Tagged: 印度菜

0

【蘇豪抵食週日Brunch $168歎廿幾款貴氣印度菜】Jashan

週末梗係要瞓到自然醒啦,食埋Brunch hea吓就完美喇!特別啲可以試吓呢間喺中環嘅印度餐廳Jashan,佢哋新推週日自助早午餐(HKD168/位),逢星期日都有廿幾款印度菜俾你任食,包埋一杯飲品㗎。入面嘅菜式除咗有肉類之外,都有唔少素食選擇,仲每星期轉款添。即刻睇吓有咩食啦! 餐廳佈置充滿貴氣,有現代感之餘又不乏印度風情。而且環境寬敞,坐得舒服自然更加開胃啦。 Brunch都有自助沙律吧,咁多款蔬菜、沙律俾你自由配搭,仲有唔同嘅印度醬汁,加埋脆餅一齊食就最正喇! 自助早午餐會出四款是日小食,通常會有兩款雞或魚之類嘅葷菜,另外兩款就會係素食,照顧唔同人需要。 呢個食物區就有印度傳統食物,大廚親自為你炮製,按你嘅要求加入豆蓉、薄荷醬等配料,有好多選擇㗎。 嚟到主菜喇!呢度基本有六道菜,每次出嘅菜式都唔同,但有2-3款肉類或者海鮮,3-4款素菜,走肉朋友都啱食!其中顏色咁鮮豔、橙橙黃黃嗰鍋就係招牌奶油蕃茄雞(右下),啲蕃茄煮得夠溶,面頭又淋滿cream,好惹味呀! 呢位大廚就整緊印度點心Dosa,即係鹹食嘅印度餅,都可以加豆蓉、乳酪等配料,味道層次夠晒豐富!   自助早午餐 供應時間:星期日:12:00-14:30 價錢:HKD168/位(設加一服務費) Jashan 地址:中環蘇豪荷李活道23號金珀苑1樓 電話:3105 5300 / 3105 5311 營業時間:星期一至日:12:00-15:00,18:00-23:00

0

【愛秩序灣街市正宗印度菜 咖喱雞肉絕配芝士烤餅】街霸

今集街霸向港島出發!喺筲箕灣嘅愛秩序灣街市最出名可能係冬天限定嘅飯焦煲仔飯,小編等凍啲再同大家介紹。今次介紹呢間Little Curry House,食返餐正宗印度菜!   同好多熟食中心一樣,呢度幾間食肆嘅食客係要share一個大嘅area,好似food court咁,不過大家各自嘅「地盤」唔多唔少都有分別嘅!呢間印度菜餐廳嘅老闆同員工全部都係印籍人,但係唔使驚難溝通喎,當日店員一見我坐低即刻話:「今日想食啲咩呀?」超流利廣東話,勁呀!即刻有返晒親切感啦!   食得咖喱就梗係要配薄餅,小編首先叫咗呢個咖喱雞肉(HKD62)同埋芝士烤餅(HKD25)。可能你會話70幾蚊街市價都幾貴喎,但其實佢都真係幾大兜吓,滿到瀉,而且真係有好多雞!幾個人一齊食share可以嗌多兩、三個餸其實都抵㗎!咖喱係有少少辣嘅,好惹味,配烤餅一流喇!芝士烤餅咬落有啲啲芝士餡喺入面,雖然做唔到牽絲嘅效果,但口感唔錯,外皮有少少煙韌,幾有咬口,正呀! 另外老闆娘極力推薦呢個印度香燒雞肉(HKD78),一場嚟到即管試吓啦!用鐵板上嘅,上碟時候「咋咋聲」,香味四溢。食落口有微微辣味,伴碟嘅洋蔥爆得超香,老闆娘果然冇介紹錯呀! 通常食印度菜永遠只會見到橙色、紅色、黃色甚至青色嘅咖喱,真係好少見到綠色㗎喎!原來係菠菜燴牛肉(HKD72)呀!菠菜汁食落唔辣,但香料味就好足,不過菠菜味就唔係好食得到喇!對於唔食辣嘅朋友嚟講係一個好選擇,因為呢個菠菜汁配埋薄餅食真係一絕㗎!   街霸最愛:如果我話我最鍾意佢個芝士烤餅……哈哈,唔好話我冇志氣住!薄餅喺印度人眼中係好重要嘅主食,同我哋廣東人嘅白飯一樣!個個都識煮,但真正煮得好味真係冇乜邊個㗎咋!我鍾意佢呢度嘅薄餅有少少厚度,點落咖喱汁度會有少少「索」咗啲汁入去,咬落去時超有咬口,令人忍唔住係咁搣、係咁點醬、係咁食唔停口呀!你話喇,成餐飯薄餅係咪先係靈魂呢? Little Curry house 地址:筲箕灣愛秩序灣道15號愛秩序灣街市熟食中心CF4號舖 電話:6901 3406 營業時間:星期一至日:11:00-23:00

0

【印度風石窯燒雞!體現真正窯燒風味】Village Malaysian and Indian Restaurant

每次提到印度菜,都會令人聯想起咖哩同辣味。位於西貢嘅Village Malaysian and Indian Restaurant專門製作馬來西亞菜同印度菜,而且咖哩唔會太辣,無論你食唔食到辣都可以嚟到歎下地道印度菜!而且佢地仲有石窯,嚟到仲可以試到真正窯燒風味添! 黃色牆極具特色,加上掛畫,令人感受到異國風情。 嚟到又點可以唔食沙嗲呢?馬來拼盤(HKD168/大) 沙嗲醬充滿花生醬味,食落甜甜地唔會太辣,好容易入口。整個拼盤有齊雞肉串、蝦餅、春卷、洋蔥Bhaji同蔬菜咖哩角,款款都夠火候熱辣辣好香脆而唔會太乾身,仲可以蘸甜酸醬或者沙嗲醬慢慢食。其中一舊舊好似魔人布歐個頭形狀咁嘅係蔬菜咖哩角,除咗個形狀夠晒得意之外,熱辣辣但咖哩味又唔會太辣,係拼盤亮點。食印度菜其中一樣好難走得甩嘅就係食雞,特式香料雞(HKD98)就以先燒好咗嘅炸雞加入濃厚蕃茄牛油醬汁入面,再加埋香草,整個醬汁組合好微妙,如果鍾意蕃茄濃湯不可不試。 如果鍾意食辣,呢個串燒五香雞件(HKD98)已經去骨,混和辣醬放入石窯燒。食落雖然辣辣地但帶少少甜,經過窯燒雞肉仍然保持到嫩滑,如果加上檸檬汁會更顯雞肉鮮嫩。 一餐入面又點可以無菜呢?鹹魚炒芥蘭(HKD62),一上檯就散發鹹香,但食落唔會過鹹,亦唔會太粗硬,連唔鍾意食菜嘅朋友都話夠晒惹味。 Village Malaysian and Indian Restaurant 電話:2791 2525 地址:西貢普通道1E號地下 營業時間:星期一至四:11:00-15:00;17:30-23:00 星期五至日:11:00-23:00