Tagged: 台灣

0

【尖沙咀新派台菜登場 白湯牛肉麵胡椒雞味濃】忠孝東路

相信去開台灣嘅朋友仔對於「忠孝東路」一定唔陌生,依家香港都有「忠孝東路」喇!呢間喺尖沙咀嘅忠孝東路,單睇個名就知係一間食台灣菜嘅餐廳啦!當然唔少得牛肉麵、滷肉飯、三杯雞呢啲充滿台灣風味嘅地道菜式,仲喺呢啲傳統台菜中加入一啲新元素添,想知有咩特色即刻睇落去啦! 有開放式水吧兼賣台式飲品,除咗堂食,客人仲可以喺門口買飲品。成間餐廳空間感幾大,座位都唔少,感覺舒適悠閒。 呢度嘅忠孝牛肉麵(HKD73)有黑湯同白湯兩種湯底,黑湯係傳統牛肉濃湯,小編今次就試咗白湯。所謂白湯即係胡椒雞湯,雖然都係台灣常見嘅麵湯之一,但喺香港食牛肉麵就比較少配搭呢種湯。湯底呈奶白色,胡椒味比較重,入面啲牛肉夠厚身又腍,真係幾有台灣風味喎! 麵條同一般食開嘅牛肉麵唔同,原來係有自家工場製作嘅,完全確保返個品質;麵嘅口感有啲似刀削麵但更薄身。 呢道慢煮香草小牛排骨(HKD298)切片上碟,面頭灑上黑白芝麻,表面燒得幾脆口,賣相特別吸睛!食落估唔到仲好有驚喜,牛排骨煮得夠腍,肥瘦均勻,肉質仲幾鮮嫩。牛排骨本身牛味已經好重,應該只係用咗少少香草配料醃味,比較重口味嘅朋友可以配搭碟邊嘅玫瑰鹽(右)、辣椒粉(中)同孜然粉(左)三種調味粉,會有另一番風味喇! 前菜冷盤可以試吓花雕醉牡丹蝦(HKD168),淨係擺盤已經好吸引,而且每隻牡丹蝦肉質好飽滿,Size比手指仲要粗,望見都流晒口水呀!浸咗花雕酒嘅大蝦夠入味,有好濃酒香。 今次試咗三杯酒系列嘅香葉三杯鴨舌(HKD128),呢度嘅三杯酒系列唔係好辣,啱晒鍾意食得惹味又唔受得辣嘅人食! 忠孝魯肉飯(HKD65)分量夠多,有埋酸菜、流心蛋呢啲配料。雖然叫魯肉飯,但因為入面啲肉比較瘦,小編就覺得似係台式肉燥飯嗰種多啲。 呢兩杯係熱賣嘅招牌台式飲品,右邊嘅黑魔(HKD33)其實係黑糖牛乳奶蓋,有黑糖掛杯賣相唔差,奶蓋夠厚、奶味都好濃,啲黑糖珍珠就比較硬身、有咬口;左邊係忠孝生果茶(HKD38),杯邊有唔同嘅水果切片夠美觀,飲落好重熱帶水果味,感覺幾清新! 食完味道較濃嘅台菜之後,飲返呢杯生果茶可以解膩,真係小編大愛!值得一提係,生果茶入面啲冰都係用咗果汁整成嘅,就算啲冰溶咗都唔會整到成杯飲品淡晒!   忠孝東路 地址:尖沙咀彌敦道63號國際廣場3樓306號舖 電話:2873 3288 營業時間:星期一至日:11:30-22:00

