Tagged: 台灣菜

0

【打卡餐廳×台西fusion菜 軟殼蟹鹹蛋意粉香口惹味】Floom Floom Cafe & Kitchen

鳥語花香係咩組合?咪係Floom Floom呢間餐廳囉,事關佢哋第一間店嘅中文名係鳥語,而喺尖沙咀新開嘅分店就叫花香,呢度嘅菜式絕大部分都配上食用鮮花做點綴,俾你唯美嘅用餐體驗。分店加入台式餐飲,選擇更加多元化。 今次裝潢比較時尚型格,仲有呢個甜美感覺嘅打卡牆俾大家慢慢留影添。 話明菜式俾你唯美嘅用餐體驗,呢個月見牛油果彩虹沙律(HKD118)都擺到靚一靚咁上枱,影好相就先將半個牛油連同裝住嘅帶子、鵪鶉蛋同醬汁撈勻,之後再連同大蝦、紫椰菜、南瓜蓉等材料撈埋一齊就食得。甜中帶鹹嘅味道幾fresh,而且蝦肉大隻爽口,感覺唔會好齋。 原隻軟殼蟹黃金鹹蛋蝴蝶粉(HKD138)喺醬汁加入鹹蛋蓉增加港式風味之外,鹹香味道令人想追住食。加上炸到外脆內嫩嘅軟殼蟹,加埋一齊邪惡得嚟幾夾喎。 睇完偏西式嘅款式,到台式嘅華麗大蝦配黑毛豬滷肉乾拌麵(HKD118)喇!凍醉蝦有成十隻咁多,分量絕無嬉場,而且淡淡酒香令蝦肉更鮮甜。配埋嫩滑唔過鹹嘅黑毛豬滷肉,令拌更加香滑。 如果想食健康啲嘅飯款,膠原滿滿熔岩飯(HKD98)就以西班牙黑毛豬滷肉配桃膠。入口有啲啫喱嘅感覺,都幾得意㗎,不過味道層次就冇華麗大蝦配黑毛豬滷肉乾拌麵咁豐富。 如果想歎個輕食hea吓,炸排骨拉絲蛋餅(HKD78)都係唔錯嘅選擇。薄身嘅炸排骨冇好油膩嘅感覺。蛋餅入面加咗芝士同帶甜嘅台式醬料,味道同口感層次都幾豐富,仲伴有沙律菜俾你清一清添。想點杯特式飲品可以試少見嘅黑糖酒釀拿鐵配懸浮棉花糖(HKD55/熱),初入口甜甜哋,慢慢會有好輕嘅酒香滲出嚟。而髒髒朱古力(HKD48/熱)就有滿瀉嘅朱古力粉同朱古力碎,但又唔會甜到封喉,啱晒朱古力控呀!   花香 Floom Floom Cafe & Kitchen 地址:尖沙咀河內道18號K11購物藝術館B2樓201號舖 電話:5500 6239 營業時間:星期一至日:12:00-22:00

