Tagged: 台灣過江龍

0

【師大燈籠滷味登港排長龍 30多款配料自由組合】燈籠滷味

等到頸都長,終於等到燈籠滷味香港店開始試業喇!落戶銅鑼灣登龍街嘅燈籠滷味係繼台北師大夜市本店之後嘅首間海外分店,將夠晒地道嘅台式滷味引入香港,有成30多款配料俾你自由配搭㗎。比起本店,香港店嘅款式更加多元化,除咗有加熱滷味之外,亦有唔同嘅台式小食、飲品同芋圓,即刻睇吓邊款最吸引你啦! 食過嘅都知,呢啲台式加熱滷味類似港式車仔麵,可以依照個人喜好自由揀唔同嘅滷味配料。但如果太多配料令你花多眼亂嘅話,香港店都好貼心咁set咗唔同嘅套餐,有師大人氣配料組合、滷汁滷味精選同有營素食選擇,有選擇困難症都唔使怕!呢度堂食免收加一服務費,不過每人最低消費HKD30。 一大碗滷味有唔同配料擺喺你面前,未食先滿足呀!呢碗「吃你滷味」套餐(HKD56)嘅配料大部分都係用滷汁滷過嘅,仲會配一個自選麵底添。 呢個套餐一共有5種配料,包括滷豬大腸、滷豬腱肉、滷豬耳、滷雞腎同高麗菜,全部都滷得好入味,而且各自有唔同咬口;加埋高麗菜同冬粉嗦晒啲滷汁,咁嘅配搭一流呀! 想有唔同嘅配搭,就要揀「自由是個好東西」(HKD10起)喇!你可以自選唔同配料(每款HKD9-12不等),再包一款自選麵。 大豆皮(HKD10)同米血糕(HKD10)都係台式滷味必食之選,一樣非常入味。除咗呢兩款之外,亦有唔少食材都由台灣直送,配合埋台灣本店以多種中藥材秘製嘅滷湯真係原汁原味呀! 食台式滷味,識食梗係要點王子麵(+HKD2)啦!佢嘅麵質同平時食開嘅公仔麵有啲唔同,不過為咗迎合大眾口味就特別將麵底煮得腍身啲。 除咗滷味之外,呢度有香脆地瓜條、台式香蒜腸等台式小食,嗌午市套餐加HKD12就可以加配其中半份喇。 而呢款綜合芋圓(HKD28/凍)暫時只有晚市供應。有齊芋圓、地瓜圓、紅豆、珍珠等配料;芋圓雖然夠軟腍,但略嫌冇乜芋頭味。 套餐亦可以加配各款飲品,呢度有四季春同桂花烏龍兩款自家製冷泡茶(加HKD13),而汽水(加HKD8)都有台味嘅蘋果西打同黑松沙士。   燈籠滷味 地址:銅鑼灣登龍街39號地舖 電話:2581 2223 試業時間:星期一至日:12:30-17:00、18:30-22:00