0

【新宿燒肉店蠱惑餐牌 價錢唔同貴1倍劏遊客】食焦

日本嘢就乜都好?其實,都係嘅,不過樹大總有枯枝!成日話去日本食燒肉又平又好味,點會諗到會去咗間「黑店」俾人劏呢?有台灣網友一心諗住去東京食買玩,其中一餐必然揀返間燒肉店啦,於是佢就搵咗一間喺新宿歌舞伎町嘅燒肉店,結果中晒招呀! 呢位台灣事主喺爆料公社群組度還原當晚情況,當晚事主去到燒肉店預備點餐,店員知道佢哋係遊客,好順手咁就遞咗本有中英對照嘅餐牌俾佢點菜。據事主形容開頭相安無事,仲食得好開心,直到佢要加點嘅時候,見到隔離枱嘅餐牌,咦?咁古怪嘅? 古怪在除咗一個係日文一個係中文之外,最蠱惑嘅地方係兩個餐牌嘅價錢係唔一樣囉!同樣係牛肋骨,圖片係一樣嘅,但喺日文餐牌嘅價錢只係500円(約$35港銀),而喺中文餐牌呢?牛肋骨嘅價錢係1000円(約$70港銀),即係貴咗成倍喎!事主再仔細對照埋其他食物,連牛舌都係咁,幾乎全部都要貴1倍喎! 事主話睇見呢個情況真係連食慾都即刻冇晒,「因為我不是日本人所以價格要貴一倍……結帳時結帳單也註明 【外】 我想應該就是這樣吧……」喺群組度反應好熱烈,有熱心網友仲忍唔住為事主私訊燒肉店,嗰間喺歌舞伎町嘅燒肉店叫做「李苑」,得到嘅回覆係認咗有呢件事喎,話因為系統上不同所以價格都會不一樣。咁難明嘅? 乜嘢系統呢?網友死心不息繼續追擊燒肉店,又有更新回覆話中文菜單嘅價格的確係貴過日文餐牌,但店方就話呢個做法絕冇任何歧視外國遊客嘅意圖,仲話會即日起將中文餐單廢除喎!咁本身個日文餐牌價格會唔會即時調高返呢?  

0

【12大陸客食火鍋冇埋單 事件曝光先找數話「誤會」】食焦

食完成餐飯拍拍籮柚走人兼走埋數,事後先至話原來係一場誤會喎!係咪玩嘢先?呢件奇聞發生喺台北一間火鍋名店身上,12個大陸客包廂擦餐勁,飲飽食醉全部人都唔記得埋單喎,成餐火鍋計埋9229台幣,即係港銀2342.6,人仔只係2079.5添,對大魚大肉嘅強國人嚟講,濕碎啦! 嗰晚係咁嘅,12個人點咗牛小排呀雪花牛呀羊肉呀,最初8個人先到場,其餘4個人之後到場,期間出出入入食吓煙呀吹吓水咁,最後個個走晒,更奇嘅係啲店員又真係俾佢哋走喎,單都冇埋到㗎!據呢間火鍋店史大華嘅店員講返,呢班操重口音嘅陸客,食食吓仲話「來台灣3天都在吃肉,真的吃到好怕。」 食咗霸王餐,店主梗係要報警追究,派出所警員即刻睇老閉,先搵到班陸客搭車走人返咗下榻飯店嘅地址,仲聯絡到帶團嘅導遊,不過呢班陸客已經離咗境搭埋飛機返強國喇!喺台灣出晒新聞,網友又話呢班強國客肯定係食霸王餐,炒到件事咁大單,班陸客先知出事! 最後導遊通知咗班陸客,佢哋就越洋轉帳返筆錢俾導遊,等導遊再去火鍋店度找數,班陸客仲錄咗段道歉語音俾店家,堅稱係「一場誤會」咁話喎!收咗錢起碼叫和氣收場啦,店主都即刻喺fb出po話希望事件告一段落喇,不過當店主想撤告,警方就話因為「控告詐欺」不能撤銷,依法都係要完成文書流程先得喎!係咪盞搞呢你話?

0

【台灣出珍珠奶茶拉麵 開店2粒鐘賣清食客讚好】食焦

珍珠乜乜乜真係去到乜都可以加珍珠嘅地步!以為pizza同梳乎厘加珍珠都已經夠出奇啦,依家連拉麵都可以喎,整咗味台日crossover嘅「極品」出嚟!最近喺高雄嘅一間拉麵店,真係諗咗呢條橋出嚟,珍珠拉麵呀!你敢唔敢試? 呢間喺高雄嘅拉麵店「極道ラーメン 」,上個星期推出咗珍珠拉麵,喺碗拉麵上面見到鋪滿一粒粒珍珠奶茶嘅珍珠,喺佢哋個專頁度話「台灣珍奶VS日本拉麵,鮮奶茶的圓潤口感做為湯底,配上珍珠新食感,台日混血珍珠拉麵就此誕生顛覆你的想像!珍奶也可以這樣吃……」 個個睇見張相都覺得難以置信,估佢唔到珍珠都好以加埋落拉麵度,好多人都紛紛留言問究竟係咩味,即係鹹定甜?有勇士去食咗喇,竟然係話整體味道係ok喎,仲解開咗大家都好想知嘅謎底,原來珍珠係無!味!道!㗎!「整體很好吃 多了珍珠(沒味道)的口感還附上鮮奶油讓湯頭有淡淡的奶香!」 呢碗限量供應嘅珍珠拉麵,賣270蚊台幣,計返大約70蚊港銀,拉麵店仲話開賣無耐,就即刻賣清添!反應咁好,好多人梗係貪新奇想去試吓啫,keep唔keep到熱賣真係要再睇多一輪時間喇!話晒咁有創意嘅配搭真係未必人人頂得住,湯底係雞湯+紅茶+牛奶,而話時話,無味嘅珍珠其實加落去又為乜呢?下次會唔會炒埋啲黑糖落去呢?咁就真係又喊又甜,加埋麻辣湯底,乜味都有喇!