0

【阿元菜市場停賣火鍋大轉型 新推牛肉麵+手工餃坐鎮】阿元菜市場

自從有Partyroom加打邊爐聚餐後集體感染武漢肺炎,火鍋店嘅生意真係一落千丈,但就演變出外賣火鍋嘅模式。不過堅尼地城嘅阿元菜市場就完全停賣火鍋玩轉型,阿元就話:「如果你已經病了,在家吃火鍋還是容易感染呀,所以不賣比較好。其實外賣火鍋在台灣很流行,我們在疫情過後會考慮。」。雖然依家轉型,但仍然做台菜,仲推出本店限定嘅牛肉麵、手工餃子、酸辣湯等款式,即刻試吓先! 講返依呢阿元菜市場嘅限定菜式先,必食嘅就有呢款牛三寶麵(HKD85),有煮到軟腍嘅牛肋條、牛筋同牛肚,肉量都幾多添。湯底就梗係紅燒湯底啦,將分開熬煮嘅牛骨湯同蔬菜湯最後合併一齊,起碼要煮6-8個鐘,味道好濃又有少少辣,啱晒重口味嘅朋友。 呢款外表似清湯腩嘅其實係藥膳牛肉麵(HKD69),配咗4大嚿厚肉又腍身嘅牛肋條。湯底都係以牛骨湯做底,再加入藥材熬煮,入口濃味唔苦,感覺好暖胃㗎。 提提大家醬料區有兩款特別配備牛肉麵嘅醬料,牛油配紅燒牛肉麵會更加香辣惹味;而酸菜就令麵嘅味道更酸爽,台灣人都會加落牛肉麵㗎。 呢度仲有5款手工水餃,可以買走生嘅高麗菜、水蓮、韭菜、素菜(各HKD50/一打)同三鮮水餃(HKD60/一打),堂食(每款5隻)又得。除咗傳統嘅高麗菜口味,配上蝦仁、帶子同木耳嘅三鮮餃(HKD30/上圖)同埋冇肉嘅碧綠素菜餃(HKD25/下圖)都唔錯㗎,餡料都幾飽滿。 想特別啲就有酸辣湯餃(HKD58/6隻),可以喺水蓮、高麗菜同韭菜3款手工餃之中自選1款,小編就試咗罕見嘅水蓮餃,爽口又有蔬菜嘅甜味。如果唔想配手工餃,亦可以點酸辣湯麵(HKD45),味道酸中帶辣都幾開胃㗎。 雖然轉型,但店內仍然保留「菜市場區」,食客可以自選蔬菜俾店員整成肉燥青菜(時價),甚至買走返屋企自己煮。呢度八成嘅菜都來自台灣,以後想試唔同品種可以嚟買菜喎。 小編就試咗台灣嚟嘅紅鳳菜(HKD29),口感有啲似莧菜。而肉燥青菜同香菇肉燥乾麵(HKD39)一樣,各有一勺香菇肉燥俾你拌勻嚟食。 除咗香菇肉燥味,仲有用台灣麻醬整成嘅麻醬拌麵,味道濃到有啲似花生醬添。   阿元菜市場 地址:西環堅尼地城科士街40號聯安新樓地舖 電話:9220 9785 營業時間:星期一至日:11:00-22:00

0

【度小月分店進駐深水埗V Walk 獨家限定三款魷魚主題菜】度小月

鍾意食台灣菜嘅朋友對度小月應該一啲都唔陌生,佢最近開第三間分店仲走入深水埗新商場V Walk。新店除咗有招牌肉燥飯同擔仔麵之外,更推出三款獨家限定嘅魷魚主題菜同三款夏日開胃菜,帶啲新鮮感俾大家!另外,喺8月10日前嚟食仲有全店8折嘅新店優惠添。 V Walk喺南昌西鐵站上蓋,位置唔難搵。環境開揚嘅店面仲睇到店員喺度熬煮肉燥,貫徹返度小月嘅特色。呢度過咗中午時段仍然有唔少客人幫襯,幾乎滿座! 除咗有得食一眾招牌菜之外,新店仲獨家推出三款以魷魚為主題嘅限定菜式,全部都充滿台灣地道風味㗎! 食台灣菜又點少得魷魚羹呢?呢道沙茶魷魚羹(HKD38)有濃郁嘅沙茶香味,啱晒重口味嘅朋友仔!而且每一羹都潷到大大嚿魷魚同埋紅蘿蔔、木耳絲等唔同配料,咁足料好抵飲。 魷魚筒喺台灣叫中卷,呢款三杯中卷(HKD88)亦係地道嘅台灣快炒小菜。以三杯醬汁加入香葉、紅椒絲等配料快炒,入晒味嘅魷魚口感非常彈牙又唔韌,食落好惹味呀! 而加入露筍、紅蘿蔔、紅椒絲、西芹炒嘅台式炒花枝(HKD88)面頭打咗芡,有好香嘅麻油味,但入口唔油膩;花枝片質地軟腍彈牙,餸飯一流! 新店趁住夏天加推三款夏日小菜俾大家醒醒胃。有冇聽過咩係木須肉呢?其實木須肉(HKD88)就係以嫩豬肉同木耳炒蛋嘅特色中菜,蛋炒得乾身而嫩滑。 另外,仲有薑汁蕃茄(HKD38)同清香豆腐(HKD38)兩款冷盤,涼浸浸又口感清爽,夏天食就啱晒喇。   度小月 (深水埗新分店) 地址:九龍深水埗深旺道28號V WALK 二樓L2-142&L2-143號舖 電話:8300 2003 營業時間:星期一至五:11:30-22:00,星期六、日:11:00-22:00

