫】La Kaffa

位於北角嘅火車主題餐廳La Kaffa,裝潢夠曬有特色。踏入餐廳,會令人有種穿梭時空感覺,而印象最深刻嘅莫過於餐廳有一個好似火車售票處嘅Cashier,牆上仲掛住好多火車裝飾,包括美國的66公路牌等。 要特別推介呢度嘅招牌豬肋骨全份 (HKD168),肉質非常嫰滑!係嚴選巴西嘅豬肋骨,配上秘製BBQ汁,伴碟沙律仲好新鮮,再[配埋藤茄同脆卜卜薯角,份量十足。 淨係睇呢碟西班牙海鮮飯(HKD138)都知來頭一啲都唔惹少,蕃茄醬嘅酸度剛剛好,唔會太甜,紐西蘭青口,北海道帶子,大蝦同香腸,食落去有少少牛油香味。一般傳統嘅Risotto,米飯會有點硬,亞洲人一般都較難以接受,廚師在米飯嘅軟硬度都花唔少心思。 再食埋呢個鮮草莓窩夫(HKD58)就感覺人生夠曬圓滿喇!窩夫外皮鬆脆,入面好香蛋味,質感好綿密!仲可以點草莓醬同幼滑嘅奶油。留意返店舖嘅窩夫都係即叫即整,所以最好係Main Course差唔多食完嘅時候就叫定先喇。 La Kaffa 地址:北角明園西街2-6號明苑中心地下 電話:3153 2972 營業時間:星期一至五: 11:00-22:00 星期六、日及公眾假期: 09:00-22:00