0

【台灣爭鮮大胃王挑戰 92磅索模鯨吞105碟壽司】食焦

台灣爭鮮啱啱搞完咗個大胃王挑戰賽,男女大胃王正式誕生啦!男人食量驚人唔出奇,女大胃王竟然係位性感辣模,仲要只係得92磅瘦瘦的,佢誇張到喺限時50分鐘內,鯨吞咗105碟壽司,食完仲要面不改容好似唔夠飽咁喎! 比賽係咁嘅,只要食完一碟碟嘅壽司,疊高啲碟高過自己身高就叫挑戰成功,唔使俾錢喇!參加挑戰之前,各位勇士都要喺門口量度身高,再睇返個相對表,睇吓自己要食幾多碟先可以贏囉!好似140cm高,相等於90碟壽司嘅高度、155cm就係100碟,而女大胃王嘅身高呢就係158cm,照道理食過100碟都已經贏,結果佢喺限定嘅50分鐘內食咗105碟! 仲未止㗎,食完105碟仲未夠喉,索模自己再加點咗12碟,即係總共食咗117碟,超額完成嚇死人啦!咁驚人嘅消息即刻喺網上瘋傳,呢位女大胃王成為風頭人物,佢仲喺自己fb度就話「終於趕上台中最後一天 破本店第一名 紀錄了 105多盤 #怒吃 謝謝美女店長、師傅 辛苦了 #一直切跟不上我吃的速度」!現場消息仲話個個都拍爛手掌為佢歡呼添喎! 呢位影開性感相嘅索模大胃王名叫張語昕,做咗爭鮮大胃王之後變咗風頭躉,接受埋電視訪問,佢話自己當日其實食完都只係得七分飽,又話遲啲想去日本參加大胃王比賽,等人知道台灣都有女大胃王!其實張語昕唔係第一次被封大胃王㗎喇,兩年前佢試過30分鐘內食咗15碗總共3公斤嘅魯肉飯而成名,睇嚟女神個胃口一直都咁驚人,好大食呀!

0

【幸福堂風波元朗加盟店照開 香港代理呻委屈總店企硬】食焦

老虎堂之前被爆黑糖唔係手炒而鬧出風波,今次就輪到幸福堂出事喇!事緣係台灣幸福堂喺fb專頁公告,「香港幸福堂多次未按照總公司合約規範內容及 SOP 手法營業……」,仲發出最後7日通牒,如果香港店仲未配合,就會另覓其他代理!不過官方好快就刪咗呢個po喎! 隔咗兩日過埋中秋,香港店先有反應,仲話係「幸福的小風波」,出po講到好似事情已經圓滿解決咁喎,「我們香港幸福堂亦跟台灣幸福堂有一個圓滿的討論……堅信香港幸福堂是能抬頭挺胸面對……」不過總店似乎唔多收貨,隨即再出聲明,「此次港台代理事件目前為止並無共識,中間嘗試告知都視若無睹……」,各有說法變咗另一塲羅生門喎! 睇返最初總店嘅公告,其中講到喺未有任何共識同改善前,係絕不允許擅自開放加盟嘅,不過你有你講,香港店亦都事先張揚9月底會有新分店,真係喎,元朗加盟店理你乜嘢違規風波,新鮮熱辣正式開張,香港店喺專頁仲hashtag咗#合法生育,話之你咁款!喺呢個星期日、即係最後通牒嗰日,元朗店仲搞gimmick玩買一送一添!依家兩邊搞到勢成水火,香港代理回應傳媒就話,係總店要求更改店面裝潢,包括個招牌要係凸字設計、招牌竹籤筒要擺喺櫃台…… 香港代理就話咁樣做係唔切合香港環境,唔係唔想配合、係環境因素唔得喎!總店就話香港店唔理質素只係掛住賺錢,回應台灣傳媒嗰陣話「就跟他說珍珠一定要炆,炆到多久時間……但他們員工就跟我們說哪有時間炆啊!我們是很講究我們品質還有品牌的,他們是為了要撈錢。」原來唔止要手炒,仲要炆珍珠? 網友梗係食花生多,有人話係咪見到香港店做得掂,想自己攞返嚟做,點解自己唔一早直營呀?最妙係香港幸福堂嘅fb admin竟然答話「你看得真透」!仲未止㗎,admin仲喺網度呻話好委屈,但係有口難言唔講得,當然有人同情有人鬧啦!有網友就問出重點,就係依家搞到咁,啲材料仲係咪台灣運嚟先,官方就好肯定咁話,所有都係台灣原材料喇!不過點都好,香港人都係照排隊照打卡㗎喇!