0

【阿元來了五週年搬大舖 新廚駕到煮出新台風】阿元來了

阿元來了五歲喇,西營盤總店搬咗去堅尼地城,舖頭大咗可以食得舒服啲。香港人對阿元來了嘅熱情咁多年都冇減退,小編三點幾去到都不斷有食客到。舖頭雖然多人幫手,但阿元都會落場,佢話:「五年來都是自己主力研究菜式,也需要人幫忙衝擊一下,所以找來新的台灣廚師阿耀加入。因為我是住台灣的南部、他是住台東,就有台灣不同地方的小吃可以融合在一起,也創作更多菜式出來,每半年他都會研究新的菜單。」。今個月唔止有新menu,依家仲會搞埋到會添,想訂你心目中嘅台菜都可以啦。唔講咁遠,睇吓新場環境同新廚阿耀嘅新菜先啦! 新場好大,除咗掛天燈增加台灣風味,部分牆身仲有掛啲兒時遊戲嘅擺設,同時又營造到夜市感覺,全部加埋又幾爽喎。 新地方可以喺食客面前整埋夜市檔口,更加食慾大開呀。 阿元魯肉飯(HKD39)嘅魯肉配方同之前一樣,但想大家食飽啲就加大咗分量同落埋魯蛋。又想健康啲,所以加埋魯菜,唔係白烚㗎!大大啖魯肉入口依然好香軟有肉汁,雖然睇到有肥肉,但食落唔多覺,汁嘅鹹度餸飯一流添。初時以為加咗量都唔係好大碗,但女仔食可能飽咗啲,除非你唔叫其他食物啦。 台灣唔同地區都有自己特色小食,今次新menu都加咗幾款唔同地區嘅傳統菜色。先講彰化肉圓(HKD39),分四份先勉強可以逐份啪入口。外皮似厚身粉果,但好軟腍同好Q彈。入面包住嘅肉仲溝入鮮筍同香菇乾,點埋湯汁一齊食,感覺好滿足。 跟住就係四神湯(HKD30),咪睇個樣好清,一潷係勁多湯料囉!入口有香濃嘅藥材味,但飲完感覺好清爽。雖然有豬大腸,但一啲都唔油,冬天飲仲幾暖身添。 仲有經典地瓜球(HKD30),每個台灣人都實食過。不過呢個係改良版,包咗餡料唔做傳統嘅空心版。黃色嘅入面包咗地瓜蓉、紫色就包咗紅豆蓉。外脆內煙韌,仲有灑咗梅粉喺面,口感同味道都好豐富。 屏東嘅萬巒豬腳(HKD45)就用台灣直送嘅無骨豬腳肉,好似燻蹄咁,不過呢款係熱食。即叫即煎再淋醬汁,所以上菜嘅時候隻碟仲係熱㗎!肉質好滑同爽口,絕對可以回頭呀! 新飲品就由阿元主理,右邊紅棗桂圓奶茶(HKD28)感覺清香,厚度似英式奶茶嘅感覺;而左邊嘅龍眼蜂蜜綠茶(HKD30)好得意,聞落有陣花香味,相對紅棗桂圓奶茶會甜啲。不過台灣口味都係比香港甜,所以店員會細心問你有冇需要少甜㗎。 想試吓舊嘅菜式都仲有大把選擇,小編推介土魠魚焿(HKD40),土魠魚都係台灣直送㗎。四、五條炸過嘅魚條淋上湯羨,一咬魚肉嘅感覺好似食緊肉鬆味嘅肉條咁,極度滿足;湯羨係佢哋平時賣嘅肉羨湯,不過令小編諗起碗仔翅,因為有冬菇條同筍絲等材料,口味好啱香港人食。   阿元來了 地址:西環堅尼地城北街31號地舖 電話:3579 2460 營業時間:星期二至日:11:00-23:00(逢星期一休息)

