Tagged: 台式料理

0

【台灣炸雞早餐店登陸土瓜灣 必食花雕炸雞配芋頭椰奶】初茶×山雞部

台式小食之中,炸雞係重中之中嘅款式,依家台灣嘅山雞部同初茶落戶土瓜灣,大家都可以試到正宗嘅台灣風味喇,因為炸雞用嘅醃料都喺嗰邊運過嚟,而煮法同分量都跟足台灣㗎。加上一系列台式飲品,邊飲邊食都幾過癮。 香港店雖然同台灣茶飲店初茶聯乘,但都保留牆畫設計,而成間店就營造出café嘅感覺。 嚟呢到唔係食雞扒先,而係招牌嘅花雕雞腿塊!不過要飽肚嘅就食花雕雞腿塊-中華功夫麵(HKD48),可以順便試埋台灣運過嚟嘅中華功夫麵,煮起撈埋香蔥油,質感幾似冷烏冬咁幾彈牙,而且肉量大約有160g㗎。花雕雞腿塊將雞髀肉連雞皮一齊切開磋成球狀,醃料就加入花雕酒,炸完之後外皮香脆肉質嫩滑,而且花雕酒味好濃郁添。 另外仲有壽喜燒肉-銷魂飯(HKD36)都值得一試,用壽喜燒汁煎巴西五花肉,味道鹹中帶甜,又有少少焦香嘅口感。連埋撈勻蔥花、炒香嘅黑白芝麻等配料嘅香蔥油飯底一齊食,味道同口感層次豐富又唔會過鹹。 台式五香厚雞排(HKD30)大約有180g,分量都算重秤。炸漿唔會好厚,雞肉亦醃得入味,口感都幾嫩滑。 薯餅起司千層蛋餅(HKD25)嘅餅皮都係台灣運過嚟,口感煙韌又唔會好酥。餅皮煎到咁上下就放喺蛋皮上,令佢哋痴埋一齊,再放上芝士同炸到香脆嘅薯餅,灑上海苔粉調味就可以捲起喇。趁熱食就可以品嚐到外皮微脆,入面「厚肉」嘅滋味。 早餐食起司肉蛋綿吐司(HKD25)就一定全日都好醒神喇!鬆軟嘅麵包有陣奶香,夾上厚厚嘅蛋肉同壽喜燒肉都幾滿足,但最驚喜係入面搽咗甜甜哋嘅青瓜沙律醬,令成份吐司增添清新嘅感覺。 初茶嘅飲品之,芋頭椰奶(HKD32[左])係最受歡迎,幾乎一返貨就好快賣晒;將台灣運嚟嘅芋頭壓成芋泥,沖入椰奶之後再加入5、6件芋頭塊,真係勁足料囉。另外落咗質感輕滑嘅海鹽奶蓋雪戀蘋果(HKD30[右]),同埋奶同抹茶近乎5:5嘅抹茶先奶綠(HKD32[中])都同樣受歡迎,而且味道唔會好甜,加上以蔗糖調味又健康啲,唔嗜甜嘅朋友都飲到。 店內仲各式口味嘅芝士蛋糕(HKD19-22),藍莓、荔枝芒果、北海道紅豆、焦糖朱古力等口味都算多選擇。   初茶×山雞部 地址:土瓜灣農圃道18號LG03舖 電話:6976 2328 營業時間:星期一至日:11:00-21:00