0

【鼎王麻辣鍋任添鴨血酸菜 鍋底人頭計自選酸辣度】鼎王麻辣鍋

台灣人氣火鍋店鼎王麻辣鍋終於過江嚟到香港喇,喺尖沙咀嘅新店無論裝潢定食物質素都同台灣總店睇齊,大部分食材都由台灣鼎王直送,確保兩地品質一致。以後唔使飛台灣都食到佢哋招牌嘅台式麻辣鍋同酸菜白肉鍋,仲有得無限任加鴨血、豆腐同酸菜添。想知有咩必食就即刻睇埋落去啦。 同台灣一樣,每枱用餐時間90分鐘,因為肉類只有一大份嘅size,4個人左右會食到多啲款式。呢度有3間10人房,用餐時間就會有120分鐘。 呢度嘅台式麻辣鍋同招牌酸菜白肉鍋都有得自選酸辣度,今次就揀咗個中辣同小酸嘅鴛鴦鍋(HKD68/位)。麻辣湯底用牛骨、雞骨、香料包熬煮,微辛有麻香,唔嗜辣嘅朋友亦可以一試,最吸引嘅就係湯中滑嘟嘟嘅麻辣鴨血同豆腐都可以任加,唔使就住就住食。而酸菜白肉湯就內有好多酸菜、少量五花豚肉、粉條同多款蔬菜,酸酸哋咁感覺清新,亦可以免費任加酸菜㗎。 食得豪啲可以點日本A4和牛(HKD388),和牛由日本農場獨家供應,每片都有霜降雪花嘅紋理,油脂分佈幾平均。配上唔同湯底更有唔同風味,配麻辣湯就比較惹味濃郁;配酸菜湯就清新唔膩。 另一款牛肉推介有五花去骨鮮牛(HKD168),呢款紅白相間嘅牛肉係牛腹部位,肉質肥美而且牛味突出,油脂分佈較多,所以入口更滑身。 御選小羔羊(HKD138)肉質鮮嫩,羊味都好濃郁,羶味唔太重,而且食落唔肥膩。 香港店獨家嘅桶蠔(HKD168)隻隻都脹卜卜、超肥美,幾乎有手掌咁大隻,食落新鮮仲爆汁添。每份大約有7隻,夠晒抵食,蠔控一定要試呀! 干貝滑(HKD118)就最有驚喜喇!打成膠狀嘅干貝滑賣相似乎冇乜特別,但一潷就會見到為數唔少嘅干貝粒同干貝絲喺入面!食落每啖都有絲絲干貝肉同好香嘅胡椒味,非常鮮味! 必點以鮮牛肉打成嘅牛肉丸(HKD68/8粒),呢款牛丸牛味十足,而且同潮洲牛丸一樣,咬開入面竟然有肉汁同油脂,配上麻辣鍋就夠晒惹味。而蛋餃(HKD68)就以豬肉做內餡,蛋皮夠薄,食落有帶蛋香,但略嫌餡料較少。 想試多幾款台式滷味就可以點呢款精選滷拼盤(HKD138),一份有齊滷牛肚、大腸頭同豬肚,樣樣都滷足3-4個鐘㗎。食之前放落麻辣湯淥一淥就會多陣麻辣香,層次更豐富。 打邊爐又點少得炸物呢?呢度招牌嘅老油條(HKD48)望落好似平時啲油炸鬼咁,但食落就好唔同;炸得香脆嘅老油條外層比較硬身,入面就夠綿密,可以嗦到唔少湯汁。而捲得較鬆散嘅豆皮(HKD48)下鍋1-2秒就食得,質地似較脆口又厚身嘅枝竹,口感獨特。 枸杞菊花露(HKD98)入面有原粒杞子同菊花,清熱下火,打邊爐飲就啱晒喇。   鼎王麻辣鍋 地址:尖沙咀金巴利道26號地下5號舖 電話:2669 8896 營業時間:星期一至日:11:00-00:00 (試業期間)、星期一至日:11:00-04:00 (開業後)

0

【老媽拌麵進軍荃灣開分店 新推三款香港限定台菜】老媽拌麵

前排喺將軍澳開咗香港第一間海外店嘅老媽拌麵,再下一城喺荃灣開分店喇!仲推出咗三款香港限定嘅新菜式,不過依然保存台灣風味㗎,快啲睇吓係咩嚟啦! 舖頭喺商場4樓嘅轉角位,有少少入但唔算難搵。全店以木系裝潢,同台灣店嘅風格一致。店內都幾寬敞,大約有40幾個座位。 嚟到呢間台式料理店,梗係要食台灣小菜啦!滷鴨舌(HKD46)、滷雞翅(HKD42)同百頁豆腐(HKD30)都滷得幾入味。 呢三款就係香港限定嘅新菜式,以鹽酥雞、魷魚圈同紅燒牛肉幾樣標誌性嘅台式食物入饌,自然充滿台灣風味啦! 講起台菜,梗係諗起牛肉麵!呢款新推出嘅川味紅燒半筋半肉牛肉麵(HKD78),牛肉同牛筋嘅比例係1:1!牛肉夠腍,牛筋就爽口彈牙,焦糖色嘅湯底感覺好濃。一般紅燒牛肉麵入口通常都會有啲辣,但呢款就唔係好食到辣味,而係花椒、八角等香料味比較突出嘅濃郁牛肉湯。 麵底係比較粗身嘅刀削麵,麵質唔會太腍,幾有咬口。而且每條麵都嗦晒牛肉湯,夠入味喎。 除咗牛肉麵之外,呢兩款新推出嘅飯食都值得一試!左邊嗰碗豆乳香香雞飯(HKD62)用台灣嘅腐乳配炸到酥脆嘅鹽酥雞,味道非常特別,但唔覺意蘸多咗腐乳醬就好鹹。而右邊嘅魷魚圈滷肉飯(HKD68)以時令嘅魷魚入饌;魷魚圈滷到入晒味,但食落依然軟腍鮮味,同地道嘅台式滷肉飯好夾呀。 呢杯老媽黑糖珍珠朱古力(HKD33)都係新品嚟㗎!朱古力做到少少掛杯效果,除咗黑糖味之外,朱古力味都好濃郁,唔鍾意飲奶茶都有多一個選擇啦。 如果都係想飲傳統啲嘅台式飲品,呢度都有老媽黑糖珍珠鮮奶茶(HKD33),有三層唔同顏色,賣相都唔差喎,飲落黑糖味都幾重同偏甜,但茶味就略嫌唔夠濃;想fresh啲就可以揀樽裝嘅阿里山高山冷泡茶(HKD22)。   老媽拌麵 地址:荃灣大壩街4-30號荃灣廣場4樓441A號舖 電話:2385 3330 營業時間:星期一至日:11:30-21-30