Tagged: #可口可樂

0

【中環茶記變身可口可樂主題 可樂豬手軟腍富膠質】中環茶記

可樂迷可以出動又食又打卡喇!中環嘅中環茶記未來兩年變身做可口可樂主題,可口可樂公司仲提供唔少擺設俾佢哋裝飾餐廳添。當然仲有用可樂炮製嘅限定菜式,快啲睇埋落去揀定食咩啦! 店內有唔少打卡位,呢幅可樂樽砌成嘅牆係必定要影㗎! 牆上仲有唔少有歷史價值嘅真品,全部由可口可樂公司提供。 可樂炆豬手(HKD148)一般係普通碟上,鍾意淋汁有「滋滋」聲嘅記得落單講明要鐵板上喇。豬手用可樂、花椒、八角浸足24個鐘,再炆足兩個鐘!味道有甜但唔會好膩,反而肉質嫩中有咬口,好似食緊骨膠原咁。 鍾意食雞翼嘅朋友就有兩款可樂雞翼俾你揀。柚子可樂雞翼(HKD36/5隻)用新鮮柚子同雞翼加入可樂慢煮,上碟再加啲香甜嘅柚子蜜,酸酸甜甜幾開胃。 薑檸可樂雞翼(HKD36/5隻)就加咗薑同檸檬,雞翼慢火煮完再焗,相對味道濃啲同辣辣哋。 而所有套餐嘅餐飲都可以升級轉做可樂特飲(單點HKD25/跟餐加HKD12),一款係海鹽柚子樂,海鹽嘅鹹同柚子嘅酸令可樂本身嘅味道更加突出:另一款係青檸香茅可樂,微微嘅青檸同香茅味令味道更加fresh,仲有啲泰式嘅感覺添。 如果15:00打後嘅時間嚟,想飽肚又唔好太heavy,可以試吓星級常餐(HKD68),因為除咗有招牌沙嗲牛肉或厚切豬扒麵,仲包埋呢款分量十足嘅明治牛奶奄列山多士,跟餐轉埋可樂特飲一定大滿足啦! 明治牛奶奄列山多士仲有八款配料俾你自選兩款,由左至右,上而下分別有秋葵、五香肉丁、牛肉碎、蘑菇、日本木魚絲、蔥花、芝士同火腿,想清啲定邪惡啲由你話事。   中環茶記 地址:中環威靈頓66號裕榮大廈地舖 電話:2387 2002 營業時間:星期一至五:07:30-22:00,星期六、日:07:30-23:00

0

【巨罐空降山頂廣場 可樂迷林二汶趕住朝聖】山頂廣場

在世界中心呼喚可口可樂迷呀!!! 山頂廣場有「可口可樂迷你博物館」展出,係巨型可口可樂裝置呀!裝置會以互動形式同大家展出可口可樂嘅品牌歷史。 林二汶話:「我係超級可樂迷,聽到呢個月有展出巨型可樂裝置,真係好期待嚟參觀 ,今次嘅限定可口可樂紀念品更加令我喜出望外!」 巨型裝置以可口可樂經典紅色罐裝設計為主題。首先可參觀 1899 至 1983 年期間製造嘅可口可樂復古玻璃瓶展覽,然後再探索呢個改變世界經典飲品嘅工藝。最後係一部自動汽水販賣機,亦係全港唯一一個售賣檸檬口味可口可樂的裝置。 預告吓嚟緊有咩限定可口可樂紀念品啦: 可口可樂儲物盒(開售日期:2017年10月 7日至 10月 13日) 可口可樂揚聲器(開售日期:2017年10月 14日至 10月 20日)   展覽日期:即日至2017年 12月 31日 時間:10:00-22:00 地點:山頂廣場一樓平台 **只要喺山頂廣場巨型可口可樂博物館內消費HKD 50,就可以獲得限定可口可樂紀念品組合一份(包括檸檬口味可樂同指定紀念品一份)。記得帶埋附喺檸檬口味可口可樂上嘅標籤,去山頂廣場地下嘅禮賓服務台換領指定可口可樂紀念品呀。