0

【太子小店專賣台式炸蛋蔥油餅 招牌肉鬆鹹蛋黃香脆爆漿】炸老闆

依家唔使飛台灣都食到正宗嘅台式炸蛋蔥油餅喇!喺太子新開嘅炸老闆主打一系列爆漿台式蔥油餅,佢哋嘅師傅專程去台灣宜蘭學師,務求將最地道嘅口味帶到香港。呢度嘅台式蔥油餅除咗原味外,仲有6款口味俾你揀,其中招牌嘅肉鬆鹹蛋黃、台灣經典嘅大蒜香腸同九層塔、充滿港式風味嘅餐肉炸蛋都係熱賣之選嚟㗎!呢度嘅蔥油餅好食仲充滿視覺效果,皆因入面嘅炸蛋真係好似「炸彈」咁一咬即爆,食嘅時候記得要小心喇。 每日人手新鮮即製嘅蔥油餅食落特別鬆脆,麵糰落鑊炸嘅時候會打一隻雞蛋喺上面,令兩者結合變成炸蛋蔥油餅! 呢款招牌嘅肉鬆鹹蛋黃炸蛋蔥油餅(HKD38/套餐連茶飲)喺炸到香脆嘅蔥油餅搽上特製嘅鹹蛋黃醬,再加入大量肉鬆!入口鬆脆之餘仲充滿鹹蛋黃嘅鹹香,係一款比較大眾化嘅口味。 台式九層塔炸蛋蔥油餅(HKD32/套餐連茶飲)就最有台式風味喇!新鮮嘅九層塔略略油炸後放喺搽上醬油膏嘅蔥油餅皮上,食落有啲脆身嘅九層塔味道清新,入口會散發九層塔獨有嘅香味添。 另一款經典嘅台式口味就係大蒜香腸炸蛋蔥油餅(HKD37/套餐連茶飲),不過唔係咁多香港人食到生蒜片,所以舖頭都貼心咁改用香蒜蓉。喺炸好嘅炸蛋蔥油餅上面加一大羹蒜蓉再鋪上台式香腸片,惹味到暈呀! 平時鍾意食港式餐蛋麵嘅朋友仔,今次就可以試吓餐肉炸蛋蔥油餅(HKD37/套餐連茶飲)。將厚切嘅午餐肉微微炸香,夾入餅中再搽上醬油膏。食落又估唔到午餐肉會同台式蔥油餅咁夾喎,亦食到午餐肉獨有嘅鹹香。 除咗蔥油餅之外,呢度嘅波霸滷肉飯(HKD35/套餐連茶飲)都幾與別不同㗎;佢個包裝好似杯麵咁有封口,唔怕倒瀉又衛生,方便客人外賣拎走。一揭開封口就見到滷肉同大大隻流心蛋,賣相幾吸引喎。撈埋一齊食,飯同滷肉嘅比例啱啱好,而且滷肉唔算太肥。唔好睇佢杯麵咁嘅size就好細碗,食落分量都唔少㗎,一人獨享都夠食。 呢度仲有小食賣,切成一片片嘅台式炸饅頭(HKD25)炸到金黃酥脆,唧上煉奶、灑滿花生粉啱晒鐘意甜食嘅你。一份約有十件,都幾抵食。 茶飲(HKD17/單買;跟餐免費)方面選擇都算多,5款都係自家沖製再入樽。其中人氣之選有清甜唔膩嘅冬瓜茶,同埋加入牛蒡、甘草,入口甘香又有淡淡牛蒡味嘅養生茶,夠晒健康呀!   炸老闆 地址:旺角弼街60號地舖 電話:5401 5749 營業時間:星期一至日:12:30-22:00

0

【元朗台式小店新推DIY鮮奶麻糬 引入爆餡紫薯芋泥吐司】羅東肉焿番

想食台式甜品嘅話,羅東肉焿番就夠晒多元化喇。呢間以肉焿湯同魯肉飯起家嘅元朗小店近期推出唔少新款台式甜品,除咗芋圓仙草呢類傳統台式甜品之外,仲有台灣hit爆嘅芋泥吐司同鮮奶麻糬添。想食嘅朋友仔就唔好錯過喇! 一睇店名就知呢度主打台灣菜,店裡店外都幾有台灣地道小店嘅感覺。食物就由以前只賣肉焿湯、魯肉飯、台灣麵等幾款台菜,進化到依家不時推出香港少見嘅台式潮興甜品做招徠。 食甜品之前,就梗係要試吓舖頭招牌嘅羅東肉焿湯(HKD46)。呢度嘅肉焿湯以新鮮豬大骨熬製,入面啲焿肉就喺用豬肉、魚漿等材料人手搓成,每朝現做現煮,保證新鮮。焿湯嘅質地稠身,焿肉食落軟腍入味,仲有筍絲、芫荽呢啲配料,真係同喺台灣食嘅肉焿湯差唔多喎。 而呢度嘅魯肉飯(HKD28/小)配咗半隻溏心蛋,魯肉嘅肥瘦比例大槪係3:7左右,食落冇乜肥肉,其實比較似肉燥飯;魯肉分量足,味道唔會過鹹,都幾抵食㗎。 重頭戲嚟喇!小店早排推出喺台灣好興嘅手作芋泥吐司,最近就有兩款新口味,其中一款就係呢個芋見紫薯吐司(HKD43)。喺烘好嘅吐司上面分別加入大大球芋泥同紫薯蓉,一啲都唔孤寒,難怪做到爆餡效果啦!每日蒸熟鮮芋頭同紫薯,壓成芋泥同紫薯蓉,做法天然冇加其他嘢㗎。 而呢款Oreo紫薯泥吐司(HKD46)就以Oreo同紫薯蓉做內餡,加咗Oreo碎嘅吐司都增加咗唔少口感。 有得玩又有得食嘅就非呢款鮮奶冰麻糬(HKD56/綜合口味)莫屬喇。呢款麻糬唔係平時食開嗰種煙韌軟腍嘅口感,而係偏流質嘅,鮮奶味好濃郁添。你要自己將麻糬倒落芝麻粉同花生粉上面撈嚟食,又幾盞鬼喎。唔想兩隻味撈埋一齊,都可以單嗌其中一種口味(HKD52),不過呢款麻糬每日限量供應,賣晒就冇㗎喇。 最後介紹埋舖頭熱賣嘅芋圓系列,想兩個人share食又驚唔夠就可以點呢款雪糕綜合芋圓(HKD70)喇。以仙草鋪底,面頭有晒三色芋圓、蜜紅豆、波霸白玉珍珠、白色小丸子同海藻水晶5款配料,另外自選一大球雪糕,小編就揀咗唔係度度有嘅海鹽雪糕。呢度嘅三色芋圓夠晒煙韌有咬口,而比較少見嘅海藻水晶就偏爽口,質感獨特。   羅東肉焿番 地址:元朗鳳翔路69號建輝大廈地下5號舖 電話:6112 5353 營業時間:星期一至日:12:00-21:00