0

【不滿連環檢舉遭霸凌 程班長小店停業抗議】食焦

遊行抗議靜坐抗議就聽得多,搞到要停業抗議又發生咩事呢?喺荔枝角工廈嘅程班長台灣美食,一直以來都有口碑又夠人氣,7月12日忽然喺fb專頁度公告要自主性停業抗議,「這些自從開業以來就沒完沒了從暗地裡飛來的箭;告訴這些發射暗箭的人(一個、兩個、或幾個……隨便啦),都因你們讓我們越來越堅強!」停業期間只會喺下午時段有外賣便當服務! 搞到要停業抗議,無非係因為開業5年來,程班長呢間小店不斷被惡整,近來情況仲似乎愈嚟愈嚴重添!據程班長所講,懷疑有人針對食店不斷向政府部門投訴,搞到食店成日俾人上門查巡。忍無可忍,唯有作出呢個抗議行動!程班長仲話「所有檢查、檢證、牌照我們通通有、也都通過檢核」!但只要一俾人投訴、又快速地有政府部門人員即刻跟進喎! 停業呢個星期以來,有唔少人都趁午飯嗰時幫襯買返個便當,更多人就選擇留言支持嗌加油,程班長見到有窩心留言鼓勵,都會親自回覆多謝!其實回顧吓程班長呢位台灣人,帶住自家出品移居香港開店,近年的確有唔少荒謬情節發生過,最經典係有疑似打手寫食評話程班長嘅珍珠奶茶奶味差,其實程班長根本都冇賣過珍奶囉! 唔止打手追擊,仲試過有飲食KOL將佢同一樣係賣台菜嘅阿元來了相比,結果就捧阿元踩程班長,有說係因為程班長唔肯俾錢做廣告鱔稿而惹來追擊!心灰意冷仲俾人狂檢舉,不得不選擇停業抗議啦!唔好以為停業就停晒手腳喎,程班長依家忙緊為美食節籌備,佢仲話呢段期間唔會接受任何傳媒訪問,就係唔想令人誤會佢呢次抗議行動係變相為美食節宣傳! 程班長仲寫明「賺錢不是人生唯一的重點」、「開店做生意也要有尊嚴」、「營業額損失事小」、「社會正義需要大家一起維護」,更難得係停業期間員工會照樣有糧出,真係良心老闆呀!停工應會至到8月頭,希望到時重新開業之後一切順利啦!

0

【老虎堂跪低買一送一爆人潮 黑糖珍奶排隊攻港未驚過】食焦

呢個星期嘅熱話應該係台灣老虎堂嘅黑糖風暴喇,一向自稱係手炒黑糖更以黑糖波霸珍珠奶茶響朵嘅老虎堂,俾人爆咗黑糖有添加焦糖色素,仲要係機炒而唔係手炒添!新聞一出,老虎堂算反應好快,即刻出道歉聲明題為「對不起,我們太急了」,長篇解釋係機炒黑糖嘅原因,仲即時推出只限兩日嘅買一送一波霸厚鮮奶優惠!送完奶都未夠,最新消息係呢個星期日會搵嚟網紅辣妹坐鎮做一日店長添喎! 鬧老虎堂黑心無良嘅當然有唔少,但鬧還鬧,更多人相信嘅事實係「台灣人就是愛排隊!」,結果一如所料,呢兩日去老虎當嘅人潮有增無減,甚至乎比平時出現嘅人龍更長,全台7間店門外大大條人龍,排足2粒鐘都冇所謂!喺老虎堂門外等候期間唔少人都打卡po面書,有人仲留言話「今天老虎堂Tigersugar買一送一……我很不爭氣的去排了……我以為下雨加上負面觀感人潮應該會很少……但是我錯……」 落雨都照排隊仲排足兩個鐘都肯,最誇張係有人買N送N。「有人買N送N……我以為我買6送6夠無恥夠不要臉了……沒想到有人比我更誇張……」有人更加當朝聖心態咁留言!「朝聖。雖然爆料被參焦糖色素,就是想試試~~~」台灣係咁,老虎堂上個月先喺香港開咗海外首間分店,咁香港店嘅黑糖又點?小編問過港店經理,佢就話現階段一切都要等台灣店嘅回覆同消息,香港店無可奉告任何嘢! 不過唯一肯定嘅係香港就冇買一送一喇,而人龍都係一樣要排!呢次台灣老虎堂掀起嘅黑糖風暴,睇嚟冇乜打擊到呢啲過江龍手搖店登陸香港嘅決心喎,好似新鮮熱辣又有2間同樣係以黑糖珍奶出名嘅過江龍排隊嚟緊,就係来自新竹嘅幸福堂、同埋喺士林夜市起家嘅珍煮丹喇,兩間都揀喺銅鑼灣區開,珍煮丹直頭開喺另一間過江龍迷客夏隔離添!珍奶戰陸續有嚟,繼續排隊啦!

