Tagged: 卡路里

0

【新年暴食急救法 營養師教你「5多」消滯】懶健康貼士

就到新年喇,為咗準備一輪徹底嘅食慾大解放,要參加Party、食自助餐、打邊爐等等Non-­‐Stop吸收卡路里嘅節目,梗係唔可以飽飽滯滯冇晒胃口啦!依家就等NUTRILICIOUS創辦人同首席營養師Michelle Lau話俾大家知,究竟每餐暴食過後,食咩可以「急救」,避免腸胃受苦! 1. 多飲熱檸水 檸茶檸水都有助消化,檸檬含豐富維他命C,除可預防節日後夜瞓兼大吃大喝而累病外,因為酸味食物可刺激胃酸分泌,幫助消化;怕酸嘅話改用代糖或可以加少少鹽,同時做到消炎潤喉功能;如果本身經常胃痛或有胃病嘅人,就應避免食太多酸味食物,以免刺激胃部。 2. 多食水果 好多水果都含有對消化有益嘅天然酵素,其中木瓜含木瓜蛋白酶、菠蘿嘅菠蘿酵素及奇異果嘅Actindin,都有助加速分解蛋白質,幫助腸胃消化肉類食物,而其中嘅纖維更可促進腸道蠕動。成人每日只要一日食相當於兩個成人拳頭大小的分量,即可幫助消化兼刺激食慾。 3. 多飲茶 綠茶、煎茶等含有抗氧化物兒茶素同時美肌防痘,而其中嘅單寧酸和咖啡因均可有效刺激胃酸分泌,幫助消化;另外,飲茶還可幫助消除腸胃氣,利水排尿、減輕水腫;烏龍茶更有消口氣作用;薄荷茶也可幫助膽汁分泌,分解油脂。 4. 多食乳酪 服用乳酪、乳酸飲品含有豐富益生菌,可幫助平衡腸道內嘅益菌及害菌,促進腸道蠕動幫助消化過程,加快排清宿便,紓緩肚脹感覺或消化不良情況,但要記得選擇低糖低脂乳酪產品! 5. 多食高纖食物 高纖維食物包括綠色蔬菜如西芹、秋葵及西蘭花,或連皮食蘋果或梨等含豐富膳食纖維,有效促進腸道蠕動,促進排便,有助消化。比一般蔬果含有更多水溶性纖維,可有效降低飽和脂肪形成嘅膽固醇。   Michelle Lau 營養諮詢公司NUTRILICIOUS創辦人及首席營養師(加拿大人類營養學碩士)。專注範疇包括運動營養學、體重管理、兒童和婦女營養學。致力推廣均衡營養飲食概念,為多間機構提供營養飲食服務及為顧客提供度身訂造的飲食計劃 。作為一個熱愛跑步和烹飪者,她深信 “Life is so endlessly delicious.” Follow her on ig/fb@nutriliciousss

0

【減肥中的零食控 食一包保證跳到崩潰 】10種香港人至愛零食

成日聽到有人話食零食好肥仔,小編精選咗10款大家成日食嘅零食計一計數話你知,究竟食一包零食,要做返幾多運動啦!香港地方少,夏天又多雨,十萬年都唔做運動嘅小編以跳繩做單位,粗略計算一下,食一包零食要跳幾耐同要跳幾多下先消耗到! 撇除年齡、性別、體質等等嘅因素,一個50kg嘅人,持續跳繩30分鐘(60-80下/每分鐘)所消耗嘅卡路里係225(Kcal)。假設無論跳咗幾多分鐘都好,平均1分鐘都可以保持跳到70下左右,咁樣食一包零食要跳幾多下! *記得大前提係:1分鐘60秒裡面跳到70下呀。(Keep到話你叻) 日版固力果百力滋(沙律味) :3267下 1盒有兩包嘅百力滋原來有成350Kcal,食晒一盒兩包就要跳3267下。食晒唔駛兩分鐘,要跳走佢就要47分鐘。真係跳到樓下盞吊燈飛埋落街都未必跳完!好彩百力滋都算方便開心share,千祈唔好自私食,一個人食晒全部呀! 時興隆芝士圈 : 3258下 童年最愛嘅芝士圈(中包裝)都有349 Kcal,食一包要跳足47分鐘!好彩當年有體育堂消一消脂咋,無做開運動真係要諗諗先! 媽咪麵:2610下  出事喇,原來開一個藍毛毛演奏會所需卡路里係279.6Kcal,閒閒地都要跳繩跳返38分鐘,想開個唱真係唔做運動唔得。 繽紛樂 :2278下  唔好意思,我繽紛樂緊……脆卜卜嘅朱古力外皮真係會令人忍唔住口食完一啖又一啖,不過小編話你知1包繽紛樂有成244Kcal,食1條就要繽紛樂33分鐘!唔想跳2千幾下,都係分幾格比人食啦。 童星點心麵(炒麵味) :1876下  前排轉咗吉祥物嘅童星點心麵,好多人都鍾意就咁倒晒入口,原來細細包都暗藏200.9Kcal!食晒成包唔駛1分鐘,但要消耗佢呢,就要27分鐘喇。 泰版熊仔餅:1672下  之前伏務台介紹過泰版同日版熊仔餅嘅分別,比較常見兼易買嘅泰版有179.1Kcal,玩下手就要跳24分鐘,都唔講得笑。 卡樂B蝦條(原味):1578下  睇戲良伴非蝦條莫屬。中包裝有169Kcal,要跳23分鐘,比起薯片算抵食。唔想做咁多運動,呃蝦條食之前都係要諗下先。 卡樂B熱浪薯片 :1270下  唔少香港人都係食熱浪食到大,原來細包裝已經有136Kcal,細細包已經19分鐘,諗諗下都係唔好再得閒就塞落口先得。 魚仔餅(紫菜味) :1247下  童年回憶其中一個經典,紫菜味魚仔餅1盒133.65Kcal,一跳就係18分鐘。最伏之處係食完唔覺自己食咗嘢,飽足感近乎零,好易搭單食其他嘢又要瘋狂跳。 善字魚肉腸(原味):327下 雖然包裝麻煩又難開,但係得閒無事食返條心情真心好!殘酷嘅係1條有35Kcal,食1條就要跳327下,救命呀! 入伏點:祥華食品公司