0

【台灣家傳牛肉麵「嫁」到香港 鹽酥肉+炸大腸惹味唔油膩】阿木台灣麵

喺香港嘅台式餐廳的確唔少,但講到地道傳統嘅台菜,不得不介紹呢間喺旺角新開嘅阿木台灣麵。老闆娘係台北人,雙親以前喺台灣老家賣牛肉麵,佢嫁嚟香港都唔想家傳手藝隨住雙親退休而失傳就決定開店喇。店內唔少菜式好似紅燒牛肉麵、鹽酥肉、炸滷大腸等等都充滿台灣風味,而且定價親民,值得一試。 呢道紅燒牛肉麵(HKD65)係喺台灣賣咗四十幾年嘅家傳招牌菜,由麵、湯底到牛肉都依照家傳秘方製作。手工麵喺工場每日新鮮出產,麵質彈滑;而湯頭就用咗牛骨、牛肋等多款食材熬煮廿幾個鐘,未食已經聞到陣陣香濃嘅牛肉味;牛?當然都係牛肉麵嘅重點啦,厚切都仲軟腍有咬口,筋肉比例幾均勻添。 而家傳鹽酥肉便當(HKD59)係台灣店主最鍾意食嘅家常菜之一。平時鹽酥雞就食得多,鹽酥肉就冇乜點聽過,因為係老闆娘嘅媽媽自創。以豬頸肉代替雞肉,又幾有新鮮感喎。便當中嘅肉燥飯就選用台灣有名嘅國產米台梗九號米,由台灣直送,咁你就知店主對「台灣風味」有幾執著啦。如果點麵或便當,就可以半價飲埋台式飲品;呢樽蜜桃烏龍冷泡茶(原價HKD28)都幾清香解膩㗎。 肉燥拌麵(HKD42)嘅麵量唔少,肉燥又夠足料,另有惹味嘅麻辣口味(HKD43)俾一眾無辣不歡嘅朋友試。 想食得再辣啲?飯麵都可以配上店內秘製嘅辣椒醬(單買HKD40/樽),麻辣之餘,仲有淡淡蝦嘅鮮味。 鍾意食炸大腸嘅朋友就一定要試吓呢度嘅台式炸大腸(HKD39)!大腸喺炸之前滷過一段長時間,入味之餘仲冇平時炸大腸嗰種攻鼻嘅味道。咬落腍身唔韌,亦冇乜油膩感,幾有驚喜喎。 即叫即整嘅芝士肉鬆蛋餅(HKD42)好有台灣早餐店嘅味道!蛋餅有濃郁蛋香,加入大量蔥花,切開仲有足料嘅芝士同肉鬆餡添。   阿木台灣麵 地址:旺角廣華街8號地舖 電話:2311 9922 營業時間:星期一至日:12:00-00:00

0

【KiKi麵x老巴剎廚房 冬蔭公VS星洲咖喱湯麵】茶米

主打台式料理嘅KiKi茶@茶.米又有新麵食喇!今次就同東南亞餐廳老巴剎廚房crossover,喺KiKi招牌日曬麵加入東南亞元素,創出三款期間限定麵食,供應到4月30日咋。拌麵同湯麵都有,即刻睇吓食邊款先! 呢款咁豐富嘅乾拌麵係泰式香草牛肉燥拌麵(HKD118),面頭啲牛肉燥加咗好多唔同嘅香料同香草煮,辣辣哋咁夠晒惹味! 跟住兩款湯麵都充滿泰國風情。泰式冬蔭蝦球拌麵(HKD128)入面嘅醬料係以冬蔭功醬混合泰國辣椒醬特製而成,聞落已經有好香濃嘅冬蔭功味,同鮮味嘅蝦球特別夾。 星洲咖喱雞絲湯麵(HKD118)個咖喱湯底夠濃稠,又有椰香味。加上雞絲吸晒湯汁嘅精華,令成碗麵加唔少分喎。 呢杯有雙層顏色嘅蝶豆花青檸蘆薈粒冬瓜茶(HKD35)會唔會夢幻咗啲呢?喺冬瓜茶入面加咗清甜嘅蘆薈粒同好fresh嘅鮮青檸,再倒入蝶豆花撞出夢幻嘅紫色,味道同賣相都一樣咁正呀。 唔好以為呢杯係普通嘅橙汁咁簡單,而係鮮橙青檸愛玉茉莉綠(HKD35),味道酸酸甜甜好開胃喎。   茶米 地址:香港金鐘金鐘道88號太古廣場1樓112號舖 電話:2117 5903 營業時間:星期一至日:11:00-22:30