0

【「很讚紅燒牛肉麵」讚唔落 肉燥勁鹹牛肉嚡口】伏務台

肉燥係台灣地道美食嘅靈魂之一,喺長沙灣嘅台式餐廳一碗肉燥就以肉燥做膽,不論飯、撈麵定係湯麵都一定配咗肉燥。咁大膽係咪就一定正宗兼好食?試吓咪知囉! 餐廳係半快餐形式,自己搵位。剔完點餐紙就舉手,等店員埋嚟幫你落單。 反正食台式嘢,梗係要試埋牛肉麵,所以加HKD4由飯變湯麵,點咗很讚紅燒牛肉肉燥湯麵(HKD56),午餐包埋蜂蜜紅茶,冷熱同價,小編就揀咗熱。建議大家check check單,因為店員落錯咗撈麵,好彩改得切,因為落單唔使5分鐘就有得食,砌得好快手。先上飲品,真係有啲嚇親,因為蜂蜜同紅茶好似分開兩件事咁,好唔夾,而且太甜,蓋過咗茶香。麵嘅賣相一般,見到溏心蛋蛋黃邊過熟已經扣分!唔理咁多喇,先試肉燥啦! 近睇肉燥就係一大pat醬,就咁潷一啖會覺得醬多過料,冇咩咬口,反而覺得鹹咗啲。睇真啲(圖右),綠色嗰堆粒粒唔係蔥、係四季豆囉,牛肉麵用四季豆做配料,小編真係未見過喺台灣有咁嘅配搭同賣相囉;肉碎呢?愈咬愈乾、另外又夾雜唔少嚿肥膏;冬菇粒就好似醃到本身水份流失晒嗰種腍! 然後試佢自己讚自己嘅很讚紅燒牛肉,入口喺腦海中即刻出現係「好鹹」兩個字……調味太重手喇。肉質有啲嚡,又炆到乾柴咁款,真係讚唔落口喎。 麵條似刀削麵加鳥冬嘅感覺,不過唔知係差少少火喉定係麵質問題, 咬落有啲硬同實淨。不過麵條太粗,唔似台灣麵嘅風味。食到咁上下,食四季豆清清味覺,點知係成陣草青味!咬落跟本未熟,外層仲硬硬哋添!食到呢個時候,小編都冇講過個湯,因為就係帶味精嗰種鹹鹹哋嘅湯囉,冇特別。   小編伏氣:成碗麵就係兩種味,就係「鹹」同「青草味」。最鹹係「很讚」紅燒牛肉,鹹到眼都凸;第二鹹係肉燥,不過咁多醬浸住,似乎叫肉燥醬適合啲囉!冇諗過四季豆都可以唔煮熟,小編想食都食唔落。如果要改善,煮腍啲四季豆同麵條,鹽用少一半會好好多。 入伏點:一碗肉燥 入伏價:HKD56 中伏by #為食加菲貓 美術by #車雲 攝影by #為食加菲貓 《伏務台》星期一伏務大眾,歡迎各界報料。