0

【麻麻哋定正到飛起?台灣人氣café殺到嚟】MAMADAY

MAMADAY係台灣嘅超人氣café,唔少台妹都專程去打卡朝聖㗎!最近仲開到嚟香港,即係又多一間打卡café俾大家,正啦! 香港店嘅環境同裝修都好有特色,文青得嚟又帶點玩味,俾人好舒服好chill嘅感覺,喺度慢慢歎返個brunch、hea吓吹吓水不知幾疏乎。 點解叫MAMADAY?店主話覺得自己嘅食物水準未如理想,但又唔算差,所以就索性取個諧音叫MAMADAY,即係麻麻哋囉,但係餐廳個中文名係「嘛嘛地」喎!其實小編覺得唔使咁謙喎,食物水準一啲都唔麻麻哋呢! 求求其其蒲燒鰻魚飯(HKD112),加28蚊可以升級原條鰻魚!單睇賣相就令人留晒口水啦!呢個鰻魚飯同台灣嘅口感有啲唔同,因為知道香港人鍾意食滑蛋,所以隻蛋入口係堅嫩滑!鰻魚唔算多骨,而且肉質都好肥美,加埋啲木魚食又ok喎!重點係個蛋非常滑溜,加晒分! 肩胛肉眼牛brunch(HKD138)除咗有生果沙律,仲有比較少見出現喺Brunch嘅蕎麥麵同蝦片。睇落好似好簡單嘅配搭,廚師話其實都試咗起碼30次先改良到依家咁㗎!肩胛肉眼牛牛味非常重,而且唔會煮到好老,成嚿香口膠咁,好食喎! 不過如此炸雞翅(HKD68/芝士粉),一共有三個口味選擇,小編叫咗最邪惡嘅芝士粉。雖然係炸嘅,不過一啲都唔油膩,而且芝士粉帶少少甜味,入面肉質多汁又嫩滑,值得一試呀! 焦糖脆脆咖啡沙冰(HKD48),上面嘅脆脆配埋咖啡沙冰可以中和到咖啡嘅苦味,入口非常清涼,消暑一流呀! 提拉米蘇聽過未(HKD46),除咗個名得意,就咁睇做到好似甜品咁呢!入口好順滑,小編推介! MAMADAY 地址:銅鑼灣霎西街28號必發大廈1樓 電話:2164 0066 營業時間:星期一至日:12:00-22:00

0

【台灣大熱手搖店過江龍 鎮店芋頭鮮奶No.1】迷客夏

最近又有新嘅台灣手搖店登陸香港喇!港迷有口福了,迷客夏喺台灣人氣爆燈,仲喺2017年獲得台灣大學生票選嘅第一名手搖飲品專門店添,犀利犀利! 大甲芋頭鮮奶(HKD32),小編飲完終於都明點解咁受歡迎了!芋頭做得非常綿密,加埋鮮奶真係無敵,芋頭味勁香,甜度剛剛好,讚! 珍珠紅茶拿鐵(HKD28),紅茶味入口好香濃,用上比較少見嘅白珍珠,入面加咗蜂蜜而製成,同平時飲開嘅黑珍珠唔同,更加清甜,珍珠都好Q彈呢! 出雲抹茶鮮奶(HKD30),紅豆加4蚊,算唔算係隱藏餐單呢?原來加咗紅豆之後有如神來一筆,將口感昇華咗,超好飲呀!紅豆口感係粒狀與綿密之間,同抹茶鮮奶勁夾!大家不妨都試吓加埋紅豆啦! 高峰烏龍拿鐵(HKD26),珍珠加4蚊,茶底入口香醇,唔會苦澀,非常順滑!加埋珍珠口感更豐富。 迷客夏 地址:銅鑼灣利園山道17號地舖 電話:2361 8328 營業時間:星期一至日:11:30-22:00