Tagged: 吉列牛

0

【機票錢都慳返 弘大人氣吉列牛登陸旺角】吉列牛忌廉烏冬專門店

喺首爾弘大超受歡迎,成日大排長龍嘅吉列牛忌廉烏冬專門店Kobekyu,早排喺香港開設第一間海外分店。大家嚟到除咗可以食到大熱嘅吉列牛,仲有好多好野食㗎,一齊跟埋小編去試下啦! 餐廳地方闊落,有成60個位,可以約埋啲朋友仔坐低慢慢燒一大餐。 嚟到點可以唔試韓國大排長龍嘅吉列牛定食(HKD148),份量十足㗎,有成24件咁多!每件嚟到外層脆卜卜,而內裡粉紅,要自己再煎多2-3秒。咁就食到酥脆表層同帶有少許濃香肉汁嘅嫩滑牛肉啦!最後仲可以點佢地嘅Wasabi秘製醬汁或者特調沙律醬嚟食,提起牛肉香味添。另外仲有個套餐有埋名物咖喱忌廉烏冬,店主建議大家先唔好攪拌,分開食出食材嘅層次感會更加好味㗎。 喺呢個拉絲年代,又點可以唔試Kobekyu秘製蛋卷(HKD68) 嘩,小編目測自己拉絲拉到有成8cm咁長,差唔多有手掌一半!Mozzarella芝士加埋蛋嘅嫩滑,入口即融,幾乎被芝士蛋汁融化! 夏天熱辣辣最想食凍冰冰嘅野,呢個雪冰冷麵(HKD62)用咗湯底製成冰再擺入湯度,就算啲冰點樣融法都唔會令味道變淡。再加埋大量椰菜、紅蘿蔔、洋蔥同生菜,更加有清爽嘅感覺!食落唔肥膩,啱晒夏天。 Kobekyu牛油蜜糖單骨雞翼(HKD65)雞翼整得好香口,除咗有蜜糖同牛油嘅香氣之外,仲散發陣陣蒜香。加上佢係單骨雞翼食起上嚟好方便,鍾意仲可以加埋檸檬汁,令雞肉更嫩滑,味道更清香添! 吉列牛忌廉烏冬專門店 電話:3705 9965 地址:旺角彌敦道726號17樓 營業時間:星期一至日:12:00-15:00;17:30-23:00

0

【千奇爆脆!吉列牛御膳】琥酌

吉列豬扒大家就食得多,近年大熱嘅「吉列牛扒」唔知你又食過未呢?喺太子琥酌牛吉列居酒屋由日本引進咗非常受歡迎嘅日式吉列牛扒,大家唔駛搭飛機都可以一嚐日式風味!舖頭仲用咗原木色做主題色,再配埋少少工業風,等你可以好舒服咁享受食吉列牛嘅樂趣。 吉列牛御膳,一共有兩種牛肉可供選擇:包括有尊貴體驗,肥瘦均勻帶點鮮紅嘅日本A5黑毛和牛(HKD398) 以及醇郁肉香嘅黑安格斯牛肉(HKD178)!兩款吉列牛御膳均以特製炸漿配以師傅精湛手藝,製成半熟吉列牛。酥脆外層感覺似薯片,但係內裡肉質嫩滑,真係外脆內軟!御膳仲包括埋自家製漬物、溫泉玉子、赤味噌湯、日本珍珠米、龍蝦薯仔沙律,仲有椰菜絲沙律。可以配搭嘅特選調味料都有6種,包括有粗粒芥末、柚子胡椒、七味鼓椒、柚子檸醋、香濃燒汁、和風芥末等六款,酸香甜辣鹹都有齊晒,好豐富又多變化。再加埋秋田米飯、溫泉蛋同味噌湯,整個套餐好豐盛!提提大家,牛扒上檯之後,可以喺小火爐度將牛肉小炙一下,牛肉幾熟由自己控制 ,牛油嘅香氣再加上吉列牛外脆內軟口感一定令你一試難忘! 小食方面,大家可以試下味噌松葉蟹蓋(HKD48),食落暖笠笠,蟹肉蟹膏加上魚子,非常鮮味! 原隻日式磯燒鮑魚(HKD38)以日本方法炮製,用慢火炆煮令肉質更加柔嫩細滑,食落鮮嫩多汁而唔韌! 琥酌 電話:26500505 地址:太子西洋菜北街159A地下 營業時間:星期一至日:12:00-15:00;18:00-23:00