0

【「請坐」再出發「吃什麽」 台灣媽媽:我們回來了!】吃什麼

相信大家對「請坐」呢個名應該唔陌生,曾經係兩位由台灣嫁來香港嘅媽媽嘅心血,自從上年十月獲得米芝蓮車胎人推介之後就一直風波不斷,仲因為信錯人同某位股東發生商標風波,今年2月開始唔可以再用「請坐」呢個名繼續做生意。不過呢兩位媽媽最近已經收拾好心情重新出發喇,喺中環再開新店,吃什麼終於開幕喇! 新店啱啱起步,當然有好多嘢要處理,小編見到Tracy(左)同Grace(右)做乜都親力親為,同員工有商有量,真係犀利。「我們甚麼都做,沒有人收錢就去收錢,沒有人掃地就掃地,沒有人送餐就送餐,我們知道員工也很累,我們不是那種袖手旁觀的老闆。」。說罷又見到Grace提點員工要照顧一下門外嘅客人!小編一直久仰兩位媽媽同一般老闆嘅唔同,到呢刻先真正明白點解佢哋有困難時大家都伸出援手。真係難得一見有heart嘅老闆娘啊! 新店叫吃什麼,其實係源自佢哋多年前喺西環開嘅外賣店,「最初我們只賣三文治,可是賣得不好,後來慢慢做起便當來賣……我們最初的外賣店叫『吃什麼』,就是那樣隨性的店,隨時我們不高興了、拉下鐵門就跑去喝咖啡了。現在的『吃什麼』就變成是我們覺得大家累了也拉下鐵門跟員工一起休息,休息夠才能繼續為大家帶來好吃的東西!」。 每次問到其他國家嘅人「覺得香港人點」嘅時候,答案多數都係「行路好快、好急好趕同好冷漠」,通常冇咩比較正面嘅形容詞,但Grace竟然話覺得香港人好可愛,真係令到身為香港人嘅小編打咗個突。「那次事件裡面(被逼關店)幫我們的全部都是香港人呀!你看這幅牆,畫的都是幫助過我們的人。」Grace指向背後的壁畫,上面畫著各式各樣的人,原來全部人都有一個故事,而這幅畫也是一位熟客幫佢哋畫嘅。「大家真的對我們很好,我們何德何能呀!」。 兩位台灣媽媽嘅拿手招牌除咗牛肉麵之外,應該就係滷肉飯喇。不過由於太好賣嘅關係,當日小編去到已經售罄喇!不過店員就推介滷肉乾拌麵(HKD65),話呢款都好多人讚好! 麵質比較粗身少少,係台灣夜市食嗰種乾拌麵質地,食落彈牙又有咬口!滷肉介乎肥同瘦中間,唔會太肥太油淋淋!台灣風味十足! 外省牛肉麵(HKD85/半筋半肉)係有得揀全筋或者全肉,不過半筋半肉可以試晒兩種口味嘛!湯底有啲麻辣,同平時食開嗰種紅燒湯底有啲唔同,不過都好濃郁,忍唔住連湯都飲埋啊。 牛肉炆得超腍又入味,一咬就溶晒喺口呀! 台灣其中一個代表性嘅食物應該就係蛋餅喇,喺台灣通常只有早餐店先會供應蛋餅,晏少少起身都食唔到呀!吃什麼嘅蛋餅係全天候供應,想幾點食就幾點食! 起司蛋餅(HKD39)皮薄餡靚,芝士同蛋嘅分量啱啱好,醬汁味道酸酸甜甜,係早餐店嘅味道啊! 最後呢味虱目魚(HKD98)係台灣比較流行嘅菜式,香港比較少見。食落口唔似鱈魚或者普通魚柳咁滑身,味道鹹鹹哋送飯唔錯,大家可以試吓! 吃什麼 地址:中環雲咸街77號嘉兆商業大廈地下A號舖 電話:2810 9278 營業時間:星期一至三:12:00-15:00;18:00-21:30;星期四至五:12:00-15:00;18:00-22:30;星期六:18:00-21:30

0

【老台灣伙食】伙食工業

伙食工業主打台灣菜,但最大賣點反而係環境氣氛,餐廳裝飾同佈置都非常懷舊同有特色!餐廳坐落於火炭,由火炭港鐵站行過去都要成15分鐘,以為佢位置比較遍遠唔會太多人,食食吓越來越多人差不多爆滿! 點食物要出去收銀處,然後會有侍應奉上食物。 餐廳所有枱櫈款式都唔統一,感覺似間古董傢俬店。 看得出來老闆好用心去搜羅各種懷舊物品,鍾情復古文藝風的話,每個角落都可以係影相位。 台式鹽酥雞 (HKD 40),大概有8小塊,算抵食。炸得蠻香,依個價位來說,算不錯。 沒有最抵食,只有更抵食既魯肉飯出場喇,$20碗,仲有埋半隻滷蛋!如果唔想食太飽,黎食碗魯肉飯其實都夠。環境又舒息,同朋友來hea下都得。 伙食工業 火炭坳背灣街57-59號利達工業中心地下3號舖 (正門入口-火炭路) 星期一: 12:00-18:00 星期二至日: 12:00-22:30