Tagged: 台式火鍋

0

【新派一人火鍋】熱點

有幾個美加留學返黎嘅八九十後,一直鍾情於以前喺美國LA成日食嘅一人一鍋台式火鍋店。點解咁回味?火鍋店香港周街都有啦!原來特別之處就係所有湯底同配料都已經細心配搭好,不同風味都有,清淡或重口味都照顧周到!同樣概念火鍋店,香港一間都無,所以決定將久違嘅味道帶返香港,首次創業。 選址非常進取,喺尖沙咀The One對出開舖,夠晒方便!策略亦都非常精明,同其他餐廳分租,希望先測量市場水溫,所以暫時只開晚市。唔好日光日白走過去呀,拿,提左你喇! 有成十款味道,一定有款啱心水啦。只需要選擇心儀味道,就成褒煮好送上黎,快靚正。店主們每樣材料都親自試過,大家一至好評先會放入個窩入面,好認真好有heart,絕對唔係亂黎嫁! 招牌款係竹笙椰子海南雞窩(HKD128),裡面有腐皮、蜆、竹笙、鮮淮山、娃娃菜、嫩滑雞件、馬蹄、金菇、貢丸、飛魚籽魚蛋腸、蜂巢豆腐、粟米、粉絲、椰子肉。材料勁多呀,又有養生攻效,味道較為清淡。每個鍋都會跟埋一碗飯,分量剛剛好。 麻辣肥牛鍋(HKD88)可以揀大中小辣,想食幾辣都得,唔洗就人。公仔麵喺個鍋入面,吸哂啲辣湯,正呀!裡面有蜂巢豆腐、腐皮、蟹柳、娃娃菜、公仔麵、金菇、貢丸、豬紅、肥牛、花枝丸、飛魚籽魚蛋腸、蜆、唐芹、蔥花。 食鍋物其中一個重點當然係醬汁,同樣都係一絲不苟嫁!蒜蓉醬油膏、台灣直送豆瓣醬同特別調配甜醬油,裡面有包括沙薑、青檸同辣椒。 大食人士可以再追加食物,仲有多款台式飲品幫你解渴。 熱點 尖沙咀加連威老道18號地下B舖 星期日至四: 18:00-23:30 星期五、六及公眾假期: 18:00-00:00